ការ​ខ្វែង​គំនិត​គ្នា​ជុំវិញ​វិសោធនកម្ម​ច្បាប់​ស្ដីពី​គណបក្ស​នយោបាយ

ដោយ រាជ វិញ្ញូ
2017-02-21
អ៊ីម៉ែល
មតិ
Share
បោះពុម្ព
សមាជិក​សភា​គណបក្ស​ប្រជាជន​កម្ពុជា លើក​ដៃ​គាំអនុម័ត​សេចក្ដី​ស្នើ​វិសោធនកម្ម​ច្បាប់​ស្ដីពី​គណបក្ស​នយោបាយ នៅ​ក្នុង​កិច្ច​ប្រជុំ​សភា​វិសាមញ្ញ នៅ​ព្រឹក​ថ្ងៃ​ទី​២០ ខែ​កុម្ភៈ ឆ្នាំ​២០១៧។
សមាជិក​សភា​គណបក្ស​ប្រជាជន​កម្ពុជា លើក​ដៃ​គាំអនុម័ត​សេចក្ដី​ស្នើ​វិសោធនកម្ម​ច្បាប់​ស្ដីពី​គណបក្ស​នយោបាយ នៅ​ក្នុង​កិច្ច​ប្រជុំ​សភា​វិសាមញ្ញ នៅ​ព្រឹក​ថ្ងៃ​ទី​២០ ខែ​កុម្ភៈ ឆ្នាំ​២០១៧។
Photo: RFA

ការ​អនុម័ត​វិសោធនកម្ម​ច្បាប់​ស្ដីពី​គណបក្ស​នយោបាយ​ទាំង​តក់ក្រហល់​របស់​ក្រុម​តំណាងរាស្ដ្រ​គណបក្ស​ប្រជាជន​កម្ពុជា កំពុង​ក្លាយ​ជា​បញ្ហា​ក្ដៅ​គគុក និង​នាំ​ឱ្យ​មាន​ការ​យល់​ឃើញ​ផ្សេងៗ​គ្នា រវាង​គណបក្ស​នយោបាយ​ដែល​មាន​សំឡេង​ក្នុង​រដ្ឋ​សភា​ទាំង​ពីរ។ មិន​ត្រឹម​ប៉ុណ្ណោះ សូម្បី​គណបក្ស​នយោបាយ​ដែល​គ្មាន​សំឡេង​ក្នុង​សភា ក៏​ចេញ​មុខ​ប្រតិកម្ម​នឹង​វិសោធនកម្ម​នេះ​ដែរ។

គណបក្ស​កាន់​អំណាច​បក​ស្រាយ​ថា មូលហេតុ​តំណាងរាស្ត្រ​ខ្លួន​សម្រេច​គាំទ្រ​អនុម័ត​វិសោធនកម្ម​ច្បាប់​ស្ដីពី​គណបក្ស​នយោបាយ​ដែល​អាច​ឈាន​ទៅ​ដល់​ការ​រំលាយ​គណបក្ស​នយោបាយ និង​រារាំង​មិន​អោយ​ធ្វើ​ប្រធាន​បក្ស​ពេល​ជាប់​ទោស​នោះ គឺ​ដើម្បី​ពង្រឹង​នីតិរដ្ឋ និង​សន្តិសុខ​សង្គម ហើយ​មិន​សំដៅ​ដល់​បក្ស​ណា​មួយ​ឡើយ។ រី​ឯ​គណបក្ស​សង្គ្រោះ​ជាតិ វិញ​យល់​ថា វិសោធនកម្ម​ច្បាប់​នេះ គឺ​ច្បាស់​ណាស់​មាន​បំណង​តែ​មួយ​គត់​ចង់​សំដៅ​មក​បក្ស​ប្រឆាំង​ដែល​កំពុង​មាន​សំឡេង​គាំទ្រ​ពី​ពលរដ្ឋ​យ៉ាង​ប្រកៀកប្រកិត​គ្នា​ជាមួយ​បក្ស​កាន់​អំណាច។

មជ្ឈដ្ឋាន​ជាតិ និង​អន្តរជាតិ​យល់​ថា វិសោធនកម្ម​ច្បាប់​ស្ដីពី​គណបក្ស​នយោបាយ​គឺ​ប្រៀប​បាន​សម្លាប់​លទ្ធិប្រជាធិបតេយ្យ​នៅ​កម្ពុជា ដែល​ចែង​ក្នុង​រដ្ឋធម្មនុញ្ញ និង​មាន​ក្នុង​កិច្ច​ព្រមព្រៀង​សន្តិភាព​ទីក្រុង​ប៉ារីស ឆ្នាំ​១៩៩១។

ក្រុម​អ្នក​តាមដាន​នយោបាយ​នៅ​កម្ពុជា មើល​មិន​ឃើញ​ថា វិសោធនកម្ម​ច្បាប់​ស្ដីពី​គណបក្ស​នយោបាយ​មាន​ប្រយោជន៍​ធំធេង​ដូច​ការ​លើក​ឡើង​របស់​គណបក្ស​កាន់​អំណាច​ឡើយ ផ្ទុយ​ទៅ​វិញ ច្បាប់​នេះ​មាន​តែ​បំផ្លាញ​ដល់​លទ្ធិប្រជាធិបតេយ្យ​សេរី​ពហុបក្ស​ដែល​មាន​ចែង​ក្នុង​រដ្ឋធម្មនុញ្ញ​ទៅ​វិញ​ទេ។

នាយក​ប្រតិបត្តិ​អង្គការ​ខុមហ្វ្រែល (COMFREL) លោក គល់ បញ្ញា លើក​ឡើង​ថា លោក​មិន​ដឹង​ច្បាស់​អំពី​គោល​បំណង​នៃ​ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​នេះ​ឡើយ ក្រៅ​តែ​ពី​មាន​មាត្រា​បាន​ចែង​ដោយ​ផ្ដល់​អំណាច​ពេញលេញ​ទៅ​ក្រសួង​មហាផ្ទៃ មាន​សិទ្ធិ​សម្រេច​ហាម​ឃាត់ ផ្អាក ឬ​រំលាយ​គណបក្ស​នយោបាយ​ណា​មួយ​ឱ្យ​ឈប់​ធ្វើ​សកម្មភាព​ត​ទៅ​ទៀត ប្រសិន​គណបក្ស​នយោបាយ​ទាំង​នោះ ត្រូវ​បាន​តុលាការ​រក​ឃើញ​ថា ធ្វើ​ឱ្យ​ប៉ះពាល់​សន្តិសុខ​ជាតិ ឬ​ញុះញង់​ឱ្យ​បែក​បាក់​ជាតិ។

លោក គល់ បញ្ញា ព្រួយ​បារម្ភ​ថា ត្រង់​ចំណុច​បទ​ធ្វើ​ឱ្យ​ប៉ះពាល់​សន្តិសុខ​ជាតិ ឬ​បទ​ញុះញង់​ធ្វើ​ឱ្យ​បែកបាក់​ជាតិ គឺ​កន្លង​មក​ត្រូវ​បាន​ក្រសួង​មហាផ្ទៃ និង​តុលាការ​អាច​យក​មក​ធ្វើ​ការ​បកស្រាយ​បាន​តាម​ចិត្ត​រហូត​ចាប់​ខ្លួន​សមាជិក​សភា និង​សមាជិក​ព្រឹទ្ធសភា​ដាក់​ពន្ធនាគារ​ជា​បន្តបន្ទាប់៖ «»។

មន្ត្រី​ជាន់​ខ្ពស់​អង្គការ​ខុមហ្វ្រែល បន្ត​ថា ការ​ផ្ដល់​អំណាច​ឱ្យ​ក្រសួង​មហាផ្ទៃ ដែល​ជា​ស្ថាប័ន​របស់​រដ្ឋាភិបាល​នៃ​គណបក្ស​កាន់​អំណាច រហូត​មាន​សិទ្ធិ​ទៅ​រំលាយ​គណបក្ស​នយោបាយ​ណា​មួយ គឺ​អាច​នាំ​ឱ្យ​មាន​វិវាទ​ខាង​នយោបាយ​មុន​ការ​បោះ​ឆ្នោត។ បន្ថែម​ពី​នេះ ប្រសិន​ច្បាប់​ត្រូវ​យក​ទៅ​អនុវត្ត​ដើម្បី​រំលាយ​គណបក្ស​នយោបាយ​ដែល​មាន​សមាជិក​របស់​ខ្លួន​នៅ​រដ្ឋ​សភា និង​ព្រឹទ្ធសភា គឺ​មាន​ន័យ​ស្មើ​នឹង​ការ​រំលាយ​ឆន្ទៈ​ពលរដ្ឋ និង​បាន​បំពាន​លើ​គោលការណ៍​ប្រជាធិបតេយ្យ សេរី​ពហុបក្ស ដែល​មាន​ចែង​ជា​កាតព្វកិច្ច​ឱ្យ​អនុវត្ត​ក្នុង​កិច្ច​ព្រមព្រៀង​សន្តិភាព​ទីក្រុង​ប៉ារីស និង​រដ្ឋធម្មនុញ្ញ​ដែរ។

កាល​ពី​ថ្ងៃ​ទី​២០ ខែ​កុម្ភៈ ក្នុង​រដ្ឋសភា ក្រុម​តំណាងរាស្ត្រ​មក​ពី​គណបក្ស​កាន់​អំណាច​ដែល​កំពុង​រង​ការ​រិះគន់​ថា អាច​គ្រប់គ្រង និង​មាន​ឥទ្ធិពល​បង្គាប់​បញ្ជា​លើ​ស្ថាប័ន​កំពូលៗ ដូចជា​តុលាការ និង​រដ្ឋ​សភា​ជាដើម បាន​សម្រេច​លើកដៃ​ព្រម​គ្នា​ទាំង ៦៦​រូប អនុម័ត​វិសោធនកម្ម​ច្បាប់​ស្ដីពី​គណបក្ស​នយោបាយ ដោយ​គ្មាន​ការ​ចូលរួម​ពី​គណបក្ស​ប្រឆាំង​ឡើយ។ បើ​និយាយ​អំពី​ការ​ចាប់​ផ្ដើម​ស្នើ​ធ្វើ​វិសោធនកម្ម រហូត​សម្រេច​អនុម័ត​ច្បាប់​ស្ដីពី​គណបក្ស​នយោបាយ គឺ​ក្រុម​តំណាង​បក្ស​ប្រជាជន​កម្ពុជា ប្រើប្រាស់​ពេល​វេលា​ខ្លី​ប៉ុណ្ណោះ បន្ទាប់​ពី​មាន​ការ​ប្រកាស​ចង់​បាន​ការ​កែប្រែ​ច្បាប់​នេះ ពី​លោក​នាយករដ្ឋមន្ត្រី ហ៊ុន សែន។

មាត្រា​មួយ​ចំនួន​ដែល​បញ្ចូល​បន្ថែម​ក្នុង​ច្បាប់​ស្ដីពី​គណបក្ស​នយោបាយ​ដែល​ទើប​អនុម័ត​នេះ កំពុង​ធ្វើ​ឱ្យ​គណបក្ស​ដទៃ​ទៀត​ប្រឆាំង​ជំទាស់​យ៉ាង​ខ្លាំងក្លា​នោះ មាន​ដូចជា​មាត្រា ៦​ថ្មី បាន​កំណត់​ឱ្យ​គណបក្ស​នយោបាយ​មិន​ត្រូវ​ធ្វើ​សកម្មភាព​ណា​មួយ​ធ្វើ​ឱ្យ​មាន​អបគមន៍​ដែល​នាំ​ឱ្យ​អន្តរាយ​ដល់​ឯកភាព​ជាតិ និង​បូរណភាព​ដែនដី ធ្វើ​វិទ្ធង្សនា​ប្រឆាំង​របប​ប្រជាធិបតេយ្យ សេរី​ពហុបក្ស និង​របប​រាជា​និយម​អាស្រ័យ​រដ្ឋធម្មនុញ្ញ​ធ្វើ​ឱ្យ​ប៉ះពាល់​ដល់​សន្តិសុខ​នៃ​រដ្ឋ​បង្កើត​កងកម្លាំង​ប្រដាប់​អាវុធ និង​ធ្វើ​ការ​ញុះញង់​ដែល​អាច​នាំ​ឱ្យ​មាន​ការ​បែក​បាក់​ជាតិ។ រី​ឯ​មាត្រា ៣៨​ថ្មី ចែង​ថា ចំពោះ​គណបក្ស​នយោបាយ​ណា​ដែល​បាន​ប្រព្រឹត្ត​ខុស​ទៅ​នឹង​រដ្ឋធម្មនុញ្ញ ច្បាប់​ស្ដីពី​គណបក្ស​នយោបាយ និង​ច្បាប់​ជា​ធរមាន​ដទៃ​ទៀត​នៃ​ព្រះរាជាណាចក្រ​កម្ពុជា ក្រសួង​មហាផ្ទៃ អាច​ចាត់​វិធានការ​ប្ដឹង​ទៅ​តុលាការ​កំពូល​ដើម្បី​រំលាយ​គណបក្ស​នយោបាយ​នោះ ក្នុង​ករណី​កំហុស​មាន​លក្ខណៈ​ធ្ងន់ធ្ងរ។

មុន​ចេញ​ច្បាប់​នេះ លោក សម រង្ស៊ី អតីត​ប្រធាន​គណបក្ស​សង្គ្រោះ​ជាតិ ដែល​កំពុង​ជាប់​បណ្ដឹង​ជា​ច្រើន​នៅ​តុលាការ​បាន​ប្រកាស​លា​ឈប់​ពី​ប្រធាន​បក្ស បន្ទាប់​ពី​លោក​រិះគន់​រដ្ឋ​សភា​ថា ជា​កន្លែង​ទីងមោង​របស់​គណបក្ស​ប្រជាជន​កម្ពុជា ដែល​កំពុង​រៀប​កម្ចាត់​គណបក្ស​របស់​លោក។ អតីត​ប្រធាន​បក្ស​លោក សម រង្ស៊ី ប្រកាស​ថា ការ​លា​ឈប់​របស់​លោក គឺ​ដើម្បី​ការពារ​គណបក្ស។

តំណាងរាស្ត្រ​មក​ពី​គណបក្ស​សង្គ្រោះ​ជាតិ លោក គឹមសួរ ភីរិទ្ធ ថ្លែង​ថា វិសោធនកម្ម​ច្បាប់​ស្ដីពី​គណបក្ស​នយោបាយ នឹង​ធ្វើ​ឱ្យ​បែកបាក់​ឯកភាព​ជាតិ ហើយ​មាន​គោលការណ៍​ផ្ទុយ​ទាំង​ស្រុង​ទៅ​នឹង​គោលការណ៍​លទ្ធិប្រជាធិបតេយ្យ​សេរី​ពហុបក្ស ព្រោះ​ច្បាប់​នេះ នឹង​ផ្ដល់​អំណាច​ទៅ​ដល់​គណបក្ស​ដឹកនាំ​រដ្ឋាភិបាល ដែល​កំពុង​គ្រប់គ្រង​ក្រសួង​ស្ថាប័ន​សំខាន់​នានា ដូចជា​ក្រសួង​មហាផ្ទៃ និង​តុលាការ ដោយ​ឱ្យ​ស្ថាប័ន​ទាំង​នេះ​ទទួល​បាន​សិទ្ធិ​គ្រប់គ្រង​គណបក្ស​នយោបាយ​ទាំង​អស់។

លោក​បន្ត​ថា ការ​កែប្រែ​ច្បាប់​នយោបាយ​នៅ​ពេល​នេះ ធ្វើ​ឡើង​មិន​បាន​ឆ្លុះបញ្ចាំង​អំពី​មតិ​ពលរដ្ឋ​ឡើយ ព្រោះ​ធ្វើ​ឡើង​ទាំង​ប្រញាប់ប្រញាល់​ដោយ​ក្រុម​តំណាងរាស្ត្រ​បក្ស​កាន់​អំណាច។ ផ្ទុយ​ទៅ​វិញ ប្រសិន​ចង់​ធ្វើ​វិសោធនកម្ម​ច្បាប់​ដើម្បី​បម្រើ​ផលប្រយោជន៍​ឱ្យ​គណបក្ស​ទូទៅ គួរ​តែ​ឆ្លងកាត់​ការ​ពិគ្រោះ​យោបល់​ជាមួយ​តំណាង​គ្រប់​គណបក្ស​នយោបាយ​ទាំង​អស់ ឬ​ក៏​ធ្វើ​ប្រជាមតិ​ពី​ពលរដ្ឋ​ដើម្បី​ដឹង​ថា តើ​មាន​គាំទ្រ​ឱ្យ​បក្ស​កាន់​អំណាច​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​ដែរ ឬ​ទេ៖ «»។

​សម្រាប់​ការ​មិន​ពេញចិត្ត​របស់​សង្គម​ស៊ីវិល និង​មន្ត្រី​បក្ស​ប្រឆាំង​ចំពោះ​វិសោធនកម្ម​ច្បាប់​ស្ដីពី​គណបក្ស​នយោបាយ មន្ត្រី​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន បក​ស្រាយ​ថា ការ​អនុម័ត​វិសោធនកម្ម​ច្បាប់​គណបក្ស​នយោបាយ គឺ​មាន​បំណង និង​សំណូមពរ​ចំនួន ៣​សំខាន់ៗ ទី​១ ដើម្បី​ឱ្យ​ច្បាប់​គណបក្ស​នយោបាយ​នេះ​មាន​គុណភាព និង​ល្អ​ប្រសើរ​ជាង​ច្បាប់​មុន ទី​២ ពង្រឹង​គណបក្ស​នយោបាយ​ទាំង​អស់​ឱ្យ​គោរព​ច្បាប់​ដើម្បី​ទៅ​ដណ្ដើម​អំណាច​គ្រប់គ្រង​ប្រទេស​នៅ​ពេល​ខាង​មុខ និង​ទី​៣ ដើម្បី​ពង្រឹង​របប​លទ្ធិប្រជាធិបតេយ្យ និង​នីតិរដ្ឋ​នៅ​កម្ពុជា៖ «»។

​លោក សុខ ឥសាន បញ្ជាក់​ថា ច្បាប់​នេះ​ក៏​ជួយ​សម្រួល​ដល់​ក្រសួង​មហាផ្ទៃ ឲ្យ​ងាយស្រួល​ដើម្បី​គ្រប់គ្រង​គណបក្ស​នយោបាយ​ទាំង​អស់ កុំ​ឱ្យ​ធ្វើ​សកម្មភាព​ប៉ាត​ណា​ប៉ាត​ណី​ត​ទៅ​ទៀត។

លោក គល់ បញ្ញា បញ្ជាក់​ថា ការ​ធ្វើ​វិសោធនកម្ម​ច្បាប់​ដើម្បី​យក​ទៅ​អនុវត្ត​ឱ្យ​មាន​ប្រសិទ្ធភាព​ជួយ​ឱ្យ​ប្រជាធិបតេយ្យ​រឹងមាំ គឺ​ទាល់​តែ​មាន​ការ​ជជែក​ពិភាក្សា​ស្រុះស្រួល​គ្នា យ៉ាង​ហោច​ណាស់​ពី​ខាង​គណបក្ស​នយោបាយ​មាន​សំឡេង​ក្នុង​សភា​ទាំង​ពីរ​ដែរ ប៉ុន្តែ​ការ​សម្រេច​ដោយ​ឯកតោភាគី​ពី​ខាង​គណបក្ស​នយោបាយ​តែមួយ​ដើម្បី​ធ្វើ​វិសោធនកម្ម​ច្បាប់​ធ្វើការ​ប្រកួតប្រជែង​គ្នា​បែប​នេះ​យក​ទៅ​គណបក្ស​ដទៃ​ទៀត​អនុវត្ត​តាម ដូច្នោះ​ច្បាប់​នោះ​មិន​គួរ​ធ្វើ​វិសោធនកម្ម​ឡើយ។

ទោះ​ជា​យ៉ាង​ណា ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ មិន​មែន​​មាន​តែ​គណបក្ស​សង្គ្រោះ​ជាតិ​ប្រឆាំង​ជំទាស់​ឡើយ ជាមួយ​គ្នា​នោះ បក្ស​ដទៃ​ទៀត​ដែល​គ្មាន​សំឡេង​ក្នុង​សភា ដូចជា​គណបក្ស​សម្ព័ន្ធ​ដើម្បី​ប្រជាធិបតេយ្យ និង​គណបក្ស​ប្រជាធិបតេយ្យ​មូលដ្ឋាន​ជាដើម ក៏​សម្ដែង​ការ​មិន​ពេញ​ចិត្ត​ដែរ។

រី​ឯ​សហគមន៍​អន្តរជាតិ​វិញ​យល់​ថា ការ​ធ្វើ​វិសោធនកម្ម​នេះ គឺ​ដើម្បី​ពង្រឹង​អំណាច​ផ្ដាច់​ការ​ឱ្យ​លោក​នាយករដ្ឋមន្ត្រី ហ៊ុន សែន និង​ដើម្បី​ធ្វើ​ឱ្យ​ស្លាប់​លទ្ធិប្រជាធិបតេយ្យ​នៅ​កម្ពុជា។

កាល​ពី​ថ្ងៃ​ទី​២០ ខែ​កុម្ភៈ នាយក​រង​នៃ​អង្គការ​សិទ្ធិមនុស្ស​អន្តរជាតិ យូមែន រ៉ៃរ៍ វ៉ច្ឆ (Human Rights Watch) ប្រចាំ​នៅ​ទីក្រុង​បាងកក លោក ហ្វីល រ៉ូប៊ឺតសុន (Phil Robertson) ចាត់​ទុក​ការ​ធ្វើ​វិសោធនកម្ម​ច្បាប់​នេះ ប្រៀប​បាន​នឹង​កាំភ្លើង​ដែល​តម្រង់​ចំ​បេះ​ដូង​គណបក្ស​សង្គ្រោះ​ជាតិ​តែម្ដង ហើយ​យុទ្ធសាស្ត្រ​របស់​លោក ហ៊ុន សែន ត្រៀម​សម្រាប់​ការ​បោះឆ្នោត គឺ​ឈូស​កម្ទេច​ចោល​ស្ថាប័ន​ប្រជាធិបតេយ្យ​ដែល​នៅ​សេសសល់​នៅ​កម្ពុជា ដោយ​ប្រើប្រាស់​ច្បាប់ ដូចជា​ច្បាប់​ស្ដីពី​គណបក្ស​នយោបាយ​នេះ។ មិន​ត្រឹម​តែ​ប៉ុណ្ណោះ លោក ហ៊ុន សែន បាន​បំភិតបំភ័យ​សង្គម​ស៊ីវិល​ឱ្យ​លែង​ហ៊ាន​និយាយ​តាម​រយៈ​ការ​ចាប់​ខ្លួន​អ្នក​ការពារ​សិទ្ធិមនុស្ស​តាម​អំពើ​ចិត្ត ព្រម​ទាំង​គំរាម​កំហែង​ថា នឹង​លុប​ឈ្មោះ​អង្គការ​ក្រៅ​រដ្ឋាភិបាល​ណា​ដែល​បង្ក​បញ្ហា​ស្មុគស្មាញ​ដល់​គណបក្ស​ប្រជាជន​កម្ពុជា ចេញ​ពី​បញ្ជី​ទៀត។

លោក ហ្វីល រ៉ូប៊ឺតសុន បន្ត​ថា ប្រទេស​កម្ពុជា នឹង​ក្លាយ​ជា​ប្រទេស​ប្រជាធិបតេយ្យ​ក្លែងក្លាយ​ត​ទៅ​ទៀត ប្រហែល​ជា​ល្អ​ជាង​ប្រទេស​វៀតណាម បន្តិច ដោយសារ​ច្បាប់​ត្រូវ​បាន​អនុវត្ត​ដោយ​តុលាការ​អាយ៉ង​របស់​គណបក្ស​ប្រជាជន​កម្ពុជា។ លោក​បញ្ជាក់​ថា លោក ហ៊ុន សែន បាន​ធ្វើ​ឱ្យ​មូលដ្ឋានគ្រឹះ​នៃ​ប្រជាធិបតេយ្យ​នៅ​កម្ពុជា ទន់​ខ្សោយ​ជា​លំដាប់​អស់​រយៈពេល​ជា​ច្រើន​ឆ្នាំ​មក​ហើយ ហើយ​នៅ​ថ្ងៃ​តំណាងរាស្ត្រ​បក្ស​កាន់​អំណាច​អនុម័ត​ច្បាប់​គណបក្ស​នយោបាយ​ថ្មី​នេះ បាន​កម្ទេច​វា​បង្ហើយ​តែម្ដង។

ចំណែក​សេចក្ដី​ថ្លែងការណ៍​របស់​សមាជិក​សភា​អាស៊ាន​វិញ បាន​ចាត់​ទុក​ការ​ធ្វើ​វិសោធនកម្ម​ច្បាប់​ស្ដីពី​គណបក្ស​នយោបាយ​ថា ជា​ការ​ស្លាប់​លទ្ធិប្រជាធិបតេយ្យ​នៅ​កម្ពុជា និង​ជា​សូចនាករ​ដំបូង​នៃ​ការ​វាយ​ប្រហារ​ចំពោះ​លទ្ធិប្រជាធិបតេយ្យ​ក្នុង​តំបន់​ទាំង​មូល។ ជាមួយ​គ្នា​នោះ ស្ថានទូត​សហរដ្ឋអាមេរិក សម្ដែង​ការ​បារម្ភ​ជា​ខ្លាំង​ពី​ការ​អនុម័ត​វិសោធនកម្ម​ច្បាប់​ស្ដីពី​គណបក្ស​នយោបាយ​ដោយ​តំណាងរាស្ត្រ​បក្ស​កាន់​អំណាច ហើយ​បាន​អំពាវនាវ​ឱ្យ​កម្ពុជា ត្រូវ​ប្រកាន់​យក​នូវ​ជំហរ​ចាំបាច់​នានា​ដើម្បី​ធានា​ថា យុទ្ធនាការ​ឃោសនា​បោះ​ឆ្នោត និង​ការ​បោះឆ្នោត​ក្នុង​ឆ្នាំ​២០១៧ និង​២០១៨ ខាង​មុខ មាន​លក្ខណៈ​សេរី បើក​ចំហ និង​មាន​តម្លាភាព ហើយ​គ្រប់​គណបក្ស​នយោបាយ​ទាំង​អស់​មាន​ឱកាស​ក្នុង​ការ​ចូលរួម​ប្រកួតប្រជែង​ដោយ​ស្មើ​ភាព​គ្នា។

លោក ហ្វីល រ៉ូប៊ឺតសុន នាយក​រង​នៃ​អង្គការ​សិទ្ធិមនុស្ស​អន្តរជាតិ យូមែន រ៉ៃត៍ វ៉ច្ឆ បញ្ជាក់​ថា ម្ចាស់​ជំនួយ និង​រដ្ឋាភិបាល​បរទេស​ចាំបាច់​ត្រូវ​ជួប​ប្រជុំ​គ្នា​ជា​បន្ទាន់​ដើម្បី​វាយ​តម្លៃ​ថា នឹង​ធ្វើ​អ្វី​ទៀត​នៅ​ពេល​ខាង​មុខ ដើម្បី​បង្កើត​យុទ្ធនាការ​ការពារ​សមាជិក​គណបក្ស​ប្រឆាំង និង​សកម្មជន​នៃ​អង្គការ​សង្គម​ស៊ីវិល​ឱ្យ​រួច​ផុត​ពី​ការ​វាយ​ប្រហារ​ដ៏​ឃោរឃៅ​ដែល​នឹង​មក​ដល់​ក្នុង​ពេល​ឆាប់ៗ​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

អ្នក​អាន​អនាមិក

If you need to change the laws which is disaster of democratically Cambodia that's mean no freedom any more in the future CPP will destroy everything. It is only one leader in Cambodia so Khmer people must be careful dictator our country .

Feb 23, 2017 01:39 AM

អ្នក​អាន​អនាមិក

well, well no problem of passing this law and need to pass with another law of judicial department under opposition party (not under Hun Sen) assignment/appointment. Hun Sen cannot have executive, legislative, and judicial and king all by himself. it is ridiculous controlling dictator. need to tell those soldiers out there Hun Sen is ridiculous controlling dictator. if soldiers don't do any things Khmer will call these soldiers as Pol Pot soldiers later, shame, shame.

Feb 22, 2017 02:01 AM

គេហទំព័រ​ទាំងមូល