បក្ស​ប្រជាជន​មិន​បារម្ភ​ពី​វត្តមាន​លោក សម រង្ស៊ី នៅ​កម្ពុជា

មន្ត្រី​ជាន់ខ្ពស់​គណបក្ស​ប្រជាជន​កម្ពុជា បាន​ប្រាប់​បណ្ដាញ​សារព័ត៌មាន​បរទេស​ថា ការ​វិល​ត្រឡប់​ចូល​កម្ពុជា​វិញ​របស់​លោក សម រង្ស៉ី ប្រធាន​គណបក្ស​សង្គ្រោះ​ជាតិ មិន​មែន​ជា​ការ​គំរាម​កំហែង ឬ​ធ្វើ​ឲ្យ​គណបក្ស​ប្រជាជន​កម្ពុជា មាន​ការ​ព្រួយ​បារម្ភ​ចំពោះ​ការ​បោះ​ឆ្នោត​នៅ​ពេល​ខាង​មុខ​នេះ​ឡើយ។
ដោយ យាង សុជាមេត្តា និង សូត សុខប្រាថ្នា
2013-07-20
អ៊ីម៉ែល
មតិ
Share
បោះពុម្ព
ប្រធាន​គណបក្ស​សង្គ្រោះ​ជាតិ លោក សម រង្ស៊ី និង​អនុ​ប្រធាន​បក្ស លោក កឹម សុខា លើក​ដៃ លើក​ដៃ​ស្វាគមន៍​អ្នក​គាំទ្រ​នៅ​ក្បែរ​អាកាសយានដ្ឋាន​អន្តរជាតិ​ភ្នំពេញ នៅ​ថ្ងៃ​ទី​១៩ កក្កដា ឆ្នាំ​២០១៣។
ប្រធាន​គណបក្ស​សង្គ្រោះ​ជាតិ លោក សម រង្ស៊ី និង​អនុ​ប្រធាន​បក្ស លោក កឹម សុខា លើក​ដៃ លើក​ដៃ​ស្វាគមន៍​អ្នក​គាំទ្រ​នៅ​ក្បែរ​អាកាសយានដ្ឋាន​អន្តរជាតិ​ភ្នំពេញ នៅ​ថ្ងៃ​ទី​១៩ កក្កដា ឆ្នាំ​២០១៣។
RFA/Uon Chhin

មន្ត្រី​គណបក្ស​ប្រជាជន​កម្ពុជា បាន​និយាយ​ទៀត​ថា លោក សម រង្ស៉ី អាច​ចូល​ស្រុក​បាន ក៏​ដោយសារតែ​មាន​ការ​ប្រោសប្រណី​របស់​លោក​នាយក​រដ្ឋមន្ត្រី ហ៊ុន សែន ដែរ។

ប្រជាពលរដ្ឋ​កម្ពុជា បញ្ចេញ​ទស្សនៈ​ផ្សេងៗ​គ្នា​ចំពោះ​ការ​ធ្វើ​មាតុភូមិ​និវត្តន៍​របស់​លោក សម រង្ស៉ី កាល​ពី​ថ្ងៃ​ទី​១៩ កក្កដា ២០១៣។ ពលរដ្ឋ​ដែល​គោរព​ស្រឡាញ់​លោក សម រង្ស៉ី និង​អ្នក​គាំទ្រ​គណបក្ស​សង្គ្រោះ​ជាតិ​របស់​លោក​ចាត់​ទុក​ថា ការ​វិល​ត្រឡប់​របស់​លោក សម រង្ស៉ី នៅ​មុន​ថ្ងៃ​បោះ​ឆ្នោត​នេះ គឺ​ជា​កម្លាំង​ចលករ​ដែល​នឹង​ជួយ​រុញ​ច្រាន​នាវា​គណបក្ស​សង្គ្រោះ​ជាតិ ដែល​កំពុង​មាន​ប្រជាប្រិយភាព​លឿន​រហ័ស​នោះ ឲ្យ​រឹតតែ​បង្កើន​ល្បឿន​លឿន​លយ​ទៅ​មុខ​បន្ថែម​ទៀត​ដើម្បី​ប្រកួត​យក​ឈ្នះ​គណបក្ស​ប្រជាជន​កម្ពុជា នៅ​ថ្ងៃ​ទី​២៨ កក្កដា ២០១៣។ សម្រាប់​ពួក​អ្នក​ប្រឆាំង វត្ត​មាន​របស់​លោក សម រង្ស៉ី គឺ​ជា​ការ​ផ្ដល់​នូវ​សន្ទុះ​ទឹក​ចិត្ត​សម្រាប់​ពួកគេ​ឲ្យ​ចូល​រួម​កាន់​តែ​សកម្ម​ជាមួយ​នាវា​សង្គ្រោះ​ជាតិ។

ផ្ទុយ​ពី​ការ​យល់​ឃើញ​របស់​មន្ត្រី និង​អ្នក​គាំទ្រ​គណបក្ស​ប្រឆាំង មន្ត្រី​ជាន់​ខ្ពស់​គណបក្ស​ប្រជាជន​កម្ពុជា ដែល​កំពុង​កាន់​អំណាច​យល់​ឃើញ​ថា ការ​វិល​ត្រឡប់​ចូល​ប្រទេស​កម្ពុជា​វិញ ​របស់​លោក សម រង្ស៉ី មិន​បាន​ធ្វើ​ឲ្យ​គណបក្ស​ប្រជាជន​កម្ពុជា ព្រួយ​បារម្ភ​នោះ​ទេ។

លោក ជាម យៀប សមាជិក​គណៈកម្មាធិការ​អចិន្ត្រៃយ៍​របស់​គណបក្ស​ប្រជាជន​កម្ពុជា បាន​និយាយ​ប្រាប់​បណ្ដាញ​សារព័ត៌មាន​ស៊ិនហួ (Xinhua) របស់​ចិន ថា គណបក្ស​ប្រជាជន​កម្ពុជា របស់​លោក​គ្មាន​ការ​ភ្ញាក់​ផ្អើល ​ព្រួយបារម្ភ ​ឬ​ភ័យ​ខ្លាច​ចំពោះ​ការ​វិល​ត្រឡប់​របស់​លោក សម រង្ស៉ី ឡើយ។

លោក​បន្ត​ថា គណបក្ស​ប្រជាជន​កម្ពុជា បាន​ចាប់​ផ្ដើម​កសាង​ប្រទេស​កម្ពុជា ដោយ​បាតដៃ​ទទេ​អស់​រយៈពេល ៣៤​ឆ្នាំ​មក​ហើយ ហើយ​គណបក្ស​របស់​លោក​បាន​ទទួល​ការ​គាំទ្រ​ពី​ប្រជាពលរដ្ឋ​កម្ពុជា យ៉ាង​ច្រើន​ក្នុង​ការ​បោះឆ្នោត​ជ្រើសរើស​តំណាង​រាស្ត្រ​កាល​ពី​អាណត្តិ​មុន ​គឺ​ទទួល​បាន​ដល់ ៩០​អាសនៈ ក្នុង​ចំណោម​អាសនៈ​សរុប ១២៣។

លោក​បន្ថែម​ថា ​សព្វថ្ងៃ​គណបក្ស​ប្រជាជន​កម្ពុជា​ មាន​សមាជិក​សរុប​នៅ​ទូទាំង​ប្រទេស​ប្រមាណ​ជា ៥,៧​លាន​នាក់ ហើយ​តាម​រយៈ​នេះ លោក​សង្ឃឹម​ថា គណបក្ស​របស់​លោក​នឹង​ឈ្នះ​យ៉ាង​តិច​បំផុត ២ ភាគ ៣​ នៃ​អាសនៈ​សរុប​ក្នុង​រដ្ឋ​សភា​សម្រាប់​ការ​បោះឆ្នោត​ក្នុង​នីតិកាល​ទី​៥​នេះ។

លោក ឈាង វុន សមាជិក​សភា​គណបក្ស​ប្រជាជន​កម្ពុជា ​បាន​និយាយ​ប្រាប់​បណ្ដាញ​សារព័ត៌មាន ស៊ិនហួ ដដែល​ថា វត្តមាន​របស់​លោក សម រង្ស៉ី ​នៅ​កម្ពុជា មិន​បាន​គំរាម​កំហែង ឬ​ធ្វើ​ឲ្យ​ប៉ះពាល់​ប្រជាប្រិយភាព​របស់​គណបក្ស​ប្រជាជន​កម្ពុជា​ឡើយ។ លោក​បន្ត​ថា ការ​វិល​ត្រឡប់​របស់​លោក សម រង្ស៉ី មិន​បាន​ធ្វើ​ឲ្យ​គណបក្ស​ប្រជាជន​កម្ពុជា ព្រួយ​បារម្ភ ​នោះ​ទេ លោក​ថា ប្រសិន​បើ​គណបក្ស​ប្រជាជន​កម្ពុជា ព្រួយ​បារម្ភ​ពី​វត្តមាន​របស់​លោក សម រង្ស៉ី មែន ម្ល៉េះ​លោក​នាយក​រដ្ឋមន្ត្រី ហ៊ុន សែន មិន​បាន​ស្នើ​សុំ​ព្រះមហាក្សត្រ ឲ្យ​លើក​លែង​ទោស​ឲ្យ​លោក សម រង្ស៉ី​ នោះ​ទេ។

ចំណែក​លោក ផៃ ស៊ីផាន អ្នក​នាំ​ពាក្យ​ទីស្ដីការ​គណៈរដ្ឋមន្ត្រី​វិញ បាន​និយាយ​ប្រាប់ ស៊ិនហួ ​ថា គណបក្ស​ប្រជាជន​កម្ពុជា បាន​ដឹកនាំ​ប្រទេស​សម្រេច​បាន​នូវ​សមិទ្ធផល​ធំៗ​ជា​ច្រើន ហើយ​តាម​រយៈ​សមិទ្ធផល​ទាំង​អស់​នេះ​ហើយ ដែល​គណបក្ស​ប្រជាជន​កម្ពុជា បាន​ទទួល​ការ​គាំទ្រ​ពី​ប្រជាពលរដ្ឋ​ជា​ច្រើន។

ដូច​ទៅ​នឹង​លោក ឈាង វុន លោក ផៃ ស៊ីផាន និយាយ​ថា លោក​មិន​មាន​ការ​ព្រួយ​បារម្ភ​អ្វី​ទេ ហើយ​ថា​លោក សម រង្ស៉ី អាច​ចូល​ស្រុក​បាន​ក៏​ដោយសារ​តែ​គោល​នយោបាយ​បង្រួប​បង្រួម និង​ផ្សះផ្សា​ជាតិ​របស់​លោក​នាយករដ្ឋមន្ត្រី ហ៊ុន សែន។

ថ្លែង​ប្រាប់​អ្នក​យក​ព័ត៌មាន​បន្ទាប់​ពី​ជំនួប​ជាមួយ​ភារធារី​ស្ថានទូត​សហរដ្ឋ​អាមេរិក កាល​ពី​ថ្ងៃ​ទី​១៥ កក្កដា ២០១៣ លោក ហោ ណាំហុង រដ្ឋមន្ត្រី​ក្រសួង​ការបរទេស​កម្ពុជា បាន​មាន​ប្រសាសន៍​ថា ការ​ដែល​លោក​នាយករដ្ឋមន្ត្រី ហ៊ុន សែន ស្នើ​សុំ​ព្រះ​មហាក្សត្រ​ឲ្យ​លើក​លែង​ទោស​ឲ្យ​លោក សម រង្ស៉ី ក៏​ដោយសារ​តែ​លោក ហ៊ុន សែន ចង់​ឲ្យ​មាន​ការ​បង្រួបបង្រួម ​និង​ឯកភាព​ជាតិ ហើយ​លោក​ថា គណបក្ស​ប្រជាជន​កម្ពុជា មិន​បាន​ទទួល​ការ​ចង្អុល​បង្ហាញ​របស់​បរទេស​ឲ្យ​កម្ពុជា បង្រួបបង្រួម​គ្នា​នោះ​ទេ តែ​កម្ពុជា​ខ្លួន​ឯង​បាន​អនុវត្ត​ជា​ច្រើន​លើក​ច្រើន​សា​មក​ហើយ​កាល​ពី​ពេល​កន្លង​មក។

តែ​ទោះ​បី​យ៉ាង​ក្ដី មាន​មតិ​ខ្លះ​យល់​ថា លោក សម រង្ស៉ី អាច​វិល​ត្រឡប់​ចូល​កម្ពុជា វិញ​បាន នៅ​ពេល​នេះ ​ក៏​ដោយសារ​តែ​រដ្ឋាភិបាល​កម្ពុជា បាន​ទទួល​រង​នូវ​សម្ពាធ​ពី​សហគមន៍​អន្តរជាតិ ជា​ពិសេស​ពី​សហរដ្ឋ​អាមេរិក។

មុន​ការ​មក​ដល់​កម្ពុជា របស់​លោក សម រង្ស៉ី អ្នក​នាំ​ពាក្យ​ក្រសួង​ការបរទេស​សហរដ្ឋ​អាមេរិក បាន​អំពាវនាវ​ឲ្យ​អាជ្ញាធរ​កម្ពុជា អនុញ្ញាត​ឲ្យ​លោក សម រង្ស៉ី បាន​វិល​ត្រឡប់​ចូល​កម្ពុជា​វិញ​ដោយ​គ្មាន​ការ​ភ័យ​ខ្លាច​ចំពោះ​សុវត្ថិភាព​ផ្ទាល់​ខ្លួន ឬ​ដោយ​គ្មាន​ការ​ចាប់​ដាក់​គុក​ជាដើម។ ហើយ​កាល​ពី​ពេល​ថ្មីៗ​នេះ​ទៀតសោត សមាជិក​សភា​សហរដ្ឋអាមេរិក ក៏​បាន​ស្នើ​ឲ្យ​រដ្ឋាភិបាល​អាមេរិកាំង​កាត់​ជំនួយ​មក​កម្ពុជា ប្រសិន​បើ​ការ​បោះ​ឆ្នោត​នៅ​ពេល​ខាង​មុខ​មិន​ប្រកប​ដោយ​ភាព​ត្រឹមត្រូវ​និង​យុត្តិធម៌។

បណ្ដាញ​ព័ត៌មាន​ក្នុង​ស្រុក​មិន​ចាប់​អារម្មណ៍​ផ្សាយ​រឿង​លោក សម រង្ស៊ី ចូល​ស្រុក

ថ្វី​ត្បិតតែ​ការ​វិល​ត្រឡប់​របស់​លោក សម រង្ស៊ី បាន​អង្រួន​ទឹក​ចិត្ត​ប្រជាពលរដ្ឋ​ខ្មែរ​ស្ទើ​តែ​ទូទាំង​ប្រទេស​កម្ពុជា យ៉ាង​ណា​ក៏ដោយ ក៏​បណ្តាញ​ផ្សព្វផ្សាយ​ព័ត៌មាន​មួយ​ចំនួន​ក្នុង​ស្រុក ហាក់​មិន​បាន​ចាប់​អារម្មណ៍​ចំពោះ​ការ​ធ្វើ​មាតុភូមិនិវត្តន៍​របស់​មេ​បក្ស​ប្រឆាំង​រូប​នេះ​ឡើយ។

ការ​មិន​ចាប់​អារម្មណ៍​នេះ ធ្វើ​ឱ្យ​​មាន​ការ​ងឿង​ឆ្ងល់​ពី​សំណាក់​អ្នក​តាម​ដាន​ព្រឹត្តិការណ៍​សង្គម​ដែល​នាំ​ឱ្យ​គេ​គិត​ថា ដូច​ជា​មាន​ភាព​អាថ៌កំបាំង​អ្វី​ម្យ៉ាង។

សូម​ស្ដាប់​សេចក្ដី​រាយការណ៍​របស់​លោក សូត សុខប្រាថ្នា អំពី​បញ្ហា​នេះ៖

 

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (12)
Share

Ben

ពី Quebec

I think what chhieng vun said is not true. He is not honest and good. Because he is a member of the Cambodian parliament from cpp, after the first national election prepared by the UNTAC in 1993. chhieng vun, he had stolen two vehicles from the UNTAC, one is white land cruiser. He locked his villa gate when the UNTAC police forces get into his villa in order to bring the cars back.

Jul 22, 2013 05:48 AM

អ្នក​អាន​អនាមិក

ពី SIEM REAP TOWN

We, Cambodian citizens, welcome to all real democratic people. Thanks with high appreciation !!!!

Jul 22, 2013 04:22 AM

long

ពី long beach

ខ្ញុំសុំអោយប្រជាពលរដ្ឌទាំងអស់រស់នៅសហរដ្ធក៏ដូចប្រទេសនានាទូទាំងពិភពលោកឈប់ជួល CTN បន្តទៀតដោយសារប៉ុសនេះលំអៀងមិនអព្យាក្រិតតាមអាជីពអ្នកពត៍មាន ( ខ្មែរជួយខ្មែរ ) ។

Jul 21, 2013 08:16 PM

អ្នក​អាន​អនាមិក

Because CPP can maneuver NEC already!

Jul 21, 2013 11:45 AM

អ្នក​អាន​អនាមិក

ការមិនចាក់ផ្សាយព្រឹត្តការណ៍ដ៍កក្រើកទីក្រុងភ្នំពេញអំពីការវិលត្រឡប់របស់លោក សម រង្សុី បញ្ជាក់អោយញថា ប្រព័ន្ធផ្សព្វផ្សាយនៅស្រុកខ្មែរមានលក្ខណៈកុម្មុយនីស្តសុទ្ធសាទ ! ពួកកុម្មុយនីស្តមិនចង់អោយប្រជាជន យល់ដឹងអំពីពត៌មានពិតទេ គឺពួកគេអោយប្រជារាស្ត្រទទួលតែពត៌មានបោកប្រាស់ !

Jul 21, 2013 09:00 AM

មើល​មតិ​ទាំង​អស់.

គេហទំព័រ​ទាំងមូល