ព័ត៌មាន​សំខាន់ៗ​ចំនួន ៩ ដែល​លោកអ្នកនាង​គួរអាន​នៅថ្ងៃពុធ​នេះ

១. គ្រួសារ និង​មេធាវីទាមទារ​តុលាការ​ដោះលែង​អនុប្រធាន​បក្ស​ភ្លើងទៀន​លោក ថាច់ សេដ្ឋា ឱ្យ​មាន​សេរីភាព​វិញ

គ្រួសារ និង​មេធាវី ទាមទារ​តុលាការ​ឲ្យ​ដោះលែង​អនុប្រធាន​បក្សភ្លើងទៀន​​លោក ថាច់ សេដ្ឋា ​ឱ្យ​មាន​សេរីភាព​ឡើង​វិញ ដើម្បីចូលរួម​ធ្វើ​នយោបាយ មុនការ​បោះឆ្នោត​ជាតិ នៅ​ខែកក្កដា​ខាងមុខ។ មេធាវី​កត់​សម្គាល់​ថា ការលើកសំអាង​អំពីសែក​ស្អុយ​របស់​តុលាការ មកដាក់​បន្ទុក​កូន​ក្តី​មាន​ភាព​មិន​ប្រក្រតី​ ខណៈ​លោក ថាច់ សេដ្ឋា អះអាងថា លោកមិន​បាន​ព្រឹត្ត​បទល្មើស​ដូចកា​រចោទ​ប្រកាន់​នោះទេ។ អានព័ត៌មានពិស្តារ...

២. ក្រុម​មន្ត្រី​ជាន់ខ្ពស់​គណបក្ស​កាន់​អំណាច​ប្រតិកម្ម​នឹង​ពលរដ្ឋ​ខ្មែរ​រស់នៅ​ក្រៅ​ប្រទេស ជេរ​ប្រមាថ​លោក ហ៊ុន ម៉ាណែត តាម​បណ្ដាញ​សង្គម

ក្រុម​មន្ត្រី​ជាន់ខ្ពស់​គណបក្ស​កាន់​អំណាច និង​ក្រុម​គ្រួសារ​ត្រកូល​ហ៊ុន កំពុង​គំរាម​ចាត់​វិធានការ​ទៅ​លើ​ពលរដ្ឋ​ម្នាក់​នៅ​ក្រៅ​ប្រទេស ដែល​រិះគន់​លោក ហ៊ុន ម៉ាណែត តាម​រយៈ​ឃ្លីប​វីដេអូ​ថា ជា​មនុស្ស​គ្មាន​សមត្ថភាព និង​កាន់​តួនាទី​ដោយសារ​លោក ហ៊ុន សែន ជា​ឪពុក​លើក​បន្តុប។ អានព័ត៌មានពិស្តារ...

៣. គណបក្ស​ចំនួន​៣ ចូលរួម​ប្រកួត​ដណ្ដើម​កៅអី​ក្រុមប្រឹក្សា​ស្រុក​ក្រុង​ទើប​បំបែក​ថ្មី
គណបក្ស​ប្រជាជនកម្ពុជា គណបក្សភ្លើងទៀន និង​បក្សហ៊្វុនស៊ិនប៉ិច ចូលរួមការ​ប្រកួត​ប្រជែងការ​បោះឆ្នោត​ជ្រើសរើស ក្រុម​ប្រឹក្សាស្រុក ក្រុង ចំនួន៥ ដែល​ទើប​បង្កើត​ថ្មី។ មន្ត្រីសង្គម​ស៊ីវិល លើក​ឡើង​ថា បោះ​ឆ្នោតនេះ​ជាការផ្ដល់​សារៈសំខាន់​ក្នុងការ​ធ្វើឱ្យ​មាន​បែងចែក​អំណាច នៅថ្នាក់ក្រោម​ជាតិក្នុងស្រុក ក្រុងទាំងនោះ។ អានព័ត៌មានពិស្តារ...

៤. ក្រុម​កូដករ​ណាហ្គាវើលដ៍ (NAGA World) បន្ត​ធ្វើ​កូដកម្ម​ទាមទារ​រក​ដំណោះ​ស្រាយ​​ក្នុង​វិវាទ​ការងារ

ក្រុម​កូដករ​ណាហ្គាវើលដ៍ (NAGA World) ប្រមាណ ៥០នាក់ នៅ​រសៀល​ថ្ងៃ​ទី២៤ មករា​នេះ បន្ត​ធ្វើ​កូដកម្ម​ទាមទារ​រក​ដំណោះ​ស្រាយ​ការងារ​នៅ​ខាង​មុខ​ក្រុមហ៊ុន​ណាហ្គាវើលដ៍ ដើម្បី​ជំរុញ​ឱ្យ​ថៅកែ​ក្រុមហ៊ុន​ចូល​តុ​ចរចា និង​ទទួល​យក​បុគ្គលិក​ទាំង​អស់​ចូល​ធ្វើ​ការ​វិញ។ អានព័ត៌មានពិស្តារ...

៥. ជនជាតិដើម​ព្នង ៣​ភូមិ នៅ​ខេត្តមណ្ឌលគិរី​តវ៉ា​ករណី​រដ្ឋាភិបាល កាត់ឆ្វៀលដី​សហគមន៍​ជាង ២រយ​ហិកតារ វិនិយោគ​ឱ្យ​ក្រុមហ៊ុន​ឯកជន

នៅខេត្តមណ្ឌលគិរី​ឯណោះវិញ​ ពលរដ្ឋ​រស់​នៅ ក្នុង​ភូមិចំនួន៣ បន្តស្នើឱ្យ​រដ្ឋាភិបាលលុប​អនុប្បយោគ ដែល​សម្រេច​កាត់ឆ្វៀល​ដី​ព្រៃអាស្រ័យ​ផល របស់​ជនជាតិ​ដើម​ភាគ​តិច​ព្នង​ជាង​ ២ រយ ៥០​ហិកតា (២៥៥) ដើម្បី​វិនិយោគ​ឱ្យ​ក្រុមហ៊ុន​ឯកជន។ អ្នកភូមិ​ទាំង​នោះ បាន​លើក​គ្នាត​វ៉ាជា​ច្រើន​លើក ដើម្បីទាមទារឱ្យ​អាជ្ញាធរ​ដោះស្រាយ​ក្តីកង្វល់​ទាំងនេះ។

៦ អង្គការសង់ត្រាល់​អប់រំ​ពី​សុវត្ថិភាព​ចំណាកស្រុក ដល់ពលរដ្ឋ ៣ខេត្ត
ពាក់ព័ន្ធ​នឹង​ពលរដ្ឋចំណាកស្រុក​វិញ មន្ត្រីអង្គការ​សង់ត្រាល់ (CENTRAL) បន្តចុះ​អប់រំ​ផ្សព្វផ្សាយ​ការ​យល់​ដឹង​អំពី​សិទ្ធិការងារ និង​សុវត្ថិភាព​នៃ​ការ​ធ្វើ​ចំណាក​ស្រុក​ដល់​ពលរដ្ឋ​នៅ​តាម​សហគមន៍​ក្នុង​ខេត្ត​ចំនួន​៣ រួមមាន​ខេត្តបន្ទាយ​មានជ័យ សៀមរាប និងខេត្តកំពង់ធំ ចាប់ពី​ថ្ងៃទី២២ មករា ដល់ថ្ងៃទី២៨ មករា។ ពលរដ្ឋ និង​អាជ្ញាធរសារទរ​ចំពោះការ​អប់រំ​នេះ​ថា ជារឿង​ល្អ ដើម្បី​កុំ​ឱ្យ​ប្រជាពលរដ្ឋ​នៅ​តាម​សហគមន៍​ចាញ់បោក​មេខ្យល់​នាំឆ្លងដែន​ប្រថុយប្រថានដោយខុសច្បាប់​បន្តទៀត។

៧. WHO ជំរុញ​ឱ្យ​មាន​វិធានការ​បន្ទាន់ ក្រោយ​មាន​ករណី​កុមារ​ស្លាប់​ដោយសារ​ថ្នាំ​ក្អក

អង្គការ​សុខភាព​ពិភពលោក​អំពាវនាវ​ដល់​​ប្រទេស​ជា​សមាជិក​ចំនួន ១៩៤ ឱ្យ​ដាក់​ចេញ​នូវ​វិធានការ​ជាក់លាក់ និង​ជាបន្ទាន់ ដើម្បី​ការពារ​កុមារ​ពី​ឱសថ​ដែល​មាន​ផ្ទុក​ជាតិ​ពុល។ ការ​អំពាវនាវ​នេះ ធ្វើ​ឡើង​ក្រោយ​ពី​ផ្ទុះ​ករណី​ស្លាប់​កុមារ​ជាច្រើន​នាក់​ពាក់ព័ន្ធ​នឹង​ការ​ប្រើប្រាស់​ទឹកស៊ីរ៉ូ​បំបាត់​ក្អក (Cough Syrup) កាល​ពី​ឆ្នាំ​មុន។

អង្គការ​សុខភាព​ពិភព​លោក​បញ្ជាក់​ក្នុង​សេចក្ដី​ថ្លែងការណ៍​កាល​ពី​ថ្ងៃ​ទី ២៣ មករា​ថា ក្នុង​ឆ្នាំ ២០២២ កុមារ​លើស​ពី ៣០០ នាក់ ដែល​ភាគ​ច្រើន​មាន​អាយុ​ក្រោម ៥ ឆ្នាំ នៅ​ក្នុង​ប្រទេស​ហ្កាំបៀ (Gambia) ឥណ្ឌូណេស៊ី (Indonesia) និង​អ៊ូបេគីស្ថាន (Uzbekistan) បាន​ស្លាប់​ដោយសារ​របួស​តម្រងនោម​ស្រួចស្រាល់។ ករណី​ទាំងនោះ​ជាប់ពាក់ព័ន្ធ​នឹង​ការ​ប្រើប្រាស់​ឱសថ​បំបាត់​ក្អក ដែល​មាន​ផ្ទុក​សារធាតុ ឌីធីលីន ហ្ក្លាយខុល (Diethylene Glycol) និង​អេធីលីន ហ្ក្លាយខុល (Ethylene Glycol)។ សារធាតុ​ទាំងនេះ ជា​សារធាតុ​គីមី​ពុល​ដែល​ត្រូវ​បាន​គេ​ប្រើ​ជា​សារធាតុ​រំលាយ​ក្នុងឧស្សាហកម្ម និង​ភ្នាក់ងារ​ប្រឆាំង​នឹង​កំណក ដែល​អាច​បណ្ដាល​ឱ្យ​ស្លាប់​បាន ​សូម្បីតែ​ក្នុង​បរិមាណ​តិចតួច។

អង្គការ​សុខភាព​ពិភពលោក​បាន​ប្រាប់​ទីភ្នាក់ងារ​សារព័ត៌មាន​រ៉យទ័រ (Reuters) ថា ប្រទេស​កម្ពុជា ហ្វីលីពីន (Philippines) ទីម័រខាងកើត (Timor Leste) និង​សេណេហ្គាល់ (Senegal) អាច​រង​ផល​ប៉ះពាល់​ខ្លាំង ពីព្រោះ​ប្រទេស​ទាំងនេះ​ប្រហែលជា​មាន​លក់​ថ្នាំ​ប្រភេទ​នេះ។

៨. មន្ត្រីសង្គម​ស៊ីវិល​ជំរុញ​ឱ្យ​ពលរដ្ឋ ចេះ​គិត​ស៊ីជម្រៅ

មន្ត្រីអង្កការ​សង្គមស៊ីវិល និងអ្នក​ពង្រឹងសិទ្ធិអំណាច​យុវជន លើក​ឡើង​ថា ប្រជាពលរដ្ឋ​ជាច្រើន​នៅ​មិន​ទាន់​ចេះ​គិតពិចារណា​ឱ្យបាន​ស៊ីជម្រៅនៅ​ឡើយទេ ដែលងាយក្លាយ​​ជាជនរង​គ្រោះ​ដោយ​អំពើ​បោក​ប្រាស់​ផ្សេងៗ។ ពួកគាត់​ជុំរុញ​ឱ្យ​ពលរដ្ឋ ​ត្រូវចេះគិត​ពិចារណា​ស៊ីជម្រៅ ដោយមាន​ហេតុផល និង​ភស្តុតាង ដើម្បី​ការពារខ្លួន​ពីការបោក​ប្រាស់​ផ្សេងៗ ជាពិសេស​ពី​អ្នក​នយោបាយប្រជាភិថុតិ។
តើ​ប្រជាពលរដ្ឋ​ត្រូវមាន​ទម្លាប់ និង​ការគិត​បែប​ណាខ្លះ ដើម្បីជៀស​វាង ការ​ចាញ់បោក​អ្នក​នយោបាយ?

៩. យុវជន​បរិស្ថាន​បារម្ភ​ពី​សុវត្ថិភាព​ក្រោយ​ពី​អាជ្ញាធរ​តាម​ឃ្លាំមើល​ពួក​គេ​គ្រប់​ទីកន្លែង
ក្រុម​យុវជន​បរិស្ថាន​បារម្ភ​ពី​សុវត្ថិភាព ក្រោយ​ពី​អាជ្ញាធរ​មួយ​ចំនួន​តាម​ឃ្លាំមើល​ពួក​គេ​គ្រប់​ទី​កន្លែង ដោយសារ​តែ​ធ្វើ​សកម្មភាព​ផ្សព្វផ្សាយ​ពី​កោះកុង​ក្រៅ​កាល​ពី​ថ្មីៗ នេះ។ អ្នក​តស៊ូ​មតិ​បញ្ហា​បរិស្ថាន​ថា ការ​តាមដាន​របស់​អាជ្ញាធរ​នេះ ជា​ទង្វើ​អាក្រក់​មួយ​នៅ​ក្នុង​សង្គម ដែល​ធ្វើឱ្យ​ប៉ះពាល់​ដល់​សិទ្ធិ​សេរីភាព​បញ្ចេញ​មតិ​របស់​យុវជន។ អានព័ត៌មានពិស្តារ...

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។