សង្ខេបព័ត៌មានសំខាន់ៗប្រចាំសប្តាហ៍
១ . អ្នករាយការណ៍ពិសេសអង្គការសហប្រជាជាតិជួបសង្គមស៊ីវិលប្រមូលព័ត៌មានទាក់ទងការរំលោភសិទ្ធិមនុស្សនៅកម្ពុជា
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុសុ្សប្រចាំនៅកម្ពុជា លោក វិទិត មុនតាប៊ន(Vitit Muntarbhorn) កំពុងបំពេញទស្សនកិច្ចនៅកម្ពុជាចាប់ពីថ្ងៃទី១៥ ដល់ថ្ងៃទី២៦ ខែសីហា ដើម្បីវាយតម្លៃពីស្ថានភាពសិទ្ធិមនុស្សនៅកម្ពុជា។ លោកបានជួបពិភាក្សាជាមួយលោកនាយករដ្ឋមន្ត្រី ហ៊ុន សែន និងមន្ត្រីអង្គការសង្គមស៊ីវិលធ្វើការផ្នែកការពារសិទ្ធិមនុស្សដើម្បីជជែកពីបញ្ហាសិទ្ធិមនុស្ស។ មន្ត្រីសិទ្ធិមនុស្ស ប្រាប់ទៅលោក វិទិត មុនតាប៊ន ថាមានការរិតត្បិតសេរីភាពពលរដ្ឋចំណែកលោក ហ៊ុន សែន ស្នើទៅអ្នករាយការណ៍ពិសេសរបស់អង្គការសហប្រជាជាតិឲ្យធ្វើរបាយការណ៍របស់ខ្លួនដោយតម្លាភាព។
អានព័ត៌មានបន្ថែម៖ https://bit.ly/3T87v7Z
២ . ក្រុមព្រឹទ្ធសភា និងសមាជិកសភាអាមេរិកជួបពិភាក្សាបញ្ហាសិទ្ធិមនុស្ស និងប្រជាធិបតេយ្យជាមួយក្រុមអង្គការសង្គមស៊ីវិល
នាយកប្រតិបត្តិសមាគមសម្ព័ន្ធអ្នកសារព័ត៌មានកម្ពុជា លោក ណុប វី ដែលបានជួនពិភាក្សាជាមួយក្រុមព្រឹទ្ធសភា និងសមាជិកសភាអាមេរិក ប្រាប់វិទ្យុអាស៊ីសេរី កាលពីយប់ថ្ងៃទី១៦ ខែសីហាថា ក្រុមអង្គការសង្គមស៊ីវិល និងអ្នកសារព័ត៌មានបានលើកឡើងប្រាប់ក្រុមព្រឹទ្ធសភា និងសមាជិកសភាអាមេរិក អំពីក្ដីបារម្ភរបស់ពួកគេ ទាក់ទងនឹងការរំលោភបំពានសិទ្ធិសេរីភាពជាមូលដ្ឋានរបស់ពលរដ្ឋ ការធ្វើទុក្ខបុកម្នេញអ្នកសារព័ត៌មាន ការអូសបន្លាយមិនផ្ដល់ដំណោះស្រាយវិវាទការងារ និងការរំលោភបំពានស្រ្តីជាកូដករនៅក្រុមហ៊ុនណាហ្គាវើលដ៏ជាដើម។
អានព័ត៌មានពិស្តារ៖ https://bit.ly/3PLfxRn
៣ . អ្នកវិភាគជំរុញឱ្យរដ្ឋាភិបាលថ្លឹងថ្លែងបញ្ហានានាពាក់ព័ន្ធអាមេរិកនិងចិន
អ្នកវិភាគនយោបាយមើលឃើញថាកម្ពុជានៅតែមានហានិភ័យខ្ពស់ក្នុងការធ្លាក់ចូលក្នុងវិបត្តិទំនាក់ទំនងជាមួយមហាអំណាចពិភពលោកធំៗពីរ គឺសហរដ្ឋអាមេរិកនិងប្រទេសចិនកុម្មុយនីស្តប្រសិនបើរដ្ឋាភិបាលមិនបានពិចារណាឱ្យបានស៊ីជម្រៅពីបញ្ហានានាពាក់ព័ន្ធនឹងមហាអំណាចទាំងពីរនេះ។ ការលើកឡើងរបស់អ្នកវិភាគនេះគឺស្របពេលគណៈប្រតិភូនៃព្រឹទ្ធសភានិងសមាជិកសភាអាមេរិកចំនួន៥រូបបានចូលជួបពិភាក្សាជាមួយតំណាងរដ្ឋសភានិងតំណាងរដ្ឋាភិបាលកម្ពុជាអំពីបញ្ហាធ្លាក់ចុះសិទ្ធិមនុស្ស ប្រជាធិបតេយ្យ និងកង្វល់អំពីបញ្ហាមូលដ្ឋានកងទ័ពចិននៅកម្ពុជាកាលពីព្រឹកថ្ងៃទី១៦ខែសីហាកន្លងទៅ។
៤ . អ្នកវិភាគថា លោក ហ៊ុន សែន នឹងរងការរិះគន់រឿងរំលោភសិទ្ធិមនុស្ស ពេលថ្លែងសុន្ទរកថា នៅអង្គការសហប្រជាជាតិនាពេលខាងមុខ
ក្រុមអ្នកវិភាគលើកឡើងថា លោក ហ៊ុន សែន នឹងរងការរិះគន់លើឆាកអន្តរជាតិ ក្នុងពេលលោកថ្លែងសន្ទរកថា នៅអង្គការសហប្រជាជាតិនៅបុរីញ៉ូវយ៉ក (New York) នាពេលខាងមុខនេះ។ អ្នកវិភាគលើកឡើងបែបនេះ ដោយសារតែពួកគាត់មើលឃើញប្រទេសកម្ពុជាសព្វថ្ងៃកំពុងមានការរំលោភបំពានលើសិទ្ធិមនុស្សធ្ងន់ធ្ងរ ដែលតម្រូវឱ្យរដ្ឋាភិបាលលោក ហ៊ុន សែន ដោះស្រាយបញ្ហារំលោភសិទ្ធិមនុស្ស និងបំផ្លាញប្រជាធិបតេយ្យ ហើយងាកមករកផ្លូវត្រូវ នៃគន្លងប្រជាធិបតេយ្យវិញ។
អានព័ត៌មានពិស្តារ៖ https://bit.ly/3c4Gz8m
៥ . អ្នករាយការណ៍ពិសេសរបស់អង្គការសហប្រជាជាតិ ជួបមេគណបក្សប្រឆាំងលោក កឹម សុខា
អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុសុ្សប្រចាំនៅកម្ពុជា លោក វិទិត មុនតាប៊ន(Vitit Muntarbhorn) បានជួបមេបក្សប្រឆាំងលោក កឹម សុខា និងគណៈកម្មាធិការសិទ្ធិមនុស្សរបស់រដ្ឋាភិបាលដើម្បីប្រមូលព័ត៌មានសម្រាប់វាយតម្លៃស្ថានភាពសិទ្ធិមនុស្សនៅកម្ពុជា។ មន្ត្រីអង្គការស៊ីវិលសង្កេតឃើញថាបំពេញទស្សនកិច្ចផ្លូវការរបស់អ្នករាយការណ៍ពិសេសអង្គការសហប្រជាជាតិពេលនេះកើតឡើងខណៈមានការរិះគន់ថារដ្ឋាភិបាលកម្ពុជាកំពុងរិតត្បិតសិទ្ធិសេរីភាពពលរដ្ឋ។
អានព័ត៌មានពិស្តារ៖ https://bit.ly/3QRaXBT
៦ . កងអង្គរក្សលោក ហ៊ុន សែន ប្រើហិង្សាលើអ្នកកាសែត និងសកម្មជនសង្គម
សមត្ថកិច្ចស្រុកបាទី ខេត្តតាកែវ បានដោះលែង យុវជនខ្មែរថាវៈ ៤នាក់ និងអ្នកសារព័ត៌មានសំឡេងប្រជាធិបតេយ្យវីអូឌី (VOD) ៥នាក់ទៀត សរុប ៩នាក់ នៅល្ងាចថ្ងៃទី១៦ ខែសីហានេះ ក្រោយពីឃាត់ខ្លួន យកទៅសួរនាំនៅអធិការស្រុកបាទីអស់ច្រើនម៉ោង។ ក្នុងពេលឃាត់ខ្លួន យុវជនម្នាក់ និងអ្នកកាសែតម្នាក់ទៀត ត្រូវកងអង្គរក្ស លោកនាយករដ្ឋមន្ត្រី ហ៊ុន សែន ស្លៀកពាក់ស៊ីវិល ប្រើអំពើហិង្សា និងដកហូតទូរសព្ទដៃ។
អានព័ត៌មានបន្ថែម៖ https://bit.ly/3AB98DE
៧ . អាជ្ញាធរបើកឱ្យកូដករណាហ្គាវើលដ៍ឈរស្រែកតវ៉ានៅមុខក្រុមហ៊ុន ពេលអ្នករាយការណ៍ពិសេសអង្គការសហប្រជាជាតិទៅឃ្លាំមើល
អាជ្ញាធររាជធានីភ្នំពេញបន្ធូដៃបង្រ្កាបក្រុមកូដករនៃក្រុមហ៊ុនបនល្បែងណាហ្គាវើលដ៍នៅថ្ងៃពុធម្សិលមិញនេះខណៈអ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុសុ្សប្រចាំនៅកម្ពុជា លោក វិទិត មុនតាប៊ន(Vitit Muntarbhorn) បានចុះឃ្លាំមើលផ្ទាល់អំពីកូដកម្មនេះ។ ប៉ុន្តែប្រធានសហជីពប្រចាំក្រុមហ៊ុនណាហ្គាវើលដ៍ កញ្ញា ឈឹម ស៊ីថរ ចាត់ទុកការរក្សាភាពស្ងៀមស្ងាត់របស់ក្រុមសមត្ថកិច្ចដែលធ្លាប់តែវាយដុំកូដករជាស្រ្តីបែកមុខបែកមាត់រហូតសន្លប់និងរលូតកូនផងនោះគឺជាការរៀបចំឈុតឆាកសម្តែង ដើម្បីកុំ លោក វិទិត មុនតាប៊ន (Vitit Muntarbhorn) ឃើញហេតុការណ៍បែបនេះផ្ទាល់ភ្នែកតែប៉ុណ្ណោះ។ អានអត្ថបទបន្ថែម៖ https://bit.ly/3QLEFsw
៨ . បក្សភ្លើងទៀនទទូចដល់អាជ្ញាធរឱ្យដោះលែងអ្នកជាប់ឃុំនយោបាយ
អនុប្រធានគណបក្សភ្លើងទៀន លោក សុន ឆ័យ បានចូលសួរសុខទុក្ខសកម្មជនបក្សប្រឆាំងដែលកំពុងជាប់ឃុំក្នុងពន្ធនាគារព្រៃស នៅថ្ងៃទី១៧ ខែសីហា។ លោកចាត់ទុកថាការឃុំខ្លួនអ្នកទាំងនោះគឺជារឿងអយុត្តិធម៌ដែលរដ្ឋាភិបាលគួរតែប្រគល់សេរីភាពជូនពួកគាត់វិញ។
អានព័ត៌មានពិស្តារ៖ https://bit.ly/3wawJsc
៩ . សមត្ថកិច្ចបញ្ជូនប៉េអឹម៣នាក់ទៅតុលាការពាក់ព័ន្ធនឹងការស្លាប់អនុប្រធានភូមិម្នាក់នៅខេត្តកំពង់ធំ
មន្ត្រីជាន់ខ្ពស់នៃកងរាជអាវុធហត្ថលើផ្ទៃប្រទេសអះអាងថាមន្ត្រីកងរាជអាវុធហត្ថ៣នាក់នៅខេត្តកំពង់ធំត្រូវបានបញ្ជូនទៅតុលាការពីបទចោទមនុស្សឃាតដោយអចេតនាករណីចាប់ខ្លួនអនុប្រធានភូមិរូងម្នាក់បណ្ដាលឱ្យស្លាប់។ អ្នកនាំពាក្យកងរាជអាវុធហត្ថលើផ្ទៃប្រទេសលោក អេង ហ៊ី ឲ្យដឹងថាមន្ត្រីកងរាជអាវុធហត្ថខេត្តកំពង់ធំទាំង៣នាក់ដែលបានបញ្ជូនទៅតុលាការនោះ រួមមាន ជំនួយការអង្គភាពនគរបាលយុត្តិធម៌លោក សៅ សិរីវុឌ្ឍ ប្រធានអង្គភាពនគរបាលយុត្តិធម៌ លោក លុយ តាំងឈួយ និងនាយការិយាល័យព្រហ្មទណ្ឌ លោក សុខ ម៉េងហុង។ ចំណែកមន្រ្តីចំនួន១០នាក់ទៀតកំពុងស្ថិតក្នុងការស្រាវជ្រាវនៅឡើយហើយបើសិនរកឃើញថាពួកគេមានកំហុសនឹងអនុវត្តតាមច្បាប់ជាបន្តទៀត។
១០ . មេធាវីបន្តទាមទារឲ្យតុលាការផ្ដល់សេរីភាពឲ្យលោក កឹម សុខា ឡើងវិញ ព្រោះតុលាការគ្មានភស្តុតាងចោទប្រកាន់គ្រប់គ្រាន់
មេធាវីលោក កឹម សុខា បន្តទាមទារឲ្យតុលាការផ្តល់សេរីភាពដល់លោក កឹម សុខា ឡើងវិញ។ មេធាវីការពារក្ដីប្រធានគណបក្សសង្គ្រោះជាតិលោក កឹម សុខា អ្នកស្រី ម៉េង សុភារី លើកឡើងថាការខ្វះខាតឯកសាររបស់តំណាងអយ្យការក្នុងការចោទប្រកាន់លើលោក កឹម សុខា ជាការបញ្ជាក់ថាតុលាការគ្មានភស្តុតាងគ្រប់គ្រាន់ដាក់បន្ទុកលោក កឹម សុខា នោះទេ។ លោក កឹម សុខា បានបាត់បង់សិទ្ធិសេរីភាពជិត៥ឆ្នាំហើយ ក្រោយរដ្ឋាភិបាល លោក ហ៊ុន សែន បានចោទប្រកាន់ថាមេបក្សប្រឆាំងរូបនេះឃុបឃិតជាមួយរដ្ឋបរទេសដើម្បីផ្តួលរំលំរដ្ឋាភិបាល។ ទោះយ៉ាងណា តុលាការមិនដែលបានបង្ហាញថារដ្ឋបរទេមួយណាដែលមានទំនាក់ទំនងសម្ងាត់ជាមួយលោក កឹម សុខា ដើម្បីផ្ដួលរំលំរដ្ឋាភិបាលនោះទេ។
អានអត្ថបទបន្ថែម៖ https://bit.ly/3K96RTk
១១ . តុលាការខេត្តពោធិ៍សាត់ផ្ដន្ទាទោសសកម្មជនបក្សភ្លើងទៀនម្នាក់ទៀតដាក់ពន្ធនាគារ២ឆ្នាំពីបទចោទក្លែងបន្លំឯកសារ
តុលាការខេត្តពោធិ៍សាត់ចេញសាលក្រមផ្តន្ទាទោសសកម្មជនបក្សភ្លើងទៀនម្នាក់ទៀតគឺលោក ឈួន ឈឿង ឱ្យជាប់ពន្ធនាគារ២ឆ្នាំក្នុងបទចោទក្លែងបន្លំឯកសារសាធារណៈពាក់ព័ន្ធនឹងឯកសាររៀបចំបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាឃុំ អាណត្តិទី៥។ ប៉ុន្តែក្រុមគ្រួសារជនជាប់ឃុំនិងមន្រ្តីសង្គមស៊ីវិលចាត់ទុកសេចក្តីសម្រេចនេះថាជារឿងអយុត្តិធម៌និងជាការធ្វើទុក្ខបុកម្នេញផ្នែកនយោបាយ។
អានព័ត៌មានបន្ថែម៖ https://bit.ly/3Abuo1v
១២ . សាលាឧទ្ធណ៍រាជធានីភ្នំពេញ បើកសវនាការជំនុំជម្រះសកម្មជនគណបក្សសង្គ្រោះជាតិ១៣នាក់
សាលាឧទ្ធណ៍រាជធានីភ្នំពេញ កាលពីថ្ងៃអង្គារម្សិលមិញ បានបើកសវនាការកាត់ក្ដីសកម្មជនទាំង ១៣នាក់ ដែលត្រូវបានតុលាការដំបូងរាជធានីភ្នំពេញកាត់ក្ដីឱ្យជាប់ពន្ធនាគារ៥ឆ្នាំ ពីបទចោទ រួមគំនិតក្បត់ និងញុះញង់ ហើយឱ្យអនុវត្តទោស៣ឆ្នាំ ៨ខែ។ ប្រពន្ធសកម្មជន ដែលកំពុងជាប់ឃុំ និយាយថា ប្ដីរបស់ពួកគាត់មិនបានប្រព្រឹត្តិកំហុសដូចការចោទប្រកាន់របស់តុលាការឡើយ ហើយទាមទារឱ្យសាលាឧទ្ធណ៍ទម្លាក់បទចោទមកលើប្ដីរបស់ពួកគាត់។ ចំណែក មេធាវីការពារក្ដីសកម្មជនសង្គ្រោះជាតិ ថ្លែងថា កន្លងមកតុលាការគ្មានភ័ស្ដតាងជាក់លាក់ណាមួយ ដែលបញ្ជាក់ថាកូនក្ដីរបស់ខ្លួនញុះញង់ ឬរួមគំនិតក្បត់ឡើយ។
១៣ . ក្រុមតំណាងគណបក្សនយោបាយក្រៅរដ្ឋាភិបាលនឹងដាក់សំណើរួមគ្នាទាមទារកែលម្អប្រព័ន្ធបោះឆ្នោត ទៅស្ថាប័នពាក់ព័ន្ធនៅសប្ដាហ៍ក្រោយ
គណបក្សប្រជាធិបតេយ្យបានបង្ហោះសារនៅលើបណ្ដាញសង្គមហ្វេសប៊ុក នៅព្រឹកថ្ងៃទី១៥ ខែសីហាសប្តាហ៍នេះថា តំណាងគណបក្សនយោបាយចំនួន៤ ដែលបានជួបប្រជុំបញ្ចប់សំណើរួមគ្នានោះរួមមាន គណបក្សភ្លើងទៀន គណបក្សប្រជាធិបតេយ្យមូលដ្ឋាន គណបក្សឆន្ទៈខ្មែរ និងគណបក្សកែទម្រង់កម្ពុជា។ ប្រភពដដែលបានបញ្ជាក់ថា ក្រៅពីរៀបចំឯកសារស្នើកែលម្អ គ.ជ.ប ពួកគេក៏បានឯកភាពគ្នាលើជំហររួមទាក់ទងទៅនឹងករណីបណ្តឹងទៅតុលាការ ដែលប្ដឹងដោយ គ.ជ.ប ផងដែរ។
១៤ . អាជ្ញាធរពន្ធនាគារបញ្ជូនសកម្មជនបក្សប្រឆាំងលោក គង់ សំអាន ទៅព្យាបាលជំងឺនៅ មន្ទីរពេទ្យរុស្ស៊ី តែមិនឱ្យសម្រាកនៅមន្ទីរពេទ្យ
មន្រ្តីពន្ធនាគារបញ្ជូនសកម្មជនគណបក្សសង្គ្រោះជាតិខេត្តត្បូងឃ្មុំ លោក គង់ សំអាន ទៅពិនិត្យនិងព្យាបាលជំងឺធ្មេញនៅមន្ទីរពេទ្យរុស្ស៊ី ហើយនាំយកទៅពន្ធនាគារវិញនៅថ្ងៃចន្ទ ទី១៥ ខែសីហានេះ ក្រោយពីមន្រ្តីបក្សប្រឆាំងរូបនេះធ្លាក់ខ្លួនឈឺធ្ងន់ធ្ងរជាច្រើនខែនៅក្នុងបន្ទប់ឃុំឃាំងចង្អៀតណែន។
អានព័ត៌មានបន្ថែម៖ https://bit.ly/3AdQArV
១៥ . មេខ្លោងឆបោកជនជាតិចិនមានសញ្ជាតិខ្មែរម្នាក់ត្រូវប៉ូលិសថៃចាប់ខ្លួនពីបទបើកបនល្បែងឆបោកខុសច្បាប់
អាជ្ញាធរប្រទេសថៃថ្មីៗនេះអះអាងថា បានឃាត់ខ្លួនអ្នកជំនួញជាប់សង្ស័យពីឆបោកជាជនជាតិចិនម្នាក់ ដែលកាន់សញ្ញាតិខ្មែរផង តាមដីការបស់ប៉ូលិសអន្តរជាតិអាំងទែប៉ូល (Interpol)។
ជនសង្ស័យជាជនជាតិចិនរូបនោះ គឺជាទណ្ឌិតបានរត់គេចខ្លួនពីការអនុវត្តទោសនៅប្រទេសចិន ហើយមកបើកមុខជំនួញអាជីវកម្មបនល្បែងឆបោកតាមប្រព័ន្ធអនឡាញ (Online) នៅក្នុងតំបន់ប្រទេសអាស៊ីអាគ្នេយ៍ ក្នុងនោះរួមមានទាំងនៅកម្ពុជាផង។
១៦ . លោក ទៀ បាញ់ អះអាងជាថ្មីថា មិនខ្វល់ពីការចោទប្រកាន់ថា មានមូលដ្ឋានទ័ពចិននៅរាម
រដ្ឋមន្ត្រីក្រសួងការពារជាតិ លោក ទៀ បាញ់ អះអាងថា កម្ពុជាមិនខ្វល់ចំពោះការរិះគន់ណាមួយពាក់ព័ន្ធនឹងឥទ្ធិពលនោះទេ សំខាន់គឺកម្ពុជាមានកិច្ចសហការនឹងគ្រប់ប្រទេសទាំងអស់ ដើម្បីធ្វើទំនើបកម្មមូលដ្ឋានទ័ពសមុទ្ររាមឲ្យបោះជំហានទៅមុខជានិច្ច។ លោក ទៀ បាញ់ លើកឡើងដូច្នេះ នៅក្នុងសន្និសីទសារព័ត៌មាន នៅព្រមានយន្តហោះអន្តរជាតិភ្នំពេញ ក្រោយពីលោកបានបញ្ចប់ដំណើរទស្សនកិច្ចនៅប្រទេសចិន ចាប់ពីថ្ងៃទី១៣ ដល់ថ្ងៃទី១៦ សីហា ខណៈក្រុមអ្នកវិភាគរិះគន់ថា កុម្មុយនិស្តចិនកំពុងតែរឹតចំណងមិត្តភាពកាន់តែខ្លាំងជាមួយកម្ពុជា ក្នុងពេលសហរដ្ឋអាមេរិកកំពុងតែសង្ស័យថា មានមូលដ្ឋានទ័ពចិននៅកំពង់ផែសមុទ្ររាមផងនោះ។
អានព័ត៌មានបន្ថែម៖ https://bit.ly/3dLgMTf
១៧ . លោក សម រង្ស៊ី អំពាវនាវឱ្យជនជាតិដើមភាគតិចរួមគ្នាបង្កើតក្រុមប្រឹក្សាជាតិតវ៉ាទាមទារសិទ្ធិរបស់ខ្លួន
ប្រធានស្ដីទីគណបក្សសង្គ្រោះជាតិ លោកសម រង្ស៊ី លើកឡើងថា រដ្ឋាភិបាលបានផ្ដល់ដីសម្បទានសេដ្ឋកិច្ចឲ្យក្រុមហ៊ុនបរទេសមួយចំនួនវិនិយោគនៅកម្ពុជា ពុំបានផ្ដល់ផលចំណេញអ្វីជាដុំកំភួនដល់ជាតិឡើយ។ ផ្ទុយទៅវិញ លោកអះអាងថា វាជាការបំផ្លាញសេដ្ឋកិច្ច ប្រពៃណី និង វប្បធម៌របស់ជនជាតិដើមភាគតិចទៅវិញទេ។ លោក សម រង្ស៊ី ស្នើឲ្យក្រុមជនជាតិដើមភាគតិចទាំងអស់ រួមគ្នាបង្កើតក្រុមប្រឹក្សាជាតិ ជនជាតិដើមមួយដែលមានសំឡេងខ្លាំង ដើម្បីតវ៉ាទៅរដ្ឋាភិបាលក្នុងការពារសិទ្ធិ និងផលប្រយោជន៍ជនជាតិដើមភាគតិចទាំងអស់នៅកម្ពុជា។
ស្តាប់បទសម្ភាសន៍លោក សម រង្ស៊ី៖ https://bit.ly/3PE4ol7
១៨ . ក្រសួងមហាផ្ទៃថាអត្រាជួញដូរមនុស្សធ្លាក់ចុះក្នុងអំឡុងពេល៦ខែដើមឆ្នាំ២០២២បើធៀបទៅឆ្នាំមុន
ក្រសួងមហាផ្ទៃឲ្យដឹងថាអត្រាជួញដូរមនុស្សធ្លាក់ចុះក្នុងអំឡុងពេល៦ខែដើមឆ្នាំ២០២២បើធៀបទៅនឹងអំឡុងពេលដូចគ្នាកាលពីឆ្នាំ២០២១។តែរបាយការណ៍ជួញដូរមនុស្សឆ្នាំ២០២២របស់ក្រសួងការបរទេសសហរដ្ឋអាមេរិកចេញផ្សាយកាលពីខែកក្កដាបានទម្លាក់ចំណាត់ថ្នាក់កម្ពុជាពីក្រុមលេខ២ មកជាក្រុមលេខ៣វិញដោយសារប្រទេសកម្ពុជាពុំបានចាត់វិធានការគ្រប់គ្រាន់និងមានប្រសិទ្ធភាពដើម្បីទប់ស្កាត់បទល្មើសជួញដូរមនុស្សការកេងប្រវ័ញ្ចផ្លូវភេទនិងពលកម្មកុមារជាដើម។
អានព័ត៌មានបន្ថែម៖ https://bit.ly/3CjMD7u
១៩ . លោក កឹម សុខាថា សមាជិកសភាអាមេរិកផ្ដល់តម្លៃការលះបង់និងការតស៊ូរបស់លោក
ប្រធានគណបក្សសង្គ្រោះជាតិ លោក កឹម សុខា អះអាងថា ក្រុមសមាជិករដ្ឋសភានិងព្រឹទ្ធសភាសហរដ្ឋអាមេរិកកោសរសើរលោកដែលមានការអត់ធ្មត់ក្នុងបុព្វហេតុសិទ្ធិមនុស្សនិងប្រជាធិបតេយ្យ។ មន្ត្រីសង្គមស៊ីវិលថាបើតុលាការគ្មានភស្តុតាងដាក់បន្ទុកគ្រប់គ្រាន់ទេតុលាការគួរផ្ដល់សេរីភាពឲ្យ លោក កឹម សុខា ឡើងវិញ។
២០ . លោក ហ៊ុន ម៉ាណែត អះអាងថា លោកមិនជាប់ពាក់ព័ន្ធរឿងដោះដូរដីនៅតំបន់ភ្នំតាម៉ៅទេ
លោក ហ៊ុន ម៉ាណែត កូនប្រុសរបស់លោកនាយករដ្ឋមន្រ្តី ហ៊ុន សែន អះអាងថា លោកមិនបាននៅពីក្រោយខ្នងគម្រោងវិនិយោគនៅតំបន់ភ្នំតាម៉ៅឱ្យទៅក្រុមហ៊ុន ឡេង ណាវ៉ាត់ត្រា នោះទេ។ លោកចាត់ទុកអ្នកដែលចោទប្រកាន់លើលោកគឺជារឿងប្រឌិតនិងមួលបង្កាច់ដើម្បីកេងចំណេញផលប្រយោជន៍នយោបាយ។ ប្រតិកម្មនេះកើតឡើងក្រោយពេលស្ថាបនិកអង្គការមាតាធម្មជាតិ លោក អាឡិចហាន់ដ្រូ ហ្កាន់សាឡេស ដេវិដសុន ថា លោក ហ៊ុន ម៉ាណែត អាចនៅពីក្រោយខ្នងនៃគម្រោងអភិវឌ្ឍន៍តំបន់ភ្នំតាម៉ៅ។
អានព័ត៌មានបន្ថែម៖ https://bit.ly/3psE56V
២១ . ប្រតិកម្មរបស់យុវជននិងអ្នកវិភាគទាក់ទងនឹងការបើកដេប៉ាតឺម៉ង់ភាសាវៀតណាម
យុវជន និងអ្នកវិភាគលើកឡើងថាការបើកឱ្យមានផ្នែកសិក្សាភាសាវៀតណាមឬដេប៉ាតឺម៉ង់ភាសាវៀតណាមក្នុងសកលវិទ្យាល័យភូមិន្ទភ្នំពេញនៅកម្ពុជាកំពុងបង្ហាញភាពមិនស្មើគ្នារវាងប្រទេសទាំងពីរខណៈភាសាខ្មែរហាក់ត្រូវបានរិតត្បិតមិនឱ្យសិក្សាក្នុងប្រទេសវៀតណាមឡើយ។ពួកគាត់ស្នើឱ្យរដ្ឋាភិបាលគួរស្នើទៅភាគីវៀតណាមវិញដើម្បីបញ្ឈប់ការរើសអើងដើម្បីឱ្យពលរដ្ឋខ្មែរកម្ពុជាក្រោមបានសិក្សានិងផ្សព្វផ្សាយវប្បធម៌ដូចពលរដ្ឋវៀតណាមដែលរស់នៅលើទឹកដីកម្ពុជាដែរ។
អានព័ត៌មានបន្ថែម៖ https://bit.ly/3wgi0Mu
២២. តើលោក ឡេង ណាវ៉ាត្រា មានប្រវត្តិយ៉ាងណាហើយធ្វើជំនួញអ្វីខ្លះ ទើបបានជាមានលុយវាល់លានដុល្លារកាន់ក្នុងដៃបែបនេះ?
ឧកញ៉ា ឡេង ណាវ៉ាត្រា គឺជាសេដ្ឋីវ័យក្មេងមួយរូប ដែលកំពុងលេចមុខមាត់ខ្លាំងក្នុងសង្គមកម្ពុជា។ លោកក្ដោបក្ដាប់មុខជំនួញជាច្រើនមុខនៅកម្ពុជា រាប់ចាប់តាំង ពីវិស័យ អចលនទ្រព្យ ហិរញ្ញវត្ថុ ធនាគារ កសិកម្ម រហូតដល់ វិស័យសិល្បៈ។ ជាពិសេស លោកបានផ្ដល់លុយឱ្យរដ្ឋាភិបាល របស់លោក ហ៊ុន សែន រាប់លានដុល្លារក្នុងរយៈពេល ប៉ុន្មានឆ្នាំចុងក្រោយនេះ។
សូមទស្សនាការសេចក្ដីរាយការណ៍របស់លោក យ៉ង ចាន់តារា ដូចតទៅ៖ https://bit.ly/3pwrJdZ
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។