ពលរដ្ឋរស់នៅអគារប៊ូឌីងចាប់ផ្ដើមរើអីវ៉ាន់ចេញពីអគារ
2017.06.06
ពលរដ្ឋរស់នៅអគារប៊ូឌីងដែលយល់ព្រមលក់បន្ទប់របស់ខ្លួន ចាប់ផ្ដើមរើអីវ៉ាន់របស់ខ្លួនចេញពីអគារជាបណ្ដើរៗហើយ។ ថ្ងៃទី៦ ខែមិថុនា នេះជាថ្ងៃដំបូងនៃការចាប់ផ្ដើមចាកចេញពីអគារវ័យចំណាស់មួយនេះ ចំពោះអ្នកយល់ព្រមលក់បន្ទប់របស់ខ្លួនក្នុងតម្លៃ ១.៤០០ដុល្លារក្នុងមួយម៉ែត្រការ៉េ។ ដោយឡែកក៏នៅតែមានពលរដ្ឋមួយចំនួនទៀតដែលមានផ្ទៃក្រឡាបន្ទប់តូច និងអ្នករស់នៅជាន់ផ្ទាល់ដីមិនទាន់យល់ព្រមចាកចេញនៅឡើយ ព្រោះពួកគេទាមទារតម្លៃខ្ពស់ជាងតម្លៃដែលរដ្ឋមន្ត្រីក្រសួងដែនដី នគរូបនីយកម្ម និងសំណង់ កំណត់ជូន។
ដូចការព្រមព្រៀងគ្នារវាងពលរដ្ឋរស់នៅអគារប៊ូឌីង ដែលយល់ព្រមលក់បន្ទប់ និងរដ្ឋមន្ត្រីក្រសួងដែនដី នគរូបនីយកម្ម និងសំណង់ ដែលកំណត់យកថ្ងៃទី៦ ខែមិថុនា ជាថ្ងៃរើអីវ៉ាន់ចេញពីអគារ។ ក្រុមពលរដ្ឋភាគច្រើនជាអ្នករស់នៅជាន់លើនាំគ្នាដឹកសម្ភារៈ និងកន្ទេលខ្នើយមុងចេញពីអគារប៊ូឌីងទៅទីកន្លែងថ្មីរបស់ពួកគេ។
ពលរដ្ឋរស់នៅអគារប៊ូឌីងតាំងអំឡុងឆ្នាំ១៩៨៩ លោកស្រី ផន ស៊ីវិន ដែលកំពុងរើអីវ៉ាន់ដើម្បីចាកចេញឲ្យដឹងថា លុយដែលបានពីការលក់បន្ទប់លោកស្រីអាចទៅទិញផ្ទះមួយកន្លែងក្នុងក្រុងភ្នំពេញ ដែលឆ្ងាយពីទីប្រជុំជនបន្តិច។ ស្ត្រីរូបនេះយល់ថា ទោះជម្រកចាស់នេះមានអនុស្សាវរីយ៍យ៉ាងណាក្ដី ក៏លោកស្រីត្រូវសម្រេចចាកចេញដែរ ដើម្បីតម្រូវការនៃការអភិវឌ្ឍ៖ «តាមចិត្តអ៊ំ ការចាប់យកជម្រកថ្មីមិនដូចជម្រកចាស់ទេ ប៉ុន្តែរដ្ឋាភិបាលគេសុំទិញអគារនេះ យើងត្រូវចេញ ព្រោះទិញនេះក៏មិនបង្ខិតបង្ខំយើងដែរ»។
ក្រោយពីមានការជួបប្រជុំគ្នាជាញឹកញាប់រវាងភាគីពលរដ្ឋរស់នៅអគារជិត ៥០០គ្រួសារ និងរដ្ឋមន្ត្រីក្រសួងដែនដី នគរូបនីយកម្ម និងសំណង់ លោក ជា សុផារ៉ា ពលរដ្ឋជាង ៩៤ភាគរយ នៃពលរដ្ឋទាំងអស់ យល់ព្រមលក់បន្ទប់របស់ខ្លួន ក្នុងតម្លៃ ១.៤០០ដុល្លារក្នុងមួយម៉ែត្រការ៉េ ឲ្យទៅក្រុមរបស់ជប៉ុន ក្រោមការសម្របសម្រួលរបស់លោក។ ប៉ុន្តែក៏មានពលរដ្ឋជាង ២០គ្រួសារទៀត មិនទាន់សម្រេចចិត្តលក់បន្ទប់របស់ខ្លួននៅឡើយទេ។
ពលរដ្ឋរស់នៅអគារប៊ូឌីងម្នាក់ ដែលមិនទាន់យល់ព្រមលក់បន្ទប់ លោកស្រី ហេង ភារុណ ដែលមិនទាន់យល់ព្រមលក់បន្ទប់ ប្រាប់អាស៊ីសេរីថា លោកស្រីចង់បានដីមួយកន្លែងក្នុងក្រុងភ្នំពេញ ដែលមានទំហំប្រហាក់ប្រហែលផ្ទៃក្រឡាបន្ទប់របស់លោកស្រី ទើបលោកស្រីយល់ព្រមចាកចេញ។
លោកស្រីនៅតែស្នើទៅរដ្ឋមន្ត្រីក្រសួងដែនដី និងក្រុមហ៊ុនជប៉ុន យោគយល់ដល់លោកស្រីដែលជាម្ចាស់បន្ទប់ផ្ទាល់ដី និងផ្ទៃក្រឡាបន្ទប់តូច ដូច្នេះបើលក់ក្នុងតម្លៃក្រសួងផ្ដល់ឲ្យលោកស្រីមិនអាចទិញផ្ទះរស់នៅបានទេ៖ «ឥឡូវសុំឲ្យរាជរដ្ឋាភិបាល និងលោក ជា សុផារ៉ា លោកជួយមក ខ្ញុំអត់ចង់បានអីទេ ចង់បានតែដីមួយកន្លែងទេ»។
អគារប៊ូឌីង ត្រូវបានសាងសង់ឡើងតាំងពីទសវត្សរ៍ទី៦០ ក្នុងសម័យសង្គមរាស្ត្រនិយម។ បច្ចុប្បន្នអគារនេះមានពលរដ្ឋជិត ៥០០គ្រួសាររស់នៅ ក្នុងនោះមានទាំងក្រុមគ្រួសារអ្នកសិល្បៈ មន្ត្រីរាជការ គ្រូបង្រៀនមួយចំនួនផង។ ក្រុមហ៊ុនជប៉ុន ឈ្មោះ អារ៉ាកាវ៉ា (Arakawa) មានបំណងអភិវឌ្ឍអគារនេះដោយសាងសង់អគារថ្មីកម្ពស់ ២១ជាន់នៅលើទីតាំងដដែលក្នុងរយៈពេល ៤ឆ្នាំ ក្នុងទំហំទឹកប្រាក់ ៨០លានដុល្លារសហរដ្ឋអាមេរិក។
អាស៊ីសេរី មិនទាន់អាចសុំការបំភ្លឺបន្ថែមពីអ្នកនាំពាក្យ ក្រសួងដែនដី នគរូបនីយកម្ម និងសំណង់ លោក សេង ឡូត ដែលកាន់សំណុំរឿងនេះ និងតំណាងក្រុមហ៊ុនអារ៉ាកាវ៉ា បានទេ នៅថ្ងៃទី៦ ខែមិថុនា ឆ្នាំ២០១៧។
រីឯរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា បានបង្ហោះសំណើរបស់ខ្លួនទៅរដ្ឋមន្ត្រីក្រសួងឧស្សាហកម្ម និងសិប្បកម្ម លោក ចម ប្រសិទ្ធ តាមហេ្វសប៊ុក (Facebook) ដោយស្នើសុំឲ្យលោក សម ប្រសិទ្ធ ជួយសម្រួលដកប្រាក់ធានាក្នុងការតភ្ជាប់បណ្ដាញទឹកស្អាតលើកដំបូង ជូនពលរដ្ឋរស់នៅអគារប៊ូឌីង ដែលយល់ព្រមលក់បន្ទប់របស់ខ្លួន។
រដ្ឋមន្ត្រីក្រសួងដែនដី នគរូបនីយកម្ម និងសំណង់ ទុករយៈពេលមួយខែឲ្យពលរដ្ឋដែលយល់ព្រមលក់បន្ទប់ដើម្បីរើអីវ៉ាន់ចេញពីអគារចាប់ពីថ្ងៃទី៦ ខែមិថុនា តទៅ។ លោកក៏ត្រៀមនំបញ្ចុកជាងពីរតោនជប់លៀងជូនពលរដ្ឋនៅប៊ូឌីង ក្នុងអំឡុងពេលរើអីវ៉ាន់ចេញ។ របៀបផ្ដល់ថវិកាជួនពលរដ្ឋ នឹងធ្វើឡើងតាមរយៈធនាគារនៅពេលពលរដ្ឋចាកចេញមិនមែនជាការប្រគល់សាច់ប្រាក់សុទ្ធនោះទេ៕