លោក ហ៊ុន សែន ប្រកាស​គោល​ជំហរ​ឱ្យ​កូនចៅ​លោក​បន្ត​តំណែង​នាយក​រដ្ឋមន្ត្រី​ត​ជំនាន់

ដោយ ឡេង ម៉ាលី
2022.08.05
Share on WhatsApp
Share on WhatsApp
លោក ហ៊ុន សែន ប្រកាស​គោល​ជំហរ​ឱ្យ​កូនចៅ​លោក​បន្ត​តំណែង​នាយក​រដ្ឋមន្ត្រី​ត​ជំនាន់ ​លោក ហ៊ុន សែន ប្រពន្ធ និងកូនចៅរបស់លោក នៅ​លើ​វេទិកា​ទទួល​សញ្ញាប័ត្រ​បណ្ឌិត​កិត្តិយស ផ្នែក​អភិវឌ្ឍន៍ ពី​សាកលវិទ្យាល័យ​ភូមិន្ទ​ភ្នំពេញ នៅ​ថ្ងៃ​ទី៥ ខែសីហា ឆ្នាំ២០២២។
រូប៖ ហ្វេសប៊ុកលោក ហ៊ុន សែន

លោក ហ៊ុន សែន ប្រកាស​គោល​ជំហរ​ជា​សាធារណៈ អំពី​ការ​ជំរុញ​កូនចៅ​របស់​លោក​ឱ្យ​ចូល​ប្រឡូក​ក្នុង​ឆាក​នយោបាយ ដើម្បី​បន្ត​កាន់​តំណែង​នាយក​រដ្ឋមន្ត្រី​ត​វង្ស​ត្រកូល។ ក្រុម​អ្នក​វិភាគ និង​យុវជន​មើល​ឃើញ​ថា ការ​ប្រកាស​បែប​នេះ​គឺ មាន​បំណង​ចង់​ឱ្យ​កូនចៅ​របស់​លោក​បន្ត​តំណែង​នាយក​រដ្ឋមន្ត្រី​ត​ជំនាន់ ដើម្បី​ថែរក្សា​អំណាច និង​ទ្រព្យ​សម្បត្តិ​គ្រួសារ​ត្រកូល ហ៊ុន។ ពួក​គេ​ថា ការ​ធ្វើ​បែប​នេះ​នឹង​ប៉ះពាល់​ដល់​ប្រយោជន៍​ជាតិ ដោយសារ​អំពើ​ពុករលួយ​របស់​គ្រួសារ​មួយ​នេះ។

ថ្លែង​ក្នុង​វេទិកា​ទទួល​សញ្ញាប័ត្រ​បណ្ឌិត​កិត្តិយស ផ្នែក​អភិវឌ្ឍន៍ ពី​សាកលវិទ្យាល័យ​ភូមិន្ទ​ភ្នំពេញ នៅ​ថ្ងៃ​ទី៥ ខែសីហា លោក ហ៊ុន សែន ថ្លែង​ថា កន្លង​មក​លោក​មិន​ចង់​ឲ្យ​កូន​ចៅ​របស់​លោក ចូល​ពាក់ព័ន្ធ​ក្នុង​រឿង​នយោបាយ​នោះ​ទេ គឺ​ត្រឹម​ឲ្យ​ចូល​បម្រើ​ការ​ក្នុង​ជួរ​កងទ័ព​តែ​ប៉ុណ្ណោះ។ ប៉ុន្តែ​ពេល​នេះ លោក​សម្រេច​ចិត្ត​ជំរុញ​កូន​ចៅ​របស់​លោក​ឱ្យ​ចូល​ប្រឡូក​ក្នុង​ឆាក​នយោបាយ រាប់​ចាប់​តាំង​ពី​ចៅប្រុស​របស់​លោក ដែល​ទើប​បញ្ចប់​ឆ្នាំ​ទី១ នៅ​ក្នុង​ថ្នាក់​សកលវិទ្យាល័យ។ លោក​មាន​បំណង​ចង់​ផ្ទេរ​តំណែង​នាយក​រដ្ឋមន្ត្រី​ពី​កូន​រហូត​ដល់​ចៅ​របស់​លោក៖ «ខ្ញុំ​តែង​ប្រដៅ​កូន​ខ្ញុំ កុំ​ឱ្យ​ពាក់ព័ន្ធ​នឹង​នយោបាយ សុខចិត្ត​ធ្វើ​ទាហាន។ ប៉ុន្តែ​ឥឡូវ​នេះ វា​ហួស​ពេល​ហើយ ខ្ញុំ​នឹង​អំពាវនាវ ជំរុញ​កូន​ខ្ញុំ ចៅ​ខ្ញុំ ឱ្យ​ចូល​ប្រឡូក​ក្នុង​នយោបាយ​ទាំង​អស់»

យុវជន និង​ក្រុម​អ្នក​វិភាគ​លើក​ឡើង​ថា ការ​ប្រកាស​របស់​លោក ហ៊ុន សែន មាន​ចេតនា​ឱ្យ​កូនចៅ​បន្ត​តំណែង​នាយក​រដ្ឋមន្ត្រី​បន្ត​ជំនាន់ ដែល​វា​ជា​ការ​ប៉ះពាល់​ធំធេង​ទៅ​ដល់​ប្រទេស​ជាតិ។

យុវជន និង​ជា​សកម្មជន​ចលនា​មាតា​ធម្មជាតិ លោក លី ចាន់ដារ៉ាវុត យល់​ឃើញ​ថា ថ្វីដ្បិត​ការ​គាំទ្រ​កូន​ឱ្យ​ក្លាយ​ជា​នាយក​រដ្ឋមន្ត្រី​ក្នុង​នាម​ជា​ឪពុក​ម្នាក់ មើល​ទៅ​ហាក់​មិន​មាន​ការ​ទាស់​ខុស​អ្វី​ឡើយ ក៏​លោក​នៅ​តែ​យល់​ឃើញ​ថា លោក ហ៊ុន សែន មិន​គួរ​ប្រកាស​បែប​នេះ​នៅ​ក្នុង​វេទិកា​សាធារណៈ​នោះ​ឡើយ។ លោក​បន្ត​ថា ជំនួស​ឱ្យ​ការ​ប្រកាស​បែប​នេះ លោក​នាយក​រដ្ឋមន្ត្រី ហ៊ុន សែន គួរតែ​ងាក​ទៅ​ចាប់​ផ្ដើម​ធ្វើ​កំណែ​ទម្រង់​នៅ​ក្នុង​ប្រព័ន្ធ​បោះឆ្នោត ដើម្បី​ជំរុញ​ឱ្យ​មាន​ការ​ជ្រើសរើស​មេ​ដឹកនាំ​ដោយ​ស្មើភាព និង​ជា​ការ​ពង្រឹង​លទ្ធិ​ប្រជាធិបតេយ្យ​នៅ​ក្នុង​ប្រទេស​ផង​ដែរ។ លោក​បន្ថែម​ថា ការ​ប្រកាស​នេះ​អាច​នឹង​មាន​ឥទ្ធិពល​ទៅ​លើ​ការ​សម្រេច​ណា​មួយ​របស់​សភា ស្រប​ពេល​កម្ពុជា​បាន​ធ្វើ​វិសោធនកម្ម​រដ្ឋធម្មនុញ្ញ ដែល​ចង់​សំដៅ​ដល់​ការ​ផ្ទេរ​អំណាច​ជា​នាយក​រដ្ឋមន្ត្រី​ពី​ឪពុក​ទៅ​កាន់​កូន៖ «ការ​ដែល​ប្រកាស​គាំទ្រ​កូន​គាត់​ហ្នឹង វា​នឹង​ធ្វើ​ឱ្យ​មាន​ឥទ្ធិពល​ទៅ​ក្នុង​ផ្ទៃក្នុង​បក្ស​គាត់​ផង ទៅ​ក្នុង​សភា​ផង។ ដោយសារ​តែ​ក្នុង​ប្រទេស​យើង​អំណាច​ហ្នឹង​បែងចែក​មិន​ដាច់​ពី​គ្នា។ តាម​ដែល​ខ្ញុំ​មើល​ឃើញ នាយក​រដ្ឋមន្ត្រី​ដូច​ជា​មាន​អំណាច​ខ្លាំង​ទៅ​លើ​រដ្ឋសភា។ អ្វី​ដែល​នាយក​រដ្ឋមន្ត្រី​និយាយ មិន​យូរ​មិន​ឆាប់​ទេ គឺ​រដ្ឋសភា ព្រឹទ្ធសភា​អី​ហ្នឹង គឺ​គេ​នឹង​អនុម័ត​ហើយ»

Hun_Sen_FB_080522.jpg
លោក ហ៊ុន សែន ពេល​ទទួល​សញ្ញាប័ត្រ​បណ្ឌិត​កិត្តិយស ផ្នែក​អភិវឌ្ឍន៍ ពី​សាកលវិទ្យាល័យ​ភូមិន្ទ​ភ្នំពេញ នៅ​ថ្ងៃ​ទី៥ ខែសីហា ឆ្នាំ២០២២។ រូប៖ ហ្វេសប៊ុកលោក ហ៊ុន សែន

នៅ​ក្នុង​ពិធី​ទទួល​សញ្ញាប័ត្រ​ជាមួយ​នឹង​ឯក​សណ្ឋាន​បណ្ឌិត លោក ហ៊ុន សែន ក៏​បាន​លើក​ឡើង​ថា ការ​ធ្វើវិសោធនកម្មរដ្ឋធម្មនុញ្ញលើកទី១០ នៅ​ពេល​នេះ​ពុំ​បាន​ធ្វើ​ឱ្យ​បាត់បង់​តួនាទី និង​អំណាច​របស់​សភា​នោះ​ទេ។ លោក ការពារ​ថា រាជ​រដ្ឋាភិបាល​ស្នើ​ធ្វើ​វិសោធនកម្ម​រដ្ឋធម្មនុញ្ញ​គឺ ដើម្បី​បំពេញ​ចន្លោះ​ខ្វះខាត​ក្នុង​លក្ខខណ្ឌ​នាយក​មន្ត្រី​ស្លាប់ ឬ​លាលែង​ចេញ​ពី​តំណែង មិនមែន​ជា​ការ​រៀបចំ​ការ​ឲ្យ​កូន​របស់​លោក​បន្ត​វេន​គ្រប់គ្រង​អំណាច​នោះ​ទេ។

ឆ្លើយតប​ទៅ​នឹង​ការ​លើក​ឡើង​នេះ អ្នក​វិភាគ​នយោបាយ ​លោក គឹម សុខ ចាត់ទុកថា ការប្រកាស​គាំទ្រ​លោក ហ៊ុន ម៉ាណែត ឱ្យ​ឡើង​ជា​នាយករដ្ឋមន្ត្រី និង​ការ​កែប្រែ​រដ្ឋធម្មនុញ្ញ ជា​ការ​រៀបចំ​ប្លន់​អំណាច មិន​មែន​ជា​ការ​ប្រកួតប្រជែង​តំណែង​នាយក​រដ្ឋមន្ត្រី​នោះ​ឡើយ។ លោក​បន្ត​ថា ការ​ប្លន់​អំណាច​នេះ ត្រូវ​បាន​ធ្វើ​ឡើង​ដោយ​លោក ហ៊ុន សែន តាម​រយៈ​ការ​កែប្រែ​រដ្ឋធម្មនុញ្ញ ដើម្បី​ឱ្យ​លោក​មាន​ឱកាស​បាន​ស្នើ​ទៅ​ព្រះមហាក្សត្រ​ចាត់​តាំង​នាយក​រដ្ឋមន្ត្រី​ដោយ​ខ្លួន​ឯង។ ជាមួយ​គ្នា​នេះ លោក ហ៊ុន សែន ព្យាយាម​ចូល​កៀក​ឱ្យ​ស្និទ្ធ​ជាមួយ​ប្រទេស​ចិន ដើម្បី​សុំ​ការ​គាំទ្រ​ពី​មហាអំណាច​មួយ​នេះ ក្នុង​ការ​តែងតាំង​លោក ហ៊ុន ម៉ាណែត ជា​នាយក​រដ្ឋមន្ត្រី៖ «និយាយ​ពី​គំនិត ចំពោះ​ជាតិ​កម្ពុជា លោក ហ៊ុន សែន គួរ​ត្រូវ​ប្រគល់​ជូន​នូវ​សញ្ញាប័ត្រ​មហា​បណ្ឌិត​លក់​ជាតិ ហើយ​បើ​និយាយ​ទៅ​ដល់​ពី​របៀប​ដឹកនាំ​ក្នុង​ទឹក​ដី​កម្ពុជា​ផ្ទាល់​គួរ​ត្រូវ​ប្រគល់​ជូន​នូវ​សញ្ញាប័ត្រ​មហា​បណ្ឌិត​នីតិ​មាត់ អំណាច​ផ្ដាច់ការ​អាជ្ញា​ទំនើង​ចិត្ត»

កន្លង​មក លោក ហ៊ុន សែន ធ្លាប់​ប្រកាស​ពី​គោល​ជំហរ​គាំទ្រ​កូន​ឱ្យ​បន្ត​តំណែង​ពី​លោក​ជា​ច្រើន​លើក​មក​ហើយ។ ពេល​នោះ គេ​ឃើញ​មាន​មន្ត្រី​របស់​លោក នាំ​គ្នា​ចេញ​ញត្តិ​គាំទ្រ​ជា​ហូរហែ។ ក្នុង​នោះ ក៏​មាន​ស្ថាប័ន​ការពារ​ជាតិ និង​ស្ថាប័ន​តុលាការ​ផង​ដែរ។ ទោះ​ជា​យ៉ាង​ណា​ក្ដី អ្នក​ឃ្លាំមើល​ថា ការ​ប្រកាស​របស់​លោក ហ៊ុន សែន ជា​បន្ត​បន្ទាប់ និង​ការ​កែ​រដ្ឋធម្មនុញ្ញ​ជា​ដើម​នេះ គឺ​ជា​ការ​ពង្រឹង​អំណាច​គ្រួសារ​របស់​លោក ដោយសារ​លោក​មិន​ទុក​ចិត្ត​ផ្ទៃក្នុង និង​មាន​ការ​បែកបាក់​ផ្ទៃក្នុង​ធ្ងន់ធ្ងរ។ ស្រប​ពេល​ជាមួយ​គ្នា​នោះ ក្រុម​អ្នក​ឃ្លាំមើល​ចាត់​ទុក​ថា លោក ហ៊ុន សែន កំពុង​នាំ​កម្ពុជា​ឆ្ពោះ​ទៅ​រក​ការ​ដឹកនាំ​ត​វង្ស​ត្រកូល និង​ធ្វើ​ឲ្យ​កម្ពុជា​ក្លាយ​ជា​ប្រទេស​ផ្ដាច់ការ ផ្ទុយ​ពី​រដ្ឋធម្មនុញ្ញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។