មន្ត្រីជាន់ខ្ពស់គណបក្សសង្គ្រោះជាតិ ជំរុញពលរដ្ឋឱ្យប្រើប្រាស់សិទ្ធិរបស់ខ្លួនប្រឆាំងនឹងការធ្វើទុក្ខបុកម្នេញពីរបបលោក ហ៊ុន សែន
2020.06.10
មន្ត្រីជាន់ខ្ពស់គណបក្សប្រឆាំងអះអាងថា របបលោក ហ៊ុន សែន ចាប់ចងមនុស្សស្រេចតែចិត្ត និងបំផ្លាញប្រជាធិបតេយ្យបានដូចសព្វថ្ងៃនេះ ដោយសារតែពលរដ្ឋម្នាក់ៗ នៅស្ងៀមមិនប្រើប្រាស់សិទ្ធិរបស់ខ្លួនតបតវិញ។ អ្នកឃ្លាំមើលផ្នែកអភិវឌ្ឍន៍សង្គម អះអាងថា ពលរដ្ឋកម្ពុជាប្រហែលជាមិនទាន់យល់ដឹងច្បាស់លាស់ថា នៅក្នុងសង្គមប្រជាធិបតេយ្យពលរដ្ឋមានសិទ្ធិការពារខ្លួន។
អនុប្រធានគណបក្សសង្គ្រោះជាតិ លោក អេង ឆៃអ៊ាង ជំរុញឲ្យពលរដ្ឋទាំងអស់ស្រុះស្រួលគ្នា ងើបឡើងប្រឆាំងនឹងអំណាចផ្ដាច់ការរបស់លោក ហ៊ុន សែន ដើម្បី ដាក់សម្ពាធឲ្យរបបឯកបក្សបញ្ឈប់ការចាប់ខ្លួនមនុស្សតទៅទៀត។
លោក អេង ឆៃអ៊ាង មានប្រសាសន៍ថា នៅពេលប្រជាពលរដ្ឋរួបរួមជាធ្លុងតែមួយហើយនោះ អាជ្ញាធររបបលោក ហ៊ុន សែន នឹងមិនហ៊ានបន្តសកម្មភាពចាប់ខ្លួនពលរដ្ឋស្លួតត្រង់ទៀតទេ ទោះជាសកម្មជនបក្សប្រឆាំង ឬពលរដ្ឋរងគ្រោះក្នុងជម្លោះដីធ្លីក៏ដោយ ។ លោក អេង ឆៃអ៊ាង បានលើកឧទាហរណ៍ជាក់ស្ដែងនៅក្នុងសហរដ្ឋអាមេរិក ដែលពលរដ្ឋមានអំណាចពេញលេញ ក្នុងការប្រឆាំងនឹងអំពើហិង្សារបស់សមត្ថកិច្ច៖ «ដោយឡែកនៅកម្ពុជាយើងរាល់ថ្ងៃនេះ របបលោក ហ៊ុន សែន ធ្វើទុក្ខបុកម្នេញពលរដ្ឋ ឧទាហរណ៍ដូចជាអ្នករងគ្រោះដីធ្លី ដូចជា អ្នកបឹងកក់ជាដើម តវ៉ារឿងដីធ្លី ខំតស៊ូ តែអ្នកដទៃបានត្រឹមសំដែងការអាណិតមិនបានចូលរួមទេ នៅមានករណីដទៃទៀតដូចគ្នា ខ្មែរយើងប្រកាន់ទស្សនៈថា ក្បាលអ្នកណាសក់អ្នកហ្នឹង តែខ្ញុំនៅមានជំនឿថា នៅពេលខាងមុខខ្មែរយើងនឹងរួបរួមគ្នា ពិសេសយុវជនជំនាន់ក្រោយ»។
លោកនាយករដ្ឋមន្ត្រី ហ៊ុន សែន កាលពីដើមខែមិថុនា ព្រមានចាប់ខ្លួនសកម្មជនបក្សប្រឆាំងបន្ថែមទៀត ចំពោះបុគ្គលណាដែលលោកចោទថា ធ្វើការតាមបញ្ជារបស់លោក សម រស្ស៊ី ប្រធានស្ដីទីគណបក្សសង្គ្រោះជាតិដែលលោក ហ៊ុន សែន អះអាងថា ជាការប៉ុនប៉ងផ្ដួលរំលំរដ្ឋាភិបាលនោះ៖ «អាហ្អែងកុំអាលមើលស្រាលអញពេកហ្អា។ អញសូមប្រាប់ហ្អែងថា ហ្អែងកុំភ្លេចណា ហ្អែងចង្អុលប្រាប់អ្នកណាធ្វើសកម្មភាពខាងក្នុងអញចាប់ខ្លួនទាំងអស់ អញសូមប្រាប់ហ្អែងតែប៉ុណ្ណឹងទេ»។
របបលោក ហ៊ុន សែន បានប្រើអំណាចលើសលុបតាំងពីរំលាយគណបក្សសង្គ្រោះជាតិក្នុងឆ្នាំ២០១៧ មក ដែលសហគមន៍ជាតិ អន្តរជាតិថ្កោលទោស និងចាត់ទុកថា ជាការបំផ្លាញឫសគល់ប្រជាធិបតេយ្យ ដែលកំពុងលូតលាស់នៅកម្ពុជា។ ចាប់តាំងពីពេលនោះសកម្មភាពចាប់ខ្លួនសកម្មជនបក្សប្រឆាំងក៏មានសន្ទុះឡើងជាបន្តបន្ទាប់។
អ្នកឃ្លាំមើលផ្នែកអភិវឌ្ឍន៍សង្គមលោក បណ្ឌិត មាស នី មានប្រសាសន៍ថា នៅក្នុងប្រទេស ដែលមានមេដឹកនាំមានប្រវត្តិចេញមកពីកងទ័ព ការដោះស្រាយបញ្ហាតែងតែយករបៀបយោធា មកប្រើដូចដែលនៅកម្ពុជានាពេលបច្ចុប្បន្ន ។ ចំពោះពលរដ្ឋវិញ លោក បណ្ឌិត មាស នី មើលឃើញថា ពលរដ្ឋក៏មិនទាន់អនុវត្ត ឬបំពេញតួនាទីរបស់ខ្លួនជាប្រជាពលរដ្ឋនៅក្នុងសង្គមប្រជាធិបតេយ្យនៅឡើយទេ៖ «ផ្នត់គំនិតរបស់ពលរដ្ឋកម្ពុជា ពេលណាគាត់បោះឆ្នោតឲ្យអ្នកដឹកនាំរបស់គាត់រួចហើយ គាត់ទុកឲ្យអ្នកដឹកនាំធ្វើអ្វីស្រេចតែចិត្តចុះ គាត់សុំតែម៉ាតែរួចខ្លួននៅក្នុងលក្ខខ័ណ្ឌនៃស្ថានភាពប្រព័ន្ធគ្រប់គ្រងនយោបាយ ឬភាពមានកម្រិតរបស់ប្រជាពលរដ្ឋហ្នឹងហើយ ដែលធ្វើឲ្យប្រព័ន្ធគ្រប់គ្រងមានការលំបាករហូតមកដល់សព្វថ្ងៃ»
ឆ្លើយតបនឹងការលើកឡើងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ថា កម្ពុជាជាប្រទេសមានប្រជាធិបតេយ្យ និងនិតិរដ្ឋ ហើយការចាប់ខ្លួនសកម្មជនបក្ស និងការរំលាយគណបក្សប្រឆាំងជាការអនុវត្តតាមច្បាប់៖ «លទ្ធិប្រជាធិបតេយ្យដំណើរការទៅល្អវាផ្សាភ្ជាប់ទៅនឹងនីតិរដ្ឋដែរ បើសិនជនណាគណបក្សនយោបាយ ឬអ្នកនយោបាយអនុវត្តប្រព្រឹត្តិខុសច្បាប់ ហើយយើងមិនហ៊ានចាត់ការតាមផ្លូវច្បាប់ខ្លាចប៉ះពាល់ប្រជាធិបតេយ្យ អាហ្នឹងមិនត្រឹមត្រូវទេ»។
ការអនុវត្តច្បាប់ និងគោរពតាមនីតិរដ្ឋដូចដែលលោក សុខ ឥសាន នេះ ត្រូវបានអង្គការសិទ្ធិមនុស្សជាតិ អន្តរជាតិមើលឃើញថា ជាការអនុវត្តមិនស្មើភាពឡើយ ប៉ុន្តែជាការអនុវត្តការពារតែក្រុមបក្ខពួកអ្នកមានអំណាចដែលគ្មានអ្នកណាអាចប៉ះបាន។ រីឯក្រុមប្រជាពលរដ្ឋ ឬអ្នកមាននិន្នាការគាំទ្របក្សប្រឆាំងវិញ មិនត្រូវបានការពារដោយច្បាប់ដោយស្មើភាពឡើយ។
មួយចំណែកនៃការចាប់ខ្លួនក៏ពាក់ព័ន្ធនឹងការបញ្ចេញមតិទាក់ទងនឹងជំងឺកូវីដ១៩ ដែរ។ ឧត្ដមស្នងការសិទ្ធិមនុស្ស អ.ស.ប អ្នកស្រី មីសែ្សល បាស្សេឡេត( Michelle Bachelet) មានប្រសាសន៍នៅក្នុងសេចក្ដីប្រកាសព័ត៌មានពីទីក្រុងហ្សឺណែវ (GENVA) ប្រទេសស្វីស កាលពីដើមខែមិថុនានេះថា រដ្ឋាភិបាលកម្ពុជា បានប្រើប្រាស់វិធានការគាបសង្កត់ ដើម្បីរារាំងការនិយាយស្ដីស្របច្បាប់ រួមទាំងចាប់ខ្លួនមនុស្សផង ក្រោមលេសថា ការពារពីភាពចលាចលសង្គម ក្នុងពេលជំងឺកូវីដ១៩ កំពុងរាតត្បាត។
ការិយាល័យនៃឧត្ដមស្នងការអង្គការសហប្រជាជាតិ ទទួលបន្ទុកសិទ្ធិមនុស្ស បានចងក្រងជាឯកសារទាក់ទងនឹងការចាប់ខ្លួនមនុស្សចំនួន ៣០នាក់ រាប់ទាំងស្ត្រីម្នាក់ និងក្មេងស្រីម្នាក់អាយុ ១៤ឆ្នាំ ដោយសារតែការនិយាយអធិប្បាយជាសាធារណៈ និងការបង្ហោះសារលើបណ្ដាញសង្គមហ្វេសប៊ុក ទាក់ទងនឹងជំងឺកូវីដ-១៩។ អ្នកស្រីបញ្ជាក់ថា មនុស្សមួយចំនួន ត្រូវបានចោទប្រកាន់ពីបទ “ផ្សព្វផ្សាយព័ត៌មានមិនពិត ឬព័ត៌មានក្លែងក្លាយ ការញុះញង់ឱ្យប្រព្រឹត្តបទឧក្រិដ្ឋ និងរៀបចំផែនការប្រឆាំងនឹងរដ្ឋាភិបាល“៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។