ប្រពន្ធមន្ត្រីជាន់ខ្ពស់គណបក្សភ្លើងទៀននៅនៅរាជធានីភ្នំពេញ ស្នើដល់អាជ្ញាធរដោះលែងប្តីឱ្យមានសេរីភាពមកវិញ ពីព្រោះពួកគាត់ជាអ្នកនយោបាយដែលមានកិត្តិយស និងកេរ្តិ៍ឈ្មោះស្អាតស្អំដែលមិនព្រមចុះចូលជាមួយគណបក្សកាន់អំណាច។ មន្រ្តីសិទ្ធិមនុស្សមើលឃើញថាការចាប់ខ្លួនសមាជិកបក្សប្រឆាំងនេះធ្វើឲ្យបរិយាកាសនយោបាយនៅមុនការបោះឆ្នោតកាន់តែរួមតូច ជាពិសេសរងការរិះគន់ពីសហគមន៍អន្តរជាតិបន្ថែមទៀត ដែលអ្នកនយោបាយត្រូវដោះស្រាយបញ្ចប់ជម្លោះឱ្យបានឆាប់។
ក្រុមគ្រួសារចាត់ទុកការចោទប្រកាន់ និងការចាប់ខ្លួនមន្ត្រីគណបក្សភ្លើងទៀនទាំងនោះថា ជាការធ្វើទុក្ខបុកម្នេញផ្នែកនយោបាយ។
ប្រពន្ធមន្ត្រីគណបក្សភ្លើងទៀននៅរាជធានីភ្នំពេញលោក លី រី គឺលោកស្រី លី គឹមហួង ប្រាប់អាស៊ីសេរីថា ក្រោយពេលប៉ូលិសស្លៀកពាក់ឯកសណ្ឋាន និងស៊ីវិលប្រមាណ ២០នាក់ចាប់ប្តីលោកស្រីដល់ផ្ទះ ដោយគ្មានបង្ហាញដីកា គឺមកដល់ពេលនេះលោកស្រីមិនទាន់ដឹងមូលហេតុទាក់ទងនឹងការចាប់ខ្លួន និងមិនបានទទួលដំណឹងអំពីប្តីសុខទុក្ខយ៉ាងណានៅឡើយ។ លោកស្រីចាត់ទុកការចាប់ខ្លួនប្តីទាំងកំរោលនេះថា ជារឿងនយោបាយ ពីព្រោះមុនពេលប្តីលោកស្រីត្រូវបានសមត្ថកិច្ចចាប់ខ្លួន គឺលោក លី រី ត្រូវបានមន្ត្រីគណបក្សកាន់អំណាចតាមអូសទាញឱ្យចុះចូលគណបក្សប្រជាជនកម្ពុជាជាច្រើនដង ដោយសន្យាផ្តល់លុយកាក់ ប៉ុន្តែគាត់តែងតែបដិសេធ។
លោកស្រី លី គឹមហួង៖ «គ្មានអ្នកណាទទួលយកបានទេ គឺចាប់គ្មានដីកាហើយ គ្មានកំហុស ខ្ញុំហួសចិត្តដោយមិនដឹងនិយាយថា មិចទេ ធ្វើអ៊ីចឹងលើសពីអាក្រក់ពេក ប្តីរបស់ខ្ញុំអត់មានកំហុសអ្វីដែលត្រូវចាប់គាត់ទេ ខ្ញុំចង់ដឹងថា កំហុសអ្វីដែលត្រូវចាប់គាត់ ហើយបើគាត់គ្មានកំហុសទេសូមដោះលែងគាត់មកវិញមក»។
ស្រដៀងគ្នានេះដែរ ប្រពន្ធមន្ត្រីគណបក្សភ្លើងទៀន នៅរាជធានីភ្នំពេញម្នាក់ទៀតលោក ប៊ុន ខេត គឺលោកស្រី កឹម សារី ប្រាប់ថា ត្រឹមរសៀលថ្ងៃទី១៥ ខែកក្កដា អាជ្ញាធរបានឃុំខ្លួននិងសាកសួរប្តីលោកស្រី នៅស្នងការដ្ឋាននគរបាលរាជធានីភ្នំពេញដោយមិនអញ្ញាតឱ្យគ្រួសារផ្ញើសម្ភារៈថ្នាំពេទ្យ ឬជួបមុខប្តីនោះឡើយ។ លោកស្រីរៀបរាប់ទាំងទឹកភ្នែកថា លោកស្រីព្រួយបារម្ភពីសុខភាពប្ដីជាខ្លាំង ពីព្រោះប្ដីគាត់មានវ័យកាន់តែចាស់ និងមានជំងឺប្រចាំកាយច្រើនមុខដូចជាជំងឺលើសឈាម និងជំងឺទឹកនោមផ្អែមដែលត្រូវការថែទាំឱ្យបានដិតដល់ពីប្រពន្ធកូន។ លោកស្រី កឹម សារី អះអាងថា ប្ដីលោកស្រីគឺជាអ្នកនយោបាយស្អាតស្អំបានលះបង់ប្រយោជន៍ផ្ទាល់ខ្លួនដើម្បីជាតិ ហើយលោកស្រីស្នើដល់សមត្ថកិច្ចដោះលែងប្តីឱ្យមានសេរីភាពមកវិញ។
លោកស្រី កឹម សារី៖ «វាមិនត្រឹមត្រូវទេ ពីព្រោះសម្រុកមកចាប់ដោយគ្មានដីកា ប្តីរបស់ខ្ញុំអត់មានកំហុសអ្វីទេ គាត់ជាគណបក្សប្រឆាំងមួយរូប គឺនិយាយទៅគាត់អត់ខុសតែម្តងដែលគេចាប់ទៅហ្នឹង ខ្ញុំសុំឱ្យអាជ្ញាធរដោះលែងគាត់មកវិញមក គាត់ចាស់ហើយ ណាមួយគាត់មានជំងឺលើសឈាម និងជំងឺទឹកនោមផ្អែមលេបថ្នាំរាល់ថ្ងៃ សូមដោះលែងគាត់មកបាននៅជួបជុំកូនចៅវិញ»។
អាជ្ញាធររដ្ឋាភិបាលលោក ហ៊ុន សែន បានព័ទ្ធផ្ទះឆ្មក់ចាប់ខ្លួនមន្ត្រីជាន់ខ្ពស់គណបក្សភ្លើងទៀនពីរនាក់ទាំងយប់ កាលពីថ្ងៃទី១៤ ខែកក្កដា រួមមានអនុប្រធានក្រុមការងារនៅរាជធានីភ្នំពេញ លោក លី រី និងប្រធានស្តីទីគណៈកម្មាធិការប្រតិបត្តិគណបក្សភ្លើងទៀនប្រចាំរាជធានីភ្នំពេញលោក ប៊ុន ខេត ដោយមិនដឹងមូលហេតុ។
ទាក់ទងរឿងនេះអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា បដិសេធមិនឆ្លើយតបនឹងសំនួររបស់វិទ្យុអាស៊ីសេរីទាក់ទងករណីចាប់ខ្លួនមន្ត្រីគណបក្សភ្លើងទៀននោះទេ ដោយលោករុញឱ្យសួរអ្នកនាំពាក្យក្រសួងមហាផ្ទៃលោក ខៀវ សុភ័គ វិញ។ វិទ្យុអាស៊ីសេរីមិនអាចទាក់ទងលោក ខៀវ សុភ័ក្រ ដើម្បីបញ្ជាក់ជុំវិញរឿងនេះបានទេ នៅថ្ងៃទី១៥ ខែកក្កដា។
ទោះយ៉ាងណាលោក ខៀវ សុភ័គ ប្រាប់ប្រព័ន្ធឃោសនារបស់លោក ហ៊ុន សែនថា សមត្ថកិច្ចបានចាប់ខ្លួនមន្រ្តីគណបក្សភ្លើងទៀនពីរនាក់គឺលោក លី រី និងលោក ប៊ុន ខេត តាមព្រះរាជអាជ្ញាអមសាលាដំបូងរាជធានីភ្នំពេញពាក់ព័ន្ធការញុះញង់ប្រជាពលរដ្ឋគូសសន្លឹកឆ្នោតចោល។ លោកឱ្យដឹងថា សមត្ថកិច្ចបានសាកសួរ និងកំពុងកសាងសំណុំរឿងអនុវត្តតាមនីតិវិធី។
ជុំវិញវិញរឿងនេះអ្នកនាំពាក្យគណបក្សភ្លើងទៀនលោក គីម សួរភីរិទ្ធិ លើកឡើងថា គណបក្សព្រួយបារម្ភជាខ្លាំង ចំពោះករណីសមត្ថកិច្ចចាប់ខ្លួនសមាជិកបក្សជាបន្តបន្ទាប់មកនេះ។ លោកឱ្យដឹងថា មេធាវីគណបក្សគឺលោក សំ សុខគង់ និងលោក ជូង ជូងី កំពុងពិនិត្យមើលករណីនេះដោយយកចិត្តទុកដាក់ក្នុងការការពារសិទ្ធិជូនពួកគេ ដែលត្រូវអាជ្ញាធរចោទប្រកាន់នោះ។
លោក គីម សួរភីរិទ្ធិ៖ «គណបក្សភ្លើងទៀនមិនបានចូលរួមការបោះឆ្នោតទេ អ៊ីចឹងទេមេត្តាអាជ្ញាធរពិនិត្យឡើងវិញនូវការឃាត់ខ្លួន និងការចាប់ខ្លួនទាំងឡាយណាមេត្តាធ្វើឱ្យស្របតាមនីតិវិធី និងមានភស្តុតាងជាក់ស្តែងផង ពីព្រោះយើងបានណែនាំឱ្យថ្នាក់ដឹកនាំទាំងអស់មិនត្រូវធ្វើសកម្មភាពអ្វីដែលផ្ទុយពីច្បាប់បោះឆ្នោតទេ»។
ប្រធានសមាគមការពារសិទ្ធិមនុស្សអាដហុក (Adhoc)នី សុខា មានប្រសាសន៍ថា ប្រសិនបើបទល្មើសនេះមិនជាក់ស្តែង ហើយសមត្ថកិច្ចមិនបានបង្ហាញដីកាចាប់ខ្លួន ឬមិនប្រាប់ពីមូលហេតុនៃការចាប់ខ្លួន គឺជាការអនុវត្តខុសនីតិវិធី ដែលធ្វើឱ្យប៉ះពាល់ដល់សិទ្ធិរបស់ពួកគាត់។ ការចាប់ខ្លួនសកម្មជនគណបក្សប្រឆាំងវិញ លោក នី សុខា កត់សម្គាល់ថាករណីនេះកើតឡើងក្រោយពេលគណបក្សភ្លើងទៀនមិនមានឱកាសចូលរួមការបោះឆ្នោតនៅថ្ងៃទី២៣ ខែកក្កដា ខាងមុខ រួមទាំងការកែច្បាប់បោះឆ្នោតប៉ះពាល់ដល់សិទ្ធិអ្នកឈរឈ្មោះបោះឆ្នោតដែលមតិជាតិនិងអន្តរជាតិមើលឃើញថា ជាការរឹតត្បិតសិទ្ធិសេរីភាពរបស់ពលរដ្ឋ។
លោក នី សុខា៖ «បើសិនយើងនៅតែបន្តមានការចាប់ខ្លួន ការគំរាមកំហែង ឬធ្វើទុក្ខបុកម្នេញទៅលើគណបក្សដៃគូ ឬគណបក្សប្រឆាំងដែលគណបក្សហ្នឹងគ្មានឱកាសចូលរួមប្រកួតប្រជែងផងនោះ ខ្ញុំគិតថា នេះធ្វើឱ្យបញ្ហានយោបាយកាន់តែចង្អៀតទៅៗ គឺចង់មិនចង់ធ្វើឱ្យប៉ះពាល់ដល់តម្លៃ ឬដំណើរការនៃបរិយាកាសការបោះឆ្នោតផងដែរ»។
ការបោះឆ្នោតនៅកម្ពុជាដែលនឹងប្រព្រឹត្តទៅនៅថ្ងៃទី២៣ ខែកក្កដា ខាងមុខនេះ ត្រូវបានសហគមន៍ជាតិ និងអន្តរជាតិចាត់ទុកថា ជាការបោះឆ្នោត«ក្លែងក្លាយ» រួចទៅហើយ ពីព្រោះរបបដឹកនាំរបស់លោក ហ៊ុន សែន បានផាត់ចោលគណបក្សប្រឆាំងធំជាងគេ គឺគណបក្សភ្លើងទៀន។
បន្ថែមពីនេះ អ្នកឃ្លាំមើលបញ្ហាសង្គម និងនយោបាយកម្ពុជាមើលឃើញថា របបដឹកនាំរបស់លោក ហ៊ុន សែន កំពុងបង្កើនកម្ដៅនយោបាយ និងព្យុះភ្លៀងបោកបក់ទៅលើគណបក្សប្រឆាំងតាមគ្រប់រូបភាព មានទាំងការគំរាមកំហែង និងការប្រើប្រាស់ប្រព័ន្ធតុលាការធ្វើជាអាវុធ។ ក្នុងនោះរួមមានការប្ដឹងទារសំណងជំងឺចិត្តរាប់សែនដុល្លារ ពីអនុប្រធានគណបក្សភ្លើងទៀន លោក សុន ឆ័យ ការរឹបអូសផ្ទះសម្បែង និងដីធ្លីរបស់ឧត្ដមទីប្រឹក្សាគណបក្សភ្លើងទៀន លោក គង់ គាំ រួមទាំងការចោទប្រកាន់ចាប់ខ្លួនលោក ថាច់ សេដ្ឋា និងសកម្មជនជាច្រើននាក់ទៀតដាក់ពន្ធនាគារកាលពីពេលថ្មីៗនេះដែលមតិជាតិនិងអន្តរជាតិចាត់ទុកជារឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។