មន្ត្រីបក្សប្រឆាំងខកចិត្តនឹងការបំភ្លឺរបស់រដ្ឋមន្ត្រីក្រសួងសុខាភិបាល
2016.12.29
នៅថ្ងៃទី២៩ ខែធ្នូ លោក ម៉ម ប៊ុនហេង បានចូលឆ្លើយបំភ្លឺនៅក្នុងរដ្ឋសភា តាមការកំណត់ដែលស្នើដោយអ្នកតំណាងរាស្ត្រគណបក្សប្រឆាំង។ រដ្ឋមន្ត្រីក្រសួងសុខាភិបាល រូបនេះ ឆ្លើយតបចំពោះការរិះគន់ពីការរុះរើអគារសុខាភិបាល ឬមន្ទីរសុខាភិបាល ជាពិសេសរឿងការដេញថ្លៃថ្នាំពេទ្យមិនមានតម្លាភាពជាដើមនោះថា គឺក្រសួងតែងអនុវត្តទៅតាមនីតិវិធីរបស់រដ្ឋប៉ុណ្ណោះ។
លោក ម៉ម ប៊ុនហេង ដែលព្យាយាមបង្ហាញពីភាពស្អាតស្អំនេះ ក៏ដាក់បន្ទុកឲ្យសួរនាំទៅអង្គភាពប្រឆាំងអំពើពុករលួយបានដែរ ប្រសិនបើសង្ស័យថា ក្រសួងបានប្រព្រឹត្តអំពើពុករលួយនេះមែន។ បើទោះជាបែបណា អ្នកស្រាវជ្រាវការអភិវឌ្ឍយល់ឃើញថា វិស័យសុខាភិបាលដែលជាសេវាដ៏សំខាន់របស់ជាតិ នៅតែពុំទាន់ឃើញមានភាពប្រសើរនៅឡើយទេ នៅតាមមណ្ឌលសុខភាព ឬមន្ទីរពេទ្យបង្អែកជាដើម។
ប្រធានគណៈកម្មាធិការទី១នៃរដ្ឋសភា មកពីខាងគណបក្សប្រឆាំង អះអាងពីការខកចិត្តនៅពេលរដ្ឋមន្ត្រីក្រសួងសុខាភិបាល ឆ្លើយមិនចំទិសដៅ និងមានការទទួលខុសត្រូវដ៏តិចតួច។
លោក អេង ឆៃអ៊ាង តំណាងរាស្ត្រគណបក្សសង្គ្រោះជាតិ និងប្រធានគណៈកម្មការទី១នៃរដ្ឋសភា ឲ្យដឹងក្រោយចេញពីសម័យប្រជុំសភាពពេញអង្គថា ចម្លើយភាគច្រើនរបស់លោក ម៉ម ប៊ុនហេង មិនអាចយកជាការបាន។ បន្ថែមពីលើនេះ ការឆ្លើយរបស់រដ្ឋមន្ត្រីក្រសួងសុខាភិបាលនេះទៀតសោត មិនចំទៅនឹងអ្វីដែលសំណួរបានតាំងឡើងនោះថែមទៀតផង។ លោក អេង ឆៃអ៊ាង បង្ហាញការសោកស្ដាយដែលការឆ្លើយបំភ្លឺរបស់លោក ម៉ម ប៊ុនហេង ទាក់ទិនភាពអសកម្មទៅលើវិស័យសុខាភិបាលនៅពេលនេះ គឺមានការទទួលខុសត្រូវដ៏តិចតួច៖ «ខ្ញុំវាយតម្លៃថា ចម្លើយហ្នឹងជាចម្លើយដែលមានការទទួលខុសត្រូវកម្រិតទាបមែនទែន ព្រោះដែលទាបមានចំណុចជាច្រើនដែលខ្ញុំកត់សំគាល់ដូចករណីដែលគាត់រុញរឿងខ្លះដែលជាសមត្ថកិច្ចនៃការទទួលខុសត្រូវរបស់គាត់ទៅអង្គភាពប្រឆាំងអំពើពុករលួយហ្នឹងឥតត្រឹមត្រូវ»។
ថ្វីបើការឆ្លើយបំភ្លឺរបស់រដ្ឋមន្ត្រីក្រសួងសុខាភិបាល ក្នុងសម័យប្រជុំសភា កាលពីព្រឹកថ្ងៃទី២៩ ខែធ្នូ តបទៅនឹងការតាំងសំណួរចំនួន ១០សំណួរ គឺលោក ម៉ម ប៊ុនហេង បានឆ្លើយទៅតាមសេចក្ដីព្រាងជាច្រើនទំព័រ ដែលបានរៀបចំទុកមុនរួចជាច្រើនប៉ុណ្ណោះ។ នៅពេលឆ្លើយតាមការអានលិខិតព្រាងទុករួចហើយនេះ នៅនាទីចុងក្រោយ ប្រធានរដ្ឋសភាលោក ហេង សំរិន បានផ្ដល់ពេលវេលាឲ្យមានការសួរដេញដោលមួយ ដែលមានរយៈពេលដ៏ខ្លីទៅសមាជិកសភា បានតាំងសំណួរផ្ទាល់មាត់ឡើង។ លោក អេង ឆៃអ៊ាង បញ្ជាក់ថា ចម្លើយផ្ទាល់មាត់នេះទៀតសោត លោក ម៉ម ប៊ុនហេង នៅតែផ្ដល់ចម្លើយមិនប្រាកដប្រជា ជាពិសេសជាងនេះទៅទៀត រដ្ឋមន្ត្រីក្រសួងសុខាភិបាល ឆ្លើយទាំងភិតភ័យ និងទឹកមុខស្លេកស្លាំងផង។
ជុំវិញរឿងនេះ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល ឲ្យដឹងក្នុងពេលឆ្លើយសំណួរក្នុងសម័យប្រជុំសភាថា អ្វីៗដែលក្រសួងបានធ្វើក្នុងពេលកន្លងទៅ គឺអនុវត្តតាមនីតិវិធីរបស់រដ្ឋប៉ុណ្ណោះ។ ម្យ៉ាងវិញទៀត ការដោះដូរអគាររដ្ឋ ឬការដេញថ្លៃថ្នាំពេទ្យជាដើម ធ្វើឡើងដោយតម្លាភាព និងសុក្រឹតបំផុត៖ «ថ្នាំពេទ្យតម្លៃយើងដេញជារួមដូចខ្ញុំបានជម្រាបជូនហើយ គឺដាក់ជាកញ្ចប់ហើយយើងប្រៀបធៀបទៅទីផ្សារ។ យើងដេញជាកញ្ចប់មួយធំ ហើយជាការងារមួយដែលយើងគោរពលក្ខខណ្ឌនីតិវិធីរបស់រដ្ឋ»។
បច្ចុប្បន្នដោយអស់ជំនឿលើវិស័យសុខាភិបាលកម្ពុជា ពលរដ្ឋខ្មែរភាគច្រើនបានចេញទៅព្យាបាលជំងឺ និងពិនិត្យសុខភាពនៅក្រៅប្រទេសវិញម្ដង។ អ្នកដែលកម្រឃើញពិនិត្យសុខភាព ឬទទួលការព្យាបាលជំងឺក្នុងស្រុក អាចជាក្រុមមនុស្សដែលមានធនធានទ្រព្យសម្បត្តិ ជាពិសេសមន្ត្រីរដ្ឋាភិបាល។ ដោយឡែកអ្នកក្រខ្សត់ ឬគ្មានលុយកាក់ ស៊ូទ្រាំព្យាបាលនៅក្នុងស្រុកទាំងប្រថុយប្រថាន។ សព្វថ្ងៃនេះ នៅតាមមន្ទីរពេទ្យរដ្ឋ ត្រូវរងការរិះគន់ពីមជ្ឈដ្ឋាននានាថា ក្រៅពីព្យាបាលពុំសូវមានជំនាញ ឬការព្យាបាលខ្វះការយកចិត្តទុកដាក់ហើយ ថែមទាំងរើសអើងអ្នកជំងឺគ្មានលុយបង់ថ្លៃសេវា និងសីលធម៌របស់គ្រូពេទ្យធ្លាក់ចុះទៀតផង។
អ្នកឃ្លាំមើលការអភិវឌ្ឍសង្គមកម្ពុជា ឲ្យដឹងថា ផ្អែករបាយការណ៍របស់ធនាគារពិភពលោកដែលស្រាវជ្រាវកាលពីពេលថ្មីៗនេះ បង្ហាញថា ប្រជាពលរដ្ឋខ្មែរប្រមាណ ៧០ភាគរយឡើងទៅ គឺត្រូវចំណាយលុយពីហោប៉ៅផ្ទាល់ខ្លួន ដើម្បីព្យាបាលជំងឺ។ និន្នាការនេះ ផ្ទុយពីបណ្ដាប្រទេសក្នុងតំបន់ និងប្រទេសអភិវឌ្ឍន៍ចំនួនវិញ ដែលរដ្ឋាភិបាលត្រូវបំពេញកាតព្វកិច្ចចេញថ្លៃព្យាបាលប្រមាណពី ៧០ ទៅ ៨០ភាគរយ ជំនួសពលរដ្ឋ ហើយសេសសល់ពីនេះ គឺជាបន្ទុករបស់ពលរដ្ឋម្ចាស់ប្រទេសទៅវិញ។
លោក មាស នី អ្នកស្រាវជ្រាវការអភិវឌ្ឍសង្គម មានប្រសាសន៍ថា រឿងការបកស្រាយខុសទិសដៅរបស់លោក ម៉ម ប៊ុនហេង នេះ វាពុំមែនជារឿងថ្មីឡើយ ហើយសម្រាប់លោកផ្ទាល់គឺក៏ពុំមានការភ្ញាក់ផ្អើលអ្វីដែរ។ បន្ថែមពីលើនេះ មូលហេតុដែលនាំឲ្យមានភាពអសកម្មក្នុងវិស័យសុខាភិបាលនេះ ព្រោះតែការផ្ដល់ព័ត៌មាននៅថ្នាក់ក្រោមជាតិមិនត្រឹមត្រូវ ទើបជាហេតុធ្វើឲ្យប្រព័ន្ធសុខាភិបាលនេះដាំក្បាលចុះ៖ «ខ្ញុំគិតថា ការទទួលយកនូវរបាយការណ៍សុទ្ធតែល្អទាំងអស់ពីក្រោមខ្សែបណ្ដោយហ្នឹង បើនិយាយឲ្យមែនទែនទៅធ្វើឲ្យមន្ត្រី ឬរដ្ឋមន្ត្រីល្ងង់ ល្ងង់ដោយសារអី? ដោយសារអ្នកខាងក្រោមរាយការណ៍តែរឿងល្អ ជួលកាលកន្លែងខ្លះនិយាយកុហកទៀត។ ដល់ពេលអ៊ីចឹងទៅធ្វើឲ្យអ្នកខាងលើឥតបានទទួលព័ត៌មានអីដែលច្បាស់លាស់»។
តាមរយៈគោលនយោបាយកែទម្រង់លើវិស័យសុខាភិបាល រដ្ឋាភិបាលរំពឹងថា ការផ្ដល់ប័ណ្ណក្រីក្រឲ្យពលរដ្ឋដើម្បីទទួលបានសិទ្ធិព្យាបាល និងពិនិត្យជំងឺដោយឥតបង់ថ្លៃនេះ នឹងជួយឲ្យប្រព័ន្ធសុខាភិបាលបានប្រសើរឡើងវិញ។ ថ្វីបើរដ្ឋាភិបាលសង្ឃឹមថា ការកែទម្រង់នេះជាផ្នែកមួយជួយស្តារភាពអាម៉ាស់របស់ខ្លួន អ្នកវិភាគសង្គមមើលឃើញថា វានឹងមិនអាចទៅរួចឡើយ ប្រសិនសីលធម៌របស់ក្រុមគ្រូពេទ្យមិនកែលម្អ និងនៅតែរើសអើងអ្នកជំងឺ ជាពិសេសអំពើពុករលួយនៅតែមានកម្រិតខ្ពស់ វិស័យសុខាភិបាលនេះ រងការរិះគន់ថា នៅតែមិនអាចងើបមុខរួចឡើយ៕