លោក សម រង្ស៊ី ចាត់ទុកការចរចាជាមួយគណបក្សហ៊្វុនស៊ិនប៉ិចថាជារឿងឥតប្រយោជន៍
2015.10.14
ប្រធានគណបក្សសង្គ្រោះជាតិ លោក សម រង្ស៊ី (ឆ្វេង) និងប្រធានគណបក្សហ៊្វុនស៊ិនប៉ិច សម្ដេចក្រុមព្រះ នរោត្ដម រណឫទ្ធិ។
ប្រធានគណបក្សសង្គ្រោះជាតិ លោក សម រង្ស៊ី បានបដិសេធនូវការលើកឡើងថា លោកគ្រោងនឹងជួបចរចាជាមួយមេដឹកនាំគណបក្សហ៊្វុនស៊ិនប៉ិច នៅក្នុងដំណើរទស្សនកិច្ចរបស់លោកទៅប្រទេសបារាំង។ លោក សម រង្ស៊ី បានសរសេរនៅក្នុងគណនេយ្យហ្វេសប៊ុក (facebook) ផ្លូវការរបស់លោកនៅរសៀលថ្ងៃទី១៤ តុលា ថាគណបក្សសង្គ្រោះជាតិ មិនមានចេតនាណាមួយក្នុងការចរចាជាមួយគណបក្សហ៊្វុនស៊ិនប៉ិច នោះឡើយ។ លោក សម រង្ស៊ី ចាត់ទុកការចរចាជាមួយគណបក្សរាជានិយមមួយនេះ ថាជារឿងឥតប្រយោជន៍។
ការលើកឡើងរបស់ លោក សម រង្ស៊ី នៅពេលនេះ មានលក្ខណៈផ្ទុយទៅនឹងអ្វីដែលរូបលោក និងលោក កឹម សុខា ធ្លាប់បានអះអាងកាលពីថ្ងៃទី២ តុលា ដែលថា គណបក្សសង្គ្រោះជាតិ នឹងធ្វើជាគណបក្សស្នូលសម្រាប់ការបង្រួបបង្រួមជាមួយគណបក្សដទៃ ឬអ្នកប្រជាធិបតេយ្យនិយម ដើម្បីឲ្យមានការឯកភាពជាតិ។
ក្រៅពីនេះ វាក៏ខុសពីសម្ដីរបស់មន្ត្រីជាន់ខ្ពស់ និងជាអ្នកនាំពាក្យគណបក្សប្រឆាំង លោក យ៉ែម បុញ្ញឫទ្ធិ ដែរ។ លោក យ៉ែម បុញ្ញឫទ្ធិ បានមានប្រសាសន៍កាលពីថ្ងៃទី១១ តុលា ថា គណបក្សសង្គ្រោះជាតិ មានគោលការណ៍បង្រួបបង្រួមជាមួយគណបក្សអ្នកប្រជាធិបតេយ្យ និងអ្នករាជានិយម ដើម្បីឲ្យមានការឯកភាពជាតិ ស្របទៅតាមព្រះរាជតម្រិះរបស់អតីតព្រះមហាក្សត្រ សម្ដេចព្រះនរោត្តម សីហនុ ហើយថា គណបក្សហ៊្វុនស៊ិនប៉ិច គឺជាគណបក្សដែលគណបក្សសង្គ្រោះជាតិ អាចនឹងបង្រួបបង្រួមជាមួយ។
ជុំវិញការលើកឡើងនេះ អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឫទ្ធិ បានបកស្រាយថា ការថ្លែងរបស់ លោក សម រង្ស៊ី នៅពេលនេះ មិនមែនសំដៅដល់ការឈប់ចរចា ឬបង្រួបបង្រួមកម្លាំងគណបក្សនយោបាយទាំងពីរនោះទេ ប៉ុន្តែវាជាដំណើរទស្សនកិច្ចរបស់ប្រធានគណបក្សសង្គ្រោះជាតិ ទៅកាន់ប្រទេសបារាំង ដើម្បីជួបសកម្មជនរបស់បក្ស មិនមែនជាជំនួបរវាងមេបក្សទាំងពីរនោះទេ។ លោក យ៉ែម បុញ្ញឫទ្ធិ បញ្ជាក់បន្ថែមថា គណបក្សរបស់លោកនៅតែមានគោលបំណងបង្រួបបង្រួមកម្លាំងនយោបាយគ្រប់និន្នាការ៖ «យើងគិតថាជាគោលការណ៍ក្នុងការបង្រួបបង្រួម លុះត្រាតែយើងអនុវត្តជាគោលការណ៍កំណត់ជាគោលដៅមួយពិតប្រាកដ។ បន្ទាប់មកទៀត គឺយុទ្ធវិធី និងយុទ្ធសាស្ត្រនៅក្នុងការជជែកគ្នា។ សំខាន់បំផុត គឺគណបក្សសង្គ្រោះជាតិ មានគោលជំហរមួយហៅថា ជាគោលនយោបាយដើម្បីធ្វើកំណែទម្រង់ដឹកនាំប្រទេសរបៀបណា ហើយថាតើមានការឯកភាពគ្នាទៅលើគោលនយោបាយទាំងអស់នោះ»។
វិទ្យុអាស៊ីសេរី បានព្យាយាមសុំការឆ្លើយតបពីខាងគណបក្សហ៊្វុនស៊ិនប៉ិច ដែរ ប៉ុន្តែ លោក ទុំ សម្បុរ ដែលជាមន្ត្រីស្និទ្ធនឹងសម្ដេចក្រុមព្រះ នរោត្តម រណឫទ្ធិ នៅថ្ងៃទី១៤ តុលា មិនបានផ្តល់ចម្លើយណាមួយនោះទេ ដោយលោកបញ្ជាក់ថា នេះជាកិច្ចការរបស់ថ្នាក់ដឹកនាំបក្ស។
លោក អ៊ូ វីរៈ នាយកវេទិកាអនាគត យល់ឃើញថា គណបក្សទាំងពីរនឹងទទួលបានផលប្រយោជន៍ច្រើន បើសិនជាពួកគេជជែកគ្នាអំពីការបង្រួបបង្រួម ហើយបើសិនជាអាចចងសម្ព័ន្ធគ្នាបានគណបក្សរួមថ្មី នឹងអាចដាក់សម្ពាធទៅលើរដ្ឋាភិបាល ក្នុងការសម្រេចជោគវាសនារបស់ជាតិ។ យ៉ាងនេះក្តី លោក អ៊ូ វីរៈ ហាក់មិនមានជំនឿទៅលើមេបក្សទាំងពីរ ថាអាចនឹងចងសម្ព័ន្ធគ្នាបាននោះឡើយ ពីព្រោះពួកគេសុទ្ធតែជាមេដឹកនាំដែលមានចរិតអំនួត៖ «ខ្ញុំថាបើរួបរួមគ្នាក្នុងន័យដែលមានគោលនយោបាយច្បាស់លាស់ ទស្សនវិស័យដូចគ្នា ហើយនិងបទបញ្ជាផ្ទៃក្នុង និងរចនាសម្ព័ន្ធជារបៀបប្រជាធិបតេយ្យ ចងក្រងវិន័យផ្ទៃក្នុងបក្ស។ នេះមើលទៅគួរតែរួបរួមគ្នា ប៉ុន្តែបើរួបរួមដើម្បីចែកអំណាចគ្នា ចែកតំណែងគ្នាក្នុងបក្ស វាជារូបមន្តនៃការប្រេះស្រាំទៅវិញទេ»។
ចំណែក លោក អ៊ូ រិទ្ធី ស្ថាបនិកក្រុមយុវជនកាហ្វេនយោបាយវិញ យល់ឃើញថា គណបក្សទាំងពីរគួរតែជជែកគ្នាអំពីការបង្រួបបង្រួម ដើម្បីប្រកួតប្រជែងក្នុងការបោះឆ្នោត ប៉ុន្តែលោកបានសង្កត់ធ្ងន់ទៅលើសមាសភាពរបស់សម្ដេចក្រុមព្រះ នរោត្តម រណឫទ្ធិ ថាអាចនឹងធ្វើឲ្យសមាជិកមួយចំនួនរបស់គណបក្សសង្គ្រោះជាតិ មិនពេញចិត្ត៖ «នយោបាយឥឡូវវាចែកជាពីរហើយ គឺគណបក្សប្រជាជន និងគណបក្សសង្គ្រោះជាតិ។ វាចែកសឹងតែពាក់កណ្ដាលៗម្នាក់។ គណបក្សហ៊្វុនស៊ិនប៉ិច មួយដែលនៅមិនច្បាស់។ ការឈរជើងនេះ គឺមិនច្បាស់លាស់ ហើយប្រជាជនគាត់ដឹងថា តើប្រឆាំង ឬក៏ស្រប។ អ៊ីចឹងជំហរបែបហ្នឹង ពិបាកចូលគ្នាជាមួយគណបក្សសង្គ្រោះជាតិ ហើយកាលណាចូលគ្នាទៅធ្វើឲ្យអ្នកគាំទ្រគណបក្សសង្គ្រោះជាតិ មានការអាក់អន់ចិត្ត ជាជាងការចំណេញ»។
កាលពីឆ្នាំ២០០៣ លោក សម រង្ស៊ី ដែលកាលណោះជាប្រធានគណបក្ស សម រង្ស៊ី បានរួបរួមគ្នាជាមួយគណបក្សហ៊្វុនស៊ិនប៉ិច របស់សម្ដេចក្រុមព្រះ នរោត្តម រណឫទ្ធិ បង្កើតជាសម្ព័ន្ធភាពអ្នកប្រជាធិបតេយ្យ តែនៅទីបំផុត សម្ដេចក្រុមព្រះ នរោត្តម រណឫទ្ធិ បានបោះបង់ លោក សម រង្ស៊ី ហើយទៅចាប់ដៃជាមួយ លោក ហ៊ុន សែន បង្កើតរដ្ឋាភិបាលចម្រុះជាមួយគណបក្សប្រជាជនកម្ពុជា វិញ។ បរិបទនយោបាយនៅពេលនេះ គេនៅរង់ចាំមើលទៀតថា តើគណបក្សសង្គ្រោះជាតិ និងគណបក្សហ៊្វុនស៊ិនប៉ិច អាចបង្រួមបង្រួមគ្នាដើម្បីប្រកួតប្រជែងក្នុងការបោះឆ្នោតនៅឆ្នាំ២០១៨ ខាងមុខឬយ៉ាងណា?
សូមស្ដាប់បទសម្ភាសន៍បន្ថែមរវាង លោក ជុន ច័ន្ទបុត្រ ជាមួយនឹង លោក សម រង្ស៊ី ដែលបដិសេធអំពីគម្រោងជួបជាមួយសម្ដេចក្រុមព្រះ នរោត្តម រណឫទ្ធិ ដូចតទៅ៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ប៉ូលិសថៃស៊ើបអង្កេតឃើញថា ករណីធ្វើឃាតលើលោក លិម គិមយ៉ា មានការរៀបចំជាប្រព័ន្ធ ដោយមានមេខ្លោងនៅកម្ពុជា
- ខ្មាន់កាំភ្លើងមិនទាន់ហ៊ានលាតត្រដាងមេខ្លោងនៅពីក្រោយ ព្រោះបារម្ភពីសុវត្ថិភាពគ្រួសារ
- អតីតតំណាងរាស្ត្រគណបក្សសង្គ្រោះជាតិ លោក លិម គិមយ៉ា ដែលរិះគន់រដ្ឋាភិបាលត្រកូល ហ៊ុន ត្រូវឃាតកបាញ់សម្លាប់នៅប្រទេសថៃ
- ជនសង្ស័យ ដែលបាញ់សម្លាប់លោក លិម គិមយ៉ា នៅបាងកក អាជ្ញាធរចាប់បាននៅក្នុងទឹកដីខ្មែរ
- កម្ពុជាបានប្រគល់ខ្លួនខ្មាន់កាំភ្លើងបាញ់សម្លាប់លោក លិម គិមយ៉ា ឱ្យភាគីថៃហើយ និងប្រកាសបទចោទភ្លាមៗ
អត្ថបទពេញនិយម
នយោបាយ
- អតីតតំណាងរាស្ត្រគណបក្សសង្គ្រោះជាតិលោក លិម គិមយ៉ា ត្រូវឃាតកបាញ់សម្លាប់នៅប្រទេសថៃ
- ភាពស្ងប់ស្ងាត់លើករណីឃាតកម្មលោក លិម គិមយ៉ា «បង្ហាញពីភាពគ្មានទំនួលខុសត្រូវរបស់រដ្ឋាភិបាល»
- អាជ្ញាធរកម្ពុជានឹងបញ្ជូនខ្មាន់កាំភ្លើងប្រគល់ឱ្យសមត្ថកិច្ចថៃ នៅថ្ងៃទី១១ មករា
- អ្នកជំនាញច្បាប់ និងអ្នកតាមដាននយោបាយថា ឃាតកម្មលោក លិម គិមយ៉ា ជាប់ពាក់ព័ន្ធរដ្ឋាភិបាល ដែលរៀបចំជាប្រព័ន្ធ
- តំណាងជនភៀសខ្លួននៅថៃចោទលោក ហ៊ុន សែន ថា ជាអ្នកបញ្ជាឱ្យសម្លាប់លោក លិម គិមយ៉ា