តំណាងរាស្រ្តរងគ្រោះ និងអ្នកចូលរួមធ្វើបាតុកម្មកាលពីឆ្នាំ២០១៥ ថា លោក ហ៊ីង ប៊ុនហៀង បញ្ជាក្រុមអង្គរក្សឲ្យប្រព្រឹត្តហិង្សា
2018.06.29
មេអង្គរក្សរបស់លោក ហ៊ុន សែន លោក ហ៊ីង ប៊ុនហៀង គឺជាបុគ្គលទីមួយ ដែលត្រូវសហរដ្ឋអាមេរិកដាក់ក្នុងបញ្ជីខ្មៅបង្កកទ្រព្យសម្បត្តិ ព្រោះមេទាហានផ្កាយបួនរូបនេះ ពាក់ព័ន្ធនឹងការរំលោភសិទ្ធិមនុស្ស និងប្រជាធិបតេយ្យ។
ករណីទាំងនោះមានដូចជា ការវាយតំណាងរាស្រ្តគណបក្សសង្គ្រោះជាតិ កាលពីឆ្នាំ២០១៣ ជាភស្តុតាង និងករណីមួយចំនួនទៀត ដែលរតនាគារអាមេរិកបានរកឃើញ។
ទោះបីជា លោក ហ៊ីង ប៊ុនហៀង មិនចេញមុខមកវាយតំណាងរាស្រ្តគណបក្សសង្រ្គោះជាតិដោយផ្ទាល់ក្តី ក៏ក្រុមបាតុករដែលជាអ្នកចូលរួមធ្វើបាតុកម្មរហូតដល់វាយធ្វើបាបតំណាងរាស្រ្តគណបក្សប្រឆាំងពីរនាក់ឲ្យរងរបួសធ្ងន់ធ្ងរនោះ បានអះអាងថា មេអង្គរក្សរូបនេះ ជាអ្នកបញ្ចេញក្រុមអង្គរក្សឲ្យប្រព្រឹត្តហិង្សា។
បាតុករចូលរួមធ្វើបាតុកម្មកាលពីឆ្នាំ២០១៥ និងអ្នកបើកឡានដឹកបាតុករបានអះអាងស្រដៀងគ្នាថា បាតុកម្មនោះ គឺបានរៀបចំយ៉ាងត្រឹមត្រូវពីក្រុមអង្គរក្ស ដែលស្ថិតក្នុងការគ្រប់គ្រងរបស់ លោក ហ៊ីង ប៊ុនហៀង។
បាតុករម្នាក់ក្នុងចំណោមបាតុកររាប់ពាន់នាក់ ដែលបានចូលរួមធ្វើបាតុកម្មនៅរដ្ឋសភាធ្លាប់ ប្រាប់ អាស៊ីសេរីដោយសុំមិនបញ្ចេញឈ្មោះ ឲ្យដឹងថា លោកត្រូវបានមេអង្គរក្សម្នាក់បញ្ជូនឲ្យមកប្រជុំនៅបន្ទាយទួលក្រសាំងមុនចេញទៅធ្វើបាតុកម្ម។ លោកថា នៅពេលចូលដល់ក្នុងបន្ទាយ លោកឃើញមានអង្គរក្សជាច្រើនស្លៀកពាក់ជាពលរដ្ឋធម្មតា ត្រៀមចេញធ្វើបាតុកម្ម ហើយមុនពេលចេញដំណើរទៅធ្វើបាតុកម្មនៅមុខរដ្ឋសភា គេបានចែកបាយឲ្យម្នាក់មួយបញ្ចប់៖ «មេដឹកនាំ គេហៅថា មកបងប្អូនចុះពីឡានមកមុខរដ្ឋសភា។ អ្នកដែលស្រែកអីហ្នឹងសុទ្ធតែក្រុមរបស់គេទេ។ ពួកខ្ញុំគ្រាន់តែជាកូនអុកសម្រាប់តែគេប្រើឲ្យមានគ្នាបានច្រើន»។
បុរសដែលចូលរួមធ្វើបាតុកម្មរូបនេះឲ្យដឹងថា លោកមិនមែនជាក្រុមអង្គរក្សរបស់លោក ហ៊ីង ប៊ុនហៀង ទេ ប៉ុន្តែលោកជាសកម្មជនគណបក្សប្រជាជនកម្ពុជាម្នាក់នៅខេត្តកណ្តាល។ លោកថា អាជ្ញាធរនៅមូលដ្ឋានរបស់លោកជាអ្នករៀបចំឲ្យលោកបានចូលរួមក្នុងការទាមទារនៅមុខរដ្ឋសភានោះ ។
យុវជននេះរៀបរាប់ទៀតថា នៅពេលបាតុកម្មបញ្ចប់ និងបានវាយប្រហារលើតំណាងរាស្ត្រគណបក្សសង្គ្រោះជាតិរួច ក្រុមបាតុករទាំងអស់គ្នា ត្រូវគេប្រាប់ឲ្យឡើងឡានត្រឡប់មកវិញ ហើយពេលធ្វើដំណើរមកដល់ក្រុងតាខ្មៅ ឡានបានទៅឈប់ចតនៅមុខសណ្ឋាគារមួយ ហើយមានបុរសម្នាក់កាន់វិទ្យុទាក់ទង (អាយកូម) នៅក្នុងដៃផងនោះ បានផ្ដល់ប្រាក់ឲ្យបាតុករម្នាក់ ២ម៉ឺនរៀល។ ដោយឡែក ជនដៃដល់ដែលវាយតំណាងរាស្ត្រមិនបានឈរនៅមុខសណ្ឋាគារដូចបាតុករដទៃទេ ដោយជននោះបានចូលទៅក្នុងសណ្ឋាគារ៖ «ឡានហ្នឹងពេលចេញមកវិញ គេជិះតាមផ្លូវជាតិលេខ១ វាងតាមផ្លូវថៃហ្គ័រ ហើយចូលបន្ទាយវិញ។ មុនចូលបន្ទាយគេចែកលុយម្នាក់ពីរម៉ឺនៗ»។
បុរសជាបាតុករដដែលនោះប្រាប់ទៀតថា បាតុកម្មដែលឈានដល់ការប្រព្រឹត្តហិង្សាដ៏កំរោលលើតំណាងគណបក្សសង្គ្រោះជាតិ គឺលោក គង់ សភា និង ញ៉យ ចំរើន ឲ្យរងរបួសធ្ងន់ស្ទើរបាត់បង់ជីវិតនោះ មានការរៀបចំដោយកងអង្គរក្សលោក ហ៊ុន សែន។
ចំណែកក្រុមអ្នកបើកឡានដឹកក្រុមបាតុករវិញ ក៏បានឲ្យដឹងដែរថា ពួកគាត់បានដឹកក្រុមអង្គរក្សជិត ២០០នាក់ ចេញពីបន្ទាយនៅក្រុងតាខ្មៅ ដើម្បីចូលរួមធ្វើបាតុកម្មនៅមុខរដ្ឋសភា កាលពីឆ្នាំ២០១៥ ដែលជាបាតុកម្មប្រឆាំងលោក កឹម សុខា ខណៈលោក កឹម សុខា ពេលនោះជាអនុប្រធានទី១ នៃរដ្ឋសភា។
ម្ចាស់ឡានឈ្នួលទាំងនោះលើកឡើងថា កងអង្គរក្សរបស់លោក ហ៊ុន សែន ទាំងនោះស្លៀក ពាក់ស៊ីវិលបន្លំខ្លួនជាប្រជាពលរដ្ឋធម្មតាដែលពួកគាត់ដឹកចេញពីបន្ទាយឈ្មោះថា "ទីបញ្ជាការដ្ឋានកងអង្គរក្សសម្ដេច ហ៊ុន សែន" ឬហៅថា "បន្ទាយពោងលឿង" ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ សំដៅមកបាតុកម្មជាមួយអ្នកគាំទ្រគណបក្សប្រជាជនកម្ពុជារាប់ពាន់នាក់ផ្សេងទៀត។
អ្នកបើកឡានម្នាក់ឲ្យដឹងថា មានគេជួលឡានដឹកមនុស្សទៅធ្វើបាតុកម្មក្នុងតម្លៃ ៤០ដុល្លារក្នុងឡានមួយគ្រឿង។ លោកថាមុនដំបូង អ្នកជួលឡានប្រាប់ថា ជួលឡានដឹកមនុស្សទៅប្រជុំទេ ប៉ុន្តែដល់ថ្ងៃកំណត់ទើបលោកដឹងថា គេដឹកក្រុមអង្គរក្សទាំងនោះចេញពីបន្ទាយ គឺឲ្យទៅធ្វើបាតុកម្ម។ លោកបន្តថា ពេលទៅដល់បន្ទាយលោកឃើញអង្គរក្សទាំងនោះកាន់ដំបង បដា និងអ្នកខ្លះទៀតកាន់ដុំថ្មនៅនឹងដៃជាស្រេច៖ «ទាហានទាំងអស់ សុទ្ធតែទាហានទាំងអស់ មានស៊ីវិលឯណាទៅនៅក្នុងហ្នឹង? ប្រុសៗ ក្មេងអាយុ ៣០ចុះ។ ចេញពីនេះទៅបាយទាហានម្នាក់មួយកញ្ចប់ៗ គេហូបហើយបានគេចេញទៅ»។
ទោះបីជាមានការលើកឡើងបែបនេះពីអ្នកចូលរួមធ្វើបាតុកម្ម និងអ្នកបើកឡានដឹកបាតុករក្តី ក៏លោក ហ៊ីង ប៊ុនហៀង តែងបដិសេធមិនទទួលស្គាល់ថា កងអង្គរក្សរបស់លោកបានចូលរួមក្នុងធ្វើបាតុកម្ម និងបង្កអំពើហិង្សានោះទេ។ ប៉ុន្តែ ក្រោយមានការថ្កោលទោសលើការប្រើហិង្សាលើតំណាងរាស្រ្តគណបក្សសង្គ្រោះជាតិជាបន្តបន្ទាប់ រួមទាំងមានការអំពាវនាវពីលោក ហ៊ុន សែន ឲ្យជនដៃដល់ចូលខ្លួនសារភាពផងនោះ ទីបំផុតមានកងអង្គរក្សរបស់ ហ៊ុន សែន បីនាក់ឈ្មោះ ចាយ សារិទ្ធ ម៉ៅ ហឿន និង សុត វណ្ណនី បានចេញមុខមកសារភាព កាលពីខែវិច្ឆិកា ឆ្នាំ២០១៥។ ពួកគេត្រូវបានសាលាដំបូងក្រុងភ្នំពេញសម្រេចផ្ដន្ទាទោសឲ្យជាប់ពន្ធនាគាររយៈ ៤ឆ្នាំ ក្រោមបទចោទ ថា បានប្រព្រឹត្តហិង្សាមានស្ថានទម្ងន់ទោសលើក្រុមតំណាងរាស្ត្រ។ ប៉ុន្តែការអនុវត្តទោសនោះបានតែ ១ឆ្នាំទេ។ ពួកគេទាំងបី ត្រូវបានដោះលែងឲ្យមានសេរីភាពវិញ កាលពីថ្ងៃទី៤ ខែវិច្ឆិកា ឆ្នាំ២០១៦ ក្រោយតុលាការសម្រេចព្យួរទោសដែលនៅសល់ចំនួន ៣ឆ្នាំទៀត។
ជាងនេះទៅទៀតទោះស្ថិតក្នុងស្ថានភាពព្យួរទោសអ្នកទាំងបីត្រូវបានលោក ហ៊ុន សែន ចេញ អនុក្រឹត្យដំឡើងឋានន្តរស័ក្ដិ គឺលោក សុត វណ្ណី និងលោក ម៉ៅ ហឿន ពីវរសេនីយ៍ទោ ទៅជាវរសេនីយ៍ឯក។
ចំណែកឈ្មោះ ចាយ សារិទ្ធ ត្រូវបានលោក ហ៊ុន សែន ស្នើសុំទៅព្រះមហាក្សត្រ ចេញព្រះរាជក្រឹត្យដំឡើងឋានន្តរស័ក្តិពីវរសេនីយ៍ឯកទៅជាឧត្តមសេនីយ៍ត្រី។
សហរដ្ឋអាមេរិក កាលពីពេលថ្មីៗ នេះ បានដាក់មេកងអង្គរក្សលោក ហ៊ុន សែន រូបនេះ ជាបុគ្គលទីមួយ នៃក្រុមមន្រ្តីរបបលោក ហ៊ុន សែន ទៅក្នុងបញ្ជីខ្មៅ ដែលត្រូវបង្កកទ្រព្យសម្បត្តិ និងហាមឃាត់ក្រុមហ៊ុនអាមេរិកមិនឲ្យរកស៊ីជាមួយ។
សហរដ្ឋអាមេរិករកឃើញថា លោក ហ៊ីង ប៊ុនហៀង ដែលជាមនុស្សជំនិតរបស់លោក ហ៊ុន សែន រូបនេះ បានជាប់ពាក់ព័ន្ធ និងអំពើហិង្សាក្នុងការបង្រ្កាបក្រុមអ្នកតវ៉ា និងសកម្មជនបក្សប្រឆាំង ដូចជាការបោកគ្រាប់បែកលើអ្នកតវ៉ាអហិង្សា កាលពីឆ្នាំ១៩៩៧ ដែលធ្វើឲ្យស្លាប់ និងរបួសមនុស្សជាច្រើននាក់ រួមទាំងរបួសជនជាតិអាមេរិកមួយរូបផង។
ជាងនេះទៅទៀត លោក ហ៊ីង ប៊ុនហៀង បានរំលោភសិទ្ធិមនុស្សយ៉ាងធ្ងន់ធ្ងរក្នុងរយៈពេលជាច្រើនឆ្នាំចុងក្រោយនេះ រួមមានអំពើហិង្សាកាលពីឆ្នាំ២០១៣ នៅក្បែរវត្តភ្នំ និងអំពើហិង្សាវាយដំតំណាងរាស្ត្របក្សប្រឆាំងពីររូបនៅមុខរដ្ឋសភា កាលពីឆ្នាំ២០១៥៕