តំណាងរាស្ត្របក្សសង្គ្រោះជាតិស្នើឲ្យវៀតណាមលុបស្រះនៅតំបន់ព្រំដែនហាមឃាត់
2015.06.08
តម្រួតព្រំដែនវៀតណាម ប្រមាណ ៣០នាក់ ខ្លះកាន់ដំបងឆក់ ខ្លះដៃកាន់កាំភ្លើង ខ្លះទៀតមានឆ្កែប្រដេញ រួមជាមួយប្រជាពលរដ្ឋវៀតណាម ប្រមាណជាង ៥០នាក់ បានស្រែកគំរាម និងរារាំងបណ្ដេញក្រុមអ្នកតំណាងរាស្ត្រ ព្រះសង្ឃ និស្សិត និងប្រជាពលរដ្ឋខ្មែរជាង ២០០នាក់ ដែលសម្រុកនាំគ្នាទៅទីតាំងជីកស្រះ ដឹកនាំដោយអ្នកតំណាងរាស្ត្រគណបក្សសង្គ្រោះជាតិ មិនឲ្យចូលទៅពិនិត្យស្រះទឹកដែលភាគីវៀតណាម ជីកក្នុងតំបន់សព្រំដែនហាមឃាត់ប្រទេសទាំងពីរ។
មិនមានអំពើហិង្សា ឬគ្រោះថ្នាក់អ្វីកើតមានក្នុងជម្លោះប្រទាញប្រទង់រយៈពេលជាង ៣ម៉ោងរវាងភាគីទាំងពីរនោះទេ ក៏ប៉ុន្តែក្រុមប្រតិភូគណបក្សសង្គ្រោះជាតិ ព្រះសង្ឃ និស្សិត និងប្រជាពលរដ្ឋ បាននាំគ្នាសម្រុកចូលទីកន្លែងជីកស្រះចំនួន៤ ក្នុងចំណោមស្រះទាំង៧ ដែលវៀតណាម បានជីកនៅលើខ្សែបន្ទាត់ព្រំដែនហាមឃាត់នៃប្រទេសទាំងពីរបានដោយសុវត្ថិភាព។
ក្រុមប្រតិភូមាននិស្សិត ព្រះសង្ឃ និងប្រជាពលរដ្ឋខ្មែរជាង ២០០នាក់ ដឹកនាំដោយសមាជិកសភាគណបក្សសង្គ្រោះជាតិ នៅព្រឹកថ្ងៃទី៨ ខែមិថុនា បាននាំគ្នាទៅពិនិត្យស្រះទឹកដែលភាគីវៀតណាម បានជីកកាលពីខែឧសភា ក្នុងតំបន់សព្រំដែនហាមឃាត់នៃប្រទេសទាំងពីរ។
អ្នកតំណាងរាស្ត្រមណ្ឌលកំពង់ចាម លោក ម៉ៅ មុនីវណ្ណ ដែលដឹកនាំប្រតិភូទៅពិនិត្យព្រំដែន ចាត់ទុកភាគីវៀតណាម ថាពិតជាបានរំលោភកិច្ចព្រមព្រៀងតំបន់ព្រំដែនស មិនទាន់វាស់វែង ពីព្រោះលោកសម្គាល់ថា ស្រះទឹកចំនួន៤ ទើបតែជីកបន្សល់ដីនៅថ្មីៗនៅឡើយ។ លោកបានចោទសួរទៅតម្រួតព្រំដែនវៀតណាម ថា ហេតុអ្វីបានជាភាគីវៀតណាម ជីកស្រះក្នុងតំបន់ហាមឃាត់? លោកទាមទារឲ្យភាគីវៀតណាម លុបស្រះនោះវិញក្នុងអំឡុងពេល ៧ថ្ងៃ បើមិនដូច្នេះទេ ក្រុមអ្នកតវ៉ាខ្មែរ នឹងនាំគ្នាមកតវ៉ាជាថ្មីទៀត៖ «វៀតណាម បានរំលោភចូលមកជីកស្រះក្នុងតំបន់មួយដែលនៅប្រទាញប្រទង់គ្នាក្នុងនោះ ៧ស្រះ។ នេះជាការរំលោភដ៏ធ្ងន់ធ្ងរមួយមកលើទឹកដីខ្មែរ»។
ក្រុមតម្រួតព្រំដែនខ្មែរប្រមាណ ១០នាក់ ស្លៀកពាក់ឯកសណ្ឋានគ្មានអាវុធ បានបញ្ជូនទៅកាន់កន្លែងមានជម្លោះចម្ងាយប្រមាណ ២គីឡូម៉ែត្រពីប៉ុស្តិ៍ការពារព្រំដែនខ្មែរ ភូមិឡំ ឃុំប៉ក់ញ៉ៃ ស្រុកអូរយ៉ាដាវ។
តម្រួតព្រំដែនវៀតណាម មួយរូបទំនងជាអ្នកទទួលខុសត្រូវនៅតំបន់នោះអះអាងថា ស្រះដែលវៀតណាម បានជីក គឺមានរយៈពេលយូរឆ្នាំហើយ។ ហេតុនេះ ប្រសិនភាគីខ្មែរមិនយល់ព្រម ត្រូវដោះស្រាយតាមរយៈមន្ត្រីការទូតប្រទេសទាំងពីរ៖ «កន្លែងហ្នឹងពលរដ្ឋវៀតណាម ចូលមកគ្រប់គ្រងយូរហើយ ធ្វើស្រែចម្ការ ប៉ុន្តែមិនទាន់មានបង្គោលព្រំដែន។ ប្រសិនអស់លោកចង់ប្រឆាំងឲ្យប្រឆាំងតាមរយៈរដ្ឋសភា ឬតំណាងចាស់ទុំ»។
សម្រែកទាមទារថាជាដីរបស់ខ្លួនរវាងពលរដ្ឋវៀតណាម និងពលរដ្ឋខ្មែរ លាន់ឡើងទ្រហឹងអ៊ឹងអ័ព្ទមិនមានភាគីណាចុះចាញ់គ្នាឡើយ ហើយការប្រឈមមុខដាក់គ្នាកាន់តែតឹងតែង រហូតមានការជេរប្រមាថឌឺដងបម្រុងនឹងកើតការវាយតប់គ្នាកើតឡើង។
អ្នកតំណាងរាស្ត្រ ព្រះសង្ឃ អ្នកដឹកនាំក្រុមប្រតិភូ បានស្រែកអំពាវនាវសុំកុំឲ្យភាគីខ្មែរប្រើអំពើហិង្សា ហើយនាំគ្នាដកថយ ខណៈតម្រួតព្រំដែនខ្មែរសម្របសម្រួលឲ្យភាគីវៀតណាម ឈរនៅមួយកន្លែង ទុកឲ្យខាងខ្មែរចាកចេញពីកន្លែងមានជម្លោះ៖ «ដូចដែលរដ្ឋាភិបាលបានអះអាងអ៊ីចឹង យើងចង់បានព្រំដែនសន្តិភាព ប៉ុន្តែសន្តិភាពស្ថិតក្នុងការគោរពគ្នាទៅវិញទៅមក។ សុំឲ្យអស់លោកប្អូនៗដែលអញ្ជើញមកដោះស្រាយបញ្ហាដោយអហិង្សា ឈរលើគោលការណ៍គោរពច្បាប់»។
ប្រជាពលរដ្ឋភូមិឡំ ដែលចូលរួមតវ៉ា លោក សល់ នើច មានប្រសាសន៍ថា ដីដែលវៀតណាម ជីកស្រះ គឺជាដីពលរដ្ឋជនជាតិដើមភាគតិចខ្មែរ ៩គ្រួសារ បានធ្វើចម្ការកាលពីឆ្នាំ២០១២ ប៉ុន្តែតម្រួតព្រំដែនវៀតណាម បានបណ្ដេញអ្នកភូមិចេញ ហើយយកដីនៅតំបន់នោះថាជារបស់វៀតណាម៖ «យកអស់ហើយ ហើយមុនយើងនៅនោះចម្ការខ្ញុំហើយ ៨ឆ្នាំហើយគេយកនោះ ភូមិជិតនេះគេដេញ វៀតណាម»។
យ៉ាងនេះក្តី អ្នកតំណាងរាស្ត្រគណបក្សសង្គ្រោះជាតិ ថ្លែងនៅចំពោះមុខអ្នកតវ៉ាថា នឹងធ្វើរបាយការណ៍ពីការរំលោភរបស់ភាគីវៀតណាម ទៅប្រមុខរដ្ឋសភា និងស្នើសុំឲ្យរដ្ឋាភិបាលធ្វើកំណត់ទូតជាមួយវៀតណាម ឲ្យគោរពកិច្ចព្រមព្រៀងបញ្ហាព្រំដែនប្រទេសទាំងពីរមិនទាន់បោះបង្គោល និងទាមទារឲ្យរដ្ឋាភិបាលពិភាក្សាជាមួយភាគីវៀតណាម លុបស្រះនោះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ
- សមត្ថកិច្ចចាប់ខ្លួនអ្នកសារព័ត៌មានឯករាជ្យ ដែលធ្លាប់បានពានពីសហរដ្ឋអាមេរិក គឺលោក ម៉ិច ដារ៉ា
អត្ថបទពេញនិយម
នយោបាយ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន