ព៍ត៌មានសំខាន់ៗចំនួន ៧ ដែលលោកអ្នកគួរអាននៅថ្ងៃសៅរ៍នេះ
មន្ត្រីអាដហុកថា ប្រសិនបើតុលាការកំពូលកាត់ក្ដីដោយសុភវិនិច្ឆ័យពួកគេនឹងទទួលបានយុត្តិធម៌
មន្ត្រីសិទ្ធិមនុស្សនៃសមាគម អាដហុក(ADHOC) លើកឡើងថា ប្រសិនបើតុលាការកំពូលកាត់ក្ដីប្រកបដោយសុភវិនិច្ឆ័យ ពកគេ នឹងទទួលបានយុត្តិធម៌។ តុលាការបានកំពូលនៅថ្ងៃទី ៤វិច្ឆិកា បានបើកសវនាការ បណ្ដឹងសាទុក្ខ លើសាលក្រុមតុលាការជាន់ទាប ដែលបានកាត់ក្ដីឱ្យក្រុមមន្ត្រីសិទ្ធិមនុស្ស មានទោស ក្នុងសំណុំរឿងសូកប៉ាន់សាក្សី។
អ្នកច្បាប់ថា ប៉ូលិសអន្តរជាតិនឹងមិនចាប់លោក សម រង្ស៊ី តាមសំណើរដ្ឋាភិបាលទេ
អ្នកជំនាញច្បាប់ជឿជាក់ថា ប៉ូលិសព្រហ្មទណ្ឌអន្តរជាតិ ឬប៉ូលិសអាំងទែរប៉ូល (Interpol) នឹងមិនឃាត់ខ្លួនលោក សម រង្ស៊ី ប្រធានស្ដីទីគណបក្សសង្គ្រោះជាតិ តាមការស្នើសុំរបស់រដ្ឋាភិបាលលោក ហ៊ុន សែន ឡើយ ពីព្រោះថា ករណីលោក សម រង្ស៊ី នេះជារឿងនយោបាយ។
រីឯលោក សម រង្ស៊ី វិញ បញ្ជាក់ថា សំណើរបស់រដ្ឋាភិបាលកម្ពុជា គ្រាន់តែជាការចង់បង្វែរការចាប់អារម្មណ៍ពីមហាជនតែប៉ុណ្ណោះ។ លោក សម រង្ស៊ី អះអាងថា សំណុំរឿងដែលលោកប្ដឹងលោក ហ៊ុន សែន និងបក្ខពួកទាក់ទងនឹងការគប់គ្រាប់បែកសម្លាប់មនុស្សរាប់សិបនាក់កាលពីឆ្នាំ១៩៩៧ នោះ តុលាការបារាំងនឹងបើកការជំនុំជម្រះ នៅឆ្នាំ២០២៣ ខាងមុខនេះ។
អានព័ត៌មានពិស្ដារ...
អាជ្ញាធរក្រុងភ្នំពេញរារាំងក្រុមស្ត្រីថ្ងៃសុក្រដែលតវ៉ានៅមុខស្ថានអាមេរិក
អាជ្ញាធរក្រុងភ្នំពេញបានបំបែកការប្រមូលផ្តុំរបស់ក្រុមស្ត្រីថ្ងៃសុក្រ ដែលឈរតវ៉ាស្វែងរកយុត្តិធម៌ជូនសមាជិកគ្រួសារពួកគេនៅមុខស្ថានអាមេរិក មុនពេលប្រធានាធិបតីសហរដ្ឋអាមេរិក លោក ចូ ប៉ៃឌិន (Joe Biden) នឹងមកកម្ពុជា ចូលរួមកិច្ចប្រជុំកំពូលអាមេរិក-អាស៊ាន និងកិច្ចប្រជុំពាក់ព័ន្ធនៅសប្តាហ៍ក្រោយ។ ពលរដ្ឋទាំងនោះចាត់ទុកចំណាត់ការរបស់អាជ្ញាធរថា គឺជាការបំបិទសិទ្ធិសេរីភាព និងបិទបាំងទង្វើអាក្រក់របស់រដ្ឋាភិបាល។
អានព័ត៌មានពិស្ដារ...
អ្នកឃ្លាំមើលថា កម្ពុជាគួរស្ដារប្រជាធិបតេយ្យ និងពង្រឹងនីតិរដ្ឋ ប្រសើរជាងទទួលយកគំនិតដឹកនាំប្រទេសតាមបែបផ្ដាច់ការ
ក្រុមអ្នកតាមដានស្ថានការណ៍នយោបាយកម្ពុជា ជំរុញដល់រដ្ឋាភិបាលគិតគូរស្ដារប្រជាធិបតេយ្យ និងពង្រឹងនីតិរដ្ឋ ប្រសើរជាងទទួលយកនូវមនោគមវិជ្ជាពីប្រទេសកុម្មុយនីស្តចិន ដើម្បីដឹកនាំប្រទេសតាមបែបផ្ដាច់ការ។ ការលើកឡើងនេះ បន្ទាប់ពីអគ្គរដ្ឋទូតចិនប្រចាំកម្ពុជាថា សមិទ្ធផលដ៏មហិមានៃសមាជគណបក្សកុម្មុយនីស្តចិនលើកទី២០ អាចជួយដល់ប្រជាជនកម្ពុជានៅគ្រប់មជ្ឈដ្ឋានស្វែងយល់កាន់តែច្បាស់អំពីសារសំខាន់នៃសមិទ្ធផលរបស់គណបក្សកុម្មុយនីស្តចិន។
អាជ្ញាធរលាក់ព័ត៌មាន ករណីពលរដ្ឋ ៥នាក់ស្លាប់ ដោយពុលថ្នាំបាញ់ចេក ក្នុងចម្ការក្រុមហ៊ុននៅកំពង់ចាម
អាជ្ញាធរខេត្តកំពង់ចាម រងការរិះគន់ថា បានលាក់បាំងព័ត៌មាន និងធ្វើរបាយការណ៍ភូតភរ ករណី ពលរដ្ឋ ៥នាក់ស្លាប់ និង ៦៩ នាក់ទៀត ត្រូវបញ្ជូនទៅសង្គ្រោះបន្ទាន់ សង្ស័យពុលថ្នាំបាញ់ចេក កាលពីពេលថ្មីៗនេះ ។ មន្ត្រីសង្គមស៊ីវិលទាមទាររដ្ឋាភិបាល បង្កើតគណៈកម្មការថ្នាក់ជាតិ ស្រាវជ្រាវឱ្យច្បាស់លាស់ករណីនេះ ដោយជំរុញឱ្យក្រុមហ៊ុន ឡុង ស្រេង (Long Sreng International Co.,Ltd)ទទួលខុសត្រូវ អាយុជីវិតពលរដ្ឋ។
អានព័ត៌មានពិស្ដារ...
គ្រួសាររបស់ជនភៀសខ្លួនខ្មែរក្រោមដែលជាប់ឃុំទាំង១០នាក់នៅប្រទេសថៃ រង់ចាំឲ្យមានការដោះលែងសមាជិកគ្រួសាររបស់ពួកគាត់
សាច់ញាតិរបស់ជនភៀសខ្លួនខ្មែរក្រោម ដែលកំពុងជាប់ឃុំទាំង១០នាក់នៅប្រទេសថៃ រង់ចាំឲ្យមានការដោះលែងសមាជិកគ្រួសាររបស់ពួកគាត់ ព្រោះអង្គការនានា និងការិយាល័យអង្គការសហប្រជាជាតិនៅទីក្រុងបាងកក ថានឹងជួយរកដំណោះស្រាយឲ្យខ្មែរក្រោមទាំង១០នាក់ឲ្យមានសេរីភាពឡើងវិញ។ ប៉ុន្តែមកដល់ពេលនេះ អ្នកទាំង១០នាក់នោះមិនទាន់ចេញពីពន្ធនាគារទេ ដែលធ្វើឲ្យក្រុមគ្រួសារបារម្ភពីសុខភាពអ្នកជាប់ឃុំ ព្រោះអ្នកខ្លះមានវ័យចាស់ អ្នកខ្លះមានជំងឺប្រចាំខ្លួន និងអ្នកខ្លះមានកូនតូចចាំផ្លូវនៅផ្ទះ។
អានព័ត៌មានពិស្ដារ...
ជំងឺគ្រុនឈាមផ្ទុះឡើងជិត ១ម៉ឺនករណីនៅឆ្នាំនេះ
កម្ពុជារកឃើញជំងឺគ្រុនឈាមជិត ១ ម៉ឺនករណី (៩.៤៨២) គិតត្រឹមខែវិច្ឆិកា ឆ្នាំ២០២២ នេះ។ ករណីនេះកើនឡើងជិត ១០ ដង បើប្រៀបធៀបនឹងរយៈពេលដូចគ្នាកាលពីឆ្នាំ ២០២១។ ជំងឺគ្រុនឈាមជិត ១ ម៉ឺនករណីក្នុងឆ្នាំ ២០២២ នេះ បានសម្លាប់ជីវិតមនុស្សចំនួន ១៦នាក់ ដែលសុទ្ធសឹងជាកុមារអាយុក្រោម ១៥ឆ្នាំ។
កាសែតភ្នំពេញប៉ុស្តិ៍ផ្សាយកាលពីថ្ងៃទី៤ វិច្ឆិកា ដោយស្រង់សម្ដីមន្ត្រីជាន់ខ្ពស់ក្រសួងសុខាភិបាលថា មូលហេតុនៃការការកើនឡើងករណីជំងឺគ្រុនឈាមនៅឆ្នាំនេះ គឺដោយសារភ្លៀងបន្តធ្លាក់ និងទឹកជំនន់។ មន្ត្រីជំនាញអំពាវនាវដល់ពលរដ្ឋឱ្យថែរក្សាអនាម័យផ្ទះសម្បែង និងត្រូវបញ្ជូនកូនចៅដែលមានអាការៈក្ដៅខ្លួនខ្លាំងទៅមន្ទីរពេទ្យ ឬមណ្ឌលសុខភាព ដើម្បីទទួលការព្យាបាលឱ្យបានត្រឹមត្រូវ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។