លោក​ ហ៊ុន​ សែន​ ប្ដូរ​ថ្ងៃ​កំណើត​មក​ថ្ងៃ​ទី៥ ខែ​សីហា ឆ្នាំ​រោង​វិញ

ដោយ សុជីវី
2022.06.23
Share on WhatsApp
Share on WhatsApp
លោក​ ហ៊ុន​ សែន​ ប្ដូរ​ថ្ងៃ​កំណើត​មក​ថ្ងៃ​ទី៥ ខែ​សីហា ឆ្នាំ​រោង​វិញ លោកនាយករដ្ឋមន្ត្រី ហ៊ុន សែន
រូប៖ ហ្វេសប៊ុកលោក ហ៊ុន សែន

ពេល​នេះ​រដ្ឋាភិបាល​លោក​ ហ៊ុន​ សែន​​ កំពុង​​មមាញឹក​ផ្ញើ​លិខិត​ទៅ​ស្ថាប័ន​ជាតិ​នានា​ រួម​ទាំង​ស្ថាប័ន​ព្រះ​មហាក្សត្រ​ ផង​ពី​ការ​​ប្តូរថ្ងៃ​ខែ​កំណើត​របស់​លោក ហ៊ុន​ សែន ដែល​​ប្ដូរ​ពី​ថ្ងៃ​ទី​៤ ខែ​មេសា​ ឆ្នាំ​១៩៥១ មក​ថ្ងៃ​ទី​៥ ខែ​សីហា​ ឆ្នាំ១៩៥២​វិញ​។​ អ្នក​ឃ្លាំមើល​សង្គម​រិះគន់​ លោក​ ហ៊ុន​ សែន ថា​ បាន​ធ្វើ​ឲ្យ​ស្ថាប័ន​របស់​ជាតិ ខាត​លុយ និង​ពេល​វេលា​​ព្រោះ​តែ​រឿង​​តូចតាច​របស់​លោក ហ៊ុន សែន​​។​

ការ​ប្ដូរ​ថ្ងៃ​ខែ​ឆ្នាំ​កំណើត​ លោក​ ហ៊ុន​ សែន​ ពេល​នេះ​តម្រូវ​ឲ្យ​​រដ្ឋាភិបាល​​ ត្រូវ​រំខាន​ដល់​​​ប្រធាន​រដ្ឋសភា ប្រធាន​ព្រឹទ្ធសភា​ រហូត​ព្រះ​មហាក្សត្រ​ និង​ប្រមុខ​ស្ថាប័ន​ជាតិ​មួយ​ចំនួន​ទៀត​។លោក​ ហ៊ុន​ សែន​ ចាប់ពីពេល​នេះ​ទៅ លោកមាន​​ថ្ងៃ​កំណើត​ពិត​ គឺ​ថ្ងៃ​ទី​៥ ខែ​សីហា​ ឆ្នាំ១៩៥២។​ ទន្ទឹម​គ្នា​ សូម្បីតែការប្តូរថ្ងៃកំណើតនេះ មន្ត្រី​របស់​លោក​ ហ៊ុន​ សែន​ មួយ​ចំនួន​ ក៏​ឆ្លៀត​ផ្ញើ​សារ​អបអរ​ផង​ដែរ​។​

អ្នក​វិភាគ​នយោបាយ​ លោក​ គឹម សុខ រិះគន់​ថា​ លោក​ ហ៊ុន​ សែន​ តែង​យក​​រឿង​ផ្ទាល់​ខ្លួន​តូចតាច​របស់​​លោក​ ធ្វើ​ឲ្យ​គេ​រវល់​ពេញ​នគរ​ ប៉ុន្តែ​លោក​ ហ៊ុន​ សែន​ មិនសូវ​អើពើ​ដោះស្រាយ​បញ្ហា​ជាតិ​ ឬ​បញ្ហា​ពលរដ្ឋ​នោះ​ទេ​​។​ លោក​បន្ត​ថា​ ​​នេះ​ជា​ការ​បំផ្លាញ​លុយ​ជាតិ​ និង​ពេល​វេលា​បំពេញ​ការងារ​របស់​​ មន្ត្រី​រាជការ«ពីព្រោះ​និយាយ​ដល់​ប្រទេស​ជាតិ គឺ​បម្រើ​ផល​ប្រយោជន៍​របស់​ប្រជាពលរដ្ឋ​ និង​ការពារ​ទាំង​បូរណភាព​ទឹកដី​ និង​កិត្តិយស​ជាតិ​ ប៉ុន្តែ​ នៅ​ពេល​ដាក់​ផល​ប្រយោជន៍​គាត់ (លោក ហ៊ុន​ សែន)​ និង​គ្រួសារ​គាត់​នៅ​មុខ​អ្វីៗ​ដែល​ជា​ដំណើរការ​ជាតិ​ត្រូវ​ស្ទះ​ទាំង​អស់​មាន​ដំណើរការ​ទាក់ទង​​​ផល​ប្រយោជន៍​នយោបាយ​របស់​ក្រុម​គ្រួសារ​ ហ៊ុន​ ហើយ​នឹង​គាត់​តែ​ប៉ុណ្ណោះ»

ចំណែក​ប្រធាន​ក្រុមប្រឹក្សា​ឃ្លាំមើល​កម្ពុជា​នៅ​ប្រទេស​ន័រវេសន៍ (Norway) លោក ម៉ែន ណាត សរសេរ​លើ​ហ្វេសប៊ុក​បែប​ឌឺដង​ទៅ​លោក ហ៊ុន សែន ថា បន្ទាប់​ពី​ស្បែក​ជើង​ហោះកាត់​មុខ ​លោក ហ៊ុន សែន ប្តូរ​ថ្ងៃខែឆ្នាំកំណើត តាម​អបិយជំនឿ​ឲ្យ​ជ្រះចង្រៃ។​

លោក ម៉ែន ណាត យល់ថា​ ការ​ប្ដូរ​ថ្ងៃ​ខែ​ឆ្នាំ​កំណើត​របស់​លោក​ ហ៊ុន​ សែន​ ពេល​នេះ​ គឺ​លោក​ ហ៊ុន​ សែន ជា​មនុស្ស​ដែល​ជឿ​លើ​អប្បិយជំនឿ​ជ្រុល​ហួស​ហេតុ​។​ លោក​បន្ត​​ថា​ មេដឹកនាំ​ដែល​ងប់ងុល​លើ​ជំនឿ​បែប​នេះ​ជា​បង្ហាញ​ថា មេ​ដឹក​នាំ​នោះ​គ្មាន​សមត្ថភាព៖ «គាត់ (លោក ហ៊ុន សែន) ជឿ​ទៅ​លើ​អបិយជំនឿ​ រឿង​កាត់​ស៊យ កាត់​សៅហ្មង​ តាម​ធម្មតា​ គ្មាន​អបិយ​ជំនឿ​ណា​មួយ​មក​ គ្រប់​តណ្ដប់​ទៅ​លើ​ការ​ដឹកនាំ​របស់​ខ្លួន​ បើ​យើង​ជា​មេដឹកនាំ​ ទោះ​បី​យើង​ស្លាប់​ជា​ខ្មោច​រាប់​សិប​ឆ្នាំ​ក៏​គេ​នៅ​តែ​គោរព​បូជា​ដែរ»

ប្រតិកម្ម​របស់​អ្នក​ឃ្លាំមើល​ដូច្នេះ គឺ​ក្រោយ​ពេល​ប្រធាន​តុលាការ​ក្រុង​ភ្នំពេញ លោក តាំង ស៊ុនឡាយ បាន​ចេញ​ដីកា​ចុះ​ថ្ងៃ​ទី២០ ខែ​មិថុនា សម្រេច​កែ​តម្រូវ​ថ្ងៃ​ខែ​ឆ្នាំ​កំណើត​តាម​ការ​ចង់​បាន​របស់​លោក ហ៊ុន សែន។ លោក ចៅក្រម តាំង ស៊ុនឡាយ បង្គាប់​ទៅ​មន្ត្រី​អត្រានុកូលដ្ឋាន និង​អាជ្ញាធរ​មាន​សមត្ថកិច្ច​កែ​តម្រូវ​ទិន្នន័យ​អត្រានុកូលដ្ឋាន​ឲ្យ​ស្រប​តាម​ការ​ស្នើសុំ​របស់​លោក ហ៊ុន សែន។

ជុំវិញ​ការ​រិះគន់​របស់​អ្នក​ឃ្លាំមើល​សង្គម​លើ​រឿង​នេះ​អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន និយាយ​ថា ការប្ដូរ​ថ្ងៃ​ខែ​ឆ្នាំ​កំណើត​លោក​ ហ៊ុន​ សែន ជា​សិទ្ធិ​របស់​លោក ហ៊ុន សែន។ លោកសុខ ឥសាន សុំ​មិន​ធ្វើ​អត្ថាធិប្បាយ​ថា ការ​ប្ដូរ​ថ្ងៃ​ខែ​ឆ្នាំ​កំណើត​របស់​ លោក​ ហ៊ុន​ សែន ទាក់ទង​នឹង​អប្បិយ​ជំនឿ​របស់​លោក ហ៊ុន សែន ឬ​យ៉ាងណា​នោះ​ទេ«មាន​ខាតបង់​ពីណា​ ហើយ​ការ ដែល​ទូល​ថ្វាយ​ព្រះករុណា ឬ​ក៏​ស្ថាប័ន​នានា ជា​ការ​ទទួល​ខុស​របស់​សម្ដេច​នាយក​លោក​ធ្វើ​លិខិត​ជូន​ដំណឹង​ទៅ​ហើយ​ទេ​តើ ហើយ​ឥឡូវ​មាន​ខាត​អី​ប្រជាពលរដ្ឋ​ទាំង​ប្រទេស​គេ​មិន​មាត់​ផង»

ទោះ​ជា​យ៉ាង​ណា​ក្ដី លោក ហ៊ុន សែន ថ្លែង​កាល​ពី​ថ្ងៃ​ទី១៧ ខែ​ឧសភា គឺ​ក្រោយ​ប៉ុន្មានថ្ងៃ​នៃ​ការ​ស្លាប់​បង​ប្រុស​របស់​លោក​ គឺ​លោក​ ហ៊ុន ណេង​ថា ថ្ងៃ​ខែ​កំណើត​បង​ប្រុស​លោក​​ គឺ​ឆុង​គ្នា​នឹង​ថ្ងៃ​កំណើត​របស់​លោក​ដែល​ប្រើប្រាស់​កន្លង​មក​គឺ ថ្ងៃ​ទី៤ ខែ​មេសា ឆ្នាំ១៩៥១«អ៊ីចឹង​បើ​និយាយ​ពី​កើត​ថ្ងៃ​ទី២ ខែ​មេសា គឺ​គាត់ (លោក ហ៊ុន ណេង) នៅ​ក្នុង​ឆ្នាំ​ឆ្លូវ ដល់​គាត់​មក​យក​ខែវិច្ឆិកា គាត់​នៅ​ឆ្នាំ​ខាល គឺ​ឆុង​ឆ្នាំ​ហ្នឹង​តែ​ម្ដង​ ព្រោះ​ក្នុង​ចំណោម​គ្រួសារ​ខ្ញុំ​អត់​មាន​អ្នក​ណា​មួយ​រឿង​បេះដូង​ទេ អ៊ីចឹង​ទេ រឿង​នេះ ខ្ញុំ​បាន​ពិភាក្សា​ជាមួយ​ឯកឧត្តម កើត រិទ្ធ ហើយ​ ខ្ញុំ​វិល​មក​រក​ថ្ងៃ​ខែ​កំណើត​ខ្ញុំ​វិញ»

មេធាវី​តំណាង​លោក ហ៊ុន សែន បាន​ប្ដឹង​ទៅ​សាលា​ដំបូង​រាជធានី​ ភ្នំពេញ កាល​ពី​ដើម​ខែ​មិថុនា​ថា ជិត​មួយ​ជីវិត​របស់​លោក​បាន​ប្រើប្រាស់​ថ្ងៃ​ខែ​ឆ្នាំ​កំណើត​ខុស ព្រោះ​ប្រទេស​មាន​សង្គ្រាម ប៉ុន្តែ​ពេល​នេះ​លោក​មាន​បំណង​ប្រើប្រាស់​ថ្ងៃ​ខែ​ឆ្នាំ​កំណើត​ពិត​របស់​ខ្លួន​វិញ គឺ​ថ្ងៃ​ទី៥ ខែ​សីហា ឆ្នាំ១៩៥២។ ថ្ងៃ​កំណើត​ផ្លូវ​ការ​ថ្មី​របស់​លោក ហ៊ុន សែន នេះ​ត្រូវ​នឹង​ថ្ងៃ​អង្គារ ១៥កើត ខែ​ស្រាពណ៍ ឆ្នាំរោង ចត្វាស័ក ពុទ្ធសករាជ ២៤៩២។ ឆ្នាំ​រោង​នេះ​ត្រូវ​នឹង​សត្វ​នាគ ដែល​លោក ហ៊ុន សែន មាន​ជំនឿ​ថា អ្នក​កើត​ឆ្នាំ​រោង​មាន​រាសី​ខ្ពស់៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល