ព័ត៌មាន​បរទេស​ចាប់​អារម្មណ៍​លើ​ការ​វិល​ត្រឡប់​របស់​មេ​បក្ស​ប្រឆាំង

ការ​ធ្វើ​មាតុភូមិ​និវត្តន៍​របស់​លោក សម រង្ស៉ី ប្រធាន​គណបក្ស​សង្គ្រោះ​ជាតិ ដែល​បាន​និរទេស​ខ្លួន​នៅ​ក្រៅ​ប្រទេស​អស់​រយៈពេល ៤​ឆ្នាំ​កន្លង​ទៅ​នេះ បាន​ធ្វើ​អោយ​ប្រជាពលរដ្ឋ​ជា​ច្រើន ជាពិសេស​ប្រជាពលរដ្ឋ​ខ្មែរ​ដែល​គោរព​ស្រឡាញ់​លោក និង​អ្នក​គាំទ្រ​គណបក្ស​សង្គ្រោះ​ជាតិ មាន​ការ​ចាប់​អារម្មណ៍​យ៉ាង​ខ្លាំង។
ដោយ យាង សុជាមេត្តា
2013-07-19
អ៊ីម៉ែល
មតិ
Share
បោះពុម្ព

អ្នក​គាំទ្រ​គណបក្ស​សង្គ្រោះ​ជាតិ នៅ​គ្រប់​ទិស​ទី ទាំង​ក្នុង​ប្រទេស​កម្ពុជា និង​នៅ​ក្រៅ​ប្រទេស ប្រាកដ​ជា​តាម​ដាន​យ៉ាង​យក​ចិត្ត​ទុក​ដាក់​ចំពោះ​ព្រឹត្តិការណ៍​វិល​ត្រឡប់​របស់​មេ​បក្ស​របស់​ពួកគេ។ បន្ថែម​ពី​លើ​នេះ គេ​សង្កេត​ឃើញ​ថា ក្រៅ​ពី​បណ្ដាញ​ព័ត៌មាន​ក្នុង​ស្រុក​ដែល​គាំទ្រ​គណបក្ស​ប្រឆាំង ​និង​បណ្ដាញ​ព័ត៌មាន​បរទេស​ឯករាជ្យ​ដែល​ផ្សាយ​ជា​ខេមរភាសា បណ្ដាញ​សារព័ត៌មាន​ធំៗ​បរទេស​​ក៏​បាន​ផ្សព្វផ្សាយ​ចំពោះ​ការ​វិល​ត្រឡប់​របស់​លោក សម រង្ស៉ី ដែរ​នៅ​ពេល​នេះ។

ខុស​ពី​ព្រឹត្តិការណ៍​ឃោសនា​បោះ​ឆ្នោត​នៅ​កម្ពុជា ថ្ងៃ​ដំបូង ដែល​ភាគ​ច្រើន​មាន​តែ​ប្រជាពលរដ្ឋ​ខ្មែរ ព្រម​ទាំង​បណ្ដាញ​ផ្សព្វ​ផ្សាយ​សារព័ត៌មាន​ក្នុង​ស្រុក ​និង​បណ្ដាញ​ផ្សព្វ​ផ្សាយ​បរទេស​ដែល​ផ្សាយ​ជា​ខេមរភាសា​បាន​ចាប់​អារម្មណ៍​ការ​ធ្វើ​មាតុភូមិ​និវត្តន៍​របស់​លោក សម រង្ស៉ី នៅ​ថ្ងៃ​ទី​១៩ កក្កដា ២០១៣ មិន​ត្រឹម​តែ​ត្រូវ​បាន​យក​ចិត្ត​ទុក​ដាក់​ពី​សំណាក់​ប្រជាពលរដ្ឋ​ខ្មែរ និង​បណ្ដាញ​ផ្សព្វផ្សាយ​ខ្មែរ​នោះ​ទេ តែ​ថែម​ទាំង​បាន​ទាក់ទាញ​ការ​ចាប់​អារម្មណ៍​ពី​សំណាក់​បណ្ដាញ​ផ្សព្វ​ផ្សាយ​ព័ត៌មាន​បរទេស​ធំៗ​ជា​ច្រើន។

បណ្ដាញ​ផ្សព្វផ្សាយ​បរទេស​ដែល​បាន​ចាប់​អារម្មណ៍​ចំពោះ​ការ​វិល​ត្រឡប់​របស់​លោក សម រង្ស៉ី នៅ​ថ្ងៃ​ទី​១៩ កក្កដា ​រួម​មាន​បណ្ដាញ​ព័ត៌មាន ប៊ី.ប៊ី.ស៊ី (BBC) របស់​អង់គ្លេស ​បណ្ដាញ​ព័ត៌មាន អេ.ប៊ី.ស៊ី (ABC) របស់​អូស្ត្រាលី ​បណ្ដាញ​ព័ត៌មាន អា.អេហ្វ.ប៉េ (AFP) របស់​បារាំង បណ្ដាញ​ព័ត៌មាន ឆែនណល ញីវ អេស៊ា (Chanel News Asia) របស់​សិង្ហបុរី បណ្ដាញ​ព័ត៌មាន ខ្យូដូ (Kyodo) របស់​ជប៉ុន និង​បណ្ដាញ​ព័ត៌មាន ស៊ិនហួ (Xinhau) របស់​ចិន ជាដើម។

បណ្ដាញ​សារព័ត៌មាន​ទាំង​នេះ​បាន​អត្ថាធិប្បាយ​ផ្សេងៗ​គ្នា​ចំពោះ​ការ​វិល​ត្រឡប់​ចូល​មក​កម្ពុជា​វិញ​របស់​លោក សម រង្ស៉ី។ បណ្ដាញ​ព័ត៌មាន ស៊ិនហួ របស់​ចិន បាន​អត្ថាធិប្បាយ​ថា ការ​ដែល​លោក​នាយក​រដ្ឋមន្ត្រី ហ៊ុន សែន សម្រេច​ចិត្ត​ស្នើ​ព្រះមហាក្សត្រ​កម្ពុជា ប្រោស​ព្រះរាជទាន​លើកលែង​ទោស​ដល់​លោក សម រង្ស៉ី ក៏​ដោយ​សារ​តែ​លោក ហ៊ុន សែន មាន​បំណង​ចង់​បង្រួប​បង្រួម និង​ផ្សះផ្សា​ជាតិ និង​ចង់​ធ្វើ​អោយ​ការ​បោះឆ្នោត​នៅ​កម្ពុជា ប្រកប​ដោយ​លក្ខណៈ​ប្រជាធិបតេយ្យ សេរី​ពហុបក្ស។ បណ្ដាញ​ព័ត៌មាន​ដដែល​នេះ បាន​និយាយ​ថា ក្នុង​លិខិត​ដែល​លោក សម រង្ស៉ី បាន​ផ្ញើ​ថ្វាយ​ព្រះមហាក្សត្រ​កម្ពុជា ដើម្បី​ថ្លែង​អំណរ​គុណ​ព្រះអង្គ​ចំពោះ​ព្រះរាជទាន​លើកលែង​ទោស​អោយ​រូប​លោក (លោក សម រង្ស៉ី) បាន​ទូល​ថ្វាយ​ព្រះ​មហាក្សត្រ​ខ្មែរ​ថា លោក​នឹង​ប្ដេជ្ញា​បន្ត​ដើរ​តាម​ព្រះរាជ​តម្រិះ​របស់​អតីត​ព្រះមហាក្សត្រ​កម្ពុជា ព្រះ​បាទ​សម្ដេច​ព្រះ នរោត្តម សីហនុ ដែល​លោក​តែង​តែ​ចង់​ឃើញ​ប្រជា​ជាតិ​ខ្មែរ​ចេះ​បង្រួប​បង្រួម ​ផ្សះផ្សា ឯកភាពជាតិ​ខ្មែរ​ជា​ធ្លុងមួយ។

ខុស​ពី​បណ្ដាញ​ព័ត៌មាន ស៊ិនហួ របស់​ចិន បណ្ដាញ​ព័ត៌មាន ប៊ី.ប៊ី.ស៊ី របស់​អង់គ្លេស បាន​អត្ថាធិប្បាយ​ថា ការ​ដែល​លោក សម រង្ស៉ី ត្រូវ​បាន​អនុញ្ញាត​អោយ​ចូល​ប្រទេស​កម្ពុជា​វិញ​នៅ​ពេល​នេះ ក៏​ដោយសារ​តែ​រដ្ឋាភិបាល​កម្ពុជា បាន​រង​គំនាប​ពី​សហគមន៍​អន្តរជាតិ ជា​ពិសេស​គំនាប​របស់​សហរដ្ឋ​អាមេរិក​តែ​ម្ដង។ បណ្ដាញ​ព័ត៌មាន​នេះ បន្ត​ថា អ្នក​នាំ​ពាក្យ​ក្រសួង​ការ​បរទេស​សហរដ្ឋ​អាមេរិក បាន​អំពាវនាវ​អោយ​អាជ្ញាធរ​កម្ពុជា អនុញ្ញាត​អោយ​លោក សម រង្ស៉ី បាន​វិល​ត្រឡប់​ចូល​កម្ពុជា​វិញ ដោយ​គ្មាន​ការ​ភ័យ​ខ្លាច​ចំពោះ​សុវត្ថិភាព​ផ្ទាល់​ខ្លួន​របស់​គាត់ ឬ​ដោយ​គ្មាន​ការ​ចាប់​ដាក់​គុក​ជាដើម។ ប៊ី.ប៊ី.ស៊ី បន្ត​ថា កាល​ពី​ពេល​ថ្មីៗ​នេះ សមាជិក​សភា​សហរដ្ឋអាមេរិក ក៏​បាន​ស្នើ​អោយ​រដ្ឋាភិបាល​អាមេរិក កាត់​ជំនួយ​មក​កម្ពុជា ប្រសិន​បើ​ការ​បោះ​ឆ្នោត​នៅ​ពេល​ខាង​មុខ​មិន​ប្រកប​ដោយ​ភាព​ត្រឹម​ត្រូវ​នឹង​យុត្តិធម៌។

ប៊ី.ប៊ី.ស៊ី បន្ថែម​ទៀត​ថា បើ​ទោះ​បី​ជា​មេ​បក្ស​ប្រឆាំង​ដ៏​មាន​ប្រជាប្រិយ​រូប​នេះ ​បាន​ត្រឡប់​ចូល​កម្ពុជា​ក្តី តែ​លោក​មិន​អាច​បោះ​ឆ្នោត ឬ​ឈរ​ឈ្មោះ​អោយ​គេ​បោះឆ្នោត​បាន​ទេ ដោយសារ​តែ​ឈ្មោះ​របស់​លោក​ត្រូវ​បាន​លុប​ចេញ​ពី​បញ្ជី​ឈ្មោះ​អ្នក​បោះ​ឆ្នោត​រួច​ហើយ។

ចំណែក​ឯ​បណ្ដាញ​ព័ត៌មាន​បារាំង អា.អេហ្វ.ប៉េ បាន​អត្ថាធិប្បាយ​ថា លោក សម រង្ស៉ី ចូល​កម្ពុជា នៅ​ពេល​នេះ គឺ​ដើម្បី​ជួយ​គណបក្ស​សង្គ្រោះ​ជាតិ​របស់​លោក ប្រកួត​យក​ជ័យជំនះ​លើ​លោក​នាយករដ្ឋមន្ត្រី ហ៊ុន សែន ដែល​បាន​កាន់​អំណាច​នៅ​កម្ពុជា ប្រមាណ​ជា ៣​ទសវត្សរ៍​មក​ហើយ។ អា.អេហ្វ.ប៉េ បន្ត​ថា បើ​ទោះ​បី​ជា​លោក ហ៊ុន សែន គឺ​ជា​មេ​ដឹក​នាំ​ម្នាក់​នៅ​អាស៊ី​អាគ្នេយ៍​ដែល​បាន​កាន់​អំណាច​អស់​រយៈពេល​ជា​យូរ​ឆ្នាំ​មក​ហើយ​ក្ដី ក៏​លោក ហ៊ុន សែន បាន​និយាយ​កាល​ពី​ខែ​មិថុនា ឆ្នាំ​២០១៣ ថា លោក​នឹង​កាន់​អំណាច ១០​ឆ្នាំ​បន្ថែម​ទៀត គឺ​រហូត​ដល់​លោក​មាន​អាយុ ៧៤​ឆ្នាំ។កាល​ពី​មុន​លោក ហ៊ុន សែន ធ្លាប់​បាន​និយាយ​ថា គាត់​នឹង​កាន់​អំណាច​រហូត​ដល់​គាត់​មាន​អាយុ ៩០​ឆ្នាំ​ឯណោះ។

ជា​ការ​កត់​សម្គាល់​លោក សម រង្ស៉ី បាន​និរទេស​ខ្លួន​ឯង​នៅ​ក្រៅ​ប្រទេស​តាំង​ពី​ខែ​វិច្ឆិកា​ ឆ្នាំ​២០០៩ ហើយ​រូប​លោក​ត្រូវ​បាន​តុលាការ​កម្ពុជា កាត់ទោស​អោយ​ជាប់​ពន្ធនាគារ​សរុប​ចំនួន ១២​ឆ្នាំ ក្នុង​សំណុំ​រឿង​ដក​តម្រុយ​ព្រំ​ដែន​កម្ពុជា​-វៀតណាម និង​ក្លែង​បន្លំ​ឯកសារ​សាធារណៈ។ លោក​ត្រូវ​បាន​ព្រះ​មហាក្សត្រ​កម្ពុជា ព្រះ​បាទ​សម្ដេច​ព្រះ នរោត្តម សីហមុនី ប្រទាន​ការ​លើក​លែង​ទោស​កាល​ពី​ថ្ងៃ​ទី​១២ កក្កដា ២០១៣ បន្ទាប់ពី​មាន​ការ​ស្នើ​សុំ​ពី​លោក​នាយករដ្ឋមន្ត្រី ហ៊ុន សែន។ ការ​វិល​ត្រឡប់​មក​កម្ពុជា របស់​លោក សម រង្ស៉ី នៅ​ពេល​នេះ បាន​ធ្វើ​ឡើង​ចំនួន ៨​ថ្ងៃ​ប៉ុណ្ណោះ មុន​កម្ពុជា រៀប​ចំ​ការ​បោះ​ឆ្នោត​ជ្រើសតាំង​តំណាងរាស្ត្រ​នីតិកាល​ទី​៥ នៅ​ថ្ងៃ​ទី​២៨ កក្កដា ឆ្នាំ​២០១៣៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (9)
Share

1 Khmer

ពី Kampong Cham

Hello RFA, I have no idear but question. Why opposition party do not have any TV Channels? Is it faire election in Cambodia? People see only the same same things that government do, how about bad?

Jul 20, 2013 02:49 PM

SanDiego usa

In CPP country all blind only one have GOOD eye don't wander.

Jul 20, 2013 10:06 AM

អ្នក​អាន​អនាមិក

ខ្ញុំសូមសួររដ្ឋាភិបាល និង លោក ខៀវ កញ្ញារិទ្ធ ថា ដូចម្តេចទៅដែលហៅថា ពត៌មាន ? សូមបុរសខ្លាំង មហាបុរស បណ្ឌិតវិភាគតាមទូរទស្សន៍ ម្ចាស់ស្ថានីយ៍ទូរទស្សន៍ ទាំងអស់ ......មេត្តាអោយនិយមន័យដល់ពាក្ស ពត៌មាន អោយកូនខ្មែរដឹងផង !

Jul 20, 2013 06:32 AM

Kone Khmer

ពី Stockton California

The return of Sam Rainsy is the big event for Cambodian nation. The Cambodian broadcast should show that on Phnom Pehn television

Jul 20, 2013 03:58 AM

KKKK

ពី KPT

មេត្តាកុំយល់ច្រលំស៊ិនហ៊ួ ការនេះមិនយល់ពីការពិតសោះ ហ៊ុនសែនមិនចង់ទាល់តែសោះការបង្រួបបង្រួមជាតិនោះពីព្រោះគាត់ជំពាក់គុណយួន ខ្លាចសម រង្សី វែកមុខរឿងទឹកដី និងកោះត្រល់ដែលយួនយកលើសន្ធិសញ្ញាបន្ថែមឆ្នាំ១៩៨៥ខុសច្បាប់អន្តរជាតិជាពិសេសកិច្ចព្រមព្រៀងទីក្រុងប៉ារីស១៩៩១ ប៉ុន្តែដោយសារគំនាមរបស់សហគមន៍អន្តរជាតិដែលបង្ខំហ៊ុន សែនទេកុំអីបងសែននៅតែនិយាយថាបើសមរង្សីចូលស្រុកនិងចាប់ដាក់គុកភ្លាម។ ចំពោះរឿងទឹកដីកាត់អោយយួនសូមលោកបារាំងដែលដាក់អាណានិគមពីមុនជួយនោះស្រាយផង។

Jul 20, 2013 12:48 AM

មើល​មតិ​ទាំង​អស់.

គេហទំព័រ​ទាំងមូល