អ្នក​ឃ្លាំមើល​សង្គម​ទាម​ទារ​ឱ្យ​របប​ក្រុង​ភ្នំពេញ​បកស្រាយ​ឱ្យ​បាន​ច្បាស់លាស់ រឿង​អ្នកស្រី​ យីងឡាក់ ប្រើ​លិខិត​ឆ្លង​ដែន​កម្ពុជា​ធ្វើ​ជំនួញ​ក្រៅ​ប្រទេស​

ដោយ សេក បណ្ឌិត
2019-01-10
អ៊ីម៉ែល
មតិ
Share
បោះពុម្ព
អតីត​នាយករដ្ឋមន្ត្រី​ថៃ អ្នកស្រី យីងឡាក់ ស៊ីណាវ៉ាត្រ (Yingluck Shinawatra) នៅ​វិមាន​សន្តិភាព រាជធានី​ភ្នំពេញ កាល​ពីអំឡុង​​ឆ្នាំ​២០១១។
អតីត​នាយករដ្ឋមន្ត្រី​ថៃ អ្នកស្រី យីងឡាក់ ស៊ីណាវ៉ាត្រ (Yingluck Shinawatra) នៅ​វិមាន​សន្តិភាព រាជធានី​ភ្នំពេញ កាល​ពីអំឡុង​​ឆ្នាំ​២០១១។
Photo: RFA

អ្នក​ឃ្លាំមើល​សង្គម​អះអាង​ថា រឿង​អតីត​នាយករដ្ឋមន្ត្រី​ថៃ អ្នក​ស្រី យីងឡាក់ ស៊ីណាវ៉ាត្រា (Yingluck Shinawatra) កំពុង​ប្រើប្រាស់​លិខិត​ឆ្លងដែន​កម្ពុជា​​នោះ គឺ​ជា​រឿង​ធំ​ប៉ះពាល់​ដល់​មុខ​មាត់​ជាតិ ​ដែល​របប​ក្រុង​ភ្នំពេញ​ត្រូវ​តែ​ចេញ​មុខ​បកស្រាយ​ឱ្យ​បាន​ច្បាស់លាស់។ កាសែត​បរទេស​បាន​លាត​ត្រដាង​កាល​ពី​ពេល​ថ្មីៗ​នេះ​ថា អ្នក​ស្រី​ យីងឡាក់ មាន​កាន់​លិខិតឆ្លងដែន​កម្ពុជា និង​បាន​ប្រើប្រាស់​​ដើម្បី​ធ្វើ​ដំណើរ​ និង​ធ្វើ​ជំនួញ​ផ្ទាល់​​​ខ្លួន​ជា​ច្រើន​មុខ​។ ក៏​ប៉ុន្តែ​ របប​ក្រុង​ភ្នំពេញ​បាន​បន្ត​​បដិសេធ​ថា ខ្លួន​មិន​បាន​ជាប់​ពាក់ព័ន្ធ​នឹង​ការ​ផ្ដល់​ឯកសារ​ផ្លូវការ​ណាមួយ​ដល់​អ្នកស្រី យីងឡាក់ នោះ​ឡើយ។

ប្រធាន​អង្គការ​សម្ពន្ធ​គណនេយ្យភាព​សង្គម​កម្ពុជា (ANSA) លោក សន ជ័យ ជំរុញ​ឱ្យ​របប​លោក ហ៊ុន សែន ផ្ដល់​ព័ត៌មាន​លម្អិត​ទាក់ទង​នឹង​រឿង​អតីត​នាយករដ្ឋ​មន្ត្រី​ថៃ​មាន​លិខិត​ឆ្លងដែន​កម្ពុជា​​ ព្រោះ​លោក​ជឿជាក់​​​ថា ​អ្នកស្រី យីងឡាក់ ទំនង​ជា​មិន​មាន​សញ្ជាតិ​​ខ្មែរ​នោះ​ឡើយ​ ប៉ុន្តែ​ហេតុ​អ្វី​បាន​ជា​កាន់​លិខិត​ឆ្លងដែន​ផ្លូវការ ដែល​​​​​​មាន​តែ​ក្រសួង​ការ​បរទេស​ទេ ដែល​មាន​សិទ្ធិ​ចេញ​ឲ្យ​ប្រើប្រាស់​ជា​ផ្លូវការ​នោះ។ លោក​បន្ត​ថា ការ​ទទួល​បា​ន​លិខិត​ឆ្លងដែន​ ដោយ​​មិន​បាន​ឆ្លង​កាត់​តាម​នីតិវិធី​ឱ្យ​បាន​ត្រឹម​ត្រូវ​ គឺ​ជា​ការ​អនុវត្ត​​ដោយ​បំពាន​ច្បាប់ ជា​ពិសេស​ក្នុង​ករណី​​​ជន​បរទេស​ដែល​មិន​មាន​សញ្ជាតិ​ខ្មែរ​បែប​នេះ៖ «វា​ជា​រឿង​ដែល​មាន​បញ្ហា​ផ្លូវ​ច្បាប់​ហើយ ប្រសិន​បើ​ជន​បរទេស​ម្នាក់​អាច​ប្រើប្រាស់​លិខិត​ឆ្លងដែន​របស់​កម្ពុជា ដោយ​មិន​មាន​ឆ្លង​កាត់​ការ​ធ្វើ​សញ្ជាតូបនីយកម្ម ឬក៏​ទទួល​បាន​នូវ​សញ្ជាតិ​កម្ពុជា»

កាល​ពី​ថ្ងៃពុធ កាសែត សាវ ឆាយណា ម៉នីង ប៉ុស្តិ៍ (South China Morning Post) ដែល​មាន​មូលដ្ឋាន​នៅ​ទីក្រុង​ហុងកុង (Hong Kong) បាន​​​​ចេញផ្សាយ​អត្ថបទ​មួយ​ដ៏​គួរ​ឱ្យ​ភ្ញាក់​ផ្អើល ដោយ​បាន​រក​ឃើញ​ថា អ្នក​ស្រី យីងឡាក់ ដែល​កំពុង​រស់​នៅ​និរទេស​ខ្លួន​នៅ​ក្រៅ​ប្រទេស​នោះ បាន​ប្រើប្រាស់​លិខិត​ឆ្លង​ដែន​ផ្លូវការ​របស់​​កម្ពុជា ដើម្បី​ចុះឈ្មោះ​ធ្វើ​ជា​អគ្គ​នាយក​ក្រុម​ហ៊ុន​សាជីវកម្ម​មួយ​ឈ្មោះ ភីធី ខភើរ៉េសិន (P.T. Corporation) នៅ​ទីក្រុង​ហុងកុង កាល​ពី​ខែ​សីហា​ ឆ្នាំ ២០១៨ កន្លង​ទៅ។ អត្ថបទ​របស់​កាសែត​ South China Morning Post ដែល​បាន​​ភ្ជាប់​មក​ជាមួយ​នូវ​ឯកសារ​ក្រុម​ហ៊ុន​ជា​ភស្តុតាង​ផង​នោះ បាន​បង្ហាញ​ឱ្យ​ឃើញ​ពី​ភាព​ផ្ទុយ​គ្នា​ទាំងស្រុង​ទៅ​នឹង​ការ​បក​ស្រាយ​របស់​របប​ក្រុង​ភ្នំពេញ​​​​ដែល​ថា ពួក​គេ​មិន​បាន​ផ្ដល់​ឯកសារ​ផ្លូវ​ការ​ណា​មួយ​ឱ្យ​អ្នក​ស្រី យីងឡាក់ ដើម្បី​​​ឱ្យ​អតីត​នាយក​រដ្ឋ​មន្ត្រី​​ថៃ​រូប​នេះ ​រត់​គេច​ចេញ​ពី​ការ​តាម​ចាប់​ខ្លួន​របស់​អាជ្ញាធរ​ថៃ​នោះ​ឡើយ។ ឯកសារ​ផ្សេង​ទៀត​បង្ហាញ​ថា អ្នកស្រី យីងឡាក់ ត្រូវ​បាន​តែងតាំង​ជា​ប្រធាន​ក្រុមហ៊ុន សានថូ អ៊ិនធើណេសិនណល ខន់ថេនមិន ធើមីណល (Shantou International Container Terminals) ​នៅ​ខេត្តគ័ង​ទុង (Guangdong) ប្រទេស​ចិន។

ទោះ​បី​ជា​មាន​ភស្តុតាង​យ៉ាង​ណា​ក៏​ដោយ ក៏​មន្ត្រី​នាំ​ពាក្យ​ទីស្ដីការ​គណៈរដ្ឋ​មន្ត្រី​ លោក ផៃ ស៊ីផាន បាន​ច្រាន​ចោល​ព័ត៌មាន​​ដែល​ថា អ្នក​ស្រី​ យីងឡាក់ មាន​កាន់​លិខិត​ឆ្លង​ដែន​ផ្លូវការ​របស់​កម្ពុជា​សម្រាប់​ការ​ធ្វើ​ដំណើរ​ទៅ​​ក្រៅ​ប្រទេស និង​ធ្វើ​ជំនួញ​ផ្ទាល់​ខ្លួន។ លោក​បកស្រាយ​ថា ​អតីត​នាយក​រដ្ឋ​មន្ត្រី​ថៃ​រូប​នេះ មិន​មាន​ឈ្មោះ​ក្នុង​គល់​បញ្ជី​នៃ​លិខិត​ឆ្លង​ដែន​កម្ពុជា​ដែល​គ្រប់​គ្រង​ដោយ​ក្រសួង​មហាផ្ទៃ​នោះ​ឡើយ។ លោក​អះអាង​ថា​ របប​របស់​លោក​មិន​ជាប់​ពាក់ព័ន្ធ​នឹង​ការ​រត់​គេច​ខ្លួន​របស់​អ្នកស្រី យីងឡាក់ នោះ​ឡើយ៖ «ប៉ាស្ព័រ​ដែល​ឈ្មោះ​អ្នកស្រី យីងឡាក់ គឺ​អត់​មាន​នៅ​ក្នុង​គល់​បញ្ជី​ទេ បាន​សេចក្ដី​ថា ក្រសួង​មហាផ្ទៃ​អត់​ទទួល​ស្គាល់​អ្វី​ដែល​អ្នក​សារព័ត៌មាន​បាន​ចុះ ហើយ​រឿង​តទៅ​ទៀត​មិន​ដឹង​វែកញែក​ មិន​ដឹង​ថា យ៉ាងម៉េច​ទេ ពីព្រោះ​អត់​មាន​នៅ​ក្នុង​គល់​បញ្ជី»

លោក សន ជ័យ ថ្លែង​ថា ការ​បកស្រាយ​បែប​នេះ​មិន​ទាន់​អាច​ទទួល​យក​បាន​នោះ​ទេ ដោយ​​​​សារ អ្នក​ស្រី យីងឡាក់ ​ជា​ឥស្សរជន​នយោបាយ​មួយ​រូប​ ដែល​ពិភពលោក​មាន​ការ​ចាប់​អារម្មណ៍​ ហើយ​ម្យ៉ាង​វិញ​ទៀត​ព័ត៌មាន​​​​ដែល​ចេញ​ផ្សាយ​ដោយ​កាសែត​ហុងកុង​នោះ មាន​ភស្តុតាង​រឹង​មាំ​ដែល​បង្ហាញ​ថា អតីត​នាយករដ្ឋមន្ត្រី​​ថៃ​រូប​នេះ ​កំពុង​ប្រើប្រាស់​លិខិត​ឆ្លង​ដែន​កម្ពុជា​ក្នុង​ការ​ធ្វើ​ជំនួញ​ផ្ទាល់​ខ្លួន៖ «ការ​ដែល​មិន​មាន (ក្នុង) គល់​បញ្ជី​មាន​ន័យ​ថា យ៉ាង​ម៉េច? មានន័យ​ថា តើ​លិខិត​ឆ្លងដែន​ហ្នឹង ឬក៏​ការ​ផ្ដល់​ជូន​ហ្នឹង​ជា​ឯកសារ​ក្លែងក្លាយ ឬក៏​យ៉ាងណា? ប៉ុន្តែ​ខ្ញុំ​គិត​ថា បើ​​ជា​ឯកសារ​ក្លែង​ក្លាយ​ ទៅ​មិន​រួច​ទេ ព្រោះ​ការ​ត្រួតពិនិត្យ​ ការ​ស្កែន​ក្រយៅ​ដៃ ការ​ផ្ទៀង​ផ្ទាត់​ទិន្នន័យ​នៅ​ពេល​ដែល​អ្នក​ធ្វើ​ដំណើរ​ឆ្លង​កាត់​កន្លែង​ត្រួត​ពិនិត្យ​នៅ​តាម​ព្រះលាន​យន្តហោះ​ហ្នឹង គឺ​គេ​មាន​ការ​ត្រួតពិនិត្យ​ហ្មត់​ចត់​ណាស់ ហើយ​ព័ត៌មាន​នៃ​បុគ្គល​ម្នាក់​នៅ​ក្នុង​លិខិត​ឆ្លង​ដែន​ គឺ​គេ​រៀប​ចំ​ឱ្យ​មាន​ប្រព័ន្ធ​ត្រួត​ពិនិត្យ​មួយ​យ៉ាង​ហ្មត់​ចត់​បំផុត។ មិន​មែន​ចេះតែ​កាន់​លិខិត​ឆ្លង​ដែន​ទៅជា​លិខិត​ក្លែង​ក្លាយ​បាន​នោះ​ទេ អ៊ីចឹង​វា​ជា​រឿង​មួយ​ដែល​ត្រូវ​មាន​ការ​បំភ្លឺ​ឱ្យ​បាន​​ច្រើន​ជាង​នេះ»

អាស៊ីសេរី​បាន​ព្យាយាម​ទាក់ទង​អ្នក​នាំ​ពាក្យ​អគ្គនាយកដ្ឋាន​អត្តសញ្ញាណកម្ម​ក្រសួង​មហាផ្ទៃ លោក​ សាយ ម៉េងឈាង ជាច្រើន​ដង​តាម​ទូរស័ព្ទ​នៅ​ថ្ងៃ​ទី១០ មករា ដើម្បី​សាកសួរ​បន្ថែម​ពី​រឿង​លិខិត​ឆ្លងដែន​របស់​អ្នក​ស្រី យីងឡាក់ នេះ ប៉ុន្តែ​ទូរស័ព្ទ​របស់​លោក​មិន​អាច​ទាក់ទង​បាន​។ ក៏​ប៉ុន្តែ​មន្ត្រី​ជាន់ខ្ពស់​មួយ​រូប​នៃ​អគ្គនាយកដ្ឋាន​អត្តសញ្ញាណកម្ម បាន​អះអាង​ប្រាប់​អាស៊ី​សេរី​ថា ​អគ្គនាយកដ្ឋាន​អត្តសញ្ញាណកម្ម ទទួល​ខុស​ត្រូវ​តែ​ទៅ​លើ​លិខិត​​ឆ្លងដែន​ធម្មតា​ប៉ុណ្ណោះ ដោយឡែក​លិខិត​ឆ្លងដែន​ផ្លូវ​ការ និង​​​លិខិត​ឆ្លង​ដែន​ការ​ទូត ក្រសួង​ការបរទេស​​ជា​អ្នក​ទទួល​ខុស​ត្រូវ។

អាស៊ី​សេរី​បាន​ទាក់ទង​ទៅ​អ្នក​នាំ​ពាក្យ​ក្រសួង​ការបរទេស​ លោក កេត សុផាន់ តាម​លេខ​ទូរស័ព្ទ​ទាំង​ពីរ​ខ្សែ​របស់​លោក​ ប៉ុន្តែ​មួយ​ខ្សែ​មិន​អាច​ទាក់ទង​បាន និង​មួយ​ខ្សែ​ទៀត​មិន​មាន​អ្នក​ទទួល។

អ្នក​ស្រី យីងឡាក់ ស៊ីណាវ៉ាត្រា (Yingluck Shinawatra) អាយុ ៥១ឆ្នាំ ត្រូវ​បាន​តុលាការ​ថៃ​កាត់​ទោស​កំបាំង​មុខ ​ឱ្យ​ជាប់​ពន្ធនាគារ​រយៈពេល​ ៥ ឆ្នាំ ពី​បទ​ធ្វេស​ប្រហែស​នៅ​ក្នុង​គោល​​នយោបាយ​ឧបត្ថម្ភ​ស្រូវ​អង្ករ អំឡុង​ពេល​អ្នកស្រី​ធ្វើ​ជា​នាយករដ្ឋមន្ត្រី​ ចន្លោះ​ពី​ឆ្នាំ ២០១១ ដល់​ឆ្នាំ ២០១៤ កន្លងទៅ។ ទោះ​ជា​យ៉ាង​ណា អ្នក​ស្រី​បាន​បាត់​ខ្លួន​យ៉ាង​អាថ៌កំបាំង មុន​ការ​ប្រកាស​សាលក្រម​នេះ​មួយ​ខែ ហើយ​​ការ​រត់​ខ្លួន​ដោយ​ជោគជ័យ​របស់​អ្នក​ស្រី​ត្រូវ​បាន​មជ្ឈដ្ឋាន​មួយ​ចំនួន​ដាក់​ការ​សង្ស័យ​ថា មាន​ការ​ជួយ​ជ្រោមជ្រែង​ពី​របប​ក្រុង​ភ្នំពេញ។

អ្នក​វិភាគ​នយោបាយ​ បណ្ឌិត ឡៅ ម៉ុងហៃ ​កត់​សម្គាល់​ថា ត្រកូល ហ៊ុន និង​ត្រកូល​​ ស៊ីណាវ៉ាត្រា មាន​ទំនាក់​ទំនង​ល្អ​នឹង​គ្នា ដូចនេះ​លោក​ ហ៊ុន សែន អាច​នឹង​ជួយ​អ្នកស្រី​ យីងឡាក់ ឱ្យ​ទទួល​បាន​លិខិត​ឆ្លងដែន​នេះ៖ «គេ​មិន​គួរ​ឆ្ងល់​ទេ ព្រោះ​គ្រួសារ ថាក់ស៊ីន ហ្នឹង មាន​ទំនាក់ទំនង​ជិត​ស្និទ្ធ​ជាមួយ​នឹង​សម្ដេច​នាយក រហូត​ដល់​សម្ដេច​នាយក​ហ្នឹង​តែង​តាំង​ ថាក់ស៊ីន ជា​ទីប្រឹក្សា​របស់​គាត់​ដែរ។ តាំងពី​ហ្នឹង​មក​ ទំនាក់​ទំនង​ក៏​ចេះ​តែ​បន្ត​ទៀត​ទៅ​ដល់​ប្អូន​ ថាក់ស៊ីន ដែល​ជា​នាយក​រដ្ឋ​មន្ត្រី​ហ្នឹង ហើយ​នៅ​ពេល​នោះ​យើង​ដឹង​ហើយ​ថា សម្ដេច​នាយក​ហ្នឹង​ក៏​បាន​អនុញ្ញាត​ឱ្យ​ពួក​អាវ​ក្រហម​មក​ធ្វើ​បាតុកម្ម​នៅ​សៀមរាប​ផង​ដែរ​។ ដូច្នេះ​ឱ្យ​ប៉ាសស្ព័រ​ហ្នឹង​ក៏​ជា​សកម្មភាព​ជួយ​ជា​បន្ត​ទៀត​របស់​សម្តេច​នាយករដ្ឋមន្ត្រី​យើង​ហ្នឹង»

អ្នក​ឃ្លាំមើល​សង្គម លោក​ សន ជ័យ ថ្លែង​ថា ទោះបីជា​អ្នក​នយោបាយ​មាន​ទំនាក់ទំនង​ល្អ​នឹង​គ្នា​យ៉ាង​ណា​ក៏​ដោយ​ ក៏​ពួក​គេ​មិន​ត្រូវ​អនុវត្ត​ដោយ​បំពាន​ច្បាប់​របស់​ប្រទេស​ខ្លួន​ឯង​នោះ​ដែរ។

សំឡេង៖ “«នាក់​ទំនង​ជិត​ស្និទ្ធ​រវាង​អ្នក​នយោបាយ​ក្នុង​កម្រិត​ទំនាក់​ទំនង​អន្តរជាតិ​ វា​ជា​រឿង​មួយ​​ចៀស​មិន​រួច​ ក៏​ប៉ុន្តែ​ការ​អនុវត្ត​ច្បាប់​នៅ​ប្រទេស​មួយ​ដែល​គេ​ហៅ​ថា ជា​រដ្ឋ​អធិបតេយ្យ​ហ្នឹង គឺ​មិន​អាច​ទៅ​ពាក់ព័ន្ធ​ជាមួយ​នឹង​ការ​ចេញ​អត្តសញ្ញាណ ចេញ​លិខិត​ឆ្លងដែន​ឱ្យ​ជន​បរទេស​ដែល​ជា​មិត្តភក្តិ​នឹង​គ្នា ទោះបី​ជា​ពួក​គេ​ស្គាល់​គ្នា​ក៏ដោយ​ ដរាប​ណា​មិន​មាន​ការ​ចូល​សញ្ជាតិ​កម្ពុជា»

មេដឹកនាំ​របប​ក្រុង​ភ្នំពេញ​លោក ហ៊ុន សែន មាន​ទំនាក់​ទំនង​យ៉ាង​ជិត​ស្និទ្ធ​ជាមួយ​អតីត​នាយករដ្ឋមន្ត្រី​ថៃ ដែល​​ត្រូវ​ជា​បងប្រុស​បង្កើត​របស់​អ្នកស្រី យីងឡាក់ គឺ​លោក ថាក់ស៊ីន ស៊ីណាវ៉ាត្រា (Thaksin Shinawatra)។ លោក​ ហ៊ុន សែន ធ្លាប់​បាន​ផ្ដល់​ភូមិគ្រឹះ​មួយ​កន្លែង​នៅ​ក្រុង​ភ្នំពេញ​ឱ្យ​លោក ​ថាក់ស៊ីន ស្នាក់​នៅ និង​បាន​បដិសេធ​សំណើសុំ​​​បញ្ជូន​ខ្លួន​អតីត​នាយករដ្ឋមន្ត្រី​រូប​នេះ​ទៅ​ប្រទេស​ថៃ​ផង។ សំខាន់​ជាង​នេះ​ទៀត លោក​ថែម​ទាំង​​បាន​តែងតាំង​លោក ថាក់ស៊ីន ឱ្យ​ធ្វើ​ជា​ទីប្រឹក្សា​សេដ្ឋកិច្ច​ឱ្យ​របប​របស់​លោក​នៅ​គ្រា​នោះ​ទៀត​ផង៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

អ្នក​អាន​អនាមិក

កាលណារស់នៅនិរទេសខ្លួនហេីយគេមិនចាំបាច់ប្រេីពាក្យក្រៅប្រទេសទេ៕

Jan 11, 2019 09:25 AM

គេហទំព័រ​ទាំងមូល