អ្នកវិភាគ៖ អ្នកនយោបាយខ្មែរនៅតែប្រើនយោបាយប្រជាភិថុតិ
2013.02.20
លោកបណ្ឌិត ឡៅ ម៉ុងហៃ អ្នកវិភាគឯករាជ្យ។
អ្នកតាមដានបញ្ហាសង្គមយល់ថា ការប្រើនយោបាយប្រជាភិថុតិ ឬនយោបាយបោកប្រាស់ដោយបំភ្លៃការពិត ទាក់ទាញអ្នកគាំទ្រនេះ ជារឿងមួយគ្រោះថ្នាក់បំផុតសម្រាប់ប្រជាពលរដ្ឋ។
នយោបាយប្រជាភិថុតិ នៅតែពេញនិយមសម្រាប់អ្នកនយោបាយខ្មែរ ដើម្បីយកមកទាក់ទាញការគាំទ្រពីប្រជាពលរដ្ឋ។ អ្នកវិភាគយល់ថា ប្រជាពលរដ្ឋងាយនឹងចាញ់បោកអ្នកនយោបាយ ដោយសារតែពួកគាត់ខ្វះនូវចំណេះដឹង ខ្វះព័ត៌មានសម្រាប់ធ្វើការវិភាគ និងពិចារណា ដែលងាយស្រួលដល់ការសម្រេចចិត្ត។
អ្នកជំនាញវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត សុខ ទូច មានប្រសាសន៍ថា នយោបាយប្រជាភិថុតិ ឬនយោបាយបោកប្រាស់នេះ ត្រូវបានគេប្រើនៅទូទាំងពិភពលោក តែកម្រិតនៃការប្រើប្រាស់ខុសៗគ្នាទៅតាមកម្រិតចំណេះដឹងរបស់ ប្រជាពលរដ្ឋ។ លោកបន្តថា ផ្អែកតាមប្រវត្តិសាស្ត្រខ្មែរ ព្រោះតែនយោបាយបោកប្រាស់នេះ ធ្វើឲ្យពលរដ្ឋបះបោរប្រឆាំងរបបរាជានិយម គាំទ្ររដ្ឋប្រហារ លន់ នល់ បន្ទាប់មកនយោបាយនេះក៏ត្រូវកងទ័ព ប៉ុល ពត យកទៅប្រើដើម្បីប្ដូររបបបន្តទៀត។
លោក សុខ ទូច បញ្ជាក់ថា បច្ចុប្បន្នអ្នកនយោបាយលើកយកបញ្ហាជាច្រើនមកបោកប្រាស់ប្រជាពលរដ្ឋ ដូចជាលេសអភិវឌ្ឍន៍ បញ្ហាព្រំដែន ការលើកតម្កើងបុគ្គលនិយមឲ្យក្លាយជាបុគ្គលអច្ឆរិយជាដើម៖ «ហើយ អត់យល់ថា មនុស្សម្នាក់ហ្នឹងរស់យ៉ាងច្រើនណាស់ ១០០ឆ្នាំចុះ បើប្រទេសមួយកើតមករាប់ពាន់ឆ្នាំ អត់មនុស្សម្នាក់ហ្នឹងធ្វើមិនកើតម៉េច? ហ្នឹងហើយអត់មានការពិចារណាទេ ការប្រើប្រាស់ប្រជាភិថុតិហ្នឹង ធ្វើឲ្យមនុស្សបាក់ទឹកចិត្ត បាក់គំនិតគាំទ្រដោយគ្មានការពិចារណា តែសម្រាប់ប្រទេសដែលគេរីកចម្រើនដូចនៅអឺរ៉ុប នៅអាមេរិក អីហ្នឹង ពិបាកធ្វើប្រជាភិថុតិណាស់»។
លោក សុខ ទូច បន្តថា នយោបាយប្រជាភិថុតិនេះមើលឃើញល្អពីសំបកខាងក្រៅ តែធាតុពិតប្រជាពលរដ្ឋជាអ្នករងគ្រោះ ហើយប្រទេសជាតិក៏នឹងខាតផលប្រយោជន៍ដែរ។
ចំណែកឯអ្នកឃ្លាំមើលបញ្ហាសង្គម ឲ្យដឹងថា នយោបាយប្រជាភិថុតិ ឬនយោបាយបោកប្រាស់នេះ ក៏ត្រូវបានក្រុមអ្នកជំនួញប្រើប្រាស់ដើម្បីបោកឲ្យមនុស្សទិញទំនិញ របស់គេដែរ។ ឧទាហរណ៍កាលពីឆ្នាំ២០០៣ មានការផ្សាយចចាមអារ៉ាមថា តម្រូវឲ្យញ៉ាំសណ្ដែកខៀវ បើមិនដូចនេះនឹងត្រូវមានគ្រោះថ្នាក់។ គ្រាន់តែរយៈពេល ១ថ្ងៃ សណ្ដែកខៀវលក់ដាច់រកទិញមិនបាន ហើយកន្លែងខ្លះឡើងថ្លៃកប់ពពក។ រឿងរ៉ាវស្រដៀងគ្នានេះដែរ បន្ទាប់ពីគ្រោះថ្នាក់ជាន់គ្នា សម្លាប់មនុស្សនៅកោះពេជ្រអស់ជាង ៣០០នាក់រួចមក ក៏កើតមានការផ្សព្វផ្សាយឲ្យមនុស្សទិញចេកគោរពបូជាដែរ។ កាលនោះ ចេកឡើងថ្លៃរហូតដល់ មួយស្និតជាង ២ម៉ឺនរៀល។ ការទិញស្រាផឹកបានរង្វាន់រាប់លាន ក្លាយជាសេដ្ឋី ឬការផឹកស្រាមានសុខភាពល្អជាដើម។
ទាក់ទងនឹងបញ្ហានេះ អ្នកវិភាគឯករាជ្យម្នាក់ទៀត លោកបណ្ឌិត ឡៅ ម៉ុងហៃ មានប្រសាសន៍ថា នយោបាយប្រជាភិថុតិនេះ ត្រូវបានគណបក្សកាន់អំណាចយកមកប្រើជាថ្នូរដើម្បីយកសន្លឹកឆ្នោត។ ឧទាហរណ៍ ការចែកអំណោយជាលុយកាក់ សារុងក្រមា និងការចុះទៅមូលដ្ឋានបង្កើតក្រុមការងារចុះជួយកន្លែងនេះ កន្លែងនោះជាដើម។ លោកបន្តថា គោលនយោបាយខ្លះរបស់រដ្ឋាភិបាល ដូចជានយោបាយមិនយកពន្ធដីធ្លី និងនយោបាយដាក់ឈ្មោះសមិទ្ធផលជាអំណោយថ្នាក់ដឹកនាំជាដើម។
លោក ឡៅ ម៉ុងហៃ បញ្ជាក់ថា ដោយសារនយោបាយប្រជាភិថុតិនេះ ធ្វើឲ្យប្រជាពលរដ្ឋបាត់បង់នូវភាពម្ចាស់ការ ការគិតពិចារណា និងចុងក្រោយបាត់បង់ផលប្រយោជន៍ជាតិ៖ «ប៉ះពាល់ដល់ផលប្រយោជន៍ ជាតិ រឿងពន្ធដារអីហ្នឹង ប្រជាភិថុតិសម្រាប់ក្រុមហ៊ុនដែរ ឲ្យតែក្រុមហ៊ុនៗមកវិនិយោគទុនអីចឹង ចេះតែបានៗអីចឹង ក៏ប្រជាភិថុតិដែរ ក៏ប៉ះពាល់ដល់ផលប្រយោជន៍ជាតិដែរ»។
រីឯព្រឹត្តិការណ៍នយោបាយដែលអ្នកវិភាគចាត់ទុកថាជានយោបាយ ប្រជាភិថុតិ ទាក់ទាញការគាំទ្រវិញ ដូចជានយោបាយចាស់សកម្មភាពថ្មីដែលលោកនាយករដ្ឋមន្ត្រី ហ៊ុន សែន ដាក់ចេញដើម្បីវាស់វែងដីធ្លីជូនប្រជាពលរដ្ឋ បន្ទាប់ពីរាជរដ្ឋាភិបាលចុះហត្ថលេខាផ្តល់ដីសម្បទានឲ្យក្រុមហ៊ុន ឯកជនរាប់លានហិកតាររួចមក។
គេដឹងហើយថា ការផ្តល់ដីសម្បទាននាំឲ្យមានបញ្ហា ដូចនេះគោលនយោបាយចែកប្លង់ដើម្បីដោះស្រាយបញ្ហា បែរជាផ្សាយថាគោលនយោបាយចាស់សកម្មភាពថ្មី នឹងលើកតម្កើងសកម្មភាពដោះស្រាយបញ្ហានេះ ដោយប្រើប្រាស់គ្រប់រូបភាពផ្សព្វផ្សាយ ទាញចំណេញពីទឹកចិត្តប្រជាពលរដ្ឋទៅវិញ។ ព្រឹត្តិការណ៍នៅកោះពេជ្រ នាំឲ្យមនុស្សស្លាប់រាប់រយនាក់ រាជរដ្ឋាភិបាលមិនបានដាក់ទណ្ឌកម្មចំពោះមន្ត្រីរបស់ខ្លួនណាម្នាក់ ទេ លោកនាយករដ្ឋមន្ត្រីបែរជាស្រក់ទឹកភ្នែកតាមទូរទស្សន៍ ហើយផ្ញើសារបង្ហាញពីទឹកចិត្តអាណិតអាសូរអ្នកស្លាប់ អ្នករបួស ដើម្បីទាក់ទាញការគាំទ្របន្ថែមទៀត។
ចំពោះគណបក្សប្រឆាំងវិញ លោក សម រង្ស៉ី នាំប្រជាពលរដ្ឋទៅដកបង្គោលព្រំដែនធ្វើឲ្យកក្រើកឆាកនយោបាយ។ ព្រឹត្តិការណ៍នោះនាំឲ្យប្រជាពលរដ្ឋ ២នាក់ដែលទៅជាមួយ ជាប់គុក តែក្នុងនាមជាអ្នកនយោបាយ លោក សម រង្ស៉ី រត់រួចខ្លួនមកដល់សព្វថ្ងៃ។ តាមរយៈការដកបង្គោលនោះ ក៏នាំឲ្យប្រជាពលរដ្ឋមើលឃើញពីទឹកចិត្តរបស់លោក សម រង្ស៉ី ដើម្បីទាក់ទាញការគាំទ្រដែរ ប៉ុន្តែលោក សម រង្ស៉ី បែរជាបាត់ឱកាសជួយប្រជាពលរដ្ឋ និងនៅជាមួយប្រជាពលរដ្ឋទៅវិញ។ លោក សម រង្ស៉ី សន្យាជាមួយអ្នកគាំទ្រម្តងជាពីរដងថាវិលមកកម្ពុជា វិញ តែនៅតែមិនទាន់ឃើញស្រមោលនៅឡើយ។
អ្នកជំនាញវិទ្យាសាស្ត្រនយោបាយ លោកបណ្ឌិត សុខ ទូច បញ្ជាក់ថា នយោបាយប្រជាភិថុតិនេះ សំដៅលើសកម្មភាពដែលអ្នកនយោបាយប្រើប្រាស់គំរាមកំហែង សម្លុត បំភិតបំភ័យ បន្លាច មហាជនទូទៅក្នុងគោលដៅបំបិទព័ត៌មានផ្សេងៗ និងទាក់ទាញការចាប់អារម្មណ៍ ការគាំទ្រ ការចុះចូលជាដើម។ លោកបន្តថា មានតែការអប់រំប៉ុណ្ណោះ ដែលធ្វើឲ្យប្រជាពលរដ្ឋអាចរួចផុតពីនយោបាយបោកប្រាស់ទាំងនេះ៖ «ប្រើប្រាស់ ប្រជាភិថុតិគ្រប់សម័យកាលហ្នឹង គឺថាហើយការជឿដោយគ្មានការពិចារណាហ្នឹង ធ្វើឲ្យសង្គមកម្ពុជា ជួបវិបត្តិនយោបាយ ដោយសារតែខ្វះការពិចារណាហ្នឹងឯង»។
លោក សុខ ទូច បន្តថា ប្រជាពលរដ្ឋត្រូវតែចេះស្តាប់ព័ត៌មាន ប្រមូលព័ត៌មាន រួចហើយធ្វើការវិភាគពិចារណាក្នុងគោលដៅសម្រេចចិត្តឲ្យបាន ត្រឹមត្រូវ ជៀសវាងការបោកប្រាស់ពីមជ្ឈដ្ឋានណាមួយនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
នយោបាយ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- ពលរដ្ឋខ្មែរនៅក្រៅប្រទេសចង់ឃើញលោក ហ៊ុន ម៉ាណែត បង្រួបបង្រួមជាតិឡើងវិញក្នុងឱកាសចូលឆ្នាំខ្មែរ
- លោក ហ៊ុន សែន ស្នើជួបមេដឹកនាំរដ្ឋប្រហារយោធាភូមាភ្លាមៗក្រោយឡើងតំណែងជាប្រធានព្រឹទ្ធសភា