យុវជន​​ចង់​ឲ្យ​អ្នក​នយោបាយ​ជជែក​ដេញ​ដោល​គ្នា​ជា​សាធារណៈ

ដោយ វណ្ណ វិចារ
2015-01-24
អ៊ីម៉ែល
មតិ
Share
បោះពុម្ព
​គេហទំព័រ http://www.politikoffee.com។
​គេហទំព័រ http://www.politikoffee.com។
Screenshot

យុវជន​មួយ​ក្រុម​មាន​មហិច្ឆតា ចង់​ឲ្យ​អ្នកនយោបាយ​ជជែក​ដេញដោល​គ្នា​ជា​សាធារណៈ ក្នុង​ការ​បោះឆ្នោត​ឆ្នាំ​២០១៨ ខាងមុខ។ នេះ​ជា​បំណង​របស់​វេទិកា​យុវជន​មួយ ឈ្មោះថា កាហ្វេ​នយោបាយ​។ ក្រុម​យុវជន​ទាំងនេះ រំពឹង​ថា ពួកគេ​នឹង​អាច​ជំរុញ​ឲ្យ​អ្នកនយោបាយ ពី​គ្រប់​មជ្ឈដ្ឋាន​លុបបំបាត់​វប្បធម៌​ឃោសនា​បែប​ប្រជាភិថុតិ ហើយ​បែរ​មក​ជជែក​ដេញដោល​គ្នា​ពី​លទ្ធភាព​ក្នុង​ការ​ដោះស្រាយ​បញ្ហា​ជាតិ​វិញ។

យុវជន​កាហ្វេ​នយោបាយ សង្ឃឹមថា​គេហទំព័រ​របស់​ខ្លួន នឹង​ក្លាយ​ជា​ទីលាន​ប្រកួតប្រជែង​គំនិត​របស់​អ្នកនយោបាយ ដើម្បី​ស្វែងរក​ការ​គាំទ្រ​ពី​សំណាក់​យុវជន។ គេហទំព័រ​ផ្លូវការ​នេះ​សម្ពោធ​នៅ​ព្រឹក​ថ្ងៃ​ទី​២៤ ខែ​មករា ដោយ​ចងក្រង​ប្រមូល​គំនិត របស់​យុវជន​ហើយ​ផ្សព្វផ្សាយ​ជា​សាធារណៈ។ ស្ថាបនិក​កាហ្វេ​នយោបាយ​រំពឹង​ថា គេហទំព័រ​ផ្ដុំ​គំនិត​យុវជន​នេះ នឹង​ក្លាយ​ជា​ឧបករណ៍​ត្រួស​ត្រាយផ្លូវ​ឲ្យ​អ្នកនយោបាយ​ខ្មែរ ហ៊ាន​ចេញមុខ​ជជែក​វែកញែក តទល់​គ្នា​ជា​ចំហ​ពី​យុទ្ធសាស្ត្រ​ក្នុង​ការ​អភិវឌ្ឍ​ជាតិ ជាជាង​វាយប្រហារ ជេរ​បញ្ចោរ​គ្នា ទៅវិញទៅមក​នោះ។

អ្នក​សម្របសម្រួល និង​ជា​ស្ថាបនិក​កាហ្វេ​នយោបាយ យុវជន អ៊ូ រិទ្ធី មានប្រសាសន៍ថា ប្រទេស​កម្ពុជា​ប្រកាន់យក​លទ្ធិប្រជាធិបតេយ្យ​ជាង​២០​ឆ្នាំ​មក​ហើយ ប៉ុន្តែ​បេក្ខជន​នាយករដ្ឋមន្ត្រី ពី​គ្រប់​គណបក្ស​មិនដែល​ជជែក​ដេញដោល​គ្នា ជា​សាធារណៈ​ឲ្យ​រាស្ត្រ​ឃើញ​ពី​សមត្ថភាព និង​ទស្សនវិស័យ​របស់​មគ្គុទ្ទេសក៍​ទាំងនោះ​ម្ដង​ណា​សោះ​។ លោក​បន្ត​ថា ក្រុម​យុវជន​កាហ្វេ​នយោបាយ នឹង​ព្យាយាម សរសេរ​អត្ថបទ​បង្ហាញ គំនិត​អភិវឌ្ឍ​ជាតិ​តាម​បែប​លទ្ធិប្រជាធិបតេយ្យ ពិសេស​ជំរុញ​ឲ្យ​អ្នកនយោបាយ ហ៊ាន​ប្រកួតប្រជែង​គ្នា​ប្រកបដោយ​ក្រមសីលធម៌ ឈរ​លើ​ចំណេះដឹង។

ឆ្លើយតប​នឹង​បញ្ហា​នេះ ប្រធាន​ក្រុមការងារ​ចរចា​កែទម្រង់​ការបោះឆ្នោត​បក្ស​ប្រឆាំង លោក គួយ ប៊ុនរឿន មាន​ប្រសាសន៍ថា គណបក្ស​សង្គ្រោះជាតិ ស្វាគមន៍​បំណង​បង្កើត​ឲ្យ​មាន​ការ​ជជែក​ពិភាក្សា​ដេញដោល​នេះ ប៉ុន្តែ​លោក​មិន​ប្រាកដ​ថា នឹង​ដាក់​គំនិត​នេះ​ចូល​ក្នុង​របៀបវារៈ នៃ​ការកែទម្រង់​ការបោះឆ្នោត​ឬ​អត់​នោះ​ឡើយ។

នាយក​ប្រតិបត្តិ​គណៈកម្មាធិការ ដើម្បី​ការបោះឆ្នោត​ដោយ​សេរី និង​យុត្តិធម៌​នៅ​កម្ពុជា លោក គល់ បញ្ញា មាន​ប្រសាសន៍ថា ក្រុម​ការងារ​កែទម្រង់​ការបោះឆ្នោត​របស់​សង្គម​ស៊ីវិល នឹង​បញ្ចូល​ចំណុច​ដេញដោល​គ្នា​របស់​បេក្ខជន​គណបក្ស​នានា​នោះ ស្នើ​ជា​ផ្លូវការ​ទៅកាន់​គណបក្ស​ទាំងពីរ។

កាលពី​ការបោះឆ្នោត​ជ្រើសតាំង​តំណាងរាស្ត្រ​ឆ្នាំ​២០១៣ លោក កឹម សុខា អនុប្រធាន​បក្ស​ប្រឆាំង​ប្រកាស​ច្រើនដង​ច្រើន​សារ​ស្នើ​ឲ្យ លោកនាយក​រដ្ឋមន្ត្រី​ហ៊ុន សែន ចូល​ជជែក​ដេញដោល​គ្នា​ជា​សាធារណៈ ដើម្បី​បញ្ជាក់​ពី​យុទ្ធសាស្ត្រ​ផ្ទាល់ខ្លួន ក្នុង​កិច្ច​អភិវឌ្ឍន៍​ជាតិ។ ប៉ុន្តែ​មន្ត្រី​គណបក្ស​ប្រជាជន​កម្ពុជា​តប​វិញ​ថា វេទិកា​ជជែក​ដេញដោល​បែបនេះ​មិន​ចាំ​បាច់​សម្រាប់​កម្ពុជា​ឡើយ។

ទោះជា​បែប​ណា​ក្ដី គណបក្ស​ទាំងអស់​បាន​បញ្ជូន​យុវជន ឲ្យ​ចូលរួម​ជជែក​ដេញដោល​គ្នា​ជា​សាធារណៈ ពី​បញ្ហា​នានា​ក្នុង​សង្គម​រួច​ហើយ កាលពី​ការបោះឆ្នោត​លើក​មុន តែ​កម្មវិធី​នេះ​ជា​កម្មវិធី​ចង្អៀត ដែល​រៀបចំឡើង​ដោយ​អង្គការ​សង្គម​ស៊ីវិល​ប៉ុណ្ណោះ។

យ៉ាងណា​មិញ​ដើម្បី​សម្រេច​គោលបំណង បង្កើត​វេទិកា​ដេញដោល​ជា​សាធារណៈ​របស់​អ្នក​នយោបាយ​នេះ ក្រុម​យុវជន​ទាំងនោះ ដាក់​ចេញ​បេសកកម្ម​មួយ​ចំនួន រួមមាន៖ បង្កើន​ការ​យល់ដឹង​ពី​បញ្ហា​សង្គម ច្បាប់​នយោបាយ ពង្រឹង​វប្បធម៌​ពិភាក្សា​តស៊ូ​មតិ ជំរុញ​ឲ្យ​យុវជន​ចូលរួម​ឲ្យ​បាន​ច្រើន និង លើកកម្ពស់​សេរី​នៃ​ការ​បញ្ចេញមតិ តាមរយៈ​ការ​សរសេរ​អត្ថបទ។

នាយក​ប្រតិបត្តិ មជ្ឈមណ្ឌល​សិទ្ធិមនុស្ស​កម្ពុជា​ដែល​ជា​ស្ថាប័ន​ផ្ដល់​ជំនួយ ក្នុង​ការ​បង្កើត​គេហទំព័រ​កាហ្វេ​នយោបាយ អ្នកស្រី ចក់ សុភាព មានប្រសាសន៍ថា អ្នកស្រី​សង្ឃឹម​ថា វេទិកា​របស់​យុវជន​នេះ​នឹង​មាន​ការ​គាំទ្រ​ពី​អ្នកនយោបាយ​និង​សាធារណជន ពី​គ្រប់​មជ្ឈដ្ឋាន។ អ្នកស្រី​បញ្ជាក់​ថា អ្នកនយោបាយ​គួរតែ​សិក្សា​ស្វែងយល់​ពី តម្រូវការ​យុវជន​ឲ្យ​បាន​ច្រើន​ដើម្បី​ចងក្រង​គោ​លន​បាយ​នានា​សម្រាប់​អភិវឌ្ឍន៍​ជាតិ។

បច្ចុប្បន្ន​វេទិកា​កាហ្វេ​នយោបាយ មាន​សមាជិក​ប្រមាណ​៣​រយ​នាក់ ក្នុង​នោះ​សមាជិក​សកម្ម​មាន ៥០​នាក់។ ការងារ​ចម្បង​របស់​យុវជន​ទាំងនោះ គឺជា​ការ​ជជែក​ពិភាក្សា​គ្នា ពី​បញ្ហា​សង្គម សេដ្ឋកិច្ច​នយោបាយ ជា​រៀងរាល់​សប្ដាហ៍ ព្រមទាំង​សរសេរ​អត្ថបទ​វិភាគ បញ្ចេញ​ទស្សនៈ​ផ្ទាល់ខ្លួន យក​ទៅ​ផ្សព្វផ្សាយ​តាម​គេហទំព័រ http://www.politikoffee.com។ បច្ចុប្បន្ន​គេហទំព័រ​កាហ្វេ​នយោបាយ មាន​យុវជន​សរសេរ​អត្ថបទ​វិភាគ និង​បញ្ចេញ​ទស្សនៈ​ចំនួន​៥០​អត្ថបទ ដោយ បែង​ចែក​ទៅតាម​ផ្នែក​មួយ​ចំនួន​រួមមាន៖ នយោបាយ សេដ្ឋកិច្ច ការបរទេស និង​សង្គម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (3)
Share

អនាមិក

ពី ភ្នំពេញ

សម្ដេចលោកមិនហ៊ានទេ។ សម្ដេចមិនដែលបានរៀននិយាយ។ សម្ដេចលោកចេះស្រែកសង្ឍក ស្រែកសំឡុត និយាយម្នាក់ឯងគ្មាននរណាហ៊ានឆ្លើយ។ ឲ្យជជែកជាសាធារណ សម្ដេចខ្លួនលោក មន្ត្រីជំនិតរបស់លោក និងគណបក្សប្រជាជនមិនឲ្យសម្ដេចលោកធ្វើជាដាច់ខាត។ គ្មានទេ​ debate ស្អីគេនោះ។ នេះជាការពិតជាក់ស្ដែងរបស់កម្ពុជា ដូចដែល ផៃ ស៊ីផាននិយាយហើយនិយាយទៀតថាការពិតកម្ពុជាខុសគ្នាពីការពិតអុឺរ៉ុប ឬអាមេរិក។

Jan 25, 2015 03:26 AM

អ្នក​អាន​អនាមិក

Your idea is good for Cambodia but my friend Hun Nal will not accept that.All I can said 100 years from now is and will be under this regime cambodia,Cambodian Khmer are and will be suffering more and more,no better life.Children of rich man spent 20 dollars a day for food and snack.Teacher salary is $200 or less.If you keep this regime i am sorry will not work for you and Khmer people.

Jan 24, 2015 03:17 PM

Kon Khmer

ពី RIVERSIDE CA

We, the people of Cambodia in oversea support 100%. We are all thirsty to wait for this happen for many years, and the whole world want to see this happen too !!!

Jan 24, 2015 03:05 PM

គេហទំព័រ​ទាំងមូល