ទស្សនៈប្រជាពលរដ្ឋក្រោយរដ្ឋសភាដកតំណែងលោក កឹម សុខា
2015.10.30
លោក កឹម សុខា អនុប្រធានគណបក្សសង្គ្រោះជាតិ និងជាអនុប្រធានទី១ រដ្ឋសភា ថ្លែងទៅកាន់អ្នកកាសែត នាអាកាសយានដ្ឋានអន្តរជាតិភ្នំពេញ ពេលត្រឡប់ពីបំពេញទស្សនកិច្ចនៅក្រៅប្រទេស នៅថ្ងៃទី៩ ខែកញ្ញា ឆ្នាំ២០១៥។
ក្រោយពីសមាជិករដ្ឋសភានៃគណបក្សប្រជាជនកម្ពុជា ដែលជាបក្សកាន់អំណាច បានបោះឆ្នោតទម្លាក់អនុប្រធានគណបក្សសង្គ្រោះជាតិ លោក កឹម សុខា ពីតំណែងអនុប្រធានទីមួយនៃរដ្ឋសភានោះ ប្រជាពលរដ្ឋ និងអ្នកប្រើបណ្ដាញសង្គមហ្វេសប៊ុក (Facebook) មួយចំនួនបានបង្ហាញការខកចិត្ត និងបញ្ចេញទស្សនៈផ្សេងៗគ្នាជុំវិញរឿងនេះ។
ពលរដ្ឋភាគច្រើនដែលបានសម្ភាសនៅថ្ងៃទី៣០ ខែតុលា និយាយថា ការដកតំណែងលោក កឹម សុខា នៅពេលនេះគឺជារឿងអយុត្តិធម៌ និងការប្រើអំណាចរុញគណបក្សប្រឆាំងឲ្យទាល់ច្រក។
ពលរដ្ឋម្នាក់ឈ្មោះ ឌី គឹមសុន មានមុខរបររត់ម៉ូតូឌុបនៅភ្នំពេញ ម្តុំរដ្ឋសភា និងកោះពេជ្រ ខកចិត្តចំពោះអ្នកនយោបាយដែលនៅមិនកាន់ពាក្យសច្ចៈ ហើយអ្នកខ្លាំងនៅតែប្រើអំណាចកៀបសង្កត់អ្នកទន់ខ្សោយដោយមិនប្រើប្រព័ន្ធច្បាប់ ហើយរបៀបធ្វើការសម្រេចហាក់ផ្អែកលើធាតុផ្សំនៃទោសកំហុសមិនសមហេតុផល ឬគ្មានការពិតឡើយ៖ «អត់គួរដកទេ! តើដកហ្នឹងមូលហេតុអីគេ? យើងអត់ដឹងរឿងដើមដំបូង?»។
លោកបន្តថា ចិត្តលោកចង់ឲ្យគណបក្សទាំងពីរធ្វើការជាមួយគ្នាដោយទទួលខុសត្រូវ ដោះស្រាយបញ្ហាទុក្ខលំបាករបស់ប្រពលរដ្ឋ៖ «បើសិនមានតែមួយគឺអត់កើតទេ ប្រៀបដូចជាម៉ូតូ ឬក៏ឡានប្រណាំងអ៊ីចឹង បើតែឯងហើយចេះតែទៅ តែបើមានពីរទន្ទឹមគ្នា អាចប្រកួតប្រជែងគ្នាដើម្បីរកចំណុចខ្វះខាតទៅវិញទៅមក»។
ចំណែកប្រជាពលរដ្ឋមួយក្រុមទៀតនៅម្ដុំផ្សារ និងសាលារៀនដែលថ្លែងក្នុងលក្ខខណ្ឌមិនឲ្យបញ្ចេញឈ្មោះបានឲ្យដឹងដែរថា ការទម្លាក់លោក កឹម សុខា ពីតំណែងអនុប្រធានទីមួយនៃរដ្ឋសភានោះ គឺពុំមានហេតុផលសមរម្យទាល់តែសោះ។ ពួកគាត់ចង់ឲ្យម្ចាស់ឆ្នោតទូទាំងប្រទេសជាអ្នកសម្រេចនៅពេលបោះឆ្នោតអាណត្តិក្រោយទើបជាការត្រឹមត្រូវជាងការសម្រេចរបស់ក្រុមអ្នកនយោបាយតែក្រុមតូចនោះ៖ «បែងចែក អត់ត្រូវ យ៉ាងម៉េចយ៉ាងម៉ារង់ចាំការបោះឆ្នោត បើគាត់ធ្វើការមិនកើតចាំបោះឆ្នោតទម្លាក់ទៅ! ចង់និយាយថា ខាងគណបក្សប្រជាជន ដូចធ្វើបាបគណបក្សសង្គ្រោះជាតិ ដល់ហើយ ដកហ្នឹងអាងសំឡេងគាត់មានច្រើន»។
ចំណែកពលរដ្ឋខ្លះទៀតមិនខ្វល់ជាមួយក្រុមអ្នកនយោបាយអ្វីទាំងអស់ គឺមួយថ្ងៃៗគាត់គិតតែពីបញ្ហារកស៊ីដើម្បីបំពេញក្រពះប៉ុណ្ណោះ។
រីឯទស្សនៈរបស់ប្រជាពលរដ្ឋនៅតាមបណ្ដាខេត្តវិញក៏បានបង្ហាញទស្សនៈជុំវិញរឿងនេះប្រហាក់ប្រហែលគ្នានឹងពលរដ្ឋនៅភ្នំពេញដែរ ដោយខ្លះមិនគាំទ្រឡើយ ហើយខ្លះទៀតមិនហ៊ានវិនិច្ឆ័យយ៉ាងណានោះទេ ព្រោះគាត់យល់ថា បញ្ហានយោបាយស្មុគស្មាញច្រើនណាស់ ពលរដ្ឋអាចពិបាកយល់លើគំនិតរបស់អ្នកនយោបាយ។ ពេលខ្លះគេគ្រាន់តែសម្ដែងល្ខោនធ្វើកម្សត់ ធ្វើកាចដាក់គ្នាលេងៗប៉ុណ្ណោះ ប៉ុន្តែជារួម ពួកគាត់មិនចង់ឲ្យអ្នកនយោបាយឈ្លោះគ្នានោះទេ៖ «ពលរដ្ឋទាំងអស់អត់ចង់បានសភាព បែបហ្នឹងទេ គឺចង់បានអ្នកដឹកនាំដែលចេះស្រលាញ់គ្នា ចេះជួយប្រទេសជាតិយើងឲ្យរីកចម្រើននោះទើបជាការប្រសើរ»។
ដោយឡែកនៅតាមបណ្ដាញសង្គមហ្វេសប៊ុកវិញ ក៏មានការបញ្ចេញទស្សនៈច្រើនដែរ ទាំងវិជ្ជមាន និងអវិជ្ជមានទាក់ទងនឹងការដកតំណែងលោក កឹម សុខា។ អ្នកខ្លះបានវិភាគទៅលើបរិយាកាសនយោបាយរបស់គណបក្សគូប្រកួតគ្នា គឺគណបក្សប្រជាជន និងគណបក្សសង្គ្រោះជាតិ ទៀតផង។
គណនីហ្វេសប៊ុក ឈ្មោះ “Son Miliben” បានសរសេរនៅថ្ងៃ៣០ ខែតុលា ថា៖ «រឿងនេះកើតឡើងដោយសារលោក ហ៊ុន សែន ឈឺចាប់បន្តិចម្តងៗ តាមរយៈការបំបែកលោក កឹម សុខា ចេញពីលោក សម រង្ស៊ី មិនបានសម្រេច។ ប៉ុន្តែលោកយល់ថា ការបាត់តំណែងរបស់លោក កឹម សុខា ពេលនេះ រឹតតែធ្វើឲ្យសង្គ្រោះជាតិកាន់តែរឹងមាំ កម្លាំងសាមគ្គីកាន់តែខ្លាំង ចំណែក (លោក) ហ៊ុន សែន កាន់តែឈឺ ដោយសារប្រជារាស្ត្រនឹងថ្កោលទោសលោកនៅឆ្នាំ២០១៧-២០១៨ ខាងមុខ»។
ដោយឡែកម្ចាស់គណនីឈ្មោះ "អានី អានី" វិញ បានគាំទ្រចំពោះការទម្លាក់លោក កឹម សុខា។ ទន្ទឹមគ្នានេះ ម្ចាស់គណនីឈ្មោះ "ស៊ី ស៊ី" ក៏បានបន្ទរថា៖ «អនុប្រធានរដ្ឋសភាទី១ ត្រូវបានតំណាងរាស្ត្របោះឆ្នោតឲ្យធ្វើមែន តែអនុប្រធានទី១រូបនេះល្ងង់ អត់ចេះធ្វើការ យកតួនាទីទៅបោកប្រាស់ ញុះញង់ឲ្យខ្មែរបែកបាក់ឥតឈប់ឈរ ដូច្នេះតំណាងរាស្ត្រក៏អាចបោះឆ្នោតទម្លាក់វិញ គឺសមហេតុផលហើយ»។
ផ្ទុយពីទស្សនៈនេះ គណនីហ្វេសប៊ុក ឈ្មោះ “Long Sokhey SK” បានសរសេរដាក់ជាសំណួរថា៖ «មានបាតុកម្មទម្លាក់លោក កឹម សុខា គឺទម្លាក់ភ្លាមតែម្ដង ចុះចំណែកឯបាតុកម្មសុំអោយទម្លាក់ លោក ហ៊ុន សែន ពីនាយករដ្ឋមន្ត្រី ម៉េចមិនទម្លាក់ផងលោកសភា?»។
ចំណែកគណនីហ្វេសប៊ុកមួយទៀតឈ្មោះ “Sam BunThon” បញ្ចេញទស្សនៈថា៖ «បាតុកម្មឥតច្បាប់បានវាយតំណាងរាស្ត្ររបួសធ្ងន់ពីរនាក់ដោយគ្មានសមត្ថកិច្ចអើពើ ថែមជំរុញអោយសភាល្ងីល្ងើបោះឆ្នោតទម្លាក់លោក កឹម សុខា ពីតំណែងថែមទៀត ហើយចុះមនុស្សរាប់លាននាក់ស្រែកទាមទារអោយលោក ហ៊ុន សែន ចុះចេញពីអំណាចម៉េចក៏មិនគិតខ្លះផងលោកសភា?»។
គណនីហ្វេសប៊ុកមួយទៀតឈ្មោះ “Vanndy Hort” បានបញ្ចេញទស្សនដែរថា៖ «បើសង្គ្រោះជាតិដាក់បេក្ខជនថ្មីជំនួសលោក កឹម សុខា នោះ ដូចអោយគណបក្សប្រជាជនត្រួតក្បាលអ៊ីចឹង»។
ម្ចាស់គណនីដដែលនេះសរសរសេរទៀតថា៖ «ចង់ដកស្រេចតែចិត្តនឹកឃើញ! បើសង្គ្រោះជាតិ ហ៊ានលេងល្បែងនេះក៏ល្អលេងដែរ បើគណបក្សប្រជាជន ទាមទារដាក់អ្នកថ្មី គឺកុំដាក់ ហើយបើចង់ដាក់ គឺត្រូវតែបេក្ខភាពលោក កឹម សុខា ដដែល។ ចាំមើលគណបក្សប្រជាជន រកលេសអីទៀត?»។
ទោះយ៉ាងណាក្តី មតិពលរដ្ឋភាគច្រើនមិនចង់ឲ្យគណបក្សនយោបាយដែលមានអាសនៈក្នុងរដ្ឋសភាឈ្លោះប្រកែកគ្នា ហើយដោះដូរតំណែងណាមួយក្នុងអាណត្តិនោះទេ ហើយទោះជាសម្រេចដកតំណែងលោក កឹម សុខា ទៅហើយនោះ ក៏មិនគួរដាក់អ្នកផ្សេងនៅពេលនេះដែរ ដោយត្រូវរង់ចាំការសម្រេចពីប្រជាពលរដ្ឋជាម្ចាស់ឆ្នោតនៅអាណត្តិថ្មី ឆ្នាំ២០១៨ ខាងមុខ ពេលនោះយុត្តិធម៌ ឬអយុត្តិធម៌យ៉ាងណានឹងបង្ហាញជាមិនខាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
អត្ថបទពេញនិយម
នយោបាយ
- បទសម្ភាសន៍៖ អតីតមនុស្សជំនិតសម្ដេចក្រុមព្រះថា លោក ហ៊ុន សែន ជ្រៀតជ្រែកព្រះមហាក្សត្រលើការតែងតាំងរដ្ឋមន្ត្រីក្រសួងព្រះបរមរាជវាំងថ្មី
- ពលរដ្ឋខ្មែរប្រកាសនាំគ្នាតវ៉ាប្រឆាំងលោក ហ៊ុន សែន នៅមុខអគាររៀបចំវេទិកាចំណេះដឹងពិភពលោកក្នុងប្រទេសកូរ៉េខាងត្បូង
- លោក ហ៊ុន ម៉ាណែត អះអាងថា យុវជន ៩នាក់ ដែលកំពុងជាប់ឃុំ ពាក់ព័ន្ធនឹង «គម្រោងផ្ដួលរំលំរដ្ឋាភិបាល»
- ពលរដ្ឋខ្មែរនៅកូរ៉េនឹងធ្វើបាតុកម្មប្រឆាំងវត្តមានលោក ហ៊ុន សែន ដែលនឹងចូលរួមវេទិកានៅកូរ៉េ
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»