មន្ត្រីបក្សប្រឆាំងចំនួន ៥នាក់បន្ថែមទៀត ចូលខ្លួនបំភ្លឺនៅសាលាដំបូងខេត្តបាត់ដំបង
2019.05.17
មន្ត្រីបក្សប្រឆាំងចំនួន ៥នាក់បន្ថែមទៀត ក្នុងនោះ មានលោក ថោង សារឿន (ពាក់កម្រងផ្កា) ជាសមាជិកក្រុមប្រឹក្សាជាប់ឆ្នោតស្រុកគាស់ក្រឡគណបក្ស សង្គ្រោះជាតិ ស្រុកគាស់ក្រឡ ចូលខ្លួនបំភ្លឺនៅសាលាដំបូងខេត្តបាត់ដំបង នៅថ្ងៃទី១៧ ឧសភា ឆ្នាំ២០១៩។
រូប៖ ពលរដ្ឋ
សកម្មជនគណបក្សសង្គ្រោះជាតិខេត្តបាត់ដំបងចំនួន ៥នាក់បន្ថែមទៀតនៅថ្ងៃទី១៧ ឧសភា បានចូលខ្លួនបំភ្លឺតាមការកំណត់របស់តំណាងអយ្យការនៅសាលាដំបូងខេត្តបាត់ដំបង ដោយមានអ្នកគាំទ្រជាច្រើននាក់ឃ្លាំមើលនៅខាងក្រៅរបងតុលាការដូចថ្ងៃមុនៗ ដែរ។
សមាជិកក្រុមប្រឹក្សាជាប់ឆ្នោតស្រុកគាស់ក្រឡគណបក្សសង្គ្រោះជាតិលោក ថោង សារឿន ប្រាប់អាស៊ីសេរីនៅរសៀលថ្ងៃទី១៧ឧសភាថា មន្ត្រីតុលាការចំនួន២នាក់បានសាកសួរលោកជាង១ម៉ោង អំពីការជួបជុំគ្នាហូបនំបញ្ចុកនៅផ្ទះរបស់លោក ជា ជីវ ប្រធានគណបក្សសង្គ្រោះជាតិខេត្តបាត់ដំបងកាលពីឆ្នាំ២០១៨កន្លងទៅ៖ «ហើយសួរថា ខ្ញុំបានទៅចូលផ្ទះកញ្ញា ស៊ិន ចាន់ពៅរ៉ូហ្សេត ដែរទេ? ខ្ញុំថា ខ្ញុំអត់ចូលទៅទេ ហើយក៏មិនបានធ្វើចលនាអ្វីដែរ។ បើតាមមើល ខ្ញុំគិតថា ដីកានេះប្រហែលគេបំភិតបំភ័យពួកខ្ញុំហើយ ដោយសារយើងមើលទៅអ្នកដែលហូបនំបញ្ចុក និងអ្នកលើកម្រាមដៃស្អាតនោះ គឺមិនមានពាក់ព័ន្ធនឹងសាលដីការបស់តុលាការកំពូលនោះទេ»។
លោកបន្តថា ពួកគាត់ទាំង ៥នាក់បានត្រឡប់ទៅផ្ទះវិញអស់ហើយ បន្ទាប់ពីចូលបំភ្លឺតុលាការរួចនៅពីរសៀលថ្ងៃដដែល។
តំណាងអយ្យការនៃសាលាដំបូងខេត្តបាត់ដំបងលោក គឺ ប៊ុណ្ណារ៉ា បានកោះហៅលោក ថោង សារឿន និងមន្ត្រីបក្សប្រឆាំង ៤នាក់ផ្សេងទៀតដែលបានចូលបំភ្លឺនៅថ្ងៃទី១៧ ឧសភា ដោយចោទប្រកាន់ប្រឆាំងសាលដីកាតុលាការកំពូល រឿងរំលាយគណបក្ស សង្គ្រោះជាតិ កាលពីខែវិច្ឆិកា ឆ្នាំ២០១៧។
ប៉ុន្តែកន្លងមកមន្ត្រីសង្គមស៊ីវិលនិងអង្គការសិទ្ធិមនុស្សអន្តរជាតិហៅដីកាកោះនេះថា ជាអំពើគំរាមកំហែងបំភិតបំភ័យដល់មន្ត្រីបក្សប្រឆាំង ដើម្បីកុំឱ្យពួកគាត់ធ្វើសកម្មភាពនយោបាយគាំទ្រលោក សម រង្ស៊ី និង លោក កឹម សុខា បន្តទៀត។
គិតត្រឹមថ្ងៃទី១៧ ខែឧសភា តំណាងអយ្យការនៃសាលាដំបូងខេត្តបាត់ដំបង បានកោះហៅមេឃុំចៅសង្កាត់ សមាជិកក្រុមប្រឹក្សាឃុំសង្កាត់ ស្រុក ក្រុង និងក្រុមប្រឹក្សាខេត្តបាត់ដំបង គណបក្ស សង្គ្រោះជាតិ ឱ្យចូលបំភ្លឺនៅតុលាការចំនួន ៣៥នាក់ហើយ ចាប់តាំងពីថ្ងៃទី៨ ឧសភាមក ក្នុងនោះមានចៅសង្កាត់អូរចារជាប់ឆ្នោត គឺកញ្ញា ស៊ិន ចាន់ពៅរ៉ូហ្សេត និងមន្ត្រីគណបក្ស សង្គ្រោះជាតិ ២២នាក់ផ្សេងទៀត ដែលបានចូលបំភ្លឺរួច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន