"ការចុះជួបកម្មករជាថ្មីរបស់លោក ហ៊ុន សែន ជាការបង្វែរស្ថានការណ៍ក្រោយបោះឆ្នោត"
2018.08.02
លោក ហ៊ុន សែន ចាប់ផ្ដើមធ្វើយុទ្ធនាការចុះជួបជាមួយកម្មករនៅតាមរោងចក្រ ដើម្បីរកសំឡេងគាំទ្រសាជាថ្មី ក្រោយពីបានផ្អាកនៅមុនការបោះឆ្នោត ដែលគ្មានគណបក្សប្រឆាំងដ៏ធំជាងគេចូលរួមប្រកួតប្រជែងនោះ។ អ្នកវិភាគ លើកឡើងថា យុទ្ធនាការនេះគ្រាន់តែជាការផ្គាប់ចិត្តក្រុមកម្មករ និងប្រជាពលរដ្ឋ ដើម្បីបង្វែរស្ថានការណ៍កុំឲ្យមានការចាប់អារម្មណ៍នឹងការរិះគន់ពីសហគមន៍អន្តរជាតិប៉ុណ្ណោះ។
លោក ហ៊ុន សែន បានជំរុញឲ្យអាជ្ញាធរពាក់ព័ន្ធត្រូវបន្តយកចិត្តទុកដាក់ពីសុខទុក្ខរបស់ក្រុមកម្មករឲ្យបានប្រសើរបន្ថែមទៀត បើទោះជាបោះឆ្នោតរួចហើយក្ដី ការអះអាងនេះ ធ្វើឡើងក្នុងពេលដែលលោកចុះជួបកម្មករ នៅព្រឹកថ្ងៃទី២ សីហា។ លោក ហ៊ុន សែន អះអាងទៀតថា បើទោះជាបីបោះឆ្នោតរួចហើយក្ដី ក៏មិនអាចបញ្ឈប់ចុះជួបក្រុមកម្មករបានឡើយ ហើយក៏មិនដូចដែលក្រុមអ្នករិះគន់តែងតែបានលើកឡើងកន្លងមកថា ការជួបកម្មករគ្រាន់តែការរកសំឡេងឆ្នោតនោះ គឺមិនដូច្នោះនោះឡើយ៖ «ខ្ញុំសុំប្រាប់ទៅវិញថា ក្នុងឋានៈជានាយករដ្ឋមន្ត្រី ខ្ញុំមានសិទ្ធិធ្វើជាមួយនឹងការដាស់តឿនបែប ខ្ញុំមានសិទ្ធិធ្វើទេ នូវការបម្រើប្រជាពលរដ្ឋ ខ្ញុំមានសិទ្ធិធ្វើទេ នូវការឲ្យប្រជាពលរដ្ឋគាំទ្ររដ្ឋាភិបាលក៏ដូចជាបក្សកាន់អំណាច។ ឥឡូវមិនមែនជាពេលយុទ្ធនាការទេ ក្រោយបោះឆ្នោតហើយខ្ញុំមានសិទ្ធិនិយាយទេ ខ្ញុំពិតជាមានសិទ្ធិ សុំយល់ឲ្យច្បាស់ពីហ៊ុន សែន»។
លោក ហ៊ុន សែន ក៏បានដាក់បទបញ្ជាឲ្យសមាជិកគណបក្សរបស់ខ្លួនទាំងអស់ត្រូវខិតខំបម្រើ និងដោះស្រាយបញ្ហានានារបស់ប្រជាពលរដ្ឋដោយស្មោះស្ម័គ្រ នឹងឲ្យបានសកម្មច្រើនជាងមុនទ្វេដង ហើយបុរសខ្លាំងរូបនេះ មានមោទនភាពភាពទៀតថា ពលរដ្ឋបានបោះឆ្នោតជូនគណបក្សរបស់ខ្លួន យ៉ាងភ្លូកទឹកភ្លូកដី ខណៈដែលគ្មានគណបក្សសង្គ្រោះជាតិដែលជាដៃគូប្រកួតប្រជែងដ៏សំខាន់នោះ ដូច្នេះត្រូវដឹងគុណដល់ម្ចាស់ឆ្នោត។
អ្នកវិភាគវ័យក្មេងលោក ហង្ស វិទូ លើកឡើងថា សំដីរបស់លោក ហ៊ុន សែន នៅពេលនេះ មិនមែនជាការចង់ជួយដល់កម្មករពិតប្រាកដនោះទេ គឺគ្រាន់តែជាការបង្វែរស្ថានការណ៍ ដល់អ្នកដែលមិនពេញចិត្តនឹងលទ្ធផលបោះឆ្នោត កាលពីថ្ងៃទី២៩ កក្កដា ឲ្យទៅជារឿងមួយផ្សេងទៀត ដើម្បីកុំឲ្យប្រជាពលរដ្ឋចាប់អារម្មណ៍នឹងការរិះគន់ពីសហគមន៍អន្តរជាតិ។ ប៉ុន្តែលោកយល់ថា យុទ្ធនាការនេះនឹងមិនបានសម្រេចទេ ប្រសិនបើលោក ហ៊ុន សែន មិនព្រមដោះស្រាយបញ្ហាចម្បងដែលប្រជាពលរដ្ឋកំពុងតែជួបប្រទះសព្វថ្ងៃនោះ៖ «ហើយរឿងនេះ វាចាំបាច់ត្រូវតែធ្វើហើយ ដោយសារតែប្រទេសជាតិមួយ មិនមែនមានតែគណបក្សកាន់អំណាចតែមួយនោះទេ ហើយធ្វើអ្វីដែលយើងព្រួយបារម្ភអាណត្តិនេះ កម្ពុជាអាចមានសភាឯកបក្សតែម្ដង មានន័យថា ជោគវាសនាប្រទេសជាតិទាំងអស់ធ្លាក់ទៅលើកណ្ដាប់ដៃបក្សតែមួយ»។
ទោះជាយ៉ាងណាប្រធានចលនាសង្គ្រោះជាតិ លោក សម រង្ស៊ី មិនទទួលស្គាល់ដំណើរការបោះឆ្នោតដែលរៀបចំឡើង ដោយលោក ហ៊ុន សែន នោះឡើយ ហើយលោកប្រៀបប្រដូចលទ្ធផលបោះឆ្នោតមួយនេះថា ជាជ័យជំនះដោយសារការលួចបន្លំសន្លឹកឆ្នោត។ ទន្ទឹមគ្នានេះ លោក សម រង្ស៊ី អះអាងទៀតថា គណបក្សសង្គ្រោះជាតិនៅតែរឹងមាំ ហើយមិនទៅណាឆ្ងាយពីប្រជាពលរដ្ឋនោះទេ។ អតីតប្រធានគណបក្សប្រឆាំងរូបនេះ មានជំនឿថា ពលរដ្ឋភាគច្រើននៅតែគាំទ្រគណបក្សសង្គ្រោះជាតិតែមួយគត់ ដើម្បីដឹកនាំកម្ពុជាឆ្ពោះទៅរកការរីកចម្រើនយ៉ាងឆាប់រហ័ស ដូច្នេះលោកថា គណបក្សសង្គ្រោះជាតិនឹងមកសង្គ្រោះពលរដ្ឋក្នុងពេលឆាប់ៗនេះ៖ «សហគមន៍អន្តរជាតិទាំងមូល មហាអំណាចដែលមានកាន់លទ្ធិប្រជាធិបតេយ្យ គាំទ្រពេញទំហឹងការតស៊ូរបស់ប្រជាពលរដ្ឋខ្មែរ ទប់ស្កាត់ការទៅរករបបផ្ដាច់ការ របបបក្សតែមួយ ដូចកាលពីសម័យមុនកិច្ចព្រមព្រៀងទីក្រុងបារីសឆ្នាំ១៩៩១។ ការតស៊ូរបស់ប្រជាពលរដ្ឋខ្មែរដើម្បីសេរីភាព ដើម្បីយុត្តិធម៌ ដើម្បីប្រជាធិបតេយ្យនឹងទទួលបានជោគជ័យ ជាពុំខាន ក្នុងពេលឆាប់នេះ ដោយប្រជាពលរដ្ឋយល់ច្បាស់ថា ត្រូវតែរួមរួមគ្នាជុំវិញគណបក្សសង្គ្រោះជាតិ»។
ថ្មីៗនេះ សហគមន៍អន្តរជាតិ រួមមានសហរដ្ឋអាមេរិក សហភាពអឺរ៉ុប អង់គ្លេស អូស្ត្រាលី បារាំងអាល្លឺម៉ង់ និងប្រទេសជាច្រើនផ្សេងទៀត បានចេញសេចក្ដីថ្លែងការណ៍ជាបន្តបន្ទាប់ ចាត់ទុកការបោះឆ្នោតថ្ងៃទី២៩ កក្កដា ដែលរបបលោកហ៊ុន សែនរៀបចំធ្វើឡើងនោះ ជាការបោះឆ្នោតដែលមិនសេរី មិនត្រឹមត្រូវ និងមិនស្របតាមគោលការណ៍ប្រជាធិបតេយ្យឡើយ ហើយក៏មិនបានឆ្លុះបញ្ចាំងពីឆន្ទៈពិតប្រាកដរបស់ប្រជាពលរដ្ឋខ្មែរដែរ។ ក្រុមប្រទេសប្រជាធិបតេយ្យវាយតម្លៃបែបនេះ ដោយសារនៅមុនការបោះឆ្នោត របបលោក ហ៊ុន សែន បានរំលាយគណបក្សសង្គ្រោះជាតិ និងហាមប្រាមថ្នាក់ដឹកនាំគណបក្សនេះចំនួន ១១៨នាក់ មិនឱ្យធ្វើសកម្មភាពនយោបាយរយៈពេល ៥ឆ្នាំ ការចាប់ខ្លួនលោក កឹម សុខា ដាក់ពន្ធនាគារជិត ១ឆ្នាំ ដោយគ្មានការកាត់ទោស ការធ្វើទុក្ខបុកម្នេញលើក្រុមអង្គការសង្គមស៊ីវិល និងការវាយបង្ក្រាបឥតឈប់ឈរលើសារព័ត៌មានឯករាជ្យជាដើម។ ប្រទេសខ្លះដូចជា សហរដ្ឋអាមេរិកជាដើម បានប្រកាសថា ពួកគេនឹងពិចារណាលើជំហានបន្ទាប់ក្នុងការឆ្លើយតបនឹងការបោះឆ្នោតនេះ ដែលអាចពង្រីកបន្ថែមទៀតនូវទណ្ឌកម្មមិនផ្ដល់ទិដ្ឋាការដល់របបក្រុងភ្នំពេញដូចដែលអាមេរិកបានដាក់ចេញកាលពីខែធ្នូ ឆ្នាំ២០១៧ ។ ចំណែកសហភាពអឺរ៉ុបវិញ ក៏កំពុងពិចារណាលើគម្រោងដកប្រព័ន្ធអនុគ្រោះពន្ធ ផ្នែកពាណិជ្ជកម្មពីកម្ពុជាដែរ ដែលជាទណ្ឌកម្មឆ្លើយតបនឹងការបំផ្លាញលទ្ធិប្រជាធិបតេយ្យដែលធ្វើឡើងដោយរបបលោក ហ៊ុន សែន នោះ។
លោក ហង្ស វិទូ លើកឡើងថា សព្វថ្ងៃពលរដ្ឋមានការព្រួយបារម្ភ ៣យ៉ាង គឺបារម្ភខ្លាចមានទណ្ឌកម្មផ្នែកសេដ្ឋកិច្ចពីលោកខាងលិច ហើយធ្វើឲ្យប៉ះពាល់ដល់ប្រាក់ចំណូលប្រចាំថ្ងៃរបស់ពលរដ្ឋថយចុះ បារម្ភទីពីជោគវាសនារបស់ប្រទេសជាតិ នឹងធ្លាក់លើកណ្ដាប់ដៃរបស់លោក ហ៊ុន សែន ដដែល ហើយធ្វើឲ្យជីវភាពរបស់ពលរដ្ឋនៅតែក្រីក្រ ហើយអាចក្រជាងមុន និងបារម្ភខ្លាចមានការរើសអើងផ្នែកនយោបាយ ដោយសារពលរដ្ឋមួយចំនួនមិនបានទៅបោះឆ្នោត ហើយក្រុមគណបក្សកាន់អំណាចបានកត់សំគាល់ទុករួចជាស្រេច ហើយអាចនឹងធ្វើទុក្ខបុកម្នេញមកលើពួកគាត់នៅថ្ងៃក្រោយ៕