គ.ជ.ប ប្រកាសសុពលភាពបញ្ជីឈ្មោះបោះឆ្នោត សម្រាប់ឆ្នាំ២០១៨ មានជាង ៨លាននាក់
2019.01.01
លោក ហង្ស ពុទ្ធា មន្ត្រីនាំពាក្យគណៈកម្មាធិការជាតិរៀបចំការបោះឆ្នោត ក្នុងសិក្ខាសាលាសម្រាប់អ្នកសារព័ត៌មានស្ដីពីការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតឆ្នាំ២០១៧ នៅឯភោជនីយដ្ឋានទន្លេបាសាក់២ នៅថ្ងៃទី១៥ ខែកញ្ញា ឆ្នាំ២០១៧។ RFA
Photo: RFA
គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប នៅថ្ងៃទី៣១ ធ្នូ ប្រកាសថា បានផ្ដល់សុពលភាពបញ្ជីឈ្មោះបោះឆ្នោត សម្រាប់ឆ្នាំ២០១៨។
ស្ថាប័នដដែលនេះ ចេញសេចក្ដីប្រកាសថា មានពលរដ្ឋចំនួនជាង ៨លាន ៥សែននាក់ ស្មើនឹងជាង ៨៦% មានឈ្មោះក្នុងបញ្ជីបោះឆ្នោត ឆ្នាំ២០១៨។
អ្នកនាំពាក្យ គ.ជ.ប លោក ហង្ស ពុទ្ធា ប្រាប់អាស៊ីសេរីថា គ.ជ.ប បានទុកថិរវេលា ចាប់ពីថ្ងៃទី២៦ វិច្ឆិកា រហូតដល់ចុងខែធ្នូ សម្រាប់ពិនិត្យ និងតវ៉ា ហើយចាប់ពីថ្ងៃទី៣១ ខែធ្នូ ឆ្នាំ២០១៨ ទៅ គ.ជ.ប បានទទួលស្គាល់បញ្ជីឈ្មោះថ្មីនេះ និងបិទផ្លូវតវ៉ា ព្រោះនីតិវិធីប្ដឹងតវ៉ាបានបញ្ចប់ហើយ។
អ្នកនាំពាក្យរូបនេះ ឲ្យដឹងថា រយៈពេលជាង ១ខែ មានបណ្ដឹងតែ ២គត់ គឺប្ដឹងនៅថ្នាក់ឃុំសង្កាត់ និងដោះស្រាយរួចរាល់ហើយ។
គ.ជ.ប កាលពីដើមខែតុលា បានធ្វើយុទ្ធនាការចុះឈ្មោះថ្មី និងពិនិត្យមើលបញ្ជីឈ្មោះ រយៈពេល ១៨ថ្ងៃ ពីថ្ងៃទី១ ដល់ថ្ងៃទី១៨ តុលា បង្ហាញថា អ្នកចុះឈ្មោះបោះឆ្នោតថ្មី មានចំនួនជាង ១សែន ៩ម៉ឺន (១៩៥.០៨៧) នាក់។ កាលពីថ្ងៃទី១៨ កញ្ញា គ.ជ.ប ប្រកាសថា ស្ថាប័នមួយនេះ គ្រោងចុះឈ្មោះពលរដ្ឋថ្មី ចំនួនជិត ៥សែន (៤៨៩.៩៦៣) នាក់។ បើតាមតួលេខសរុបសម្រាប់យុទ្ធនាការ ចុះឈ្មោះថ្មី កាលពីខែតុលា បង្ហាញថា គ.ជ.ប ទទួលបានការចុះឈ្មោះ មិនដល់ ៥០ភាគរយទេ។
បញ្ជីឈ្មោះអ្នកបោះឆ្នោតឆ្នាំ២០១៨ របស់ គ.ជ.ប បង្ហាញថា អ្នកមានឈ្មោះក្នុងបញ្ជីបោះឆ្នោតសរុប ជាង៨លាន (៨.៥១១.៨៨៥) នាក់ បើធៀបនឹងបញ្ជីឈ្មោះបោះឆ្នោត ឆ្នាំ២០១៧ (៨.៣៨០.២១៧នាក់) គឺកើនឡើងជាង ១សែន (១៣១.៦៦៨) នាក់។
សេចក្ដីប្រកាសរបស់ គ.ជ.ប និងសេចក្ដីសម្រេចរបស់ប្រធាន គ.ជ.ប លោក ស៊ិក ប៊ុនហុក ចុះថ្ងៃទី៣១ ធ្នូ បង្ហាញថា តួលេខអ្នកចុះឈ្មោះបោះឆ្នោតថ្មី មានចំនួន ១សែន ៩ម៉ឺន ៥ពាន់ ៣រយ ៨៥ (១៩៥.៣៨៥) នាក់ ហើយអ្នកដែលត្រូវលុបឈ្មោះចេញពីបញ្ជីមានចំនួនជាង ៥ម៉ឺន (៥៦.៩៤១) នាក់។ គ.ជ.ប ប៉ាន់ស្មានថា អ្នកដែលមានអាយុចាប់ពី ១៨ឆ្នាំឡើង អាចមានចំនួន ៩លាន ៩ សែន ៨ពាន់ ២រយ ៤៣ (៩.៩០៨.២៤៣) នាក់។
អ្នកសម្របសម្រួល និងអង្កេត នៃគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា អង្គការ ខុមហ្រ្វែល លោក កន សាវាង្ស មានប្រសាសន៍ថា ការចូលរួមរបស់ពលរដ្ឋលើការពិនិត្យតវ៉ា បញ្ជីឈ្មោះបណ្ដោះអាសន្នឆ្នាំ២០១៨ បើធៀបនឹងឆ្នាំ២០១៦ មុនពេលមានវិបត្តិនយោបាយ គឺធ្លាក់ចុះខ្លាំង។
លោក កន សាវាង្ស បញ្ជាក់ថា ឆ្នាំ២០១៦ មានតែគណបក្សប្រឆាំង ១គត់ ដែលបានសកម្មរឿងប្ដឹងបញ្ជីឈ្មោះបោះឆ្នោត រកឃើញមានឈ្មោះជនជាតិវៀតណាម ក្នុងបញ្ជីបោះឆ្នោត។ ចំណែកឆ្នាំ២០១៧ និង២០១៨ បើទោះជាមានគណបក្សច្រើនចូលរួមការបោះឆ្នោត ប៉ុន្តែតំណាងគណបក្សទាំងនោះ មិនបានសកម្មក្នុងការឃ្លាំមើលបញ្ជីឈ្មោះ ឬពិនិត្យបញ្ជីឈ្មោះបោះឆ្នោតទេ គឺឃើញសកម្មតែពេលបោះឆ្នោត។ សង្គមស៊ីវិលរូបនេះ យល់ថា មិនមែនជារឿងចម្លែកទេ ដែលស្ថិតក្នុងកាលៈទេសៈ នេះ គ.ជ.ប ទទួលបានបណ្ដឹងតែ២ ហើយសុទ្ធតែជាបណ្ដឹងសុំកែឈ្មោះជាដើមនោះ ព្រោះទាំងពលរដ្ឋ និងគណបក្សនយោបាយ សុទ្ធតែមិនចាប់អារម្មណ៍នឹងការពិនិត្យបញ្ជីឈ្មោះបោះឆ្នោត៖ «យើងអត់មានអីចម្លែកនោះទេដែរបណ្ដឹងទាក់ទងជំទាស់មានតែមួយនឹងគឺអត់មានអីចម្លែកសោះពីព្រោះវាត្រូវការថ្នាក់មូលដ្ឋាននក្នុងការចូលរួមក្នុង ការពិនិត្យ និងតាមដានមើលបើយើងក្រឡេកមើលឆ្នាំ២០១៨ នេះ ឃើញថា ១៧ ក៏ដោយ ១៨ ក៏ដោយ ឃើញថា គណបក្សនយោបាយអត់សូវមានគណបក្សណាមួយ ដែលសូវចូលរួមសកម្មចូលរួមពិនិត្យ មើលដំណើរការបោះឆ្នោតនេះទេយើងអត់មានទេ សូម្បីតែក្នុងស្ថាប័ន គ.ជ.ប គឺមានតែគណបក្ស ប្រជាជនតែមួយទេ ដែលចូលរួមសកម្មក្នុងការតាមដាននេះបាទ!»។
ពលរដ្ឋ ពិសេសយុវជន អះអាងថា ចាប់តាំងពីលទ្ធិប្រជាធិបតេយ្យនៅកម្ពុជារងការកម្ទេច ពីរបបក្រុងភ្នំពេញមក ពួកគេលែងមានជំនឿលើ គ.ជ.ប និងមិនចាប់អារម្មណ៍តម្លៃការងារ របស់ស្ថាប័នរៀបចំការបោះឆ្នោតនេះទៀតហើយ។ ពលរដ្ឋ និងសង្គមស៊ីវិល យល់ថា ប្រសិនបើរបបក្រុងភ្នំពេញ មិនព្រមស្ដារបរិយាកាសនយោបាយ តាមអនុសាសន៍របស់សហគមន៍អន្តរជាតិទេ ពលរដ្ឋនឹងមិនចាប់អារម្មណ៍នីតិវិធី ឬព្រឹត្តិការណ៍បោះឆ្នោតទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន