សកម្មជន​បក្ស​ប្រឆាំង​នៅ​តំបន់​ខ្មែរ​ក្រហម​ផ្ដាច់​ខ្លួន​ខេត្ត​ប៉ៃលិន​ត្រៀម​ទៅ​ទទួល​លោក​លោក​ សម រង្ស៊ី វិល​ចូល​ស្រុក​ដោយ​មិន​ខ្លាច​អាជ្ញាធរ​គំរាម​ចាប់​ខ្លួន

ដោយ សេក បណ្ឌិត
2019-01-29
អ៊ីម៉ែល
មតិ
Share
បោះពុម្ព
អ្នក​គាំទ្រ​គណបក្ស​សង្គ្រោះ​ជាតិ ប្រមូល​ផ្ដុំ​គ្នា​នៅ​វត្ត​ចាស់ ក្នុង​សង្កាត់​ជ្រោយចង្វារ។
អ្នក​គាំទ្រ​គណបក្ស​សង្គ្រោះ​ជាតិ ប្រមូល​ផ្ដុំ​គ្នា​នៅ​វត្ត​ចាស់ ក្នុង​សង្កាត់​ជ្រោយចង្វារ។
Photo: RFA

សកម្មជន​គណបក្ស​ប្រឆាំង​នៅ​តំបន់​អតីត​ខ្មែរ​ក្រហម​ផ្ដាច់​ខ្លួន​ ក្នុង​ខេត្ត​ប៉ៃលិន​​ បាន​ត្រៀម​ខ្លួន​រួច​ជា​ស្រេច​ ដើម្បី​ទៅ​អម​ដំណើរ​​ប្រធាន​ស្ដី​ទី​គណបក្ស​សង្គ្រោះ​ជាតិ​លោក​ សម រង្ស៊ី វិល​ចូល​ស្រុក​វិញ​ក្នុង​ពេល​ឆាប់ៗ​ នេះ។ សកម្មជន​អះអាង​ថា​ បើ​ទោះ​បី​ជា​ថ្មី​ៗ​ក្រសួង​ការពារ​ជាតិ​របប​លោក​ ហ៊ុន សែន​បាន​ចេញ​សេចក្ដី​ប្រកាស​គំរាម​បង្ក្រាប​ពលរដ្ឋ​ដែល​គាំ​មេ​បក្ស​ប្រឆាំង​វិល​ចូល​ស្រុក​វិញ​ក៏​ដោយ​​​ ក៏​ពួកគាត់​មិន​ខ្លាច​ដែរ។

ប្រធាន​គណបក្ស​សង្គ្រោះ​ជាតិ​ តំបន់​ខ្មែរ​ក្រហម​ផ្ដាច់​ខ្លួន​​នៅ​ខេត្ត​ប៉ៃលិន​ អ្នក​ស្រី វ៉ែន តារា ថ្លែង​ប្រាប់​អាស៊ី​សេរី​នៅ​ព្រឹក​ថ្ងៃ​ទី​២៨​ មករា​ថា​ អ្នក​ស្រី​និង​សកម្មជន​គណបក្ស​ជា​ច្រើន​នាក់​ផ្សេង​ទៀត​ បាន​​​ត្រៀម​បង្វេច​ខោអាវ​រួច​ជា​ស្រេច​ហើយ​ ដើម្បី​ទៅ​ទទួល​លោក​ សម រង្ស៊ី វិល​ចូល​ស្រុក​វិញ។ អ្នក​ស្រី​អះអាង​ទៀត​ថា ពួកគាត់​រង់ចាំ​​តែ​សញ្ញា​ពី​ខាង​ក្រៅ​ប្រទេស​ប្រាប់​ទីតាំង​ច្បាស់​លាស់ ដែល​ប្រធាន​ស្ដី​ទី​គណបក្ស​ចូល​មក​កម្ពុជា ទោះ​បី​ចូល​តាម​ច្រក​ណា​ក៏​ពួកគាត់​ទៅ​ទទួល​ឲ្យ​ដល់​គោល​ដៅ​ដែរ ហើយ​មិន​ខ្លាច​ការ​គំរាមកំហែង​របស់​អាជ្ញាធរ​របប​ក្រុង​ភ្នំពេញ​នោះ​ទេ ព្រោះ​ពួកគាត់​យល់​ថា មាន​តែ​លោក សម រង្ស៊ី ទេ ដែល​អាច​ស្ដារ​ប្រជាធិបតេយ្យ​នៅ​កម្ពុជា​ឲ្យ​រស់​ឡើង​វិញ​បាន៖ «ខ្ញុំ​កាត់​ចិត្ត​ថា ជីវិត​មួយ​ដូច​តែ​គ្នា​មិន​ដែល​ពី​ណា​អាយុ ៨០​ពីរ​ដង​ទេ កាល​មុន​តស៊ូ​គេ​ឲ្យ​ទៅ​វ៉ៃ​គ្នា​ផង ហើយ​នាំ​គ្នា​ទៅ​អត់​មាន​ប្រាក់​ខែ​ផង​សម័យ​ខ្មែរ​ក្រហម​ នៅ​តែ​ទៅ។ មក​ដល់​សម័យ​នេះ​យើង​តស៊ូ​ពាក្យ​សំដី ដើម្បី​ទាមទារ យើង​មិន​បាន​ទៅ​បាញ់​គ្នា​ឯណា ហើយ​ប្រទេស​ជិត​ខាង​គេ​នៅ​ទទួល​ស្គាល់​យើង ពេល​យើង​នៅ​មាន​ដី​បន្តិច​បន្តួច​ទេ តែ​ដី​យើង​គេ​យក​អស់​ហើយ គឺ​គេ​ធ្វើ​បាប​យើង​ហើយ។ ដូច្នេះ​សុំ​ឲ្យ​ជន​រួម​ជាតិ​យើង​ទាំង​អស់​ក្រោក​សង្គ្រោះ​ជាតិ​ឲ្យ​ទាន់​ពេល»

ចំណែក​អនុប្រធាន​គណបក្ស សង្គ្រោះ​ជាតិ ខេត្ត​ប៉ៃលិន លោក ឃឹម ប៉ុន អះអាង​ថា លោក​ក៏​ត្រៀម​ទៅ​ទទួល​ប្រធាន​ស្ដីទី​គណបក្ស សង្គ្រោះ​ជាតិ ដែរ ព្រោះ​ចង់​ចូល​រួម​ស្ដារ​កេរ្តិ៍ឈ្មោះ​កម្ពុជា​នៅ​លើ​ឆាក​អន្តរជាតិ​ឲ្យ​បាន​ប្រសើរ​ឡើង​វិញ៖ «ខ្ញុំ​មិន​ខ្លាច​ទេ​ខ្ញុំ​គិត​ថា ប្រជាធិបតេយ្យ​នៅ​កម្ពុជា គឺ​ស្មើ​នឹង​ជីវិត​របស់​ពលរដ្ឋ​ខ្មែរ ហើយ​ស្មើនឹង​អនាគត​​របស់​កម្ពុជា​ដែរ។ បើ​សិន​ជា​ប្រទេស​មិន​មាន​ប្រជាធិបតេយ្យ​ ខ្ញុំ​គិត​ថា​ ប្រទេស​ខ្មែរ​វា​អាច​ប្រឈម​នឹង​រលាយ​បាត់​ទឹក​ដី។ ដូច្នេះ​ហើយ​បាន​ចាំ​បាច់​ត្រូវ​រួបរួម​ជា​មួយ​អ្នក​ប្រជាធិបតេយ្យ​ដោយ​អហិង្សា»

កាល​ថ្ងៃ​ទី​២៦ មករា ក្រសួងការពារជាតិ​បាន​ចេញ​សេចក្ដីប្រកាស​ព័ត៌មាន​ប្រឆាំង​ការ​អំពាវនាវ​របស់ លោក សម រង្ស៊ី និង​ព្រមាន​បង្ក្រាប​ពលរដ្ឋ​ណា ដែល​គាំទ្រ​ការ​អំពាវនាវ​របស់ លោក សម រង្ស៊ី ដោយ​យក​លេស​ថា ដើម្បី​ថែរក្សា​សន្តិសុខ សណ្ដាប់ធ្នាប់​សង្គម និង​សន្តិភាព​ជូន​កម្ពុជា។ រីឯ​មេ​ដឹក​នាំ​របប​ឯក​បក្ស​ក្រុង​ភ្នំពេញ លោក ហ៊ុន សែន កាលពី​ថ្ងៃ​ទី​២៤ មករា ក៏​បាន​ប្រកាស​ថា រដ្ឋមន្ត្រី​ក្រសួង​មហាផ្ទៃ លោក ស ខេង បាន​ទទួល​ដីកា​ពី​តុលាការ​កំពូល​ឱ្យ​ចាប់ខ្លួន​ប្រធាន​ស្ដីទី​បក្ស​ប្រឆាំង​រួច​ហើយ និង​ដាក់​បញ្ជា​បន្ថែម​ឲ្យ​កងទ័ព​វាយ​កម្ទេច​ជន​ក្បត់​ជាតិ ប៉ុនប៉ង​បង្កើត​បដិវត្តន៍​ពណ៌ ដែល​មេ​ដឹក​នាំ​របប​ឯក​បក្ស​រូប​នេះ សំដៅ​ដល់​លោក សម រង្ស៊ី។

ប្រធាន​ស្ដី​ទី​គណបក្ស​សង្គ្រោះ​ជាតិ​លោក សម រង្ស៊ី បាន​ប្រកាស​​ជា​ថ្មី ក្នុង​ហ្វេសប៊ុក​របស់​លោក កាល​ពី​យប់​ថ្ងៃ​ទី​២៧​ មករា​ថា​ លោក​នឹង​វិល​ទៅ​ស្ដារ​ប្រជាធិបតេយ្យ​នៅ​កម្ពុជា​ឲ្យ​ទាល់​តែ​បាន​នៅ​ក្នុង​ឆ្នាំ​២០១៩​ នេះ ព្រោះ​​នេះ​ជា​ឱកាស​ចុង​ក្រោយ​របស់​លោក។ ដូច្នេះ លោក​មិន​បណ្ដោយ​ឲ្យ​ឱកាស​ដ៏​ល្អ​នេះ​កន្លង​ផុត​ដោយ​គ្មាន​ប្រយោជន៍​នោះ​ទេ៖ «មិន​មែន​ពាក់កណ្ដាល​នគរ​ទេ​បងប្អូន​ គឺ​ជាង​ពាក់​កណ្ដាល​នគរ​ឆ្ងាយ​ណាស់​រង​ចាំ​យ៉ាង​អន្ទះសា​ឲ្យ​មាន​ការ​ផ្លាស់​ប្ដូរ​ជា​វិជ្ជមាន​ ដោយសន្តិវិធី​តាម​បែប​បទ​ប្រជាធិបតេយ្យ​នៅ​កម្ពុជា ហើយ​ការ​ផ្លាស់​ប្ដូរ​នឹង​មក​ដល់​ក្នុង​ឆ្នាំ​២០១៩​នេះ​។ខ្ញុំ​មាន​ការ​ប្ដេជ្ញា​ចិត្ត​គឺ​ខ្ញុំ​នឹង​ធ្វើ​ឲ្យ​មាន​ការ​ផ្លាស់​ប្ដូរ​ឲ្យ​ទាល់​តែ​បាន​ក្នុង​ឆ្នាំ​នេះ»

ប៉ុន្តែ​រដ្ឋមន្ត្រី​ក្រសួង​មហាផ្ទៃ​របប​ក្រុង​ភ្នំពេញ​ លោក ស ខេង នៅ​តែ​យល់​ថា ការ​ប្រកាស​នេះ ជា​ល្បិចកល​នយោបាយ​របស់​លោក សម រង្ស៊ី ដែល​ធ្លាប់​ធ្វើ​កាល​ពី​ពេល​កន្លងទៅ ដើម្បី​កុំ​ឲ្យ​អ្នក​គាំទ្រ​អស់​សង្ឃឹម។

ចំណែក​អ្នក​វិភាគ​បញ្ហា​សង្គម និង​នយោបាយ លោក គឹម សុខ យល់​ថា ទោះ​បី​ជា​លោក សម រង្ស៊ី ប្រកាស​ហើយ បែរ​ជា​មិន​វិល​ចូល​កម្ពុជា​វិញ​ក្ដី ក៏​នយោបាយ​របស់​លោក សម រង្ស៊ី មិន​អស់​ផ្លូវ​ដើរ ដូច​ការ​លើកឡើង​របស់​លោក ស ខេង នោះ​ទេ ពីព្រោះ​កម្លាំង​នយោបាយ​របស់​បក្ស​ប្រឆាំង​បច្ចុប្បន្ន គឺ​ពឹង​ផ្អែក​ទាំង​ស្រុង​ទៅ លោក សម រង្ស៊ី និង​លោក កឹម សុខា។ លោក គឹម សុខ បន្ថែម​ទៀត​ថា លោក ស ខេង ហាក់​ទទួលស្គាល់​ឥទ្ធិពល​របស់​លោក សម រង្ស៊ី វិល​ចូល​ប្រទេស​វិញ ដែល​អាច​ជា​ចរន្ត​មួយ បង្ក​ឱ្យ​ការ​រង្គោះរង្គើ​ការ​កាន់​អំណាច​របស់​លោក ហ៊ុន សែន៖ «បើ​សិន​ជា​គាត់​មិន​ចូល វា​អាច​ធ្វើ​ឱ្យ​ស្ថានការណ៍​នយោបាយ ស្ថិត​នៅ​ក្នុង​ស្ថានភាព​ស្ងប់ស្ងាត់ ការ​ដែល​លោក ហ៊ុន សែន មាន​ប្រៀប​គ្រប់គ្រង​ប្រទេស​កម្ពុជា។ ក៏​ប៉ុន្តែ​បើ​គាត់​ចូល​នោះ ស្ថានការណ៍​វា​នឹង​ប្រែប្រួល។ បើ​គាត់​ចូល ប្រជារាស្ត្រ​ជា​ម្ចាស់​អំណាច​នឹង​ចូលរួម​ជា​មួយ​គាត់ ក្នុង​ការ​តវ៉ា​ប្រឆាំង​រដ្ឋាភិបាល​ខុសច្បាប់​របស់​លោក ហ៊ុន សែន នោះ​ធ្វើ​ឱ្យ​មាន​ការ​ប្រែប្រួល​ដំណើរ​នយោបាយ​នៅ​ក្នុង​ប្រទេស​កម្ពុជា ដែល​អាច​ផ្លាស់​ប្ដូរ​លឿន ឬ​ក៏​ឆាប់​ជាង​ការ​រំពឹង​ទុក ក្នុង​ករណី​ដែល​លោក សម រង្ស៊ី មិន​ចូល»

សកម្មជន​គណបក្ស​សង្គ្រោះ​ជាតិ​ខេត្ត​ប៉ៃលិន​ អ្នក​ស្រី វ៉ែន តារា​ អះអាង​ថា ពួកគាត់​នៅ​តំបន់​ខ្មែរ​ក្រហម​ផ្ដាច់​ខ្លួន​ជំរុញ​ឲ្យ​លោក សម រង្ស៊ី វិល​ចូល​ស្រុក​វិញ​ឲ្យ​បាន​ឆាប់​កាន់​តែ​ល្អ ព្រោះ​របប​ដឹក​នាំ​បច្ចុប្បន្ន​ ធ្វើ​ទុក្ខ​បុក​ម្នេញ​មក​លើ​ពលរដ្ឋ​ ជា​ពិសេស​កសិករ​ក្រីក្រ​លំបាក​វេទនា ដោយ​ជំពាក់​​ប្រាក់​ធនាគារ​គ្រប់​ទីកន្លែង ព្រោះ​គ្មាន​ទីផ្សារ​លក់​កសិករ​ រីឯ​អាជ្ញាធរ​វិញ​ធ្វើ​មិន​ដឹង​មិន​ឮ ដោយ​​បាន​ឃុបឃិត​ជា​មួយ​ក្រុម​មហាសេដ្ឋី​គំរាមកំហែង​មក​លើ​ពលរដ្ឋ​ខ្លួនឯង​ ដូច​ជា​ករណី​ការ​បាញ់​បង្ក្រាប​មក​លើ​ពលរដ្ឋ​រង​គ្រោះ​ដីធ្លី​នៅ​ខេត្ត​ព្រះសីហនុ បណ្ដាល​ឲ្យ​ពលរដ្ឋ​រង​របួស​ចំនួន ២នាក់ និង​ចាប់ខ្លួន​​មនុស្ស​ជា​ច្រើន​នាក់​ផ្សេង​ទៀត។ អ្នក​ស្រី​បន្ត​ថា បញ្ហា​ទាំង​នេះ​ហើយ ដែល​ជំរុញ​ទឹក​ចិត្ត​អ្នក​ស្រី​ និង​គាំទ្រ​គណបក្ស​ប្រឆាំង​ក្នុង​ខេត្ត​នេះ​ឲ្យ​ចូល​រួម​ស្ដារ​ប្រជាធិបតេយ្យ​ជា​មួយ​លោក សម រង្ស៊ី ដោយ​មិន​ខ្លាច​ស្លាប់​នោះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

Max Thomi

ត្រូវចូលហើយរួមគ្នាដើម្បីផ្លាស់ប្តូរ! ហើយបើគេថា ប្រើប្រាស់ស្លាកសញ្ញា ឬពាក្យសង្រ្គោះជាតិ ត្រូវផ្តន្ទាទោសនោះ សូមបងប្អូន យកក្រដាស់សៀវភៅពណ៌ស ហើយគូររូបព្រះអាទិត្យ ឬ សរសេរពាក្យសង្រ្គោះជាតិ បិតតាមមុខផ្ទះរបស់ខ្លួនទាំងអស់គ្នាមើល។ ហើយចាំមើលតើមានគុកប៉ុន្មានសំរាប់ដាក់បងប្អូនទូរទាំងប្រទេសនោះ!

Feb 03, 2019 05:08 AM

Cambodia are belonged for all khmer pple...is not belong to one group or one party or one family rule...

The smart thing to all khmer pple time's up a time to rescue your country from the fascist dictatorship regime and we appealing to all khmer brothers and sisters around the country please come out on the street to greet your CNRP's leader to move our country toward DEMOCRACY,freedom,free speech,free press by without fear the govm't,move forward to prosperity,stability and peace.

Jan 29, 2019 12:27 PM

គេហទំព័រ​ទាំងមូល