រដ្ឋាភិបាលអំពាវនាវឲ្យស្ថាប័នមីក្រូហិរញ្ញវត្ថុបញ្ចុះការប្រាក់កម្ចី
2015.02.11
លោកនាយករដ្ឋមន្ត្រី ហ៊ុន សែន ក្នុងពេលចូលរួមក្នុងកិច្ចប្រជុំវេទិកាសេដ្ឋកិច្ចពិភពលោកលើកទី៤៥ នាប្រទេសស្វីស កាលពីថ្ងៃទី២៣ មករា ២០១៥។
បច្ចុប្បន្ន ប្រជាពលរដ្ឋមួយចំនួនខ្ចីប្រាក់ស្ថាប័នមីក្រូហិរញ្ញវត្ថុ ដើម្បីយកទៅអភិវឌ្ឍមុខរបបរកស៊ីរបស់ខ្លួន។ ប្រាក់កម្ចីនោះរួមជាមួយការប្រាក់ បានកើនឡើងជាលំដាប់ រហូតធ្វើឲ្យអ្នកជំពាក់ប្រាក់មិនអាចសងបាន ហើយត្រូវម្ចាស់បំណុលរឹបអូសយកផ្ទះ ឬដីដែលដាក់តម្កល់ដើម្បីខ្ចីប្រាក់។ ប្រជាពលរដ្ឋមួយចំនួនបានអំពាវនាវឲ្យរដ្ឋាភិបាលជួយពួកគាត់ ដោយបញ្ចុះការប្រាក់ជំពាក់។
ប្រធានសមាគមមីក្រូហិរញ្ញវត្ថុកម្ពុជា និងជាអគ្គនាយកគ្រឹះស្ថានមីក្រូហិរញ្ញវត្ថុស្ថាបនា ថ្លែងនៅថ្ងៃទី ១១ កុម្ភៈ ថា នៅក្នុងទិសដៅទាក់ទាញអតិថិជន ស្ថាប័នមីក្រូហិរញ្ញវត្ថុ តែងតែបញ្ចុះការប្រាក់កម្ចីជានិច្ចពីមួយឆ្នាំទៅមួយឆ្នាំ។
ការថ្លែងរបស់លោក ប៊ុន មុនី ប្រធានសមាគមមីក្រូហិរញ្ញវត្ថុកម្ពុជា កើតមានក្រោយពីមានសេចក្ដីអំពាវនាវរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី១០ កុម្ភៈ សុំឲ្យស្ថាប័នមីក្រូហិរញ្ញវត្ថុខិតខំបញ្ចុះការប្រាក់កម្ចីឲ្យទាប ដើម្បីជួយសម្រាលបន្ទុកជំពាក់បំណុលរបស់ប្រជាពលរដ្ឋ។
ក្នុងពេលចែកសញ្ញាបត្រនិស្សិតមហាវិទ្យាល័យច្បាប់ នៅកោះពេជ្រ លោក ហ៊ុន សែន បានលើកឡើងថា ស្ថាប័នមីក្រូហិរញ្ញវត្ថុមិនមែនជារបស់រដ្ឋទេ គឺជារបស់ឯកជន ដូច្នេះ រដ្ឋមិនអាចធ្វើអ្វីបានចំពោះការរឹបអូសផ្ទះនិងដីរបស់ប្រជាពលរដ្ឋជំពាក់ប្រាក់ស្ថាប័នមីក្រូហិរញ្ញវត្ថុនោះទេ។ ប៉ុន្តែលោកបានសុំឲ្យម្ចាស់ស្ថាប័នមីក្រូហិរញ្ញវត្ថុនានា គិតអំពីការសមត្ថភាពសងបំណុលរបស់ប្រជាពលរដ្ឋមុនពេលឲ្យប្រាក់ខ្ចី។ លោកថ្លែងថា សុំធ្វើយ៉ាងណាចុះឲ្យបានតែទាបកាន់តែល្អ សម្រាប់ការយកទៅប្រើប្រាស់ក្នុងការអភិវឌ្ឍ គ្រួសាររបស់គាត់ និងមុខរបររបស់គាត់។ សុំធ្វើយ៉ាងណាកុំឲ្យកន្លែងមីក្រូហិរញ្ញវត្ថុ ក្លាយទៅជាទីកន្លែងបញ្ចាំរបស់គាត់។
លោក ប៊ុន មុនី ប្រធានសមាគមមីក្រូហិរញ្ញវត្ថុកម្ពុជា មានប្រសាសន៍ថា កន្លងមក មុនពេលឲ្យប្រាក់ខ្ចី ស្ថាប័នមីក្រូហិរញ្ញវត្ថុតែងតែបានប្រកាសប្រាប់ប្រជាពលរដ្ឋថា អង្គភាពដែលឲ្យខ្ចីប្រាក់នេះ ជាក្រុមហ៊ុនឯកជន មិនមែនជាស្ថាប័នរបស់រដ្ឋទេ ប៉ុន្តែប្រជាពលរដ្ឋមួយចំនួននៅតែមានការយល់ច្រឡំ។
លោកប្រធានសមាគមមីក្រូហិរញ្ញវត្ថុកម្ពុជា ថ្លែងថា ចំពោះការទារបំណុលដោយមានការរឹបយកទ្រព្យសម្បត្តិតម្កល់ ដូចជា ផ្ទះ ឬ ដីនោះ វាជាការមួយមិនអាចជៀសផុតបានទេ នៅក្នុងការទូទាត់បំណុល ប៉ុន្តែបាតុភាពនោះស្ថិតនៅក្នុងចំនួនមួយតិចតួចប៉ុណ្ណោះ។
លោក ប៊ុន មុនី ថ្លែងថា ក្នុងរយៈពេល ៩ឆ្នាំ គិតពីឆ្នាំ២០០៨ មកដល់ឆ្នាំ២០១៥នេះ គ្រឹះស្ថានមីក្រូហិរញ្ញវត្ថុស្ថាបនា របស់លោក កាត់បន្ថយអត្រាការប្រាក់ពី ៣១% ក្នុងមួយឆ្នាំ ចុះមក ២២%។ លោកថ្លែងថា វាជាកត្តាមិនអាចចៀសរួចសម្រាប់អ្នកខ្ចីបុល ដែលមិនអាចសងបំណុលដែលត្រូវរឹបអូស។ ចំពោះការរឹបអូសនោះ គឺយើងគ្មានអំណាចទៅរឹបអូសទ្រព្យសម្បត្តិ ទ្រព្យតម្កល់របស់ប្រជាពលរដ្ឋទេ គឺមានតែអំណាចរបស់តុលាការ។ ដូច្នេះកាលណាមានការខកខាន យឺតយ៉ាវមិនបានសងបំណុលអីជាដើមនោះ មានតែយើងប្ដឹងទៅតុលាការ។
ប្រជាពលរដ្ឋមួយរូបឈ្មោះ សារួត រស់នៅខេត្តបាត់ដំបង ថ្លែងថា គាត់មានការរីករាយ បើសិនជាគ្រឹះស្ថានមីក្រូហិរញ្ញវត្ថុកាត់បន្ថយអត្រាការប្រាក់កម្ចីថែមទៀត។
ប្រភពមន្ត្រីសមាគមមីក្រូហិរញ្ញវត្ថុបានឲ្យដឹងថា បច្ចុប្បន្ននៅប្រទេសកម្ពុជា មានស្ថាប័នមីក្រូហិរញ្ញវត្ថុជាង ៣០០ ដែលដើរតួនាទីជាអ្នកផ្ដល់ប្រាក់ឲ្យប្រជាពលរដ្ឋខ្ចីយកទៅប្រើប្រាស់ពង្រីកមុខជំនួញ។ ប៉ុន្តែ ក្នុងចំណោមស្ថាប័នមីក្រូហិរញ្ញវត្ថុជាង ៣០០ នោះ មានតែ ៣៩ស្ថាប័នប៉ុណ្ណោះដែលមានអាជ្ញាប័ណ្ណធ្វើសកម្មភាពស្របច្បាប់ ដែលផ្ដល់ដោយធនាគារជាតិ ដែលជាអាជ្ញាធរមានសមត្ថកិច្ច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- លោក ហ៊ុន ម៉ានី ស្នើឲ្យនាយករដ្ឋមន្ត្រី លោក ហ៊ុន ម៉ាណែត ដកប្រធានមន្ទីរបរិស្ថានចំនួន៤ ខេត្ត នៅជុំវិញតំបន់ព្រៃឡង់
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- ខ្មាន់កាំភ្លើងបង្ហាញអត្តសញ្ញាណអ្នកបញ្ជាឱ្យបាញ់សម្លាប់លោក លិម គិមយ៉ា ក្រោយពេលតុលាការចេញដីកាចាប់ខ្លួនលោក លី រតនរស្មី
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
អត្ថបទពេញនិយម
នយោបាយ
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ
- តុលាការថៃចេញដីកាចាប់ខ្លួនជនសង្ស័យជនជាតិខ្មែរគឺលោក លី រតនរស្មី ករណីឃាតកម្មលើលោក លិម គិមយ៉ា
- អាជ្ញាធរកម្ពុជានឹងបញ្ជូនខ្មាន់កាំភ្លើងប្រគល់ឱ្យសមត្ថកិច្ចថៃ នៅថ្ងៃទី១១ មករា
- អាជ្ញាធរត្រៀមបញ្ជូនអតីតឧកញ៉ា ហេង សិទ្ធី មកកម្ពុជា ក្រោយចាប់ខ្លួនបាននៅរុស្ស៊ី
- តំណាងជនភៀសខ្លួននៅថៃចោទលោក ហ៊ុន សែន ថា ជាអ្នកបញ្ជាឱ្យសម្លាប់លោក លិម គិមយ៉ា