ពលរដ្ឋរស់នៅក្រៅប្រទេសហួសចិត្តនឹងលោក ហ៊ុន ម៉ាណែត ដែលមិនខ្វល់ពីសំឡេងរបស់ខ្លួន
2024.10.20
លោកនាយករដ្ឋមន្ត្រី ហ៊ុន ម៉ាណែត ថ្លែងនៅប្រទេសឥណ្ឌូណេស៊ី កាលពីថ្ងៃទី១៩ តុលា ២០២៤។
រូប៖ ហ្វេសប៊ុកលោក ហ៊ុន ម៉ាណែត
ពលរដ្ឋរស់នៅក្រៅប្រទេសមួយចំនួនរិះគន់ លោកនាយករដ្ឋមន្ត្រី ហ៊ុន ម៉ាណែត ដែលចាត់ទុកមតិយោបល់របស់អ្នករិះគន់ថា គ្មានប្រយោជន៍ និងមិនចំណេញព្រោះលោកមានការងារច្រើនដែលត្រូវដោះស្រាយជូនពលរដ្ឋ។ ពួកគាត់អះអាងថា ទង្វើរបស់លោក ហ៊ុន ម៉ាណែត នេះមិនស័ក្ដិសមធ្វើជាមេដឹកនាំប្រទេសឡើយ ហើយគួរតែចុះចេញពីដំណែងជានាយករដ្ឋមន្ត្រី។
ក្រោយពេលដែលលោក ហ៊ុន ម៉ាណែត ឡើងកាន់ដំណែងជានាយករដ្ឋមន្ត្រីបន្តពីឪពុករបស់លោក គឺលោក ហ៊ុន សែន រយៈពេលជាង ១ឆ្នាំមកនេះ លោកនៅមិនទាន់បង្ហាញស្នាដៃលេចធ្លោជួយដោះស្រាយបញ្ហាពលរដ្ឋនៅឡើយទេ ផ្ទុយវិញ លោកបែរជាចាត់ទុកក្រុមអ្នករិះគន់នៅក្រៅប្រទេសថា មនុស្សគ្មានប្រយោជន៍ និងមានគំនិតអវិជ្ជមានលើរដ្ឋាភិបាលរបស់លោកទៅវិញ។
ពលរដ្ឋខ្មែររស់នៅប្រទេសជប៉ុន លោកស្រី ខាត សំនៀង ប្រាប់វិទ្យុអាស៊ីសេរីនៅថ្ងៃទី១៩ ខែតុលា ថា លោកស្រីហួសចិត្តនឹងភាពក្រអឺតក្រទមរបស់លោក ហ៊ុន ម៉ាណែត ដែលចាត់ទុកមតិយោបល់របស់អ្នករិះគន់ថា ជាមនុស្សគ្មានប្រយោជន៍ក្នុងក្រសែភ្នែករបស់លោក។ លោកស្រីបន្តថា លោក ហ៊ុន ម៉ាណែត មិនស័ក្ដិសមធ្វើជាមេដឹកនាំប្រទេសនោះទេ ពីព្រោះការដឹកនាំរបស់លោកកន្លងមកនេះ ធ្វើឱ្យពលរដ្ឋរស់នៅកាន់តែធ្លាក់ខ្លួនក្រីក្រ។
លោកស្រី ខាត សំនៀង៖ «មានតែការចាប់ចងប្រជាពលរដ្ឋ និងតាមកម្ទេចអ្នករិះគន់តាមពិតគេរិះគន់គេមើលចំណុចគាត់ខ្វះខាតបានគេរិះគន់។ ប្រសិនបើគាត់ដឹកនាំល្អគ្មានចំណុចខ្វះខាតទាំងឪពុកទាំងកូនគ្មានអ្នកណាគេរិះគន់ទេគ្មានអ្នកណាទំនេរចាំតែរិះគន់គាត់ទេ តែសំខាន់ការដឹកនាំរបស់គាត់ទាំងឪពុកទាំងកូនវាអសមត្ថភាពមានតែចាប់ចងប្រជាពលរដ្ឋមានការតាមកម្ទេច»។
ស្រដៀងគ្នានេះដែរ ប្រធានចលនាយុវជនគណបក្សសង្គ្រោះជាតិប្រចាំប្រទេសកូរ៉េខាងត្បូង (South Korea) លោក មាស ពិសាល ចំអកឱ្យលោក ហ៊ុន ម៉ាណែត ថា លោក ហ៊ុន ម៉ាណែត តាំងខ្លួនជាជួយដោះស្រាយទុក្ខលំបាកឱ្យពលរដ្ឋ ប៉ុន្តែក្រុមឈ្មួញរកស៊ីទុច្ចរិតដែលស្និទ្ធនឹងត្រកូលហ៊ុនបែរជារកស៊ីបោកប្រាស់ពលរដ្ឋទៅវិញ។ លោកបន្តថា តាំងពីឡើងដឹកនាំប្រទេសមកលោក ហ៊ុន ម៉ាណែត មិនបានធ្វើឱ្យពលរដ្ឋរស់នៅក្នុងជីវភាពសមរម្យឡើយ។
លោក មាស ពិសាល៖ «បើគាត់រវល់នឹងដោះស្រាយទុក្ខលំបាកប្រជាពលរដ្ឋពួកគាត់ត្រូវមកស្ដាប់សំឡេងមកត្អូញត្អែររបស់ពលរដ្ឋដែលកំពុងតែតវ៉ាទាមទារយុត្តិធម៌នោះ។ តែជាក់ស្ដែងគាត់ខ្លួនឯងបានទទួលស្គាល់ថា មិនដែលខ្វល់អំពីការរិះគន់អំពីការតវ៉ាទាមទារអ៊ីចឹងបានន័យថា ម៉េចគាត់កំពុងនិយាយជាន់កែងខ្លួនឯង អ៊ីចឹងយើងមើលហើយវិបត្តិដីធ្លីនៅតំបន់មួយចំនួនមិនទាន់អាចដោះស្រាយបានរយៈពេលអូសបន្លាយជាង ១០ឆ្នាំ»។
ប្រតិកម្មរបស់ពលរដ្ឋរស់នៅក្រៅប្រទេសនេះធ្វើឡើងបន្ទាប់ពី លោក ហ៊ុន ម៉ាណែត នៅថ្ងៃទី១៩ ខែតុលា បានថ្លែងថា លោកមិនដែលខ្វល់នឹងមតិយោបល់រិះគន់របស់អ្នករិះគន់នៅក្រៅប្រទេសឡើយ ហើយលោកក៏គ្មានពេលតាមដានក្រុមអ្នកអង្គុយចាំតែរិះគន់អ្នកទាំងនោះដែរ ពីព្រោះលោកមានការងារច្រើនណាស់ដែលត្រូវដោះស្រាយ។ ក្រៅពីនេះលោក ហ៊ុន ម៉ាណែត ថ្លែងជំនួសម្ដាយរបស់លោកគឺ អ្នកស្រី ប៊ុន រ៉ានី ក្នុងពិធីសំណេះសំណាល និងបំពាក់កន្សែងយុវជនកាកបាទក្រហមកម្ពុជាថា មានអ្នកវិភាគមួយចំនួនថា ស្ថាប័នកាកបាទក្រហមកម្ពុជាក្រោមការដឹកនាំរបស់លោកម្ដាយគឺជា ស្ថាប័នមិនឯករាជ្យ ក៏ប៉ុន្តែម្ដាយលោកមិនខ្វល់នឹងសំដីទាំងនោះឡើយ គឺស្ថាប័នកាកបាទក្រហមគឺផ្ដោតលើការជួយសង្គ្រោះពលរដ្ឋដែលជួបទុក្ខលំបាក។
លោក ហ៊ុន ម៉ាណែត៖ «មានអ្នកសួរខ្ញុំថា បងឯងឃើញតែអ្នកក្រៅប្រទេសមួយថ្ងៃតានោះអីផងតាំងពីអ្នកអត់សក់រហូតដល់អ្នកមានសក់ សក់វែងមួយថ្ងៃៗឃើញតែជេរហើយបងឯងញញឹមរហូតអ៊ីចឹងខ្ញុំថា ខ្ញុំអត់ដែលខ្វល់ផងគេជេររឿងរបស់គេ បើគេងើបពីដេកគេអង្គុយតែពីរឿងអវិជ្ជមាន ឱ្យគេក្ដៅចិត្តចុះតែខ្ញុំគិតតែពីខ្ញុំធ្វើអីខ្លះក្នុងនាមជានាយករដ្ឋមន្ត្រីធ្វើអីខ្លះ ដកបានអីខ្លះដើម្បីបង្កើនផលល្អជូនជាតិ និងមាតុភូមិគិតតែធ្វើប៉ុណ្ណឹងទៅបានហើយ»។
ជុំវិញរឿងនេះ អ្នកឃ្លាំមើលបញ្ហាសិទ្ធិមនុស្ស និងសង្គម លោក ស៊ឹង សែនករុណា មានប្រសាសន៍ថា ការលើកឡើងរបស់លោក ហ៊ុន ម៉ាណែត នេះគឺបង្ហាញភាពគ្មានទំនួលខុសត្រូវក្នុងនាមជាមេដឹកនាំ ពីព្រោះមេដឹកនាំដែលយកចិត្តទុកដាក់ពីប្រទេសជាតិគឺស្ដាប់មតិយោបល់ពីពលរដ្ឋដែលជាម្ចាស់ឆ្នោត។ លោកបន្តថា មេដឹកនាំដែលអសកម្មបែបនេះនឹងធ្វើឱ្យសង្គមជួបវិបត្តិកាន់តែធ្ងន់ធ្ងរ។
លោក ស៊ឹង សែនករុណា៖ «មានវិបត្តិសង្គមអ៊ីចឹងជាដើមអាហ្នឹងដោយសារតែខ្វះការយកចិត្តទុកខ្វះការចូលរួមយ៉ាងសកម្មអ៊ីចឹង ហើយបានជាមេដឹកនាំតែងតែបំផ្លើសបំភ្លៃព័ត៌មានបោកបញ្ឆោតអួតអាងហើយគ្មានអ្វីដែលជារឿងពិតជាក់ស្ដែងដែលអាចទុកចិត្តបានអាចរស់នៅក្នុងសង្គមមួយដែលគាត់អាចរស់នៅដោយសុខដុមរមនាដោយសារតែការមិនយកចិត្តដាក់ពីពួកគាត់ឱ្យសកម្មដែលអ្នកនយោបាយចេះតែធ្វើអ្វីបានតាមចិត្ត»។
កន្លងមក លោក ហ៊ុន ម៉ាណែត ចាត់ទុកពាក្យសម្ដីរបស់អ្នករិះគន់ថា គ្រាន់តែជាការកម្សាន្តសប្បាយដើម្បីកំដរពេលអផ្សុករបស់លោកប៉ុណ្ណោះ។
ពលរដ្ឋ និងអ្នកឃ្លាំមើលយល់ឃើញថា ការណ៍ដែលលោក ហ៊ុន ម៉ាណែត មិនស្ដាប់មតិពលរដ្ឋបែបនេះ នឹងបណ្ដាលប្រទេសធ្លាក់ក្នុងវិបត្តិសេដ្ឋកិច្ចពលរដ្ឋចំណាកស្រុកទៅរកការងារធ្វើនៅក្រៅស្រុក បញ្ហាអំពើពុករលួយចាក់ស្រេះ លំហូរជនជាតិចិនមករកស៊ីខុសច្បាប់នៅកម្ពុជាតាមការឆបោកតាមប្រព័ន្ធអនឡាញ (Online) បញ្ហាសន្តិសុខសង្គម និងបញ្ហាអយុត្តិធម៌សង្គមជាដើម។ ពួកគាត់ចង់ឃើញ រដ្ឋាភិបាលកែលម្អចំណុចខ្វះខាតដោយទទួលយកមតិចម្រុះពីពលរដ្ឋដើម្បីលើកកម្ពស់សេដ្ឋកិច្ច និងស្ដារលិទ្ធប្រជាធិបតេយ្យឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- ពលរដ្ឋ និងអ្នកការពារសិទ្ធិមនុស្សធ្វើធម្មយាត្រាពីក្រុងកំពតមកភ្នំពេញ ដើម្បីលើកកម្ពស់ការគោរពសិទ្ធិមនុស្ស
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន តែងតាំងលោក ហៃ វណ្ណា និងសកម្មជន ១៨នាក់ទៀតជាទីប្រឹក្សា និងជំនួយការ
អត្ថបទពេញនិយម
នយោបាយ
- លោក ហ៊ុន សែន ទៅមជ្ឈិមបូព៌ា «ទំនងចង់ទៅដើរទាក់ទាញវិនិយោគទុន ខណៈរដ្ឋាភិបាលកូន កំពុងជួបបញ្ហាសេដ្ឋកិច្ច»
- ពលរដ្ឋខ្មែរនៅជប៉ុនធ្វើបាតុកម្មជំរុញឱ្យលោក ហ៊ុន ម៉ាណែត ស្ដារលទ្ធិប្រជាធិបតេយ្យឡើងវិញ
- បទសម្ភាសន៍អ្នកស្រី ធិត គឹមហ៊ុន អំពីការធ្វើសមាជរបស់ពលរដ្ឋខ្មែរ-អាម៉េរិកាំងរឿងកោះគជ់
- ពលរដ្ឋខ្មែរនៅអាមេរិកធ្វើសមាជទាមទារឲ្យរដ្ឋាភិបាលកម្ពុជា ប្ដឹងករណីកោះគជ់ទៅតុលាការអន្តរជាតិ
- អ្នកវិភាគថា របបផ្ដាច់ការត្រកូលហ៊ុន នឹងដួលរលំដូចរបបផ្ដាច់ការនៅស៊ីរីដែរ