គណបក្សប្រឆាំងនៅក្រៅប្រទេសប្រកាសធ្វើយុទ្ធនាការគូសសន្លឹកឆ្នោតចោលនៅពេលទៅបោះឆ្នោត រួមទាំងប្រមូលផ្តុំធ្វើបាតុកម្មប្រឆាំងនឹងការបោះឆ្នោតថ្ងៃទី ២៣ កក្កដា ដែលពួកគេចាត់ទុកថា ជាការបោះឆ្នោតក្លែងក្លាយ។ យុទ្ធនាការនេះ ធ្វើឡើងបន្ទាប់ពីរបបដឹកនាំរបស់លោក ហ៊ុន សែន រារាំងគណបក្សភ្លើងទៀនមិនឱ្យចូលរួមបោះឆ្នោត និងកែច្បាប់បោះឆ្នោតបំបិទសិទ្ធរបស់ពលរដ្ឋដើម្បីកេងចំណេញនយោបាយ។
មន្ត្រីគណបក្សប្រឆាំងកំពុងយុទ្ធនាការបង្ហោះសារនៅលើបណ្តេញសង្គមស្នើឱ្យពលរដ្ឋទៅគូសសន្លឹកឆ្នោតចោលដើម្បីប្រឆាំងនឹងអំពើអយុត្តិធម៌ ក្រោយលោក ហ៊ុន សែន រារាំងមិនឱ្យគណបក្សភ្លើងទៀនចូលរួមប្រកួតប្រជែងការបោះឆ្នោតនាពេលខាងមុខ។
ប្រធានក្រុមប្រឹក្សាភិបាលគណបក្សសង្គ្រោះជាតិនៅក្រៅប្រទេសហៅកាត់ថា (CNRPO) លោក សួន ណារិទ្ធ ប្រាប់វិទ្យុអាស៊ីសេរីនៅថ្ងៃទី៣០ ខែមិថុនា ថា ក្រោយពេលរបបដឹកនាំរបស់លោក ហ៊ុន សែន ផាត់គណបក្សប្រឆាំងចេញពីសង្វៀនប្រកួតប្រជែង ហើយកែច្បាប់បំបិទសិទ្ធិរបស់ពលរដ្ឋដែលមិនចេញទៅបោះឆ្នោតនោះ គណបក្សប្រឆាំងបានប្រកាសធ្វើយុទ្ធនាការអំពាវនាវឱ្យពលរដ្ឋខ្មែរដែលមានឈ្មោះនៅក្នុងបញ្ជីបោះឆ្នោតទាំងអស់ចេញទៅបោះឆ្នោត តែគូសខ្វែងនៅលើសន្លឹកឆ្នោតចោល ដើម្បីបញ្ចេញសំឡេងប្រឆាំងនឹងការបោះឆ្នោតអយុត្តិធម៌នៅថ្ងៃទី២៣ ខែកក្កដា ខាងមុខនេះ។ លោកបញ្ជាក់ទៀតថា មេដឹកនាំគណបក្សនេះកំពុងមមាញឹកធ្វើសកម្មភាពការទូត ហើយថ្នាក់ដឹកនាំនៅតាមបណ្តាទ្វីបជុំវិញពិភពលោកក៏រៀបចំធ្វើបាតុកម្មឱ្យបានច្រើនដងនៅតាមបណ្តាប្រទេសដែលមានពលរដ្ឋខ្មែររស់នៅ និងធ្វើការ ដូចជានៅប្រទេសជប៉ុន អឺរ៉ុប អាមេរិក និងអូស្ត្រាលីជាដើម ដើម្បីរុញឱ្យសហគមន៍អន្តរជាតិកុំទទួលស្គាល់រដ្ឋាភិបាលខុសច្បាប់នៅក្រោយការបោះឆ្នោត។
លោក សួន ណារិទ្ធ៖ «ការប្រើប្រាស់សិទ្ធិហ្នឹងអស់ពិបាកទេ គឺថាអំពាវនាវដល់ពលរដ្ឋចូលរួមនិយាយឱ្យស្រួលស្តាប់ គឺគូសខ្វែងនៅលើសន្លឹកឆ្នោតចោល បើសិនបងប្អូនយល់ថា នៅក្នុងបញ្ជីឆ្នោតពុំមានគណបក្សដែលបងប្អូនគាំទ្រ ហើយបងប្អូននៅក្នុងស្រុកមិនបាច់ធ្វើសកម្មភាពអ្វីធំដុំ ឬគគ្រឹកគគ្រេងទេ ដើម្បីសុវត្ថិភាពរបស់បងប្អូន សាររបស់យើងរហូតដល់មួយថ្ងៃមុនការបោះឆ្នោតដើម្បីឱ្យបងប្អូនជ្រាបទូទាំងប្រទេសឱ្យបានច្រើនតាមដែលអាចធ្វើទៅបាន»។
ស្រដៀងគ្នានេះតំណាងពលករធ្វើការនៅប្រទេសថៃ និងជាសកម្មបក្សប្រឆាំង លោក ឆន សុខឿន ប្រាប់ថា បច្ចុប្បន្នក្រុមការងាររបស់លោកកំពុងចុះជួបក្រុមកម្មករខ្មែរធ្វើការនៅតាមតំបន់នានានៅប្រទេសថៃ រួមទាំងបង្ហោះសារនិងរូបភាពនៅលើបណ្ដាញសង្គមថែមទៀត ដើម្បីពន្យល់ពួកគាត់អំពីការប្រើប្រាស់សិទ្ធិសេរីភាព និងសារៈសំខាន់នៃការគូសខ្វែងនៅលើសន្លឹកឆ្នោតចោលនៅថ្ងៃបោះឆ្នោត ដើម្បីប្រឆាំងទៅនឹងការបោះឆ្នោតក្លែងក្លាយនៅថ្ងៃទី២៣ ខែកក្កដាខាងមុខនេះដែលគ្មានមានវត្តមានគណបក្សភ្លើងទៀន។ លោកឱ្យដឹងថា ក្រុមកម្មករនឹងនាំគ្នាចេញដាក់ញត្តិនៅតាមបណ្តាស្ថានទូតនៃប្រទេសម្ចាស់ហត្ថលេខីកិច្ចព្រមព្រៀងសន្តិភាពទីក្រុងប៉ារីសថ្ងៃទី២៣ ខែតុលា ឆ្នាំ១៩៩១ នៅពេលឆាប់ៗនេះ ដើម្បីជំរុញឱ្យលោក ហ៊ុន សែន ងាកមកគោរពសិទ្ធិមនុស្ស និងលទ្ធិប្រជាធិបតេយ្យ ព្រមទាំងរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ឡើងវិញ។
Opens in new windowលោក ឆន សុខឿន៖ «យើងមិនទៅចូលរួមការបោះឆ្នោតនៅថ្ងៃទី២៣ ខែកក្កដា ទេ ព្រោះថ្ងៃនោះជាថ្ងៃបោះឆ្នោតក្លែងក្លាយដោយសារគ្មានគណបក្សភ្លើងទៀន។ ទីពីរបើសិនជាមេដឹកនាំគឺលោក ហ៊ុន សែន ក៏ដូចជាគណបក្សកាន់អំណាចបង្ខំឱ្យទៅបោះឆ្នោត គឺពលរដ្ឋទៅបោះឆ្នោតដោយគូសខ្វែងនៅលើសន្លឹកឆ្នោតចោលតែម្តង នេះគឺជាយុទ្ធនាការរបស់ពួកយើងកំពុងធ្វើរាល់ថ្ងៃ»។
យុទ្ធនាការពលរដ្ឋ នឹងទៅគូសសន្លឹកឆ្នោតចោលនេះធ្វើឡើងស្របពេលដែលលោក ហ៊ុន សែន អះអាងជាថ្មីទៀតនៅក្នុងខេត្តពោធិ៍សាត់នៅថ្ងៃទី៣០ ខែមិថុនា ថា ច្បាប់បោះឆ្នោតដែលសភាពឯកបក្សរបស់លោកបានធ្វើវិសោធនកម្មអាចដកសិទ្ធិនយោបាយរបស់ក្រុមគណបក្សប្រឆាំងនៅក្រៅប្រទេសមិនឱ្យចូលរួមបោះឆ្នោតរហូតមួយជីវិត។
លោក ហ៊ុន សែន៖ «ដោយសារពួកអ្នកឯងរុកចុះរុកឡើងវិធានការច្បាប់ត្រូវប្រកាន់យក វាមិនមែនជាការកាត់សិទ្ធិពលរដ្ឋទេ គឺដើម្បីការពារភាពសុខសាន្តរបស់ប្រជាពលរដ្ឋ និងដំណើរការអនុវត្តសិទ្ធិរបស់ពលរដ្ឋ អ៊ីចឹងលោកឯងមើលនៅក្នុងច្បាប់ហ្នឹងទៅចេញទៅលោកឯងស្រងាកចិត្តទេ»។
ជុំវិញរឿងនេះ នាយកប្រតិបត្តិអង្គការ ឃ្លាំមើលការបោះឆ្នោតនៅកម្ពុជាហៅកាត់ថា និចហ្វិច(Nicfec) លោក សំ គន្ធាមី ថ្លែងថា សង្គមប្រជាធិបតេយ្យការបោះឆ្នោតជ្រើសរើសគណបក្សនយោបាយណាមួយ គឺជាសិទ្ធិសេរីភាពរបស់ពលរដ្ឋគ្រប់រូបដោយមិនបង្ខំបានឡើយ។ លោកបញ្ជាក់ថា បើសិនពលរដ្ឋចេញទៅបោះឆ្នោតនៅថ្ងៃទី២៣ ខែកក្កដានេះ ប៉ុន្តែពួកគាត់គូសនៅលើសន្លឹកឆ្នោតជ្រើសគណបក្សនយោបាយណាមួយ ឬមិនគូសឱ្យគណបក្សទាំងអស់ក៏បាន ព្រោះការបោះឆ្នោតជាការសម្ងាត់ និងគ្មានទោសទណ្ឌអ្វីនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។