លោក សម រង្ស៊ី កៀរគរ​ថវិកា​ជួយ​ពលរដ្ឋ​ដោយ​ដាក់​លក់នាឡិកា​ក្នុង​តម្លៃ​៥​ដុល្លារ

ដោយ ទីន ហ្សាការីយ៉ា
2021-05-15
Share
លោក សម រង្ស៊ី កៀរគរ​ថវិកា​ជួយ​ពលរដ្ឋ​ដោយ​ដាក់​លក់នាឡិកា​ក្នុង​តម្លៃ​៥​ដុល្លារ លោក សម រង្ស៊ី បង្ហាញ​នាឡិកា​កាស្យូ (Casion) តាមរយៈហ្វេសប៊ុក​របស់​លោក​ នាពេល​កន្លង​ទៅ។
រូបពី​ហ្វេសប៊ុក

លោក សម រង្ស៊ី កំពុង​រៀបចំ​យុទ្ធនាការ​ជាវ​នាឡិកា​ផ្ទាល់ខ្លួន​របស់​លោក​ម៉ាកកាស្យូ (Casio) តម្លៃ​ ៥​ដុល្លារ ដើម្បី​កៀរគរ​ថវិកា​ទិញ​ស្បៀង​ជូន​ពលរដ្ឋ​ក្រីក្រ ​ដែល​កំពុង​រងគ្រោះ​ដោយ​ជំងឺ​កូវីដ១៩។ អ្នកវិភាគ​ថា សកម្មភាព​លោក សម រង្ស៊ី គឺ​ដើម្បី​ជំរុញ​ទៅ​រដ្ឋាភិបាល​បន្ថែម​ការ​គិតគូរ​ទៅ​ពលរដ្ឋ ប៉ុន្តែ​បង្ក​ការ​បញ្ឈឺ​ទៅ​លោក ហ៊ុន សែន។

ខុសពី​លោក ហ៊ុន សែន ពាក់​នាឡិកា​ដៃ​តម្លៃ​រាប់​លាន​ដុល្លារ ប្រភេទ ផាថេក ហ្វីលីប (Patek Philip)​។ រីឯ​មេ​បក្ស​ប្រឆាំង​លោក សម រង្ស៊ី វិញ កំពុង​រៀបចំ​កៀរគរ​ថវិកា​តាមរយៈ​ការ​ជាវ​នាឡិកា​របស់​ខ្លួន​តម្លៃ​ត្រឹមតែ​ ៥​ដុល្លារ​ប៉ុណ្ណោះ។

លោក សម រង្ស៊ី មាន​ប្រសាសន៍​ថា ការ​លះបង់​នាឡិកា​ដៃ​របស់​លោក​គឺជា​និមិត្តរូប ដូច្នេះ​ស្នើ​ទៅ​មហាជន​ទូទៅ​ចូលរួម​គាំទ្រ​ថវិកា​ម្នាក់ ៥​ដុល្លារ ដើម្បី​អាច​ជួយ​ពលរដ្ឋ​ដែល​កំពុង​ជួប​ការ​លំបាក។ លោក​រំពឹង​ថា បើសិន​មាន​មនុស្ស​ចូលរួម ១​ម៉ឺន​នាក់​ក៏​អាច​ប្រមូល​លុយ​បាន ៥​ម៉ឺន​ដុល្លារ​ដែរ៖ «នាឡិកា​ខ្ញុំ​តែ​ប្រាំ​ដុល្លារ​ទេ ដូច្នេះ សូម​បងប្អូន​ណា​យល់​ឃើញ​ថា អ្វី​ដែល​ខ្ញុំ​ធ្វើ​ជា​កាយវិការ​ល្អ​សូម​ធ្វើ​ដូចគ្នា​ទៅ​ដាក់​ប្រាំ​ដុល្លារ​ម្នាក់​ធ្វើ​តាម សម រង្ស៊ី»

កម្មវិធី​រក​ប្រាក់​ជួយ​ពលរដ្ឋ​ក្រីក្រ​ដែល​រង​ផល​ប៉ះពាល់ ដោយសារ​ជំងឺ​កូ​វីដ​១៩ ​នេះ តម្រូវ​ឱ្យ​អ្នក​ចាប់អារម្មណ៍​ជាវ​ប័ណ្ណ​ ដែល​មាន​តម្លៃ​ ៥​ដុល្លារ​ក្នុង​មួយ​សន្លឹក ហើយ​មនុស្ស​ម្នាក់​អាច​ទិញ​ប័ណ្ណ​នេះ​បាន​ច្រើន​សន្លឹក។

ប្រធាន​គណបក្ស​សង្គ្រោះ​ជាតិ​នៅ​ក្រៅ​ប្រទេស (CNRP-O) លោក ម៉ែន វណ្ណា ដែល​ទទួលបន្ទុក​រៀប​ចំ​កម្មវិធី​នេះ​ឱ្យ​អាស៊ីសេរី​ដឹង​ថា អ្នក​ដែល​ចង់​ចូលរួម​បរិច្ចាគ​ថវិកា​អាច​ជាវ​ប័ណ្ណ​នេះ​បាន នៅ​គ្រប់​សាខា​គណបក្ស​សង្គ្រោះ​ជាតិ​នៅ​ក្រៅ​ប្រទេស ដែល​មាន​ជាង ៤០​សាខា ទូទាំង​ពិភពលោក​។ អ្នក​រៀបចំ​កម្មវិធី​ដដែល​បន្ត​ទៀត​ថា ពេល​កំណត់​ក្រុម​ការងារ​នឹង​ផ្ញើ​កន្ទុយ​ប័ណ្ណ​ទាំងអស់​ទៅ​ប្រទេស​បារាំង៖ «ទោះ​ទិញ​នៅឯណា​ក៏ដោយ​ក៏​យើង​បញ្ជូន​ទៅ​បារាំង​ទាំងអស់​ដើម្បី​ឱ្យ​គាត់​បើក​នៅ​បារាំង សន្លឹក​មាន​លេខ​ទូរស័ព្ទ​ទាំងអស់​ដើម្បី​ផ្ញើ​ទៅ​បើក​នៅ​បារាំង»

យុទ្ធនាការ ជាវ​នាឡិកា​លោក សម រង្ស៊ី នៅ​ពេល​នេះ ក្នុង​ពលរដ្ឋ​ខ្មែរ​ជាពិសេស​ពលរដ្ឋ​រស់នៅ​រាជធានី​ភ្នំពេញ​កំពុង ខ្វះ​ស្បៀងអាហារ​ក្នុង​ពេល​រដ្ឋាភិបាល​លោក ហ៊ុន សែន បិទ​ខ្ទប់​តំបន់​មួយ​ចំនួន ដើម្បី​បង្ការ​ជំងឺ​កូ​វីដ​១៩​។ ជា​ញឹកញាប់ លោក សម រង្ស៊ី តែង​រិះគន់​រដ្ឋាភិបាល លោក ហ៊ុន សែន ថា អសមត្ថភាព​ក្នុង​ការ​ដោះស្រាយ​បញ្ហា​នេះ ហើយ​លោក​ធ្លាប់​ណែនាំ​ពលរដ្ឋ​ឱ្យ​សរសេរ​ពាក្យសុំ​ជំនួយ​ពី​អង្គការ​ស្បៀងអាហារ​ពិភពលោក (World Foods Program) ថែម​ទៀត​ផង​។​

ជុំវិញ​រឿ​ងនេះ អាស៊ីសេរី​មិនទាន់​អាច​សុំ​ប្រតិកម្ម​ពី​អ្នកនាំពាក្យ​រដ្ឋាភិបាល លោក ផៃ ស៊ីផាន អ្នក​ពាក្យ​គណបក្ស​ប្រជាជន​កម្ពុជា លោក សុខ ឥសាន បាន​ទេ​នៅ​ថ្ងៃទី​១៤ ខែឧសភា ដោយ​ទូរស័ព្ទ​ចូល​គ្មាន​អ្នក​ទទួល។

អ្នកវិភាគ​នយោបាយ​លោក​បណ្ឌិត សេង សារី យល់​ថា អ្វី​ដែល​លោក សម រង្ស៊ី ធ្វើ​នេះ​ជា​តិចនិក បង្កប់​ដោយ​វិធី​បញ្ឈឺ​ចិត្ត​ជំរុញ​ទៅ​រដ្ឋាភិបាល​គិតគូរ​បន្ថែម​ទៀត​ដល់​ការ​ផ្ដល់​ស្បៀងអាហារ​ឲ្យ​ពលរដ្ឋ។ អ្នកវិភាគ​ដដែល​បន្ត​ថា ប្រជាប្រិយភាព​លោក សម រង្ស៊ី អាច​នឹង​កៀរគរ​ថវិកា​បាន តាមរយៈ​ជាវ​នាឡិកា​នេះ៖ «កន្លង​មក​យើង​ឃើញថា មាន​ព័ត៌មាន​បង្ហាញ​នាឡិកា​លោកនាយក​រដ្ឋមន្ត្រី​មានតម្លៃ​ខ្ពស់​រហូតដល់​បី​បួន​លាន​ដុល្លារ​ឯណោះ ដែល​សឹងតែ​លក់​នាឡិកា​មួយ​អាច​ជួយ​មនុស្ស​បាន​រាប់​ម៉ឺន​នាក់»

យុវជន​គាំទ្រ​គណបក្ស​សង្គ្រោះ​ជាតិ​នៅ​ប្រទេស​កូរ៉េខាងត្បូង​(South Korea) លោក ម៉ាត់ វណ្នី គាំទ្រ​គម្រោង​នេះ​។ លោក​អះអាង​ថា នឹង​ចូលរួម​កម្មវិធី​សប្បុរសធម៌​មួយ​នេះ​។ លោក​យល់​ថា ថវិកា ​៥​ដុល្លា​របស់​លោក​នឹង​អាច​ចូលរួម​ចំណែក​ជួយ​ដល់​ពលរដ្ឋ​ក្រីក្រ​ដែល​រង​ផល​ប៉ះពាល់​ព្រោះ​បញ្ហា​កូវីដ១៩៖ «សំខាន់​យើង​មាន​ចូលរួម​ជាមួយ​មូលនិធិ​ហ្នឹង​ដើម្បី​បាន​មាន​លទ្ធភាព​បាន​ជួយ​ប្រជាជន»

រីឯ​យុវជន​ម្នាក់ទៀត លោក សេង ម៉េងប៊ុនរ៉ុង ស្នើ​ទៅ​លោក ហ៊ុន សែន គួរ​ហ៊ាន​លក់​នាឡិកា​របស់​ខ្លួន​ដែល​មាន​តម្លៃ​រាប់​លាន​ដុល្លារ​ជួយ​ដល់​ពលរដ្ឋ៖ «មេដឹកនាំ​គណបក្ស​កាន់អំណាច​ដែល​នាឡិកា​គាត់​មានតម្លៃ​រាប់​លាន​ដុល្លារ​ហើយ​មិនមែន​មានតែ​មួយ​គ្រឿង​ទេ ហើយ​មិនមែន​មានតែ​នាឡិកា​ទេ គឺ​គាត់​មាន​របស់​គាត់​របស់​របរ​ប្រើប្រាស់​ពេញ​ដងខ្លួន​របស់​គាត់​សុទ្ធតែ​តម្លៃ​រាប់​លាន​ដុល្លារ ប៉ុន្តែ​គាត់​អត់​ហ៊ាន​លក់​ចំណាយ​ឱ្យ​ពលរដ្ឋ​ទេ គាត់​សុខចិត្ត​ឱ្យ​ប្រជាពលរដ្ឋ​ស្រែកយំ»

បណ្ដាញ​ព័ត៌មាន​ប្រព័ន្ធ​អ៊ីនធឺណិត​ឈ្មោះថា វ៉ាយស៍ (VICE) បាន​ចេញ​ផ្សាយ​អត្ថបទ​មួយ កាលពី​ចុងឆ្នាំ​២០២០​ ថា លោក លោក ហ៊ុន សែន ជា​នាយករដ្ឋមន្ត្រី នៃ​ប្រទេស​ក្រីក្រ​មួយ​មាន​ប្រាក់ខែ​ត្រឹម​ជាង ១០​លាន​រៀល ឬ​ប្រមាណ ២៥.០០០ដុល្លារ​​អាមេរិក​នោះ បែរ​ជា​មាន​នាឡិកា​ដៃ​ប្រណិត​ជាច្រើន​គ្រឿង ក្នុង​តម្លៃ​រាប់​លាន​ដុល្លារ។

សារព័ត៌មាន​អន្តរជាតិ​នេះ បន្ត​ថា នាឡិកា​ដៃ​ដ៏​ប្រណិត​មួយ​គ្រឿង​ថ្មី​ទៀត ដែល​លោក ហ៊ុន សែន កំពុង​ពាក់ គឺជា​ប្រភេទ​នាឡិកា​ដៃ​ម៉ាក ផាថេក ហ្វីលីប (Patek Philip) ផលិត​នៅ​ប្រទេស​ស្វីស​អំឡុង​ឆ្នាំ​២០១៤-២០១៦ មាន​តម្លៃ ១​លាន ២​សែន​ដុល្លារ​។ នាឡិកា​ប្រភេទ​នេះ មាន​តម្លៃ​ដល់ ៣​លាន​ដុល្លារ​នៅពេល​គេ​ដាក់​ឲ្យ​ដេញថ្លៃ​។ ជាមួយគ្នានេះ​គេ​ក៏​ប្រទះឃើញ​លោក ហ៊ុន សែន ធ្លាប់​ពាក់​នាឡិកា​ជាច្រើន​គ្រឿង​ទៀត ដែលមាន​តម្លៃ​សរុប​ដល់​ទៅ ៩​លាន​ដុល្លារ ក្នុង​នោះ​ក៏​មាន​នាឡិកា​ម៉ាក រីឆាត មៀល (Rechard Mill Sapphire Dragon Tuorbilon) ដែល​ជា​ប្រភេទ​កម្រ គឺ​មាន​តែ ៥៥​គ្រឿង​ប៉ុណ្ណោះ​លើ​ពិភពលោក។

កម្មវិធី​ជាវ​ប័ណ្ណ ដើម្បី​បាន​នាឡិកា​លោក សម រង្ស៊ី នឹង​ចាប់ផ្ដើម​នៅ​ថ្ងៃអាទិត្យ​ទី​១៦ ឧសភា ដែល​នឹង​ផ្សាយ​ផ្ទាល់​តាម​ប្រព័ន្ធ​ហ្ស៊ូម (Zoom)។ ប័ណ្ណ​នីមួយៗ​ មាន​លេខ​សម្គាល់​នៅ​លើ​នោះ​។ អ្នក​ជាវ​ប័ណ្ណ​សម្គាល់​នៅ​លើ​ប័ណ្ណ​រៀងៗ​ខ្លួន ដើម្បី​ផ្ទៀងផ្ទាត់​នៅពេល​លោក សម រង្ស៊ី នឹង​ចាប់​យក​តែ​ប័ណ្ណ​មួយ​សន្លឹក​ក្នុង​ចំណោម​ប័ណ្ណ​ទាំងអស់ ១​ម៉ឺន​សន្លឹក ក្នុង​រយៈពេល​បី​សប្ដាហ៍​បន្ទាប់ ដើម្បី​ប្រគល់​នាឡិកា​របស់​លោក ជូន​អ្នក​ដែល​មាន​សំណាង​តាមរយៈ​ប័ណ្ណ​មួយ​សន្លឹក​ដែល​ចាប់​បាន។ ថវិកា​ទាំងអស់​ដែល​បាន​មកពី​ការ​ជាវ​ប័ណ្ណ​នេះ លោក សម រង្ស៊ី នឹង​យក​ទៅ​ទិញ​ស្បៀងអាហារ​សំរាប់​ចែក​ជូន​អ្នក​ដែល​ដាច់​ស្បៀង ដោយសារ​តែ​រដ្ឋាភិបាល​បិទ​ខ្ទប់ ក្នុង​ពេល​វិបត្តិ​ជំងឺ​កូវីដ១៩៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល