លោក ហ៊ុន សែន ថានឹងធ្វើជាប្រធានបក្សប្រជាជនកម្ពុជាពេលអត់ពីលោក ជា ស៊ីម
2015.04.29
លោកនាយករដ្ឋមន្ត្រី ហ៊ុន សែន ថ្លែងក្នុងពិធីសម្ពោធដាក់ឲ្យដំណើរការវារីអគ្គិសនីស្ទឹងអាតៃ ក្នុងខេត្តពោធិ៍សាត់ នៅព្រឹកថ្ងៃទី២៧ ខែមីនា ឆ្នាំ២០១៤។
អ្នកឃ្លាំមើលស្ថានការណ៍នយោបាយនៅកម្ពុជា បានចាត់ទុកប្រសាសន៍របស់លោកនាយករដ្ឋមន្ត្រី ហ៊ុន សែន ដែលប្រកាសពីការរក្សាអំណាចក្នុងរដ្ឋាភិបាល និងអំណាចក្នុងគណបក្សប្រជាជនកម្ពុជា របស់លោកនោះ គឺជាការឆ្លុះបញ្ចាំងពីឥទ្ធិពលរបស់លោកក្នុងការក្ដោបក្ដាប់អំណាចតែម្នាក់ឯង និងបង្ហាញពីការគ្រប់គ្រងបែបផ្ដាច់ការ គ្មានប្រជាធិបតេយ្យនៅក្នុងផ្ទៃក្នុងគណបក្ស។
លោកនាយករដ្ឋមន្ត្រី ហ៊ុន សែន ថ្លែងនៅក្នុងពិធីសម្ពោធរោងចក្រចម្រាញ់ដូងប្រេងទី២ ខេត្តព្រះសីហនុ ថា តួនាទីប្រធានគណបក្ស និងបេក្ខភាពនាយករដ្ឋមន្ត្រីនៅអាណត្តិក្រោយ នៅតែជារូបលោកដដែល។
លោក ហ៊ុន សែន មានប្រសាសន៍ថា នៅពេលអត់ពី លោក ជា ស៊ីម ទៅ គណបក្សប្រជាជនកម្ពុជា នឹងត្រូវលោកដឹកនាំធ្វើជាប្រធានគណបក្សវិញម្ដង។ លោកអះអាងថា បច្ចុប្បន្ននេះលោកបានដឹកនាំគណបក្សនេះស្រាប់ទៅហើយ។
ការប្រកាសនៅពេលនេះ លោក ហ៊ុន សែន ហាក់ដឹងយ៉ាងច្បាស់ថា លោកនឹងឈ្នះការបោះឆ្នោតទៀត ដោយលោកសន្មតដោយខ្លួនឯងថា បើអត់ពីលោកទៅ ប្រទេសជាតិនឹងមិនមានសេចក្ដីសុខនោះទេ៖ «»។
ទោះជាមានការប្រកាសបែបនេះក្ដី អ្នកវិភាគលើកឡើងថា គណបក្សប្រជាជនកម្ពុជា សង្ឃឹមថានឹងឈ្នះឆ្នោតតិចតួចណាស់ ព្រោះថា ការដឹកនាំរបស់រដ្ឋាភិបាលកន្លងមកមានបញ្ហាជាច្រើនដែលរដ្ឋាភិបាលដោះស្រាយជូនប្រជាពលរដ្ឋមិនបាន។
ក្រៅពីនេះទៀត អ្នកវិភាគបានចាត់ទុកប្រសាសន៍របស់លោកនាយករដ្ឋមន្ត្រី ហ៊ុន សែន នេះថា ជាការឆ្លុះបញ្ចាំងពីគណបក្សប្រជាជនកម្ពុជា គ្មានប្រជាធិបតេយ្យផ្ទៃក្នុង និងជាការបង្ហាញពីឥទ្ធិពលរបស់លោក និងអំណាចប្រមូលផ្ដុំក្រុមគ្រួសាររបស់លោកនាយករដ្ឋមន្ត្រី ដែលមិនចង់ផ្ទេរអំណាចឲ្យអ្នកដទៃ។
អ្នកឃ្លាំមើលផ្នែកអភិវឌ្ឍន៍សង្គម លោកបណ្ឌិត កែម ឡី មានប្រសាសន៍ថា ការថ្លែងរបស់ លោក ហ៊ុន សែន នេះ ជាកាយវិការមិនទទួលខុសត្រូវសម្រាប់ក្មេងជំនាន់ក្រោយនោះទេ៖ «»។
គណបក្សប្រជាជនកម្ពុជា បានធ្វើសមាជកាលពីខែកុម្ភៈ កន្លងទៅ គឺបានបញ្ចូលថ្នាក់ដឹកនាំកំពូលទៅក្នុងគណៈកម្មការគណបក្ស មានដូចជា កូនរបស់លោកនាយករដ្ឋមន្ត្រី ហ៊ុន សែន កូនរបស់លោកឧបនាយករដ្ឋមន្ត្រី ស ខេង កូនរបស់លោកឧបនាយករដ្ឋមន្ត្រី សុខ អាន និងកូនមន្ត្រីជាន់ខ្ពស់មួយចំនួនទៀត។
អ្នកជំនាញខាងវិទ្យាសាស្ត្រនយោបាយ និងជាអ្នកវិភាគឯករាជ្យ លោកបណ្ឌិត រស់ រ៉ាវុធ មានប្រសាសន៍ថា នៅក្នុងរដ្ឋធម្មនុញ្ញ ឥស្សរជននយោបាយណាអាចធ្វើជានាយករដ្ឋមន្ត្រីបាន លុះត្រាណាសភាជាអ្នកជ្រើសរើសចេញពីគណបក្សដែលមានសំឡេងច្រើនជាងគេ ក្រោយពេលបោះឆ្នោត មិនមែនអ្នកណាក៏អាចប្រកាសចង់ធ្វើជានាយករដ្ឋមន្ត្រីបាននោះទេ។ ម្យ៉ាងទៀត ការធ្វើប្រធានគណបក្ស ក៏ត្រូវធ្វើសមាជជ្រើសរើសនៅក្នុងបក្សដែរ៖ «»។
អ្នកវិភាគលើកឡើងថា ការប្រកាសរបស់ លោក ហ៊ុន សែន ពីការមិនធានាសន្តិសុខ បើសិនជាលោកមិនធ្វើជានាយករដ្ឋមន្ត្រីនោះ គឺហាក់ដូចជាការគំរាមកំហែង និងធ្វើឲ្យប៉ះពាល់សតិអារម្មណ៍ប្រជាពលរដ្ឋ តែបើសិនជាគិតពីផ្លូវច្បាប់ជាតិ និងអន្តរជាតិ អ្នកនយោបាយចុះចេញពីតួនាទីនៅក្រោយលទ្ធផលបោះឆ្នោត ដូចមានចែងនៅក្នុងច្បាប់ គឺការចុះចេញពីតួនាទីដោយសន្តិវិធី។
គណបក្សប្រជាជនកម្ពុជា បានបង្កើតឡើងនៅឆ្នាំ១៩៥១ កាលនោះឈ្មោះថា គណបក្សឥណ្ឌូចិន នៅឆ្នាំ១៩៦៩ ប្ដូរឈ្មោះមកថា គណបក្សពលករ។ ឆ្នាំ១៩៧៩ ឈ្មោះថា គណបក្សប្រជាជនបដិវត្តន៍កម្ពុជា និងមកដល់ឆ្នាំ១៩៩៣ ដែលជាពេលប្រកួតប្រជែងតាមបែបប្រជាធិបតេយ្យលើកដំបូង គណបក្សនេះប្ដូរឈ្មោះជា គណបក្សប្រជាជនកម្ពុជា ដែលមាន លោក ជា ស៊ីម ធ្វើជាប្រធានតាំងពីពេលនោះមក។ បច្ចុប្បន្ន លោក ជា ស៊ីម មានវ័យជាង ៨០ឆ្នាំ។ នៅក្នុងសមាជរបស់គណបក្សប្រជាជនកម្ពុជា នោះ គ្មានវត្តមាន លោក ជា ស៊ីម ទេ។ លោកទៅព្យាបាលជំងឺនៅប្រទេសវៀតណាម។ ទាក់ទងបញ្ហានេះ គ្មានមន្ត្រីណាមួយបញ្ជាក់អំពីស្ថានភាពជំងឺ លោក ជា ស៊ីម នៅឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- លោក ហេង សិទ្ធី ត្រូវបានចាប់ខ្លួនដល់រុស្សីក្រោយស្នើឱ្យលោក ហ៊ុន ម៉ាណែត ចុះចេញពីតំណែង
អត្ថបទពេញនិយម
នយោបាយ
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ
- តុលាការថៃចេញដីកាចាប់ខ្លួនជនសង្ស័យជនជាតិខ្មែរគឺលោក លី រតនរស្មី ករណីឃាតកម្មលើលោក លិម គិមយ៉ា
- អាជ្ញាធរកម្ពុជានឹងបញ្ជូនខ្មាន់កាំភ្លើងប្រគល់ឱ្យសមត្ថកិច្ចថៃ នៅថ្ងៃទី១១ មករា
- អាជ្ញាធរត្រៀមបញ្ជូនអតីតឧកញ៉ា ហេង សិទ្ធី មកកម្ពុជា ក្រោយចាប់ខ្លួនបាននៅរុស្ស៊ី