មនុស្សជាច្រើននាក់ដែលខ្លះធ្វើដំណើរដោយរថយន្តទំនើបផ្ទាល់ខ្លួន ដោយមានរថយន្តខ្លះពាក់ស្លាកលេខនគរបាលផងនោះ បានយកទៅចតនៅទីស្នាក់ការគណបក្សប្រជាជនកម្ពុជា ឃុំតាគ្រាម ស្រុកបាណន់ ខេត្តបាត់ដំបង ដើម្បីចុះឈ្មោះបោះឆ្នោតនៅក្នុងឃុំនេះជាបន្តបន្ទាប់។ ពលរដ្ឋមួយចំនួនដែលរស់នៅក្បែរការិយាល័យចុះឈ្មោះបោះឆ្នោតនោះ បញ្ជាក់ថា ពលរដ្ឋទាំងនោះជាមនុស្សប្លែកមុខដែលពុំបានរស់នៅក្នុងឃុំជាមួយពួកគាត់ឡើយ។
ប្រជាពលរដ្ឋមួយចំនួនដែលរស់នៅក្បែរការិយាល័យចុះឈ្មោះបោះឆ្នោតឃុំតាគ្រាម បានប្រតិកម្មយ៉ាងខ្លាំងទៅនឹងក្រុមអ្នកមកចុះឈ្មោះបោះឆ្នោតទាំងនោះ ថាជារូបភាពមួយដែលអាចបង្កភាពអយុត្តិធម៌នៅក្នុងការបោះឆ្នោតជ្រើសរើសអ្នកដឹកនាំឃុំ-សង្កាត់ក្នុងមូលដ្ឋានរបស់ពួកគាត់។
ពលរដ្ឋរស់នៅក្បែរសាលាឃុំតាគ្រាម គឺលោកស្រី អៀង ស្រីខួច ប្រាប់អាស៊ីសេរីនៅខាងមុខផ្ទះ នៅព្រឹកថ្ងៃទី៤ កញ្ញា ថា អ្នកដែលមកចុះឈ្មោះបោះឆ្នោតនោះពុំមែនជាប្រជាពលរដ្ឋរស់នៅ ឬមកស្នាក់ធ្វើការងារនៅក្នុងឃុំតាគ្រាម នោះឡើយ។ លោកស្រីព្រួយបារម្ភខ្លាចការចុះឈ្មោះនេះ ធ្វើឲ្យប៉ះពាល់ដល់ភាពសុក្រឹត និងយុត្តិធម៌នៅពេលបោះឆ្នោតជ្រើសមេឃុំនៅឆ្នាំ២០១៧ ខាងមុខ៖ « ក្រុមការងារមក កាន់អត្តសញ្ញាណប័ណ្ណមកចូលទៅចុះឈ្មោះបានឆាប់ ចំណែកប្រជាពលរដ្ឋសាមញ្ញយើងដែលរស់នៅក្នុងភូមិផ្ទាល់មិនដូច្នោះឡើយ។ ស្នើសុំឲ្យមន្ត្រីធ្វើការងារចុះឈ្មោះបោះឆ្នោត ជួយសម្រួលដល់ប្រជាពលរដ្ឋឲ្យចុះឈ្មោះឆាប់ផង »។
ក្រុមអ្នកទៅចុះឈ្មោះបោះឆ្នោតដែលអ្នកភូមិព្រួយបារម្ភនោះ ភាគច្រើនជាមនុស្សប្រុសអាយុចន្លោះពី ២៥ឆ្នាំទៅ ៥០ឆ្នាំ ដោយធ្វើដំណើរតាមរថយន្តទំនើបផ្ទាល់ខ្លួន មានដូចជារថយន្តឡិចស៊ីស (Lexus 330) ជាដើម បានចតនៅក្នុងទីស្នាក់ការគណបក្សប្រជាជនកម្ពុជា ឃុំតាគ្រាម ហើយនាំគ្នាដើរជាក្រុមចាប់ពី ២នាក់ទៅ ៥នាក់ ឆ្ពោះទៅសាលាឃុំតាគ្រាម ដែលមានចម្ងាយប្រមាណ ២០០ម៉ែត្រជាបន្តបន្ទាប់។
ពលរដ្ឋរស់នៅក្បែរសាលាឃុំតាគ្រាម ម្នាក់ទៀត គឺលោកស្រី ឈន ឈីន ថ្លែងថា អ្នកដែលជិះរថយន្តសេរីទំនើប ហើយមកចុះឈ្មោះបោះឆ្នោតដោយពួកគាត់មិនធ្លាប់ស្គាល់នោះ មកចុះឈ្មោះជាបន្តបន្ទាប់តាំងពីថ្ងៃទី១ កញ្ញា ប៉ុន្តែលោកស្រីអះអាងថា នៅថ្ងៃទី៣ និងថ្ងៃទី៤ កញ្ញា មានរថយន្តច្រើនជាងថ្ងៃដំបូង គឺយ៉ាងហោចណាស់ចន្លោះពី ១៥គ្រឿងទៅ ៣០គ្រឿងដែរក្នុងមួយថ្ងៃ៖ « ខ្ញុំរស់នៅទីកន្លែងនេះយូរឆ្នាំហើយ តែមិនដែលឃើញពួកគាត់មកចុះឈ្មោះនោះសោះ។ ខ្ញុំមិនសប្បាយចិត្តសោះនៅពេលឃើញមនុស្សប្លែកៗមកចុះឈ្មោះបោះឆ្នោតនៅក្នុងឃុំរបស់ខ្ញុំដូច្នេះ »។
ឆ្លើយតបនឹងបញ្ហានេះ មេឃុំតាគ្រាម លោក អ៊ឹម ប៊ុនយូ មានប្រសាសន៍ថា ពលរដ្ឋដែលមកឈ្មោះបោះឆ្នោតនោះ ជាក្រុមការងារថ្នាក់ជាតិរបស់គណបក្សប្រជាជនកម្ពុជា ក្នុងឃុំតាគ្រាម។ ទោះជាយ៉ាងណា លោកអះអាងថា អ្នកដែលមកចុះឈ្មោះនោះ កន្លងមកតែងចុះមកជួយប្រជាពលរដ្ឋក្នុងមូលដ្ឋាននោះជាប្រចាំ ប៉ុន្តែលោកថា អ្នកភូមិមិនបានចាប់អារម្មណ៍លើការងារនេះ៖ « បាទ ! ពួកគាត់ជាអ្នកធ្វើការងាររដ្ឋដែរទេ ហើយគាត់ក៏ជាប្រជាពលរដ្ឋក្នុងឃុំដែរ »។
នៅបរិវេណការិយាល័យចុះឈ្មោះបោះឆ្នោតនៅឃុំតាគ្រាម នោះ នៅព្រឹកថ្ងៃទី៤ កញ្ញា ឃើញមានប្រជាពលរដ្ឋដែលមានសម្បុរស្រអែម ដែលដូចប្រជាកសិកររស់នៅតំបន់នោះមានចំនួនតិចជាងមនុស្សដែលមានសម្បុរស ហើយភាគច្រើនជាមន្ត្រីប៉ូលិសអន្តោប្រវេសន៍ប្រចាំការនៅព្រំដែនកម្ពុជា-ថៃ ដែលអ្នកភូមិអះអាងថាជាមនុស្សមកពីតំបន់ផ្សេង។
អ្នកសង្កេតការណ៍សុំមិនឲ្យបញ្ចេញសំឡេងបញ្ជាក់ថា ចាប់ពីថ្ងៃចុះឈ្មោះបោះឆ្នោតដំបូងដល់រសៀលថ្ងៃទី៤ កញ្ញា មានមនុស្សដែលមិនធ្លាប់ស្គាល់ជាង ២៣០នាក់ក្នុងចំណោមអ្នកដែលចុះឈ្មោះបោះឆ្នោតប្រមាណ ៨០០នាក់រយៈពេល ៤ថ្ងៃកន្លងមក។
ទាក់ទងនឹងបញ្ហានេះ មន្ត្រីស៊ើបអង្កេត និងតស៊ូមតិនៃអង្គការខុមហ្វ្រែល (COMFREL) លោក ស៊ិន ទិត្យសីហា មានប្រសាសន៍ថា បុគ្គលដែលអាចចុះឈ្មោះបោះឆ្នោតបានជាប្រជាពលរដ្ឋដែលមានទីលំនៅ ឬស្នាក់នៅក្នុងឃុំ-សង្កាត់នោះ។ លោកបញ្ជាក់ថា ប្រសិនបើពលរដ្ឋដែលពុំមានទីលំនៅក្នុងឃុំ-សង្កាត់ទេ ចាត់ជាអំពើមិនប្រក្រតីក្នុងការចុះឈ្មោះបោះឆ្នោត។ លោកបញ្ជាក់ថា ការធ្វើបែបនេះ នាំឲ្យប៉ះពាល់ដល់លទ្ធផលនៃសន្លឹកឆ្នោត ដែលធ្វើឲ្យគណបក្សនោះឈ្នះការបោះឆ្នោតដោយភាពអយុត្តិធម៌។ លោកចាត់ទុកករណីអ្នកដែលចុះឈ្មោះនៅឃុំតាគ្រាម នោះ ថាជាយុទ្ធសាស្ត្រផ្នែកនយោបាយដើម្បីឈ្នះការបោះឆ្នោត៖ « អ៊ីចឹងបើសិនមានករណីរៀបចំឲ្យមានប្រជាពលរដ្ឋនៅកន្លែងផ្សេងមកចុះឈ្មោះបោះឆ្នោត យើងគិតថានេះជាយុទ្ធសាស្ត្រមួយអាចប៉ះពាល់ទៅនឹងដំណើរការនៃការបោះឆ្នោតដែរ »។
លោកបន្ថែមថា ច្បាប់បោះឆ្នោតទុកឱកាស ១០ថ្ងៃក្រោយពីការបិទផ្សាយឈ្មោះអ្នកបោះឆ្នោតចាប់ពីថ្ងៃទី៣ ខែមករា ឆ្នាំ២០១៧ ដើម្បីឲ្យប្រជាពលរដ្ឋប្ដឹងជំទាស់ករណីដែលរកឃើញថា ឈ្មោះក្នុងបញ្ជីបោះឆ្នោតនោះពុំមែនជាប្រជាពលរដ្ឋក្នុងឃុំ-សង្កាត់របស់ខ្លួន។
លេខាធិការគណៈកម្មការរៀបចំការបោះឆ្នោតខេត្តបាត់ដំបង ឲ្យដឹងថា ការចុះឈ្មោះបោះឆ្នោតចាប់ពីថ្ងៃទី១ ដល់ថ្ងៃទី៣ មានប្រជាពលរដ្ឋដែលចុះឈ្មោះសរុបជាង ៣ម៉ឺន ៥ពាន់នាក់ (៣៥.៦៧៤នាក់) ក្នុងចំណោមប្រជាពលរដ្ឋដែលគ្រប់អាយុបោះឆ្នោតចាប់ពី ១៨ឆ្នាំឡើងទៅចំនួនជាង ៧សែន ៨ម៉ឺននាក់ (៧៨០.០០០នាក់)៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។