អ្នកវិភាគ​ថា លោក ហ៊ុន ម៉ាណែត នៅ​មិន​ទាន់​មាន​ឥទ្ធិពល និង​កេរ្តិ៍ឈ្មោះ​នៅ​លើ​ឆាក​អន្តរជាតិ

ដោយ មាន ឫទ្ធិ
2019-06-12
អ៊ីម៉ែល
មតិ
Share
បោះពុម្ព
កូនប្រុស​ច្បង​លោក ហ៊ុន សែន គឺ លោក ហ៊ុន ម៉ាណែត (ឆ្វេង) និង​រដ្ឋមន្ត្រីការបរទេស​សិង្ហបុរី លោក វីវ៉ាន បាឡាគ្រីសនន្ត (Vivan Balakrishnan) ក្នុង​ជំនួប​នា​ប្រទេស​សិង្ហបុរី កាល​ពីថ្ងៃ​ទី១១ ខែ​មិថុនា ឆ្នាំ​២០១៩។
កូនប្រុស​ច្បង​លោក ហ៊ុន សែន គឺ លោក ហ៊ុន ម៉ាណែត (ឆ្វេង) និង​រដ្ឋមន្ត្រីការបរទេស​សិង្ហបុរី លោក វីវ៉ាន បាឡាគ្រីសនន្ត (Vivan Balakrishnan) ក្នុង​ជំនួប​នា​ប្រទេស​សិង្ហបុរី កាល​ពីថ្ងៃ​ទី១១ ខែ​មិថុនា ឆ្នាំ​២០១៩។
រូប​ពី​ហ្វេសប៊ុក លោក ហ៊ុន ម៉ាណែត

អ្នក​ជំនាញ​វិទ្យាសាស្ត្រ​នយោបាយ លោក ឯម សុវណ្ណារ៉ា លើកឡើង​ថា​កូនប្រុស​ច្បង​លោក ហ៊ុន សែន គឺ លោក ហ៊ុន ម៉ាណែត នៅ​មិន​ទាន់​មាន​ឥទ្ធិពល​នៅ​លើ​ឆាក​អន្តរជាតិ​នៅឡើយ​ទេ​។ លោក​ថា គណបក្ស​កាន់អំណាច​របស់​លោក ហ៊ុន សែន កំពុង​ព្យាយាម​បង្ហាញ​មុខមាត់​លោក ហ៊ុន ម៉ាណែត ដែល​អាច​នឹង​ដើរតួ​ជា​មេដឹកនាំ​សំខាន់​របស់​កម្ពុជា​នា​ពេល​អនាគត​។ ការ​លើកឡើង​នេះ ធ្វើឡើង​ស្រប​ពេល​ដែល​លោក ហ៊ុន ម៉ាណែត កំពុង​បំពេញ​ទស្សនកិច្ច​ណែនាំ​ខ្លួន​ក្នុងនាម​ជា​មេបញ្ជាការ​កងទ័ពជើងគោក ទៅកាន់​ប្រទេស​សិង្ហបុរី ពី​ថ្ងៃ​ទី១១ ដល់​ថ្ងៃទី១៣ មិថុនា។

លោក ឯម សុវណ្ណារ៉ា ថា តាមរយៈ​ដំណើរ​ទស្សនកិច្ច​ណែនាំ​ខ្លួន​របស់​លោក ហ៊ុន ម៉ាណែត ទៅ​កាន់​ក្រុម​មេដឹកនាំ​ប្រទេស​សិង្ហបុរី​នា​ពេល​នេះ គណបក្ស​កាន់អំណាច​របស់​លោក ហ៊ុន សែន កំពុង​ព្យាយាម​រំលេច​មុខមាត់​លោក ហ៊ុន ម៉ាណែត នៅ​លើ​ឆាក​អន្តរជាតិ និង​ព្យាយាម​រក្សា​កិច្ចសហការ​ល្អ​រវាង​កម្ពុជា និង​សិង្ហបុរី៖ «ឯកឧត្តម ហ៊ុន ម៉ាណែត គាត់​ជា​មេបញ្ជាការ​កងទ័ពជើងគោក និង​ជា​អគ្គ​មេបញ្ជាការ​រង​ទូទាំង​ប្រទេស​។ អ៊ីចឹង គាត់​កាន់​តួនាទី​ធំ ហើយក៏​ជា​ចំណុច​មួយ ដែល​គណបក្ស​កាន់អំណាច​ចង់​រំលេច​អ្នក​ដែល​ដើរតួ​នៅ​ក្នុង​នយោបាយ​ការបរទេស​នៅ​ក្នុង​ថ្ងៃ​អនាគត។ អ៊ីចឹង ជា​ទិដ្ឋភាព​មួយ​ដែល​យើង​អាច​មើល​ឃើញ​អំពី​ការ​បង្ហាញ ឬ​ការ​ចង់​ឱ្យ​មាន​កិច្ច​សហប្រតិបត្តិការ​ល្អ​រវាង​កម្ពុជា និង​សិង្ហបុរី​នៅ​ក្នុង​ក្របខ័ណ្ឌ​អាស៊ាន ក្នុង​តំបន់ ហើយក៏​ចង់​រំលេច​លើ​ឆាក​អន្តរជាតិ​ដែរ គឺ​ពាក់ព័ន្ធ​នឹង​អនាគត​នៃ​អ្នកដឹកនាំ​ដែរ​។ នេះ​ជា​រូបភាព​ដែល​យើង​អាច​មើល​ឃើញ»

លោក ហ៊ុន ម៉ាណែត កំពុង​ធ្វើ​ទស្សនកិច្ច​ណែនាំ​ខ្លួន​ក្នុងនាម​ជា​មេបញ្ជាការ​កងទ័ពជើងគោក ទៅកាន់​ប្រទេស​សិង្ហបុរី រយៈពេល​បី​ថ្ងៃ ពី​ថ្ងៃ​ទី១១ ដល់​ថ្ងៃ​ទី១៣ មិថុនា​។ ដំណើរ​ទស្សនកិច្ច​នេះ ក៏​ធ្វើឡើង​គាប់​ជួន​នៅ​រយៈពេល​ប៉ុន្មាន​ថ្ងៃ​មុន​នេះ ទំនាក់ទំនង​រវាង​កម្ពុជា និង​សិង្ហបុរី រង​ភាព​រកាំរកូស ក្រោយ​នាយករដ្ឋមន្ត្រី​សិង្ហ​បុរី លោក លី ស៊ានឡុង បាន​បញ្ចេញ​សារ​ពាក់ព័ន្ធ​នឹង​ការឈ្លានពាន​របស់​វៀតណាម​មក​លើ​កម្ពុជា កាលពី ៤០ ឆ្នាំមុន​។ កាលណោះ មន្ត្រី​ជាន់ខ្ពស់​នៃ​របប​លោក ហ៊ុន សែន រួម​ទាំង​ក្រសួងការបរទេស​កម្ពុជា​ផង បាន​ចេញ​មុខជា​បន្តបន្ទាប់​ការពារ​អំពើ​ឈ្លានពាន​របស់​វៀតណាម ដោយ​ប្រកាស​សោកស្ដាយ​ចំពោះ​សារ​នាយករដ្ឋមន្ត្រី​សិង្ហបុរី​នេះ រឿង​វៀតណាម​ឈ្លានពាន​កម្ពុជា​។ មន្ត្រី​ជាន់ខ្ពស់​ទាំងនោះ មាន​ដូចជា​លោក ហ៊ុន សែន ខ្លួនឯង កូនប្រុស​លោក គឺ​លោក ហ៊ុន ម៉ានី និង លោក ទៀ បាញ់ ជាដើម បាន​ចេញ​មុខ​មក​ថ្លែង​ការពារ​វៀតណាម ថា ការ​លើកឡើង​របស់​សិង្ហបុរី​នេះ ជា​ការ​ប្រមាថ​វៀតណាម ហើយ​ជា​ការ​ចូលរួម​ចំណែក​គាំទ្រ​របប​ខ្មែរក្រហម និង​ចង់​ឱ្យ​របប​នេះ​វិល​ត្រឡប់​មក​កម្ពុជា​ឡើងវិញ​។ ពួកគេ​ថែមទាំង​បង្ហាញ​ចេតនា​ចង់​ឱ្យ​សិង្ហបុរី​កែតម្រូវ ការ​ចោទ​ថា វៀតណាម​ឈ្លានពាន​កម្ពុជា​នេះ ដោយ​ចង់​កោះហៅ​មន្ត្រី​ការទូត​សិង្ហបុរី​ប្រចាំ​កម្ពុជា មក​សួរនាំ​ផង​។ ក៏ប៉ុន្តែ ក្រោយមក ការ​ធ្វើ​ឱ្យ​កម្ពុជា​ថ្នាំងថ្នាក់​នេះ បាន​បិទ​បញ្ចប់​ទៅវិញ ក្រោយពី​រដ្ឋមន្ត្រីការបរទេស​ទាំងពីរ​បាន​សន្ទនា​គ្នា​តាម​ទូរស័ព្ទ ដោយ​គូស​បញ្ជាក់​ថា ប្រទេស​ទាំងពីរ​នៅ​បន្ត​ជា​អ្នកជិតខាង​ល្អ ហើយ​ខិតខំ​បំភ្លេច​អតីតកាល​ចោល​។ ជា​ការ​គួរ​ឱ្យ​កត់សម្គាល់ លោក ហ៊ុន ម៉ាណែត ហាក់​ស្ងៀមស្ងាត់ និង​មិនបាន​បញ្ចេញ​សារ​ណាមួយ​នៅ​លើ​ហ្វេសប៊ុក​របស់​លោក ជុំវិញ​បញ្ហា​ថ្នាំ​ថ្នាក់​ជាមួយ​សិង្ហបុរី​នេះ​ទេ។

ក្រសួងការបរទេស​សិង្ហបុរី ឱ្យ​ដឹង​កាលពី​ថ្ងៃ​ទី១១ មិថុនា ថា ក្នុង​ដំណើរ​ទស្សនកិច្ច​ណែនាំ​ខ្លួន​នេះ លោក ហ៊ុន ម៉ាណែត មាន​ផែនការ​ជួប​ជាមួយ​នឹង​ឧបនាយករដ្ឋមន្ត្រី និង​រដ្ឋមន្ត្រី​ក្រសួង​ហិរញ្ញវត្ថុ​សិង្ហបុរី និង​រដ្ឋមន្ត្រី​ក្រសួងការពារជាតិ​សិង្ហបុរី នៅ​ថ្ងៃទី១២ មិថុនា​។ លោក​ក៏បាន​ជួប​ជាមួយ​ទេសរដ្ឋមន្ត្រី និង​ជា​រដ្ឋមន្ត្រី​សម្របសម្រួល​សន្តិសុខ​ជាតិ​សិង្ហបុរី និង​រដ្ឋមន្ត្រី​ក្រសួងការបរទេស​សិង្ហបុរី កាលពី​ថ្ងៃ​ទី១១ មិថុនា។

ក្រោយ​ជំនួប​នេះ រដ្ឋមន្ត្រីការបរទេស​សិង្ហបុរី លោក វីវ៉ាន បាឡាគ្រីសនន្ត (Vivan Balakrishnan) បាន​សរសេរ​សារ​បង្ហោះ​នៅ​លើ​បណ្ដាញ​ទ្វីធ័រ (Twitter) របស់​លោក​ថា លោក និង​លោក ហ៊ុន ម៉ាណែត បាន​ពិភាក្សា​បញ្ហា​ប្រឈម​កំពុង​កើតមាន​ក្នុង​តំបន់ និង​ឯកភាព​ថា ជា​ការ​សំខាន់​ដែល​ប្រទេស​ទាំងពីរ​ធ្វើ​កិច្ច​សហប្រតិបត្តិការ​ទ្វេភាគី និង​នៅ​ក្នុង​តំបន់​អាស៊ាន ដើម្បី​ដោះស្រាយ​បញ្ហា​ទាំងនេះ​។ លោក​គូស​បញ្ជាក់​ថា សិង្ហបុរី និង​កម្ពុជា គឺជា​មិត្តភ័ក្ដិ​ចាស់ ហើយ​ថា កិច្ច​សហ​ប្រតិបត្តិ​ការ​គ្រប់​វិស័យ​ទូលំទូលាយ​របស់​ប្រទេស​ទាំងពីរ បាន​ផ្ដល់​អត្ថប្រយោជន៍​ដល់​ប្រទេស​ទាំងពីរ។

លោក​រដ្ឋមន្ត្រីការបរទេស​សិង្ហបុរី និង​លោក ហ៊ុន ម៉ាណែត ក៏បាន​ស្វាគមន៍​គំនិត​ផ្ដួចផ្ដើម កិច្ច​ពិគ្រោះ​យោបល់​រវាង​ក្រសួងការបរទេស​កម្ពុជា និង​សិង្ហបុរី ដែល​នឹង​ប្រព្រឹត្តិ​ទៅ​នៅ​ថ្ងៃទី១៩ មិថុនា ឆ្នាំ​២០១៩។ ពួកគេ​ថា គំនិត​ផ្ដួចផ្ដើម​នេះ នឹង​លើក​កម្ពស់​នូវ​ការ​យល់ដឹង​គ្នា​ទៅវិញទៅមក និង​ផ្លាស់ប្ដូរ​ទស្សនៈ​រវាង​ក្រសួង​ទាំងពីរ នៅ​កម្រិត​ថ្នាក់​ការងារ។

ជុំវិញ​ដំណើរ​ទស្សនកិច្ច​ណែនាំ​ខ្លួន​របស់​លោក ហ៊ុន ម៉ាណែត នេះ លោក ឯម សុវណ្ណារ៉ា មាន​ប្រសាសន៍ថា លោក ហ៊ុន ម៉ាណែត នៅ​មិន​ទាន់​មាន​កិត្តិនាម​សុះសាយ​ក្នុងចំណោម​ក្រុម​មេដឹកនាំ​ពិភពលោក​នៅឡើយ​ទេ​។ ដូច្នេះ​ហើយ លោក​ថា ទើប​​បាន​ជា​គណបក្ស​កាន់អំណាច​ព្យាយាម​បង្ហាញ​មុខមាត់​របស់​លោក៖ «ឥទ្ធិពល​លោក ឬ​កិត្តិនាម​លោក​នៅ​លើ​ឆាក​អន្តរជាតិ គឺ​អត់​ទាន់​សុះសាយ ឬ​សាយភាយ​ច្រើន​ទេ ដោយសារតែ​លោក​ទើបតែ​បញ្ចេញ​មុខមាត់ ឬក៏​ដើរតួ​នៅ​ក្នុង​ឆាក​អន្តរជាតិ គឺ​ទើបតែ​ចាប់ផ្ដើម​ទេ។ ថ្វីត្បិតតែ​លោក​ចាប់ផ្ដើម​នៅ​ក្នុង​ឆាក​ផ្ទៃក្នុង​នយោបាយ​ក្នុងស្រុក​ច្រើន តែ​នៅ​ក្នុង​ឆាក​អន្តរជាតិ​នៅ​តិច​នៅឡើយ​ទេ។ មិនទាន់​ឃើញ​ជា​ការ​រួមចំណែក​នៅ​ក្នុង​សមិទ្ធផល ឬ​កិច្ចការ​អន្តរជាតិ​ធំៗ​ឱ្យ​អន្តរជាតិ​ចាប់អារម្មណ៍​នៅ​ឡើយ​​ទេ»

នៅ​រយៈពេល​ប៉ុន្មាន​ខែ​មុន​ព្រឹត្តិការណ៍​បោះឆ្នោត​ក្លែងក្លាយ​កាលពី​ឆ្នាំ ២០១៨ កូនប្រុស​ច្បង​របស់​លោក ហ៊ុន សែន គឺ​លោក ហ៊ុន ម៉ាណែត បាន​ជួប​ជាមួយ​ក្រុម​មេដឹកនាំ​ថ្នាក់​តំបន់​ក្នុង​ជំនួប​ឯកជន​មិន​ធ្លាប់​មាន​ពី​មុន​មក រួមមាន​នាយករដ្ឋមន្ត្រី​ជប៉ុន លោក ស៊ិន ហ្សូអាបេ (Shinzo Abe) និង​នាយករដ្ឋមន្ត្រី​សិង្ហបុរី លោក លី សៀនឡុង (Lee Hsien Loong) ជាដើម។ ជំនួប​ដ៏​កម្រ​នៅ​ពេល​នោះ ទំនងជា​លោក ហ៊ុន សែន ចង់​បង្ហាញ​មុខ និង​ណែនាំ​កូនប្រុស​របស់​លោក​រូប​នេះ ឱ្យ​មេដឹកនាំ​ក្នុង​តំបន់​ទាំងនោះ ស្គាល់​ជា​បណ្ដើរៗ ហើយក៏​ត្រូវ​បាន​ប្រព័ន្ធ​ផ្សព្វផ្សាយ​របស់​លោក ហ៊ុន សែន យក​ទៅ​ចុះផ្សាយ​យ៉ាង​ព្រោងព្រាត​ផង​ដែរ​។ លោក ហ៊ុន សែន កាល​ពី​ពេល​ថ្មីៗ​ នេះ បាន​ប្រកាស​ថា នឹង​មិន​ឱ្យ​មានការ​ដំឡើង​តំណែង ឬ​ឋានន្តរសក្ដិ​លោក ហ៊ុន ម៉ាណែត ជា​នាយ​ឧត្ដមសេនីយ៍​ផ្កាយ​មាស ៤ នោះ​ទេ​។ ក៏ប៉ុន្តែ នៅ​មិន​ដល់ ១​ខែ​មុន​ព្រឹត្តិការណ៍​បោះឆ្នោត​ក្លែងក្លាយ លោក ហ៊ុន សែន បាន​ពន្លឿន​តំណែង​លោក ហ៊ុន ម៉ា​ណែ​ត ឱ្យ​ក្លាយ​ជា​នាយសេនាធិការ​ចម្រុះ​ស្ដីទី និង​ជា​មេបញ្ជាការ​កងទ័ពជើងគោក​ស្ដីទី បន្ថែម​លើ​មុខងារ​បច្ចុប្បន្ន​របស់​លោក ដែល​ជា​មេបញ្ជាការ​កម្លាំង​ពិសេស​ប្រឆាំង​ភេរវកម្ម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

The whole world would be ban all dictator HunSen family members in politic

H.Maneth can't be any pm at all,because the whole world cannot accept H.Maneth who was a son of dictator HunSen family,and they won't let any family of evil dictator to be leader of Cambodia anymore"stop Cambodian pple suffering".There is the only chance that H.Maneth can do is do something else rather better than pm"dictator causing for his children".Especially,to avoid any personal conflict of CCP's members who'd been worked for decades and no one promote to be their CCP leader like"S.Kheng,TBanh+others"still waiting on the lists.Trust us my friend from now on the whole world or international community would be ban all dictator HunSen family member in politic or to be pm of Cambodia anymore"ENOUGH IS ENOUGH".

Jun 13, 2019 11:28 AM

គេហទំព័រ​ទាំងមូល