លោក សម រង្ស៊ី ទៅដល់ដីអាមេរិកគ្រោងជួបសកម្មជនមុនជួបមន្ត្រីអាមេរិក
2021.08.20
លោក សម រង្ស៊ី ប្រធានស្តីទីគណបក្សសង្គ្រោះជាតិ បានទៅដល់សហរដ្ឋអាមេរិកដើម្បីធ្វើនយោបាយការទូតជាមួយមន្ត្រីអាមេរិក និងជួបសកម្មជនរបស់ខ្លួនក្នុងប្រទេសនេះ។ មន្ត្រីបក្សកាន់អំណាចថា ដំណើរទស្សនកិច្ចនេះមានចរិតពិសពុលចង់បំផ្លាញកម្ពុជាមិនឈប់។
លោក សម រង្ស៊ី មានពេលវេលាមួយខែ បំពេញបេសកកម្មរបស់លោកដើម្បីជួបអ្នកមុខអ្នកការនៃរដ្ឋាភិបាលសហរដ្ឋអាមេរិក សមាជិកព្រឹទ្ធសភា និងសមាជិករដ្ឋសភាសំខាន់ៗដែលកំពុងធ្វើច្បាប់ដាក់ទណ្ឌកម្មមេដឹកនាំកម្ពុជាដែលរំលោភសិទ្ធិមនុស្សនិងប្រជាធិបតេយ្យ។ លោក សម រង្ស៊ី អាចនឹងជួបអ្នកគាំទ្ររបស់ខ្លួនមុនសិន មុននឹងជួបសមាជិកព្រឹទ្ធសភានិងរដ្ឋសភារបស់អាមេរិក។
អនុប្រធានគណបក្សសង្គ្រោះជាតិលោក អេង ឆៃអ៊ាង ឲ្យវិទ្យុអាស៊ីសេរីដឹងថ្ងៃទី២០ ខែសីហា ថា លោក សម រង្ស៊ី បានមកដល់ទឹកដីសហរដ្ឋអាមេរិកហើយ។ លោក អេង ឆៃអ៊ាង ថា លោក សម រង្ស៊ី មិនទាន់កំណត់ពេលជាក់លាក់ជួបតំណាងរាស្ត្រ សមាជិកព្រឹទ្ធសភា និងមន្ត្រីពាក់ព័ន្ធផ្សេងទៀតនៅឡើយទេ ព្រោះពេលនេះសភាអាមេរិកកំពុងសម្រាក។ ទោះយ៉ាងណា លោក សម រង្ស៊ី គ្រោងជួបថ្នាក់ដឹកនាំគណបក្សសង្គ្រោះជាតិ និងសកម្មជនរបស់លោកនាដើមខែកញ្ញាខាងមុខដើម្បីរៀបចំយុទ្ធសាស្ត្រ ផែនការសកម្មភាពនយោបាយគណបក្សសង្គ្រោះជាតិ។ លោកថា ក្រៅពីនេះប្រធានស្តីទីគណបក្សសង្គ្រោះជាតិរូបនេះ ក៏នឹងជួបអ្នកគាំទ្ររបស់លោកនៅតាមមូលដ្ឋាននានាក្នុងសហរដ្ឋអាមេរិកផងដែរ៖ «យើងនឹងមានធ្វើសិក្ខាសាលាមួយ នៅសហរដ្ឋអាមេរិកជាមួយថ្នាក់ដឹកនាំគណបក្សសង្គ្រោះជាតិនៅអាមេរិកហ្នឹងណាដើម្បីនិយាយគ្នាជាមួយយុទ្ធសាស្ត្ររបស់គណបក្សសម្រាប់បន្តក្នុងឆ្នាំនេះនិងឆ្នាំក្រោយ ហើយនឹងពង្រឹងសមត្ថភាពថ្នាក់ដឹកនាំយើងនៅប្រទេស»។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចំអកថា ក្រុមលោក សម រង្ស៊ីអាចត្រឹមជួបសមាជិកសភាអាមេរិកពីរបីនាក់ ជាលក្ខណៈឯកជនឬជំនួបក្រៅផ្លូវការប៉ុណ្ណោះ។ អ្នកនាំពាក្យរូបនេះនៅតែចោទប្រកាន់ថា លោក សម រង្ស៊ី ជាឧទ្ទាមក្រៅច្បាប់ ដូច្នេះបើសមាជិកសភា ឬមន្ត្រីអាមេរិកជួបក្រុមលោក សម រង្ស៊ី ស្មើនឹងក្រុមជនឧក្រិដ្ឋ។
ទោះយ៉ាងណាពេលអ្នករាយការណ៍វិទ្យុអាស៊ីសេរីសួរលោកថា តើរដ្ឋាភិបាលកម្ពុជាមានគម្រោងស្នើទៅសហរដ្ឋអាមេរិកឱ្យចាប់ខ្លួនលោក សម រង្ស៊ី បញ្ជូនមកកម្ពុជាវិញទេ? លោកបែរឆ្លើយថា ទុកឲ្យលោក សម រង្ស៊ី នៅក្រៅប្រទេសចុះ ទោះបីជាលោកចោទប្រកាន់សកម្មភាពរបស់លោក សម រង្ស៊ី នៅក្រៅស្រុក កំពុងបំផ្លាញកម្ពុជាក្ដី៖ «ជាបុគ្គលទទួលឧទ្ទាមក្រៅច្បាប់ខ្ញុំយល់ថា អត់ត្រឹមត្រូវសមស្របទៅនឹងប្រទេសប្រជាធិបតេយ្យព្រោះក្នុងហ្នឹងជាក្រុមឧទ្ទាមក្រៅច្បាប់មានចរិតពិសពុលចង់កម្ពុជា»។
ឆ្លើយតបការលើកឡើងរបស់លោក សុខ ឥសាន បែបនេះ លោក អេង ឆៃអ៊ាង ប្រាប់ថា បើសិនរបបលោក ហ៊ុន សែន គោរពសិទ្ធិមនុស្ស និងប្រជាធិបតេយ្យនោះ មិនមែនប្រទេសលោកសេរី និង សហរដ្ឋអាមេរិកផងនោះ ធ្វើច្បាប់ដាក់ទណ្ឌកម្មក្រុមលោក ហ៊ុន សែន ជាបន្តបន្ទាប់នោះទេ។
គណៈកម្មាធិការកិច្ចការបរទេសរដ្ឋសភាអាមេរិក កាលពីថ្ងៃទី២៨ កក្កដា បានអនុម័តសេចក្តីព្រាង “ ច្បាប់ស្ដីពីប្រជាធិបតេយ្យកម្ពុជា ឆ្នាំ២០២១» ឬ H.R.4686 ដើម្បីដាក់ទណ្ឌកម្មក្រុមមេដឹកនាំនៅកម្ពុជា ដោយសារតែបានរម្លាយប្រជាធិបតេយ្យ និងរំលោភសិទ្ធិមនុស្សធ្ងន់ធ្ងរ។
ទន្ទឹមគ្នានេះ សមាជិកព្រឹទ្ធសភាអាមេរិកដ៏មានឥទ្ធិពល ៣ រូប ផ្សេងទៀត ក៏កំពុងត្រៀមដាក់សេចក្តីព្រាងច្បាប់ដាក់ទណ្ឌកម្មស្រដៀងគ្នាមួយទៀត គឺ (សេចក្តីព្រាងច្បាប់ស្ដីពីសិទ្ធិមនុស្ស និងប្រជាធិបតេយ្យកម្ពុជា) ទៅឱ្យព្រឹទ្ធសភាអាមេរិកពិនិត្យ ដើម្បីដាក់ទណ្ឌកម្មក្រុមមេដឹកនាំនៅកម្ពុជាដែរ។ សមាជិកព្រឹទ្ធសភាទាំងនេះ បានចេញសេចក្ដីថ្លែងការណ៍កាលពីថ្ងៃដើមខែសីហាថា លោកនាយករដ្ឋមន្ត្រី ហ៊ុន សែន កំពុងដឹកនាំប្រទេសតាមបែបឯកបក្សដែលរំលោភរដ្ឋធម្មនុញ្ញកម្ពុជា តាមរយៈអំពើពុករលួយ ការហាមឃាត់សិទ្ធិអ្នកនយោបាយបក្សប្រឆាំង ការធ្វើទុក្ខបុកម្នេញផ្នែកនយោបាយ បង្កើតច្បាប់បែបគាបសង្កត់ ព្រមទាំងការបង្ក្រាបលើសេរីភាពបញ្ចេញមតិ និងប្រព័ន្ធផ្សព្វផ្សាយឯករាជ្យជាដើម។
ប្រធានអនុគណៈកម្មាធិការទំនាក់ទំនងការបរទេសនៃព្រឹទ្ធសភាអាមេរិក ទទួលបន្ទុកកិច្ចការអាស៊ីបូព៌ា លោក អ៊ែដ ម៉ារ៍ឃី (Ed Markey) ថ្លែងថា ពលរដ្ឋខ្មែរសមតែទទួលបាននូវអ្វីដែលជាការសន្យានៅក្នុងកិច្ចព្រមព្រៀងសន្តិភាពទីក្រុងប៉ារីស១៩៩១។ នោះគឺលទ្ធិប្រជាធិបតេយ្យបែបតំណាងដែលឆ្លុះបញ្ចាំងពីឆន្ទៈរបស់ពលរដ្ឋ មិនមែនជាការគ្រប់គ្រងបែបផ្ដាច់ការឯកបក្សបែបនេះឡើយ។
អ្នកវិភាគនយោបាយលោកបណ្ឌិត សេង សារី យល់ថា ការបំពេញបេសកកម្មរបស់លោក សម រង្ស៊ី ពេលនេះ អាចទាក់ទងនឹងស្ថានការណ៍នយោបាយនៅតំបន់អាស៊ីអាគ្នេយ៍ខណៈចិនកំពុងពង្រីកឥទ្ធិពលរបស់នៅតំបន់នេះ។ លោកយល់ថា សហរដ្ឋអាមេរិកចាំបាច់ត្រូវប្រមែប្រមូល និងពង្រឹងអ្នកប្រជាធិបតេយ្យក្នុងតំបន់នេះឡើងវិញ។ ចំពោះស្ថានការណ៍នយោបាយកម្ពុជា លោក បណ្ឌិត សេង សារី យល់ថា វត្តមានលោក សម រង្ស៊ី នៅលើទឹកដីអាមេរិកពេលនេះអាចក្រុមសមាជិកសភាសហរដ្ឋអាមេរិកត្រូវការលោក សម រង្ស៊ី ដើម្បីធ្វើជាសាក្សី បន្ថែម ក្នុងការជំរុញឲ្យការធ្វើដាក់ទណ្ឌកម្មរដ្ឋាភិបាល លោក ហ៊ុន សែន ឆាប់ចេញជារូបរាង៖ «ប្រហែលជាវត្តមានលោក សម រង្ស៊ី នៅក្នុងសហរដ្ឋអាមេរិកគឺជាផ្នែកមួយជាសាក្សីក្នុងការជំរុញការអនុម័តច្បាប់ប្រជាធិបតេយ្យ ឬច្បាប់ទណ្ឌកម្មថ្មីមកលើកម្ពុជាហើយប្រហែលការអញ្ជើញទៅរបស់លោក សម រង្ស៊ី ជាការអញ្ជើញរបស់សមាជិកសភាដែលជាអ្នកផ្ដួចផ្ដើមបង្កើតច្បាប់ប្រឆាំងរដ្ឋាភិបាលដែលដឹកនាំកម្ពុជាចេញពីគន្លងប្រជាធិបតេយ្យនោះឯង»។
លោក សម រង្ស៊ី គ្រោងនឹងប្រាប់ផ្ទាល់មាត់ទៅ សមាជិកសភា និងមន្ត្រីអាមេរិក អំពើអំពើរំលោភសិទ្ធិ និងការធ្វើទុក្ខបុកម្នេញលើសកម្មជននយោបាយ សិទ្ធិមនុស្ស បរិស្ថាន ដីធ្លី និង អ្នកធ្វើកិច្ចការព្រំដែនដែលរបបក្រុងភ្នំពេញបានធ្វើទុក្ខបុកម្នេញ និងចាប់ដាក់ពន្ធនាគារ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។