សកម្មជនបក្សប្រឆាំងនៅស្វាយរៀងត្អូញត្អែរថា មានការរឹតត្បិតសេរីភាពពួកគាត់កាន់តែខ្លាំង
2019.04.29
មេឃុំមកពីគណបក្សសង្គ្រោះជាតិ ខែត្រស្វាយរៀង កាលពីថ្ងៃទី២២ ខែតុលា ឆ្នាំ២០១៧។
Photo provided
សកម្មជនគណបក្សប្រឆាំងនៅខេត្តស្វាយរៀងត្អូញត្អែរថា អាជ្ញាធរមូលដ្ឋានគណបក្សកាន់អំណាចក្នុងខេត្តនេះ កំពុងតាមដានរឹតត្បិតសិទ្ធិ សេរីភាពការជួបគ្នារបស់ពួកគាត់កាន់តែខ្លាំង និងធ្វើឱ្យប៉ះពាល់ដល់ការប្រស្រ័យទាក់ទងគ្នានៅក្នុងសង្គម។ ការរិះគន់នេះ បន្ទាប់ពីសមត្ថកិច្ចនៅស្រុករមាសហែក ហាមឃាត់ពួកគាត់ដែលមានគ្នា៤នាក់ មិនឱ្យចែកលិខិតអញ្ជើញចូលរួមក្នុងពិធីការកូនកាលពីព្រឹកថ្ងៃទី២៨ មេសា។
ប្រធានគណបក្សសង្គ្រោះជាតិខេត្តស្វាយរៀង លោក ញាណ ប៊ុនធឿន ប្រាប់អាស៊ីសេរីនៅរសៀលថ្ងៃទី២៨ មេសាថា សិទ្ធិសេរីភាពរបស់ពួកគាត់កាន់តែរួញតូច ព្រោះគ្រាន់តែលោកដើរចែកសំបុត្រអញ្ជើញការកូនក៏សមត្ថកិច្ចហាមឃាត់ដែរ។
លោកបន្តថា កាលពីព្រឹកថ្ងៃទី២៨ មេសា លោកបានដើរចែកសំបុត្រការកូននៅផ្ទះសកម្មជនគណបក្សប្រឆាំង ៤នាក់ នៅឃុំកំពង់ត្រាច ស្រុករមាសហែក ក្រោយមកស្រាប់តែប៉ូលិស២នាក់និងមេភូមិប្រម៉ាត់៥ បានទៅហាមឃាត់ម្ចាស់ផ្ទះដែលលោកទៅចែកសំបុត្រឱ្យនោះ មិនឱ្យជួបជុំពួកគាត់ឡើយ៖ «ប្រហែលគេសំគាល់មកលើខ្ញុំ ព្រោះខ្ញុំជាសមាជិកគណៈកម្មការប្រតិបត្តិខេត្តមួយរូបដែរ ហើយពេលខ្ញុំចុះទៅអញ្ជើញភ្ញៀវ ហើយគេសង្ស័យថាខ្ញុំចុះទៅជួបជាមួយសមាជិករបស់គណបក្សសង្គ្រោះជាតិ បានគេមិនចង់ឱ្យជួបជុំគ្នា ព្រោះជាមុខសញ្ញាដែលគេកំពុងតាមដាន។ ខ្ញុំដូចជាហួសហេតុពេកប្រជាពលរដ្ឋធម្មតាសោះ ដោយគ្រាន់តែជួបជុំគ្នាទៅអញ្ជើញការកូនសោះមានតាមដានឃ្លាំមើលដែរ»។
ឆ្លើយតបនឹងបញ្ហានេះមេភូមិប្រម៉ាត់៥ លោក ម៉ី សាន មានប្រសាសន៍ប្រាប់អាស៊ីសេរីថា មូលហេតុដែលទៅហាមដោយសារព្រួយបារម្ភខ្លាចពួកគេប្រមូលគ្នាធ្វើបាតុកម្មប្រឆាំងរដ្ឋាភិបាលលោក ហ៊ុន សែន ព្រោះអ្នកដែលជួបជុំគ្នានោះជាមន្ត្រីបក្សប្រឆាំង ហើយមានគ្នាជាច្រើននាក់៖ «គាត់មិនធ្វើអីទេដោយសារគាត់ផ្ដុំគ្នាច្រើន តែគាត់មិនមានខុសអីទេ គ្រាន់តែថាថ្នាក់លើគេបញ្ជាមក រួមមានពីខាងឃុំ ប៉ូលិសនិងពីខាងស្រុក ហើយខ្ញុំគ្រាន់តែប្រាប់គាត់ថាកុំឱ្យនៅផ្ដុំគ្នា»។
មេដឹកនាំរបបក្រុងភ្នំពេញលោក ហ៊ុន សែន ប្រកាសកាលពីដើមឆ្នាំ២០១៩ ថា របបលោកនឹងបន្តតាមកម្ទេចគណបក្សប្រឆាំងដោយមិនទុកឱ្យមានជីវិតទេ ប្រសិនបើអន្តរជាតិដាក់គំនាបសេដ្ឋកិច្ចលើកម្ពុជានោះ។
ប្រធានគ្រប់គ្រងការិយាល័យអង្កេតរបស់អង្គការលីកាដូ(Licadho) លោក អំ សំអាត ចាត់ទុកបញ្ហានេះថា ជាការគំរាមកំហែងបំភិតបំភ័យនិងបិទសិទ្ធិសេរីភាពពលរដ្ឋដែលមាននិន្នាការគាំទ្រគណបក្សប្រឆាំងដោយខុសច្បាប់ ដែលផ្ទុយពីគោលការណ៍ប្រទេសប្រជាធិបតេយ្យ និងកតិកាអន្តរជាតិដែលពលរដ្ឋគ្រប់រូបមានសិទ្ធិជួបជុំទាក់ទងគ្នានៅសង្គមបានដោយសេរី៖ «ហើយនៅក្នុងរដ្ឋធម្មនុញ្ញចែងអំពីសិទ្ធិសេរីភាពរបស់ប្រជាពលរដ្ឋក្នុងការចូលរួមលើកិច្ចនយោបាយ ហើយបើសិនជាយើងបារម្ភហើយធ្វើការហាមឃាត់គ្រាន់តែជួបជុំគ្នាដើរចែកសំបុត្រការមិនបានទេ តើអាសិទ្ធិសេរីភាពរបស់ប្រជាពលរដ្ឋវាបាត់ទៅណា?។អា ហ្នឹងហើយធ្វើឱ្យគេរិះគន់ថា សេរីភាពនៅក្នុងការជួបជុំ ការប្រមូលផ្ដុំ ការបញ្ចេញមតិរបស់ពលរដ្ឋហ្នឹងវាធ្លាក់ចុះធ្ងន់ធ្ងរ»។
មន្ត្រីសង្គមស៊ីវិលរូបនេះបន្តថា មួយរយៈចុងក្រោយនេះអាជ្ញាធរនៅតាមមូលដ្ឋានតាមដានសកម្មភាព និងរឹតត្បិតសិទ្ធិសេរីរបស់សកម្មជនគណបក្សប្រឆាំងជាបន្តបន្ទាប់ ជាពិសេសចាប់តាំងពីអ្នកគាំទ្រគណបក្សមួយនេះធ្វើបាតុកម្មភ្លើងទៀននៅប្រទេសកូរ៉េ កាលពីថ្ងៃទី២០ មេសា មក គឺអាជ្ញាធរហាក់មានការរឹតត្បិតដល់ពួកគេកាន់តែខ្លាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
អត្ថបទពេញនិយម
នយោបាយ
- គណបក្សកម្លាំងជាតិបោះឆ្នោតជ្រើសតាំងលោក ជា មុនី ធ្វើជាប្រធានបក្ស
- លោក រ៉ុង ឈុន ថា លោកមិនខ្លាចក្នុងការចូលបំភ្លឺតុលាការទេ ពាក់ព័ន្ធបទចោទ «មិនរាងចាល»
- អ្នកឃ្លាំមើលថា លោក ហ៊ុន សែន និងលោក ហ៊ុន ម៉ាណែត អសមត្ថភាពក្នុងការដោះស្រាយបញ្ហា ទើបប្រកាសធ្វើច្បាប់ចោទអ្នករិះគន់ថា ជាក្រុមភេរវកម្ម
- ហេតុអ្វីបានជាលោក ហ៊ុន សែន មិនហ៊ានក្អកជាមួយវៀតណាមក្នុងរឿង CLV?
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ