មេធាវីថា មិនទាន់ទទួលបានដំណឹងពីការបន្តសវនាការលោក កឹម សុខា ឡើងវិញទេ
2020.07.25
លោក កឹម សុខា (ឆ្វេង) ប្រធានគណបក្សសង្គ្រោះជាតិ និងលោក ចាន់ ចេន (ស្ដាំ) មេធាវីសំណុំរឿងលោក កឹម សុខា ទៅចម្ការនៅខេត្តត្បូងឃ្មុំ នៅថ្ងៃទី៦ ខែកក្កដា ឆ្នាំ២០២០។
រូបពីហ្វេសប៊ុកលោក ចាន់ ចេន
មេធាវីការពារក្ដីថា មកដល់ពេលនេះក្រុមមេធាវីមិនទាន់ទទួលបានដំណឹងណាមួយពីតុលាការស្តីពីការបន្តសវនាការ លោក កឹម សុខា វិញនៅឡើយទេ។ អ្នកវិភាគថា ការផ្អាកសវនាការនេះ ឱ្យគណបក្សសង្គ្រោះជាតិបន្តខាតប្រយោជន៍ ប៉ុន្តែធ្វើឱ្យគណបក្សកាន់អំណាចទទួលបានផលចំណេញថែមទៀត។
មេធាវី លោក ចាន់ ចេន ជាមេធាវីម្នាក់ក្នុងចំណោមក្រុមមេធាវី ការពារក្តីលោក លោក កឹម សុខា ប្រធានគណបក្សសង្គ្រោះជាតិ ឱ្យអាស៊ីសេរីដឹងថ្ងៃ២៥ ខែកក្កដា ថា ក្រុមមេធាវីការពារក្ដី បានស្នើឱ្យតុលាការមានការពន្លឿនការបន្តសវនាការ លោក កឹម សុខា ឡើងវិញក្ដី ប៉ុន្តែ មកដល់ពេលនេះ មិនទាន់ទទួលបានដំណឹងពីតុលាការស្ដីពីដំណើរការនៃការបើកសវនាការវិញនៅឡើយទេ។ សហមេធាវីរូបនេះ ឱ្យដឹងទៀតថា កន្លងមកតុលាការបានឆ្លើបតបជាលិខិតមកមេធាវីវិញថា ការពន្យារពេលនេះដោយហេតុថា ក្រុមប្រឹក្សាជំនុំជម្រះ សង្កេតឃើញថា ស្ថានភាពជំងឺកូវីដ-១៩ មិនទាន់ធូរស្រាលនៅឡើយ។
សាលាដំបូងរាជធានី ភ្នំពេញបានសម្រេចផ្អាកសវនាការលោក កឹម សុខា គ្មានកាលកំណត់ព្រោះវិបត្តិជំងឺឆ្លងកូវីដ-១៩ កាលពីខែមីនា។ ក្រុមមេធាវីលោក កឹម សុខា បានស្នើឲ្យតុលាការបន្តសវនាការឡើងវិញ។
ប៉ុន្តែលិខិតរបស់សាលាដំបូងរាជធានី ភ្នំពេញចុះថ្ងៃទី២៣ ខែមិថុនា ដែលផ្ញើជូនក្រុមមេធាវី ឱ្យដឹងថា ភាពប្រថុយប្រថានដំណើរការសវនាការឡើងវិញ ក្នុងគ្រាដែលមិនច្បាស់លាស់នៃការរីករាលជំងឺកូវីដ-១៩ អាចនាំអន្តរាយដល់សវនាការទាំងមូល និងធ្វើឱ្យប៉ះពាល់ដល់សិទ្ធិភាគីពាក់ព័ន្ធ បើមានការចម្លងមេរោគនេះជាយថាហេតុ។ លិខិតដដែលបន្តថា គ្រប់គ្នានៅមានអារម្មណ៍ភ័យខ្លាចអំពីជំងឺឆ្លងកូវីដ-១៩ ដែលមានការរីករាលដាលដ៏កាចសាហាវ និងមានលក្ខណៈធ្ងន់ធ្ងរជាសកល។ តុលាការពន្យល់ទៀតថា ម្យ៉ាងទៀត សាលសវនាការជំនុំជម្រះ មិនអាចផ្ទុកអ្នកចូលរួមពី៣០នាក់ទៅ៤០នាក់ ដោយតម្រូវឱ្យមានគម្លាតវាងគ្នានិងគ្នានូវចម្ងាយ ២ម៉ែត្រ ឬទៅបីម៉ែត្រ បានឡើយ។ តុលាការលើកឡើងទៀតថា ការផ្អាកសវនាការនេះ មានគោលបំណង រក្សាបរិយាកាសសវនាការ ឱ្យមានភាពរលូន ទំនួលខុសត្រូវ និងប្រកបដោយសុវត្ថិភាពគ្រប់ភាគីពាក់ព័ន្ធ ក៏ដូចជាសាធារណៈជនជាតិ និងអន្តរជាតិ ដែលបានចូលស្តាប់ ដោយគ្មានការភ័យខ្លាចអំពីមេរោគដ៏កាចសាហាវនេះ។ប៉ុន្តែ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ដែលតាមដានដំណើរការសវនាការនេះ យល់ថា បើតុលាការមានឆន្ទៈក្នុងការកាត់ក្ដីរឿងនេះ គឺអាចធ្វើទៅបានដោយរកទីតាំងបើកសវនាការធំទូលាយ និងអនុវត្តវិធានការបង្ការរបស់ក្រសួងសុខាភិបាល។ មន្ត្រីសិទ្ធិមនុស្សរូបនេះ បន្តថា ពន្យារពេលបែបនេះធ្វើឱ្យខូចប្រយោជន៍លោក កឹម សុខា៖ «បើមានឆន្ទៈបន្តក៏អាចធ្វើបានដែរដោយវិធានការតាមគោលការណ៍របស់ក្រសួងសុខាភិបាល អាចថា រកបន្ទប់ដែលមានធំទូលាយហើយធ្វើការពិនិត្យកម្ដៅ លាងដៃនឹងអាល់កុល រក្សាគម្លាតនៅក្នុងតុលាការនៅតែអាចបន្តបាន បើសិនឆន្ទៈរបស់តុលាការលោកចង់បន្តបើក»។
រីឯ អ្នកជំនាញខាងវិទ្យាសាស្ត្រនយោបាយ លោកសាស្ត្រាចារ្យ ឯម សុណ្ណារ៉ា យល់ថា ការអូសបន្លាយពេលសវនាការនេះ អាចមកពីតុលាការពិបាកក្នុងការកាត់ក្ដី ដែលមិនស្រួលដូចការចោទប្រកាន់នោះទេ ខណៈសំណុំរឿងនេះតែងមានការឃ្លាំមើលពីសហគមន៍ជាតិ និងអន្តរជាតិ។ លោកបន្តថា ការពន្យារពេលនេះ គឺធ្វើឱ្យគណបក្សសង្គ្រោះជាតិ ខាតពេលក្នុងការធ្វើនយោបាយឡើងវិញ ហើយផ្ទុយទៅវិញ បែរជាធ្វើឱ្យបក្សកាន់អំណាចទទួលផលចំណេញដែលអាចគ្រប់គ្រងស្ថានការណ៍នយោបាយបានល្អ៖ «ពេលកាត់ក្ដីកាលពីលើកមុន យើងឃើញប្រតិកម្មពីទូតអាមេរិកអីចឹងមកហើយ អ៊ីចឹងខ្ញុំគិតថា តុលាការពិបាកនឹងកាត់ក្ដីដូចការចោទប្រកាន់ ហើយបើសិនបើចេះតែអូសបន្លាយពេល ក៏ជាករណីមួយធ្វើបក្សប្រឆាំងកាន់តែបាត់ថាមពលបាត់ភាពខ្លាំងរបស់ខ្លួនដែរ»។
ប៉ុន្តែ លោកសាស្ត្រាចារ្យ ឯម សុណ្ណារ៉ា ថា បក្សកាន់អំណាច ក៏ប្រឈមនឹងវិធានការ និងការរិះគន់ ពីសហគមន៍អន្តរជាតិ ជាពិសេសគឺសហភាពអឺរ៉ុប និងសហរដ្ឋអាមេរិកផងដែរ។
លោក កឹម សុខា ប្រធានគណបក្សសង្គ្រោះជាតិ ត្រូវបានសមត្ថកិច្ចចាប់ខ្លួន ដោយចោទប្រកាន់ពីបទក្បត់ជាតិ កាលពីឆ្នាំ២០១៧។ ប៉ុន្តែកាលពីឆ្នាំ២០១៩ តុលាការបានបន្ធូរបន្ថយការត្រួតពិនិត្យខ្លះដោយអនុញ្ញាតអាចឱ្យធ្វើដំណើរក្នុងប្រទេស ប៉ុន្តែហាមធ្វើនយោបាយ។ នៅរយៈពេលចុងក្រោយក្នុងខែកក្កដានេះ លោក កឹម សុខា បានធ្វើដំណើរទៅតាមខេត្តមួយចំនួន ដោយបានបង្ហាញ វត្តមាន នៅចម្ការនៅខេត្តត្បូងឃ្មុំ ទៅសួរសុខទុក្ខអតីតសហការីរបស់លោកនៅស្រុកមង្គលបុរី ខេត្តបន្ទាយមានជ័យ ដែលកំពុងមានជំងឺ ហើយលោកក៏បានទៅបួងសួងនៅរមណីយដ្ឋានឧកញ៉ាឃ្លាំងមឿង ក្នុងខេត្តពោធិ៍សាត់ ទៅខេត្តកំពង់ចាម រួចបន្តដំណើរឈៀងចូលមើលប្រាសាទបុរាណក្នុងខេត្តសៀមរាប និងដើរមើលចម្ការស្វាយ នៅខេត្តកំពត រួមទាំងជជែកសំណេះសំណាលជាមួយពលរដ្ឋនៅខេត្តបាត់ដំបង និងខេត្តកំពតជាដើម។
ការចេញក្រៅផ្ទះរបស់លោក កឹម សុខា នេះខណៈសហភាពអឺរ៉ុបនឹងចាប់គិតពន្ធ ២០ភាគរយ ពីកម្ពុជានៅពាក់កណ្ដាល ខែសីហាខាងមុខ។
ទាក់ទងទៅនឹងរឿងនេះ អ្នកវិភាគនយោបាយលោក គឹម សុខ យល់ថា លោក កឹម សុខា ទើបធ្វើដំណើរតាមបណ្ដាខេត្តពេលនេះ អាចមកលោកប្រើពេលដើម្បីស្ទាបស្ទង់ស្ថានការណ៍ជាមុនសិន។ ទោះជាយ៉ាងណា ភ្លាមៗនោះ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោក ចៅក្រម កូយ សៅ បានចេញលិខិតមួយ កាលពីថ្ងៃទី២០ ខែកក្កដា ថា ក្រុមប្រឹក្សាជំនុំជម្រះបានទទួលរបាយការណ៍ពីមន្ត្រីនគរបាលយុត្តិធម៌ដែលទទួលបន្ទុកតាមដាន លោក កឹម សុខា ឱ្យដឹងថា លោក កឹម សុខា បានធ្វើសកម្មភាពមួយចំនួន ជាពិសេសនៅតាមបណ្ដាខេត្តដោយចុះជួបសំណេះសំណាលជាមួយពលរដ្ឋ ក៏ដូចជាការប្រមូលផ្ដុំជួបជុំអ្នកគាំទ្ររបស់ខ្លួនក្រោមរូបភាពផ្សេងៗ។
លិខិតនោះបន្តថា សកម្មភាពរបស់ប្រធានគណបក្សសង្គ្រោះជាតិ អាចនឹងឈានទៅហួសព្រំដែន ឬនាំទៅដល់ការបំពានលើកាតព្វកិច្ចនៃការត្រួតពិនិត្យតាមផ្លូវតុលាការ។
កាលពីខែមិថុនា ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ លោកចៅក្រម កូយ សៅ ឱ្យដឹងថា ការបន្តសវនាការឡើងវិញបាន គប្បីធ្វើឡើងក្នុងពេលវេលាសមស្របណាមួយដែលស្ថានភាពនៃការឆ្លងរាលដាលនៃជំងឺកូវីដ-១៩ មានបានធូរស្រាលជាទូទៅ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
អត្ថបទពេញនិយម
នយោបាយ
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- មន្ត្រីរដ្ឋាភិបាលអះអាងថា ការជីកព្រែកហ្វូណនជាសិទ្ធិអធិបតេយ្យរបស់កម្ពុជា គ្មានការចាំបាច់បំភ្លឺគ្រប់រឿងដល់វៀតណាមទេ
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់
- តើកម្ពុជាអាចជម្នះសាងសង់ព្រែកជីកហ្វូណនតេជោបានដែរឬទេ?
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន