លោក សម រង្ស៊ី ថា លោក ហ៊ុន សែន ជាប់អន្ទាក់ខ្លួនឯងមិនអាចផ្ទេរអំណាចទៅកូនប្រុសបាន
2021.09.11
លោក សម រង្ស៊ី ប្រធានស្តីទីគណបក្សសង្គ្រោះជាតិលើកឡើងថា លោកនាយករដ្ឋមន្ត្រី ហ៊ុន សែន មិនផ្ទេរអំណាចទៅលោក ហ៊ុន ម៉ាណែត ក្នុងស្ថានភាពព្យុះភ្លៀងដូចសព្វថ្ងៃនេះទេ។ ស្រដៀងគ្នានេះ អ្នកវិភាគនយោបាយមើលឃើញថា ទោះមានការផ្ទេរអំណាចពីឪពុកទៅកូនក្ដី ក៏លោក ហ៊ុន ម៉ាណែត មិនអាចគ្រប់គ្រងស្ថានភាពក្រោយខ្លួនទទួលបានអំណាចដែរ។
ប្រធានស្តីទីគណបក្សសង្គ្រោះជាតិ លោក សម រង្ស៊ី បង្ហោះសារលើហ្វេសប៊ុកនៅថ្ងៃទី១១ កញ្ញា ថា មេដឹកនាំរបបក្រុងភ្នំពេញលោក ហ៊ុន សែន កំពុងជាប់អន្ទាក់ហិង្សាដើម្បីរក្សាអំណាច ហើយស្ថានការណ៍បែបនេះលោក ហ៊ុន សែន មិនអាចផ្ទេរអំណាចទៅលោក ហ៊ុន ម៉ាណែត បានទេ។ លោក សម រង្ស៊ី សរសេរទៀតថា ការផ្ទេរអំណាចដែលមិនបង្កគ្រោះថ្នាក់ទៅលោក ហ៊ុន សែន គឺត្រូវការបរិយាកាសនយោបាយត្រជាក់ សំដៅដល់ការគ្មានវិបត្តិនយោបាយ និងមានវត្តមានគណបក្សសង្គ្រោះជាតិក្នុងឆាកនយោបាយ។ លោកប្រៀបធៀបថា គេមិនដែលប្ដូរទូកកណ្ដាលទន្លេ ពេលមានព្យុះនោះទេ។ ទោះយ៉ាងណា លោកថា លោក ហ៊ុន សែន មិនអាចជ្រើសរើសឲ្យមានដំណោះ ឬឲ្យមានគណបក្សប្រឆាំងឡើងវិញឡើយ ព្រោះអាចធ្វើឲ្យរបបរបស់គាត់ ប្រឈមគ្រោះថ្នាក់ ដូច្នេះលោក ហ៊ុន សែន មានតែផ្លុំភ្លើងឲ្យក្ដៅជានិច្ចដើម្បីរក្សាអំណាច។ មេដឹកនាំបក្សប្រឆាំងដ៏មានឥទ្ធិពលរូបនេះព្រមានថា បើលោក ហ៊ុន សែន ផ្ទេរអំណាចទៅកូនក្នុងស្ថានភាពក្ដៅបែបនេះ គាត់និងត្រកូលគាត់នឹងបាត់បង់អំណាចទាំងស្រុង និងជាស្ថាពរ។
ជុំវិញការលើកឡើងរបស់លោក សម រង្ស៊ី បែបនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឆ្លើយតបថា នេះជាគំនិតទុច្ចរិតរបស់លោក សម រង្ស៊ី ដើម្បីបន្ទាបបន្ថោកគូរបក្សបដិបក្ខ។ លោកអះអាងថា គណបក្សប្រជាជនកម្ពុជា មានរបៀបជ្រើសរើសមេដឹកនាំត្រឹមត្រូវ លក្ខន្តិកៈ និងតាមបែបប្រជាធិបតេយ្យផ្ទៃក្នុងបក្ស៖ «គេមិនដែលរើសមនុស្សអន់យកមកទេ រើសមនុស្សកំពូលៗរបស់គណបក្សហើយដែលមានលក្ខណៈបន្តវេនពីគណបក្ស ហើយមិនត្រឹមតែសមត្ថភាពការងារសញ្ញាប័ត្រខ្ពស់ ក៏ប៉ុន្តែត្រូវអំពីគោលជំហរនយោបាយច្បាស់លាស់ដើរតាមឥតងាករេចំពោះកម្មវិធីនយោបាយរបស់គណបក្ស»។
ទោះមានការអះអាងបែបនេះក្ដី ក៏កន្លងមក លោក ហ៊ុន សែន ធ្លាប់និយាយជាសាធារណៈរួចទៅហើយថា លោកកំពុងជួយជ្រោមជ្រែងកូនប្រុសច្បង គឺលោក ហ៊ុន ម៉ាណែត ឱ្យក្លាយជានាយករដ្ឋមន្ត្រី នាថ្ងៃខាងមុខ។ លោកក៏ធ្លាប់ដឹកនាំកូនប្រុសលោកទៅជួប មេដឹកនាំចិន និងអួតប្រាប់មេដឹកនាំវៀតណាមថា លោក ហ៊ុន ម៉ាណែត កំពុងប្រឹងប្រែងសម្រាលទុក្ខលំបាក និងផ្តល់ក្តីសង្ឃឹមដល់ពលរដ្ឋកម្ពុជាក្នុងការប្រយុទ្ធប្រឆាំងនៃការរីករាលដាលជំងឺកូវីដ-១៩ យ៉ាងពេញទំហឹង។
អ្នកវិភាគនយោបាយបណ្ឌិត សេង សារី សង្កេតឃើញថា លោក ហ៊ុន សែន នៅតែចិញ្ចឹមចិត្តផ្ទេរអំណាចទៅកូនប្រុសរបស់លោក និងព្យាយាមយកស្ថាប័នជាតិសំខាន់ៗយកមកប្រើប្រាស់ដើម្បីជាឧបករណ៍ក្នុងការផ្ទេរអំណាច។ អ្នកវិភាគដដែលបន្តថា ស្ថានភាពកម្ពុជាសព្វថ្ងៃធ្វើឲ្យលោក ហ៊ុន សែន ពិបាកក្នុងផ្ទេរអំណាចទៅកូន ព្រោះអាចធ្វើឲ្យមានការបែកបាក់ផ្ទៃក្នុងនិងមានការគាបសង្កត់ពីអន្តរជាតិ៖ «មធ្យោបាយដែលលោក ហ៊ុន សែន អាចផ្ទេរអំណាចទៅកូនហ្នឹងគឺមានមធ្យោបាយមួយដែលអាចធ្វើទៅបានតាមរយៈបិទមិនឲ្យគណបក្សប្រឆាំងមានឱកាសចូលរួមការបោះឆ្នោតហើយអំឡុងពេលអវត្តមានគណបក្សប្រឆាំងក្នុងការបោះឆ្នោតគឺអាចឲ្យកូនឈរឈ្មោះជាបេក្ខភាពនាយករដ្ឋមន្ត្រីតែម្ដង ប៉ុន្តែគំនាបសង្កត់អន្តរជាតិនៅតែមានបន្ត»។
លោក ហ៊ុន សែន កំពុងផ្ដល់តួនាទីការងារជាតិ និងការងារបក្សសំខាន់ៗទៅលោក ហ៊ុន ម៉ាណែតដូចជា៖មេបញ្ជាការកងទ័ពជើងគោក មេបញ្ជាការកងកម្លាំងពិសេសប្រឆាំងភេរវកម្ម មេបញ្ជាការរងកងអង្គរក្ស ជាប្រធានអនុគណៈកម្មការគ្រប់គ្រងសន្តិសុខ និងសណ្ដាប់ធ្នាប់នៅតាមគោលដៅនិងតំបន់ចត្តាឡីស័ក។ លោកក៏មានតួនាទីស្អេកស្កះច្រើនទៀតក្នុងជួរបក្ស គឺជាសមាជិកគណៈ អចិន្ត្រៃយ៍ស្ថិតក្នុងចំណោមមនុស្ស ៣៤នាក់ ដែលជាក្បាលម៉ាស៊ីនដឹកនាំរបស់គណបក្ស ជាប្រធានចលនាយុវជនគណបក្ស និងជាអនុប្រធានគណៈចលនាមហាជនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។