មេដឹកនាំគណបក្សសង្គ្រោះជាតិ អះអាងថា យុវជនជាប់ឃុំ ៣នាក់របស់គណបក្សនេះ អាចនឹងត្រូវបានដោះលែងឲ្យមានសេរីភាពវិញ នៅថ្ងៃច័ន្ទ សប្ដាហ៍ក្រោយ។ ការអះអាងបែបនេះ ធ្វើឡើងនៅពេលស្ថានភាពនយោបាយ ហាក់ធូរស្រាលជាងមុនបន្តិច ក្រោយពីតំណាងរាស្ត្រទាំង ៥៥រូបរបស់គណបក្សសង្គ្រោះជាតិ ព្រមចូលប្រជុំសភា។
ប្រធានគណបក្សសង្គ្រោះជាតិ លោក សម រង្ស៊ី រួមដំណើរដោយតំណាងរាស្ត្រមួយចំនួន រួមមាន លោក យឹម សុវណ្ណ លោក គួយ ប៊ុនរឿន លោក យ៉ែម បុញ្ញឫទ្ធិ និងលោក ម៉ែន សុថាវរិន្ទ្រ ព្រមទាំងសកម្មជនរបស់ខ្លួនប្រមាណ ៥០នាក់ទៀត ធ្វើដំណើរទៅកាន់ពន្ធនាគារព្រៃស នៅព្រឹកថ្ងៃទី៩ ខែសីហា ដើម្បីចូលសួរសុខទុក្ខយុវជនបក្សសង្គ្រោះជាតិ ៣រូប ដែលកំពុងជាប់ឃុំនៅទីនោះ។
ពេលធ្វើដំណើរចេញពីពន្ធនាគារ លោក សម រង្ស៊ី ដែលមានទឹកមុខញញឹមញញែមនោះ ថ្លែងចេញពីក្នុងរថយន្តហាក់មានសង្ឃឹមថា អ្វីៗដោះស្រាយចប់សព្វគ្រប់អស់ហើយ ហើយលោកសង្ឃឹមថា យុវជន ៣រូបនោះ នឹងត្រូវដោះលែងនៅថ្ងៃច័ន្ទ ទី១១ សីហា ខាងមុខ។ លោក សម រង្ស៊ី ឲ្យដឹងថា លោកបានជួបយុវជនទាំង ៣នាក់ ហើយថា ពួកគេនៅតែមានការប្ដេជ្ញាខ្លាំងក្លាដដែល។ នៅពេលសួរថា តើដំណឹងនៃការដោះលែងនេះ អាចជាកាដូសម្រាប់គណបក្សសង្គ្រោះជាតិ ក្រោយពីព្រមចូលសភា ឬយ៉ាងណា? លោក សម រង្ស៊ី ថាវាមិនមែនជាកាដូទេ ប៉ុន្តែវាជាយុត្តិធម៌ទៅវិញ៖ «ចប់សព្វគ្រប់អស់ហើយ (គេនឹងដោះលែងម៉ោងប៉ុន្មាន?) យើងអត់ដឹងទេ សង្ឃឹមអាទិត្យក្រោយ សង្ឃឹមថ្ងៃច័ន្ទ សង្ឃឹម ប៉ុន្តែមិនយូរទេ ជឿជាក់ៗ ថានឹងមានដំណោះស្រាយរួមចប់សព្វគ្រប់អស់»។
យុវជនគណបក្សសង្គ្រោះជាតិ ៣រូប ដែលត្រូវអាជ្ញាធរចាប់ខ្លួននោះ រួមមាន លោក ឃិន ជំរឿន ប្រធានចលនាយុវជនគណបក្សសង្គ្រោះជាតិ រាជធានីភ្នំពេញ លោក សាន គឹមហេង ប្រធានចលនាយុវជនគណបក្សសង្គ្រោះជាតិ ខណ្ឌទួលគោក និងលោក នាង សុឃុន ហេរញ្ញិកចលនាយុវជនគណបក្សសង្គ្រោះជាតិ ខណ្ឌច្បារអំពៅ។ ពួកគេត្រូវបានចាប់ខ្លួននៅថ្ងៃទី២ ខែសីហា ដោយសង្ស័យថា មានជាប់ពាក់ព័ន្ធនឹងអំពើហិង្សានៅស្ពាននាគ ក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា ដែលកាលណោះបានបណ្ដាលឲ្យពលរដ្ឋ ពិសេសកងសន្តិសុខសាលាខណ្ឌដូនពេញ ជាច្រើនរងរបួស។
ទោះជាយ៉ាងណាក៏ដោយ ការចាប់ខ្លួនយុវជនបក្សប្រឆាំងដោយអាជ្ញាធររដ្ឋាភិបាល ត្រូវបានគេមើលឃើញថា ធ្វើឡើងក្រោមហេតុផលនយោបាយ។ អង្គការសង្គមស៊ីវិល ចាត់ទុកការចាប់ខ្លួនសកម្មជនបក្សប្រឆាំងជាបន្តបន្ទាប់នេះ ថាជាការប្រើប្រាស់ពួកគេ ដើម្បីទាញយកលទ្ធផលចរចាផ្នែកនយោបាយប៉ុណ្ណោះ។
មន្ត្រីបច្ចេកទេសការិយាល័យស៊ើបអង្កេត នៃអង្គការសិទ្ធិមនុស្សលីកាដូ (Licadho) លោក អំ សំអាត មានប្រសាសន៍ថា ដោយសារយុវជនបក្សប្រឆាំងត្រូវបានចាប់ខ្លួន ក្រោមហេតុផលនយោបាយ ដូច្នេះក្នុងពេលដែលមានការស្រុះស្រួលនយោបាយហើយ ពួកគេគួរតែត្រូវបានទម្លាក់ចោលបទចោទ និងដោះលែងឲ្យមានសេរីភាព។ មន្ត្រីសិទ្ធិមនុស្សរូបនេះបន្តថា រដ្ឋាភិបាលគួរបញ្ឈប់ការចាប់ខ្លួនសកម្មជនបក្សប្រឆាំង ក្រោមរូបភាពនយោបាយបន្តទៀត ព្រោះទង្វើទាំងអស់នេះ ធ្វើឲ្យប៉ះពាល់ដល់ដំណើរការលទ្ធិប្រជាធិបតេយ្យនៅកម្ពុជា និងជាការរំលោភបំពានទៅលើប្រព័ន្ធយុត្តិធម៌នៅកម្ពុជា។
លោក អំ សំអាត៖ «ខ្ញុំគិតថា ប្រព័ន្ធយុត្តិធម៌ ដើម្បីពង្រឹងនូវជំនឿទុកចិត្ត ឬក៏ដើម្បីផ្តល់ជាយុត្តិធម៌សម្រាប់ប្រជាពលរដ្ឋទូទៅ គួរណាស់តែតាំងខ្លួនឯងឲ្យទៅជាប្រព័ន្ធមួយដែលឯករាជ្យទៅ ហើយធ្វើការដោយមិនចំណុះឲ្យគណបក្សនយោបាយ ហើយជាពិសេស ដើម្បីឲ្យប្រទេសយើងក្លាយជាប្រទេសដែលប្រកាន់នីតិរដ្ឋ និងលទ្ធិប្រជាធិបតេយ្យពិតប្រាកដ សូមឲ្យអ្នកនយោបាយឈប់យកប្រព័ន្ធតុលាការ ដើម្បីប្រើប្រាស់ជាផលប្រយោជន៍ ដើម្បីពង្រឹងអំណាច និងពង្រឹងឥទ្ធិពលនយោបាយរបស់ខ្លួនជាបន្តទៀត»។
ជុំវិញបញ្ហានេះ មន្ត្រីរដ្ឋាភិបាលធ្លាប់បានអះអាងថា ការចាប់ខ្លួនតំណាងរាស្ត្រ និងសកម្មជនគណបក្សប្រឆាំងជាបន្តបន្ទាប់នេះ មិនមែនជារឿងនយោបាយនោះទេ។ ទោះជាយ៉ាងណាក៏ដោយ គេនៅចាំបានថា តំណាងរាស្ត្រគណបក្សសង្គ្រោះជាតិ ចំនួន ៧រូប និងសកម្មជនបក្សនេះ ១រូប ដែលត្រូវបានអាជ្ញាធរចាប់ខ្លួននៅថ្ងៃទី១៥ ខែកក្កដា ក្នុងអំពើហិង្សានៅក្បែរទីលានប្រជាធិបតេយ្យ ត្រូវបានតុលាការដោះលែងវិញ នៅថ្ងៃទី២២ កក្កដា គឺភ្លាមៗបន្ទាប់ពីគណបក្សទាំង២ បានព្រមព្រៀងគ្នាលើដំណោះស្រាយនយោបាយ។ ចំណែកការចាប់ និងឃុំខ្លួនយុវជន ៣រូបនេះ ក៏ត្រូវមើលឃើញថា គ្មានអ្វីក្រៅពីហេតុផលនយោបាយនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។