អាជ្ញាធររដ្ឋាភិបាលលោក ហ៊ុន ម៉ាណែត បានចាប់ខ្លួនអនុប្រធានក្រុមការងារបណ្ដោះអាសន្នរបស់គណបក្សកម្លាំងជាតិខេត្តកំពង់ចាម និងជាបេក្ខជនក្រុមប្រឹក្សាខេត្តលេខរៀងទី១ គឺលោក មឺ សេងហ៊ ហៅ គា វិសាល នៅរសៀលនៅថ្ងៃទី១៥ ខែមីនា។
ជំទប់ទី២នៃឃុំកោះមិត្តដែលជាប្រពន្ធរបស់លោក គា វិសាល គឺអ្នកស្រី ញ៉ែ សុខឿន ប្រាប់វិទ្យុអាស៊ីសេរី នៅយប់នៅថ្ងៃទី១៥ ខែមីនា ថា ប៉ូលិសមកពីស្នងការនគរបាលខេត្តកំពង់ចាម និងក្រសួងមហាផ្ទៃជាច្រើននាក់បានឃាត់ខ្លួនប្តីអ្នកស្រីអំឡុងពេលជិះម៉ូតចេញពីផ្ទះនៅភូមិកោះប៉ែន ស្រុកកំពង់សៀម។ អ្នកស្រីបន្តថា សមត្ថកិច្ចក៏បានរុញប្តីអ្នកស្រីបញ្ជូនឡានដឹកទៅសាកសួរនៅអគ្គស្នងការនគរបាលជាតិពាក់ពាក់នឹងរឿងញុះញង់។ អ្នកស្រីចាត់ការចាប់ខ្លួននេះជារឿងនយោបាយដើម្បីគំរាមកំហែងបំបាក់ស្មារតីលើសកម្មជនគណបក្សប្រឆាំងនៅតាមមូលដ្ឋានដែលកំពុងតស៊ូយ៉ាងសកម្មឱ្យសង្គមមានប្រជាធិបតេយ្យពិតប្រាកដ។
ជុំវិញរឿងនេះ គណបក្សកម្លាំងបានចេញសេចក្តីថ្លែងការព្រួយបារម្ភ និងចាប់ករណីចាប់ខ្លួនលោក គា វិសាល នេះជារូបភាពបំភិតបំភ័យ និងបង្កឱ្យបរិយាកាសនយោបាយអាប់អួក្នុងដំណើរការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាស្រុក ក្រុង ខណ្ឌអាណត្តិទី៤។ គណបក្សកម្លាំងជាតិអំពាវនាវដល់សមត្ថកិច្ចដោះលែងលោក គា វិសាល ឱ្យមានសេរីភាពឡើងវិញដើម្បីធានាបរិយាកាសនយោបាយប្រសើរសម្រាប់ការបោះឆ្នោតក្រុមប្រឹក្សាខាងមុខនេះ។
លោក គា វិសាល ធ្លាប់បានរត់ភៀសខ្លួនទៅជ្រកកោននយោបាយក្នុងប្រទេសថៃមួយរយៈដើម្បីគេចពីអាជ្ញាធរតាមធ្វើទុក្ខបុកម្នេញ ហើយលោកតែងប្រើប្រាស់បណ្ដាញសង្គមរិះគន់ភាពអសកម្មរបស់រដ្ឋាភិបាល ភាពអយុត្តិធម៌នៅក្នុងសង្គមជាដើម។ លោកបានសម្រេចវិលត្រឡប់ទៅប្រទេសកម្ពុជាវិញកាលពី២៥ ខែកុម្ភៈ ដោយធ្វើសកម្មភាពជាមួយគណបក្សកម្លាំងជាតិដោយចុះជួបអ្នកគាំទ្រនៅមូលដ្ឋាន ជាពិសេសរៀបចំបញ្ជីបេក្ខជនក្រុមប្រឹក្សាខេត្ត និងក្រុមប្រឹក្សាស្រុក ក្រុងសម្រាប់ខេត្តកំពង់ចាមរហូតសមត្ថកិច្ចបានចាប់ឃុំខ្លួនលោកជាលើកទី២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។