តុលាការខេត្តប៉ៃលិនកោះហៅប្រធានគណបក្សភ្លើងទៀនម្នាក់នៅស្រុកសាលាក្រៅឱ្យចូលឆ្លើយបំភ្លឺ ពីបទឆបោក រំលោភលើសេចក្ដីទុកចិត្ត និងកាន់កាប់លើអចលនវត្ថុឯកជន។មន្ត្រីសង្គមស៊ីវិលយល់ឃើញថា ករណីរឿងនេះគឺមានភាពមិនប្រក្រតី និងជាធ្វើទុក្ខបុកម្នេញដល់មន្ត្រីគណបក្សភ្លើងទៀន។
តំណាងអយ្យការអមសាលាដំបូងខេត្តប៉ៃលិនកោះហៅប្រធានគណបក្សភ្លើងទៀនស្រុកសាលាក្រៅលោក ពេជ្រ បូរិន ឱ្យចូលឆ្លើយបំភ្លឺនៅថ្ងៃទី២៨ មិថុនា ខាងមុខនេះ។ លោក ពេជ្រ បូរិន ចាត់ទុកការកោះហៅនេះថា ជាទង្វើធ្វើទុក្ខបុកម្នេញផ្នែកនយោបាយ និងប្រកាន់និន្នាការគណបក្ស។
ប្រធានគណបក្សភ្លើងទៀនស្រុកសាលាក្រៅ លោក ពេជ្រ បូរិន ប្រាប់វិទ្យុអាស៊ីសេរីនៅថ្ងៃទី២៦មិថុនា ថា លោកមិនស្គាល់បុគ្គលដែលបានប្ដឹងលោកនោះជាមិនហើយក៏មិនមានទំនាក់ទំនងអ្វីនឹងគ្នាដែរ។ លោកបន្តថា ដីកាកោះហៅតក់ក្រហល់បែបនេះ គឺជារឿងនយោបាយច្រើនជាងដោយសារតែលោកមិនព្រមចុះចូលជាមួយគណបក្សកាន់អំណាចដូច្នេះហើយបានអាជ្ញាធរប្រឹងប្រែងប្រើប្រព័ន្ធតុលាការធ្វើទុក្ខបុកម្នេញមកលើរូបលោក។
លោក ពេជ្រ បូរិន៖ «ខ្ញុំមានការសោកស្ដាយខ្លាំងសម្រាប់ខ្ញុំក៏ដូចជាគ្នីគ្នាខ្ញុំមួយចំនួនកន្លងមកធ្លាប់ជួបរឿងអយុត្តិធម៌អ៊ីចឹងដែរ ក៏ប៉ុន្តែខ្ញុំអត់ធ្លាប់ជួបផ្ទាល់ទេ ធ្លាប់តែឃើញគ្នាខ្ញុំជួបភាពធ្វើទុក្ខបុកម្នេញ ឬក៏រងភាពអយុត្តិធម៌ ឥឡូវនេះធ្លាក់មកលើខ្ញុំហើយ ទាំងដែលខ្ញុំអត់ដឹងអីផងហ្នឹង»។
លោក ពេជ្រ បូរិន ជាអតីតមេឃុំស្ទឹងកាច់របស់គណបក្សសង្គ្រោះជាតិ កាលឆ្នាំ២០១៧ ក្រោយលោកឡើងកាន់ដំណែងជាមេឃុំស្ទឹងកាច់បានរយៈពេលជិត៤ខែ រដ្ឋាភិបាលលោក ហ៊ុន សែន បានរម្លាយគណបក្សសង្គ្រោះជាតិចោលទាំងកំរោល។ លោក ពេជ្រ បូរិន បញ្ជាក់ថា ក្នុងរយៈពេលលោកធ្វើជាមេឃុំស្ទឹងកាច់ ស្រុកសាលាក្រៅលោកមិនដែលស្គាល់បុគ្គលដែលជាដើមបណ្ដឹង គឺលោក ឡាវ ស៊ាងហេង និងលោក ឈុន ឆៃហ៊ាង នោះទេ ដូច្នេះករណីនេះគឺការគំរាមកំហែងកំបាក់ស្មារតីដោយសារលោកមិនព្រមចូលរួមជីវភាពនយោបាយ។
ប្រធានគណៈកម្មការប្រតិបត្តិគណបក្សភ្លើងទៀនខេត្តប៉ៃលិន លោក ខឹម មុន្នីកុសល ថ្លែងថា បញ្ហាលោក ពេជ្រ បូរិន នេះគឺជាការប្រឌិតឡើងដើម្បីបំភិតបំភ័យឱ្យលោកចុះចូលជាមួយគណបក្សកាន់អំណាចតែប៉ុណ្ណោះ ពីព្រោះលោក ពេជ្រ បូរិន ជាមនុស្សស្លូតបូតនិងតម្កល់ប្រយោជន៍ជាតិជាធំ។ លោកអះអាងថា លោក ពេជ្រ បូរិន គ្មានដីធ្លីនៅភូមិអូរឈើក្រំ ឃុំស្ទឹងកាច់ នោះទេ ដូច្នេះដីកាកោះហៅរបស់តុលាការនេះ គ្រាន់តែជាឧបករណ៍គាបសង្កត់ដល់សមាជិកគណបក្សភ្លើងទៀនតែប៉ុណ្ណោះ។
លោក ខឹម មុន្នីកុសល៖ «សូមអំពាវនាវទៅអាជ្ញាធរខេត្តប៉ៃលិន ជាពិសេសលោកជំទាវ បាន ស្រីមុំ អភិបាលខេត្តប៉ៃលិនសូមឱ្យដកពាក្យបណ្ដឹងហ្នឹងវិញដើម្បីឱ្យលោក ពេជ្រ បូរិន ហ្នឹងអាចបន្តកិច្ចការរបស់លោកនៅថ្នាក់មូលដ្ឋានហ្នឹងបានដូចប្រក្រតីឡើងវិញ ពីព្រោះលោកជាមនុស្សស្អាតស្អំ អ៊ីចឹងហើយខ្ញុំមានការសោកស្ដាយ ហើយនិងហួសចិត្តទៅនឹងដីកាដែលសាលាដំបូងខេត្តប៉ៃលិន បានកោះហៅលោក ពេជ្រ បូរិន យ៉ាងតក់ក្រហល់បែបនេះ»។
ឆ្លើយតបបញ្ហានេះប្រធានលេខាធិការដ្ឋានសាលាដំបូងខេត្តប៉ៃលិនលោក ពិន សុខុម ប្រាប់វិទ្យុអាស៊ីសេរីយ៉ាងខ្លីថា លោកមិនទាន់ទទួលបានព័ត៌មាននេះទេ។
លោក ពិន សុខុម៖ «ពាក់ព័ន្ធនឹងម្នាក់ឈ្មោះ បូរិន ហ្នឹងដោយសារព័ត៌មានខ្ញុំមិនទាន់ទទួលបានរបាយការណ៍ឬក៏ដីកាកោះហៅ ពេជ្រ បូរិន ទេខ្ញុំចូលធ្វើការវិញថ្ងៃស្អែកច្បាស់អ៊ីចឹងខ្ញុំអាចផ្ដល់ព័ត៌មានជូនវិញថ្ងៃស្អែក»។
ទោះជាយ៉ាងណាមន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបាត់ដំបង និងខេត្តប៉ៃលិនលោក យិន ម៉េងលី មានប្រសាសន៍ថា ករណីរឿង លោក ពេជ្រ បូរិន នេះគឺមានភាពមិនប្រក្រតី។ លោកកត់សំគាល់ថា ទី១លោក ពេជ្រ បូរិន ជាអតីតមេឃុំស្ទឹងកាច់ របស់បក្សសង្គ្រោះជាតិកាលពីឆ្នាំ២០១៧ ក្រោយកាន់តំណែងបានជិត៤ខែបក្សសង្គ្រោះជាតិត្រូវបានរម្លាយចោល ក៏ប៉ុន្តែក្នុងដីកាដាក់ថា អំឡុងឆ្នាំ២០១៩ដល់បច្ចុប្បន្នដែលលោក ពេជ្រ បូរិន បានរំលោភយកទ្រព្យសម្បត្តិរបស់បុគ្គលឯកជន។ ចំណុចទី២ នគរបាលយុត្តិធម៌យកដីកាមកប្រគល់ឱ្យមន្ត្រីបក្សភ្លើងទៀន នៅថ្ងៃ២៦ មិថុនា ហើយឱ្យចូលបំភ្លឺថ្ងៃទី២៨ មិថុនា គឺមានរយៈពេលខ្លី ដែលធ្វើឱ្យចុងចោទមិនអាចត្រៀមឯកសារ និងរកមេធាវីទាន់ពេលនោះទេ។
លោក យិន ម៉េងលី៖ «ពាក់ព័ន្ធនឹងបទចោទនេះប្រសិនបើមិនមានធាតុផ្សំអីគ្រប់គ្រាន់ទេ ខ្ញុំសង្ឃឹមថា តុលាការនឹងតម្កល់រឿងនេះចោលឥតចាត់ការ ព្រោះតាមនីតិវិធីប្រសិនបើ លោក បូរិន គាត់ពាក់ព័ន្ធមែន បើដីកានេះតាមខ្ញុំចាប់អារម្មណ៍គឺ លោក បូរិន ជាអតីតមេឃុំ អ៊ីចឹងនៅក្នុងការបោះឆ្នោតឆ្នាំ២០១៧ លោក បូរិន គឺជាមេឃុំមើលឃើញមេឃុំ កាលហ្នឹងយើងបោះឆ្នោតខែ៦ គាត់ជាមេឃុំបានរយៈពេលតែ៤ខែស្រាប់តែមានបទល្មើសដល់ទី២បណ្ដឹងដោយមនុស្សដល់ទៅ ២នាក់ អ៊ីចឹងយើងមានការចាប់អារម្មណ៍»។
ក្រៅពីលោក ពេជ្រ បូរិន រងការធ្វើទុក្ខបុកម្នេញតាមប្រព័ន្ធតុលាការនោះ នៅមានសកម្មជនបក្សភ្លើងទៀនមួយចំនួនទៀតដូចជាលោក ខឹម មុន្នីកុសល ត្រូវបានតុលាការខេត្តនេះចោទប្រកាន់ពីបទញុះញង់បង្កឱ្យមានការរើសអើង និងដកលោកចេញពីក្របខណ្ឌរដ្ឋជាដើម។ លើសពីនេះទៀតអភិបាលខេត្តប៉ៃលិននេះក៏មានឈ្មោះថា អ្នកពូកែខាងរើសអើងនយោបាយលើសកម្មជនគណបក្សភ្លើងទៀន ដែលជាសមាជិកក្រុមប្រឹក្សាឃុំសង្កាត់ នៅក្នុងខេត្តនេះដែរ។ សមាជិកក្រុមប្រឹក្សាឃុំសង្កាត់ដែលមកពីគណបក្សភ្លើងទៀនមិនត្រូវបានអនុញ្ញាតឱ្យចូលប្រជុំត្រួតពិនិត្យ និងដាក់ទិសដៅការងារ របស់ក្រុមប្រឹក្សាឃុំសង្កាត់ និងស្មៀនទូទាំងខេត្តប៉ៃលិន ដឹកនាំដោយអភិបាលខេត្តប៉ៃលិនអ្នកស្រី បាន ស្រីមុំ នោះទេ។ ការបំភិតបំភ័យតាមប្រព័ន្ធតុលាការ ការគំរាមកំហែង ការរើសអើងសកម្មជនគណបក្សភ្លើងទៀននេះហើយ ជាដើមហេតុធ្វើឱ្យសមាជិកបក្សភ្លើងទៀនមួយចំនួនបង្ខំចិត្តចុះចូលជាមួយគណបក្សកាន់អំណាច។
ទោះយ៉ាងណាលោក ពេជ្រ បូរិន អះអាងថា បើទោះបីមានអាជ្ញាធរគំរាមកំហែងក្រោមរូបភាពបែបណាក៏ដោយ ក៏លោកមិនតក់ស្លុតឡើយហើយនៅតែប្រកាន់ជំហរមិនចុះចូលជាមួយគណបក្សកាន់អំណាចដដែល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។