លោក កឹម សុខា ថាជប៉ុនដើរតួនាទីសំខាន់សម្រាប់ស្ថិរភាពនយោបាយនៅកម្ពុជា
2015.11.11
លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១ រដ្ឋសភា ថ្លែងទៅកាន់អ្នកកាសែត នាអាកាសយានដ្ឋានអន្តរជាតិភ្នំពេញ ពេលត្រឡប់ពីបំពេញទស្សនកិច្ចនៅក្រៅប្រទេស នៅថ្ងៃទី៩ ខែកញ្ញា ឆ្នាំ២០១៥។
មន្ត្រីជាន់ខ្ពស់គណបក្សជំទាស់មើលឃើញថា ប្រទេសជប៉ុន គឺបានដើរតួនាទីរួចមកហើយក្នុងដំណោះស្រាយនយោបាយកម្ពុជា ហើយរឹតតែមានសារសំខាន់ថែមទៀត ដែលអាចជួយធ្វើឲ្យកម្ពុជា មានសន្តិភាព និងស្ថិរភាពនយោបាយ។
បន្ថែមពីលើនេះ សម្រាប់អ្នកឃ្លាំមើលស្ថានការណ៍នយោបាយវិញ អះអាងថា ប្រទេសជប៉ុន គឺជាប្រទេសដែលស័ក្តិសម ហើយមានលទ្ធភាពគ្រប់គ្រាន់អាចជំរុញឲ្យកម្ពុជា ស្វែងរកដំណោះស្រាយនយោបាយរួមបាន បើធៀបនឹងបណ្ដាប្រទេសផ្ដល់ជំនួយផ្សេងទៀតឲ្យកម្ពុជា។
អ្នកវិភាគនយោបាយមើលឃើញថា ប្រទេសជប៉ុន គឺជាប្រទេសមួយដែលស័ក្ដិសមជាងបណ្ដាមេដឹកនាំរដ្ឋជាដៃគូដទៃទៀតរបស់កម្ពុជា ក្នុងការផ្សះផ្សានយោបាយនៅកម្ពុជា ថ្វីបើប្រទេសដែលអនុវត្តរបបរាជានិយមមួយនេះមិនមានសិទ្ធិ ឬកាតព្វកិច្ចណាមួយក្នុងកិច្ចការនយោបាយក្ដី។
ការថ្លែងដូចនេះរបស់ លោក អ៊ូ វីរៈ ប្រធានអង្គការនៃវេទិកាអនាគត ធ្វើឡើងបន្ទាប់ពីអតីតអនុប្រធានរដ្ឋសភា មកពីខាងគណបក្សជំទាស់លើកឡើងថា ជប៉ុន បានដើរនាទីយ៉ាងសំខាន់សម្រាប់រកដំណោះស្រាយនយោបាយនៅកម្ពុជា។
លោក អ៊ូ វីរៈ យល់ឃើញថា ជាការពិត ជប៉ុន ជាប្រទេសដែលប្រកាន់របបលទ្ធិប្រជាធិបតេយ្យមួយនេះ មានស្ថានភាពស្ទើរតែស័ក្ដិសមជាងសហគមន៍អឺរ៉ុប និងសហរដ្ឋអាមេរិក ក្នុងការដើរតួនាទីរកដំណោះស្រាយនយោបាយសម្រាប់កម្ពុជា បើកម្ពុជា ពិតជាត្រូវការមែន។ លោក អ៊ូ វីរៈ បន្តថា ថ្វីបើជំនួយរបស់ជប៉ុន ជាជំនួយលំដាប់លេខរៀងទី២ បន្ទាប់ពីចិន ក្នុងការផ្ដល់ជំនួយឲ្យកម្ពុជា ក៏ដោយចុះ ក៏ប៉ុន្តែរាល់ជំនួយលើសលប់របស់ជប៉ុន ជាជំនួយដែលមានភាពស្មោះត្រង់ និងពុំទាមទារសំណងអ្វីឡើយពីកម្ពុជា។ លោកបន្តថា «ប្រទេសជប៉ុន ជួយសម្របសម្រួលប្រហែលជាអាចមានសក្ដានុពល។ បើសិនជាយើងមើលសហរដ្ឋអាមេរិក សហរដ្ឋអាមេរិក គឺគាត់មានទំនោរ ឬមួយគណបក្សប្រឆាំងហាក់មានភាពជិតស្និទ្ធជាង ហើយអ៊ីចឹងគណបក្សប្រជាជន មិនទុកចិត្តសហរដ្ឋអាមេរិក ទេ។ ដោយសារអ៊ីចឹង ពិបាកក្នុងការដើរតួក្នុងការសម្របសម្រួល។ ប៉ុន្តែបើជប៉ុន គឺមានទំនុកចិត្តពីគណបក្សទាំងពីរ ហើយខ្ញុំថាអាចដើរតួសម្របសម្រួលបាន។ ប្រទេសចិន គឺសម្របសម្រួលឥតបានទេ ដោយសារប្រទេសកុម្មុយនិស្ត ហើយពុំមានឆន្ទៈក្នុងការសម្របសម្រួលនយោបាយប្រជាធិបតេយ្យទេ»។
ក្រោយពីកម្ពុជា បានបញ្ចប់ភាពជាប់គាំងនយោបាយកាលពីថ្ងៃទី២២ ខែកក្កដា ឆ្នាំ២០១៤ នោះ រដ្ឋាភិបាលជប៉ុន ក៏បានជួយដល់ការរៀបចំប្រព័ន្ធបោះឆ្នោតតាមប្រព័ន្ធអេឡិចត្រូនិកទំនើបដល់កម្ពុជា ថែមទាំងបានបញ្ជូនក្រុមអ្នកបច្ចេកទេសលើកិច្ចការបោះឆ្នោតឲ្យមកជួយដល់គណៈកម្មាធិការជាតិរៀបចំការបោះឆ្នោតទៀតផង។
របាយការណ៍របស់គេហទំព័រ ឌីប្លូមាត (Diplomat) បានឲ្យដឹងថា ចាប់តាំងពីឆ្នាំ១៩៩២ មក ជប៉ុន បានផ្ដល់ជំនួយអភិវឌ្ឍន៍ជាផ្លូវការសម្រាប់កម្ពុជា ជាង ២ពាន់លានដុល្លារសហរដ្ឋអាមេរិក ខណៈប្រទេសចិន ដែលជាម្ចាស់ជំនួយធំជាងគេនៅកម្ពុជា ទាំងជំនួយឥតសំណង និងជំនួយមានការប្រាក់ប្រមាណ ២.៧០០លានដុល្លារសហរដ្ឋអាមេរិក គិតចាប់តាំងពីឆ្នាំ១៩៩២ មក ក៏ប៉ុន្តែសម្រាប់ជំនួយជប៉ុន វិញ ភាគច្រើនគឺជាជំនួយពុំមានសំណង ឬលក្ខខណ្ឌផ្សេងទៀតដូចប្រទេសជាដៃគូផ្សេងទៀតរបស់កម្ពុជា ទេ។
ជំនួយរបស់ជប៉ុន ភាគច្រើនផ្ដោតលើការស្ថាបនាស្ពាន ថ្នល់ សាលារៀន ប្រព័ន្ធធារាសាស្ត្រ និងជំនួយលើវិស័យសុខាភិបាល ជាដើម។
លោក កឹម សុខា អនុប្រធានគណបក្សសង្គ្រោះជាតិ និងជាអតីតអនុប្រធានទី១ នៃរដ្ឋសភា បានថ្លែងនៅក្នុងបណ្ដាញសង្គមហ្វេសប៊ុក (Facebook) របស់លោកកាលពីថ្ងៃទី១០ វិច្ឆិកា ថា តួនាទីសំខាន់របស់ប្រទេសជប៉ុន ក្នុងការស្វែងរកដំណោះស្រាយនយោបាយ និងស្ថិរភាពនយោបាយសម្រាប់ការអភិវឌ្ឍនៅប្រទេសកម្ពុជា។ លោក កឹម សុខា បន្តថា ជំនួបជាផ្លូវការនៅវិមានព្រឹទ្ធសភាជប៉ុន កាលពីថ្ងៃទី១០ វិច្ឆិកា ក្នុងទីក្រុងតូក្យូ ដែលជំនួបនោះធ្វើឡើងរួមទាំងបក្សដឹកនាំរដ្ឋាភិបាល និងបក្សប្រឆាំងរបស់ជប៉ុន ផង គឺតំណាងរាស្ត្រ និងសមាជិកព្រឹទ្ធសភារបស់ប្រទេសជប៉ុន ចង់ឃើញប្រទេសកម្ពុជា មានស្ថិរភាពនយោបាយ ដើម្បីធានាដំណើរការលទ្ធិប្រជាធិបតេយ្យ សេរីភាពជាមូលដ្ឋាន ការអភិវឌ្ឍ និងទាក់ទាញអ្នកវិនិយោគទុនបរទេសកាន់តែច្រើន។
ពាក់ព័ន្ធរឿងនេះ លោក ហ៊ុន សែន ថ្លែងកាលពីថ្ងៃទី៥ វិច្ឆិកា ដោយលោកនាយករដ្ឋមន្ត្រីស្នើឲ្យជប៉ុន ពន្យល់ទៅបក្សប្រឆាំងផង ដោយ លោក ហ៊ុន សែន ចាត់ទុកថា ជំនួយរបស់ជប៉ុន គឺរដ្ឋាភិបាលធ្វើឡើងដោយតម្លាភាព និងភាពស្មោះត្រង់។ លើសពីនេះទៀត លោក ហ៊ុន សែន ឌឺដងឲ្យគណបក្សជំទាស់ដែលរិះគន់រដ្ឋាភិបាលរឿងអំពើពុករលួយជំនួយរបស់ជប៉ុន នេះថា វាគ្រាន់តែល្បិចនយោបាយរបស់បក្សប្រឆាំងប៉ុណ្ណោះ។ លោកបន្តថា «និយាយមួយ គឺនិយាយរឿងចាយលុយជប៉ុន ដើម្បីឲ្យជប៉ុន ជួយប្រាប់គេប្រាប់ឯងផង។ បើខ្ញុំនិយាយមិនមានវត្តមានឯកឧត្ដម គេថាខ្ញុំភូតទៀតហើយ។ អ៊ីចឹងនិយាយមុខឯកឧត្ដមថា ចាយលុយជប៉ុនៗ អ្នកកាន់លុយតើម៉េចមកចោទថា ហ៊ុន សែន ពុករលួយ។ មើលជប៉ុន អាហ្នឹងទាល់តែជប៉ុន ជួយប្រាប់ ហើយប្រាប់ទៅអ្នកណា? ប្រាប់ទៅបក្សប្រឆាំង»។
បើទោះជាបែបណា លោក កឹម សុខា លើកឡើងនៅក្នុងបណ្ដាញសង្គមរបស់លោកថា សមាជិករដ្ឋសភា និងព្រឹទ្ធសភារបស់ជប៉ុន អះអាងថា ជំនួយរបស់ប្រទេសជប៉ុន ដែលផ្ដល់ដល់កម្ពុជា គឺសម្រាប់ពលរដ្ឋខ្មែរទាំងអស់ ពុំមែនសម្រាប់គណបក្សនយោបាយណាមួយឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
អត្ថបទពេញនិយម
នយោបាយ
- ពលរដ្ឋខ្មែរនៅអូស្ត្រាលីធ្វើបាតុកម្មទាមទារឱ្យរដ្ឋាភិបាលកម្ពុជាដកគម្រោង CLV ទាំងស្រុង
- ឧបនាយករដ្ឋមន្ត្រីកម្ពុជាថា នាវាកងទ័ពបរទេសណាក៏អាចចូលចតនៅមូលដ្ឋានទ័ពរាមដែរ
- អង្គការសិទ្ធិមនុស្សថ្កោលទោសរដ្ឋាភិបាលម៉ាឡេស៊ីបញ្ជូនពលករខ្មែរម្នាក់ ឱ្យអាជ្ញាធរកម្ពុជា ដោយសារតែរិះគន់លោក ហ៊ុន សែន