“អាជ្ញាធរមូលដ្ឋាននឹងមិនបម្រើសេវាសាធារណៈជូនពលរដ្ឋណាមិនគូសសន្លឹកឆ្នោតតាមបង្គាប់”
2018.07.17
ជនពិការបោះឆ្នោតនៅការិយាល័យនៅឃុំមនោរម្យ ខែត្រមណ្ឌលគិរី កាលពីថ្ងៃទី២៨ ខែកក្កដា ឆ្នាំ២០១៣។
Photo: RFA
ជនជាតិដើមភាគតិចព្នង រស់នៅឃុំប៊ូស្រា ស្រុកពេជ្រាដា ខេត្តមណ្ឌលគិរី ឲ្យដឹងថា អាជ្ញាធរមូលដ្ឋាន ក្រុមយុវជនសហភាពសហព័ន្ធកម្ពុជា និងយុវជនគណបក្សកាន់អំណាច បានដើរតាមផ្ទះពលរដ្ឋបង្ខំឲ្យអ្នកភូមិគូសសន្លឹកឆ្នោត គំរូតាមបង្គាប់របស់ពួកគេ តែបើពលរដ្ឋណាបដិសេធ អាជ្ញាធរមូលដ្ឋាននឹងមិនបម្រើសេវាសាធារណៈជូននោះទេ។
ជនជាតិដើមភាគតិចព្នងរស់នៅភូមិពុលុ ឃុំប៊ូស្រា ឲ្យដឹងថា អាជ្ញាធរមូលដ្ឋានថ្មីៗនេះ បានដើរតាមផ្ទះពលរដ្ឋគ្រប់ក្រុមគ្រួសារ បង្ខំឲ្យអ្នកភូមិគូសសន្លឹកឆ្នោតគំរូលេខរៀងទី២០ របស់គណបក្សប្រជាជនកម្ពុជា។ ពួកគេចាត់ទុកបញ្ហានេះជារូបភាពគំរាមកំហែងថ្មីមួយ ដែលមិនធ្លាប់ជួបប្រទះទាល់តែសោះ។
ជនជាតិដើមភាគតិចព្នងម្នាក់ ក្នុងចំណោមជាច្រើននាក់ទៀត ថ្លែងក្នុងលក្ខខណ្ឌមិនបញ្ចេញឈ្មោះ ឲ្យដឹងនៅថ្ងៃទី១៧ កក្កដា ថា អាជ្ញាធរភូមិឃុំ និងក្រុមយុវជនសហភាពសហព័ន្ធកម្ពុជា បានគំរាមអ្នកភូមិណា ដែលមិនគូសសន្លឹកឆ្នោត លេខរៀងទី ២០ ឲ្យគណបក្សប្រជាជនកម្ពុជា។ លោកបញ្ជាក់ថា អាជ្ញាធរទាំងនោះបានលើកឡើងចំពោះមុខពលរដ្ឋថា អាជ្ញាធរមូលដ្ឋាននឹងមិនចុះហត្ថលេខាទិញលក់ដី ធ្វើសំបុត្រកំណើត និងសៀវភៅគ្រួសារជាដើម ប្រសិនពលរដ្ឋមិនធ្វើតាមបង្គាប់ពួកគេ។ លោកថា អ្នកភូមិខ្លះភ័យខ្លាចការគំរាមកំហែងនេះ ដោយសុខចិត្តគូសសន្លឹកឆ្នោតភ្លាមៗ ដើម្បីបញ្ចប់ការសួរដេញដោលវែងឆ្ងាយរបស់អាជ្ញាធរ ក៏ប៉ុន្តែក៏មានអ្នកភូមិខ្លះបដិសេធ។ លោកសង្ស័យថា អាជ្ញាធរអាចនឹងយកសន្លឹកឆ្នោតដែលពលរដ្ឋគូសនេះដាក់ចូលក្នុងធុងឆ្នោត ខណៈដែលគ.ជ.ប រងការរិះគន់ថាមិនឯករាជ និងគ្មានអង្គការសង្គមស៊ីវិលចូលរួមសង្កេតការណ៍៖ «ខុសប្លែកគេបង្ខំឲ្យយើង គូសសន្លឹកឆ្នោតលេខរៀងទី២០ គណបក្សប្រជាជនដែរ។ មេឃុំទៅជាមួយដែរ»។
អាស៊ីសេរីបានព្យាយាមទាក់ទង មេឃុំប៊ូស្រា លោក យឺត សារៀន តែទូរស័ព្ទមិនអាចទាក់ទងបាននៅថ្ងៃទី១៧ កក្កដា។
អ្នកនាំពាក្យគ.ជ.ប លោក ហង្ស ពុទ្ធា មានប្រសាសន៍ថា គ.ជ.ប នៅមិនទាន់ប្រាកដថា ព័ត៌មាននេះជារឿងពិតឬយ៉ាងណាទេ។ យ៉ាងណាលោកថា ពលរដ្ឋមិនសុខចិត្តរឿងនេះ មានសិទ្ធិប្តឹងទៅគណៈកម្មការឃុំ/សង្កាត់រៀបចំការបោះឆ្នោតដើម្បីសម្របសម្រួល តែបើមិនអាចដោះស្រាយបានទេ ពលរដ្ឋអាចប្ដឹងបន្តទៅគណៈកម្មការរៀបចំការបោះឆ្នោតខេត្ត និងគណៈកម្មាធិការជាតិរៀបចំការបោះឆ្នោត។ លោកបញ្ជាក់ថា ប្រសិនគ្មានបណ្ដឹងពីពលរដ្ឋទេ គ.ជ.ប នឹងមិនចាត់វិធានការរឿងនេះទេ ព្រោះច្បាប់បានចែងថា គ.ជ.ប មិនអាចបំពេញតួនាទី ជាតំណាងព្រះរាជអាជ្ញាធរ ឬជាអ្នកចោទប្រកាន់គ្រប់បណ្ដឹងនោះទេ៖ «គ.ជ.ប ច្បាប់មិនចែងមិនឲ្យបំពេញតួនាទីជារាជអាជ្ញានោះទេ។ ការងារបោះឆ្នោតការងារគ្មានសាលា និងជាជំនាញមួយត្រូវបំពេញទទួលខុសត្រូវចំពោះមុខប្រវត្តិសាស្ត្រ។ អ៊ីចឹងគ.ជ.ប អត់អាចធ្វើជាអ្នកចោទប្រកាន់ទេ»។
នៅខណៈអះអាងថា គ.ជ.ប មិនមានសមត្ថកិច្ចពិនិត្យដោះស្រាយរឿងនេះ លោក ហង្ស ពុទ្ធា ក៏ងាកទៅអំពាវនាវឲ្យអ្នកសារព័ត៌មាន កុំធ្វើឲ្យប៉ះពាល់អារម្មណ៍ពលរដ្ឋដោយផ្អែកលើនិន្នាការផ្សេងៗ និងសូមឲ្យតម្កល់រឿងរាវទាំងឡាយឋិតក្នុងជា អព្យាក្រឹត្យ និងផ្ដល់ឱកាសឲ្យភាគីពាក់ព័ន្ធ ធ្វើការដោះស្រាយដោយខ្លួនឯង។
មន្ត្រីអង្កេតជាន់ខ្ពស់អង្គការខុមហ្វែ្រល លោក កន សាវាង្ស ពន្យល់ថា គ្រប់គណបក្សនយោបាយមានសិទ្ធិឃោសនាបោះឆ្នោត តែមិនអាចមានសិទ្ធិបង្ខំឲ្យពលរដ្ឋគូសសន្លឹកឆ្នោតទៅលើគណបក្សនយោបាយណាមួយបានទេ។ លោកចាត់ទុកការគំរាមកំហែង ប្រើរូបភាពមិនបម្រើសេវាសាធារណៈ ប្រសិនពលរដ្ឋមិនគូសសន្លឹកឆ្នោតតាមបង្គាប់របស់ពួកគេ ជាទង្វើខុសច្បាប់។ លោកថា គណបក្សនយោបាយផ្សេងមានសិទ្ធិប្ដឹង សុំការអន្តរាគមន៍ពីគ.ជ.បបាន។ លោកអះអាងថា គ.ជ.ប មានតួនាទីធ្វើកិច្ចការងារទាំងនេះ ដោយមិនចាំបាច់ទាល់តែមានបណ្ដឹងពីពលរដ្ឋនោះទេ៖ «ករណីដែលកើតឡើង មិនអាចទាក់ទងតែមានបណ្ដឹង ទើបគ.ជ.ប មានវិធានការទេ។ ខ្ញុំថា ជាយោបល់ខ្ញុំ គ.ជ.ប លើកឡើងអ៊ីចឹង អត់អាចអនុវត្តទៅតាម សមត្ថកិច្ចរបស់គ.ជ.បទេ។ ករណីនេះបញ្ជាក់ច្បាស់ កើតឡើងចំពោះពលរដ្ឋ អ៊ីចឹងគ.ជ.ប គួរតែមានវិធានការ»។
លោក កន សាវាង្ស បន្ថែមថា គ.ជ.ប គួរតែបើកការស៊ើបអង្កេតរឿងនេះ ព្រោះការគំរាមកំហែង បំភិតបំភ័យពលរដ្ឋជារឿងសំខាន់ទាមទារអន្តរាគមន៍ពីស្ថាប័នគ.ជ.ប។ លោកគិតថា ពលរដ្ឋគ្មានសមត្ថភាពក្នុងការធ្វើពាក្យបណ្ដឹង រឿងនេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា