ជនពិការស្នើសុំ គ.ជ.ប ជួយសម្រួលដល់ពួកគេក្នុងថ្ងៃបោះឆ្នោតឃុំ-សង្កាត់
2017.06.01
ក្រុមជនពិការ ស្នើទៅ គ.ជ.ប ជួយសម្រួលដល់ពួកគេក្នុងថ្ងៃបោះឆ្នោតខាងមុខ ព្រោះពួកគេលើកឡើងថា កាលពីអាណត្តិមុនៗ ជនពិការជួបការលំបាកក្នុងពេលបោះឆ្នោត ឬរកមនុស្សទុកចិត្តដើម្បីជួយគូសលើសន្លឹកឆ្នោតមិនបាន។ ចំណែកអង្គការសង្គមស៊ីវិលដែលធ្វើការងារទាក់ទងការបោះឆ្នោត ថាពួកគេបានជួបប្រជុំជាមួយ គ.ជ.ប ដើម្បីផ្ដល់ភាពងាយស្រួលដល់ជនពិការ។
មិនខុសពីពលរដ្ឋទូទៅទេ ជនពិការដែលបានចុះឈ្មោះរួចហើយ ក៏នឹងទៅបោះឆ្នោតដើម្បីជ្រើសរើសតំណាងរបស់ខ្លួននៅមូលដ្ឋានដែរ។ ដូច្នេះ ពួកគេស្នើសុំទៅ គ.ជ.ប ជួយសម្រួលដើម្បីអាចបោះឆ្នោតបាន។
ជនពិការភ្នែកទាំងសងខាង លោកស្រី ទូច ផូ ប្រាប់ថា លោកស្រីធ្លាប់បោះឆ្នោតកាលពីឆ្នាំ១៩៩៣ និងឆ្នាំ១៩៩៨ ប៉ុន្តែកាលពីឆ្នាំ២០១៣ ដោយសារគ្មានការជួយសម្រួលត្រឹមត្រូវពីអ្នករៀបចំការបោះឆ្នោត លោកស្រីមិនបានបោះឆ្នោតទេ។ លោកស្រីយល់ថា សន្លឹកឆ្នោតរបស់ជនពិការក៏មានសារសំខាន់ដូចពលរដ្ឋផ្សេងទៀតដែរ៖ «អ្នកពិការក៏មានបេះដូង អ្នកពិការក៏ចេះស្នេហាជាតិដែរ។ អ្នកភ្លឺតែម្នាក់ពីរនាក់ មិនអាចទ្រផែនដីបានទេ ដល់តែមានភ្លឺអ្នកពិការទូទាំងប្រទេសចូលរួមគ្នា បានទ្របានផែនដីបាន»។
ស្រដៀងគ្នានេះដែរ លោក រីម ម៉ូរី ជាជនពិការដែរនោះ ស្នើទៅ គ.ជ.ប ជួយសម្រួលដល់លោកអាចបោះឆ្នោតបានមុនគេ និងអនុញ្ញាតឲ្យលោកនាំមនុស្សដែលលោកទុកចិត្ត អាចនាំចូលទៅគូសសន្លឹកឆ្នោតនៅក្នុងបន្ទប់សម្ងាត់។ លោកសង្ឃឹមថា គ.ជ.ប នឹងស្របតាមតម្រូវការរបស់លោក និងជនពិការផ្សេងទៀត៖ «ខ្ញុំសុំសំណូមពរដល់ គ.ជ.ប ធ្វើយ៉ាងណាជួយសម្រួលដល់អ្នកបោះឆ្នោត គាត់ធ្វើយ៉ាងណាឲ្យជនពិការបានបោះឆ្នោតដោយងាយស្រួល»។
ក្នុងច្បាប់ស្ដីពីកិច្ចការពារ និងលើកកម្ពស់សិទ្ធិជនពិការ ចែងថា ជនពិការទាំងអស់ត្រូវបានធានាការចូលរួមក្នុងវិស័យនយោបាយ។
ប្រធានអង្គការជនពិការកម្ពុជា លោក ងិន សៅរ័ត្ន ឲ្យដឹងថា លោកបានលើកបញ្ហារបស់ជនពិការទៅប្រជុំជាមួយ គ.ជ.ប ជាញឹកញាប់ ដែលជាលទ្ធផល គ.ជ.ប យល់ព្រមឲ្យមានជនពិការទៅសង្កេតការណ៍ដើម្បីរង់ចាំពិនិត្យ និងជួយសម្រួលដល់ជនពិការជាង ៧០មណ្ឌល នៃមណ្ឌលបោះឆ្នោតទូទាំងប្រទេស។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៤ នឹងចាប់ផ្តើមពីម៉ោង ៧ព្រឹក ដល់ម៉ោង ៣រសៀល ថ្ងៃទី៤ ខែមិថុនា។
ទាក់ទងការលើកឡើងរបស់ជនពិការ អ្នកនាំពាក្យ គ.ជ.ប លោក ហង្ស ពុទ្ធា ឲ្យដឹងថា គ.ជ.ប បានណែនាំមន្ត្រីរៀបចំការបោះឆ្នោត បង្កលក្ខណៈងាយស្រួលជូនជនពិការ។ លោកថា ការជួយសម្រួលនេះ គឺឲ្យជនពិការទៅបោះឆ្នោតនៅការិយាល័យមានជម្រាលឡើង គ.ជ.ប រៀបចំឲ្យមានបញ្ជីបោះឆ្នោតសម្រាប់ជនពិការ ដោយគាត់អាចគូសលើសន្លឹកឆ្នោតដោយខ្លួនឯង និងផ្តល់អាទិភាពដល់ជនពិការជ្រើសរើសអ្នកគូសសន្លឹកឆ្នោតឲ្យក្នុងករណីជនពិការមិនអាចគូសលើសន្លឹកឆ្នោត៖ «ក្នុងករណីដែលជនពិការមិនអាចគូសសន្លឹកឆ្នោតបាន គាត់មានសិទ្ធិក្នុងការស្នើសុំជំនួយ»។
តាមទិន្នន័យរបស់ គ.ជ.ប បង្ហាញថា បញ្ជីចុះឈ្មោះបោះឆ្នោតថ្មីមានជនពិការជាង ២ម៉ឺននាក់ បានចុះឈ្មោះ ប៉ុន្តែប្រធានអង្គការជនពិការកម្ពុជា លោក ងិន សៅរ័ត្ន យល់ថា ជនពិការដែលចុះឈ្មោះមានច្រើនជាងនេះ ព្រោះបញ្ជីរបស់ គ.ជ.ប មិនបានបែងចែកលក្ខណៈនៃជនពិការ៕