លោក សម រង្ស៊ី អំពាវនាវឱ្យអន្តរជាតិទាត់ចោលដីកាចាប់ខ្លួនថ្នាក់ដឹកនាំបក្សសង្គ្រោះជាតិ ៨រូប
2019.04.08
លោក សម រង្ស៊ី ប្រធានស្ដីទីគណបក្សសង្គ្រោះជាតិ។
រូបថត៖ ហ្វេសប៊ុក Sam Rainy
ប្រធានស្ដីទីគណបក្ស សង្គ្រោះជាតិ លោក សម រង្ស៊ី ស្នើសុំឱ្យអន្តរជាតិ កុំយកចិត្តទុកដាក់នឹងរឿងដីការបស់តុលាការរបបក្រុងភ្នំពេញ ដែលបញ្ជាឱ្យតាមចាប់ខ្លួនថ្នាក់ដឹកនាំជាន់ខ្ពស់គណបក្សប្រឆាំងចំនួន៨ រូប ទាក់ទងនឹងសំណុំរឿងក្បត់ជាតិ។ អ្នកវិភាគនយោបាយអះអាងថា ដីកានោះធ្វើឡើងក្រោមហេតុផលនយោបាយ ដោយមិនមានមូលដ្ឋានច្បាប់គ្រប់គ្រាន់នោះឡើយ។
លោក សម រង្ស៊ី ថ្លែងនៅក្នុងហ្វេសប៊ុករបស់លោកនៅពេលថ្មីៗ នេះថា ថ្នាក់ដឹកនាំគណបក្សសង្គ្រោះជាតិ ៨រូប ដែលរួមទាំងរូបលោកផង ត្រូវបានតុលាការរបបក្រុងភ្នំពេញចេញដីកាតាមចាប់ខ្លួន ក្រោមបទចោទដ៏គួរឱ្យអស់សំណើច។
ប្រធានស្ដីទីគណបក្ស សង្គ្រោះជាតិ រូបនេះ អះអាងទៀតថា អង្គការសហប្រជាជាតិ ព្រឹទ្ធសភាអាមេរិក សភាអឺរ៉ុប សមាជិកសភាអាស៊ានដើម្បីសិទ្ធិមនុស្ស និងអង្គការអន្តរជាតិទាំងឡាយ សុទ្ធតែអាចបញ្ជាក់បានថា ដីកាចាប់ខ្លួននេះធ្វើឡើងក្រោមហេតុផលនយោបាយសុទ្ធសាធ និងបង្ហាញពីការបង្ក្រាបកាន់តែអាក្រក់ឡើង ក្រោមការដឹកនាំបែបផ្ដាច់ការរបស់លោក ហ៊ុន សែន។
លោកអំពាវនាវដល់បណ្ដាប្រទេសជាមិត្តរបស់កម្ពុជា ជាពិសេសប្រទេសដែលគោរពគោលការណ៍ប្រជាធិបតេយ្យ និងសិទ្ធិមនុស្ស ឱ្យទាត់ចោលនូវដីកាចាប់ខ្លួននេះ។
កាលពីពេលថ្មីៗនេះ ចៅក្រមស៊ើបសួរតុលាការក្រុងភ្នំពេញ លោក កូយ សៅ បានបញ្ជាឱ្យចាប់ខ្លួនថ្នាក់ដឹកនាំគណបក្សសង្គ្រោះជាតិ ៨រូប រួមមាន លោក សម រង្ស៊ី លោក អេង ឆៃអ៊ាង អ្នកស្រី មួ សុខហួរ លោក អ៊ូ ច័ន្ទឫទ្ធិ លោក ហូរ វ៉ាន់ លោក ឡុង រី លោក ម៉ែន សុថាវរិន្ទ្រ និងលោក តុ វ៉ាន់ចាន់ ដោយចោទប្រកាន់ពីបទរួមគំនិតក្បត់ និងញុះញង់ឱ្យប្រព្រឹត្តិបទឧក្រិដ្ឋជាអាទិ ប្រព្រឹត្តនៅកម្ពុជា និងនៅទីកន្លែងផ្សេងទៀត ចាប់ពីថ្ងៃទី២០ ដល់ទី២៧ ខែមករា ឆ្នាំ២០១៩។
អាស៊ីសេរីមិនអាចទាក់ទងចៅក្រមស៊ើបសួរតុលាការក្រុងភ្នំពេញលោក កូយ សៅ ដើម្បីសុំការឆ្លើយតបជុំវិញរឿងនេះបានទេនៅថ្ងៃទី០៨ មេសា ចំណែកអ្នកនាំពាក្យអយ្យការអមតុលាការក្រុងភ្នំពេញលោក លី សុផាណា បដិសេធការធ្វើអត្ថាធិប្បាយដោយផ្ទាល់តាមទូរស័ព្ទ។
អ្នកវិភាគនយោបាយ លោក គឹម សុខ ថ្លែងថា នេះជាដីកាបែបនយោបាយ មិនមែនជារឿងផ្លូវច្បាប់អ្វីនោះទេ ហើយលោកជឿថា ដីកាប្រភេទនេះនឹងត្រូវទម្លាក់ចោលនៅពេលមានដំណោះស្រាយនយោបាយ។ លោកបន្តថា សកម្មភាពរបស់ថ្នាក់ដឹកនាំគណបក្ស សង្គ្រោះជាតិ នៅក្រៅប្រទេសនោះ មិនមែនជារឿងក្បត់ជាតិអ្វីនោះឡើយ ហើយចំណាត់ការទាំងឡាយរបស់តុលាការលើមន្ត្រីបក្សប្រឆាំង គឺធ្វើឡើងតាមការបង្គាប់បញ្ជារបស់មេដឹកនាំរបបក្រុងភ្នំពេញលោក ហ៊ុន សែន តែប៉ុណ្ណោះ៖ «ឥឡូវឧទាហរណ៍ការចាប់លោក កឹម សុខា ភ្ជាប់ជាមួយនឹងអាមេរិកាំង ភ្ជាប់ជាមួយនឹងហេតុផលផ្សេងៗថា ក្បត់ជាតិ ក៏ប៉ុន្តែមកដល់ពេលនេះសួរថា តើរបបក្រុងភ្នំពេញបានហៅរដ្ឋាភិបាល ឬតំណាងរដ្ឋាភិបាលអាមេរិកាំងទៅសួរទេ? ហ៊ានសួរទេ? អត់ហ៊ានទេ។ ដូច្នេះមានន័យច្បាស់ណាស់ថា ដីកាទាំងឡាយដែលគេធ្វើនៅក្នុងកាលៈទេសៈនយោបាយច្របូកច្របល់បែបហ្នឹង គឺជាយុទ្ធសាស្ត្រនយោបាយ ដើម្បីហែកគូប្រជែងតែប៉ុណ្ណឹង។ វាមិនមែនជាអំពើដែលបង្ហាញច្បាស់ថា អ្នកទាំងអស់នោះពិតជាបានក្បត់ជាតិមែនទេ មិនមែនទេ»។
ថ្នាក់ដឹកនាំគណបក្សសង្គ្រោះជាតិទាំង ៨រូប កំពុងរស់នៅនិរទេសខ្លួន និងធ្វើសកម្មភាពនយោបាយនៅក្រៅប្រទេស ដើម្បីគេចចេញពីការតាមធ្វើទុក្ខបុកម្នេញពីសំណាក់របបលោក ហ៊ុន សែន។
ពួកគេទាំង៨ រូប គឺជាអ្នកបានចូលរួមដោយផ្ទាល់ក្នុងកិច្ចប្រជុំគណៈកម្មាធិការអចិន្ត្រៃយ៍លើកទី១ របស់គណបក្សសង្គ្រោះជាតិ ដែលប្រព្រឹត្តទៅកាលពីថ្ងៃទី២០ មករាកន្លងទៅ នៅទីក្រុងឡូវែល (Lowell) នៃរដ្ឋម៉ាស្សាឈូសេត (Massachusetts)។ កិច្ចប្រជុំនៅពេលនោះ ផ្តោតលើចំណុច៣ សំខាន់ គឺការទទួលស្គាល់លោក សម រង្ស៊ី ជាប្រធានស្ដីទីគណបក្សសង្គ្រោះជាតិបណ្ដោះអាសន្ន ការបដិសេធរឿងលោក ហ៊ុន សែន យកគណបក្សសង្គ្រោះជាតិធ្វើជាចំណាប់ខ្មាំងនយោបាយទៅគំរាមសហភាពអឺរ៉ុប និងការរៀបចំផែនការសម្រាប់ដំណើរវិលត្រឡប់របស់លោក សម រង្ស៊ី ទៅកម្ពុជាវិញ។
មេដឹកនាំរបបក្រុងភ្នំពេញលោក ហ៊ុន សែន បានសម្ដែងការខឹងសម្បារយ៉ាងខ្លាំងចំពោះការរៀបចំផែនការទទួលលោក សម រង្ស៊ី នេះ ហើយលោកបានព្រមានប្រើហិង្សាលើសកម្មជនគណបក្សសង្គ្រោះជាតិ ប្រសិនបើពួកគេមិនបញ្ឈប់សកម្មភាពរៀបចំទទួលលោក សម រង្ស៊ី ទេនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន