សមត្ថកិច្ចខេត្តប៉ៃលិនចុះឈូសឆាយតូបលក់ដូររបស់អ្នកស្រុក
2011.05.24
ក្រុមអ្នកភូមិដែលមានតូបលក់ដូរនៅក្នុងផ្សារផ្លូវបំបែកសាលាក្រៅ អស់រយៈពេលជាច្រើនឆ្នាំមកហើយនោះ បានរិះគន់ចំពោះអាជ្ញាធរខេត្ត ដែលបានប្រើប្រាស់កម្លាំងសមត្ថកិច្ចជាច្រើន និងគ្រឿងចក្រជាច្រើនគ្រឿង ទៅឈូសបំផ្លាញតូបលក់ដូររបស់ពួកគាត់ ដើម្បីបង្ខំឲ្យទៅទិញតូបនៅផ្សារឯកជនថ្មីមួយដែលបានសាងសង់រួចរាល់ កាលពីឆ្នាំ២០១០ តែគ្មានមនុស្សទៅជួលតូបលក់ដូរ។
អ្នកភូមិរងគ្រោះបានថ្លែងថា អាជ្ញាធរខេត្តប៉ៃលិន បានប្រើប្រាស់រូបភាពយកទីតាំងផ្សារផ្លូវបំបែកសាលាក្រៅ ដែលពួកគាត់កំពុងលក់ដូរ ដើម្បីសាងសង់រង្វង់មូលនៅលើផ្លូវជាតិលេខ៥៩។ តែធាតុពិតពួកគេមានចេតនាបង្ខំឲ្យក្រុមអ្នកភូមិលក់ដូរនៅទីនោះ ទីជួលតូបនៅផ្សារឯកជនថ្មីមួយ ដែលមានភាគហ៊ុនពាក់ព័ន្ធនឹងអាជ្ញាធរមូលដ្ឋាន។
កាលពីយប់ថ្ងៃទី២៣ និងនៅថ្ងៃទី២៤ ខែឧសភា ឆ្នាំ២០១១ អាជ្ញាធរខេត្តប៉ៃលិន បានប្រើប្រាស់កងកម្លាំងសមត្ថកិច្ចចម្រុះជិត ១០០នាក់ និងកម្មករប្រមាណជា ៦០នាក់ ដើម្បីដាក់ទៅការពារ និងធ្វើការរុះរើកម្ទេចតូបលក់ដូររបស់អ្នកភូមិជាច្រើនកន្លែងនៅក្នុងផ្សារផ្លូវបំបែកសាលាក្រៅ ក្នុងខេត្ត ប៉ៃលិន។
ទាក់ទិនបញ្ហាខាងលើនេះ លោក អ៊ី ឈាន អភិបាលខេត្តប៉ៃលិន បានមានប្រសាសន៍ថា ខាងអាជ្ញាធរខេត្តបានចេញសេចក្ដីជូនដំណឹងទៅដល់ប្រជាពលរដ្ឋដែលមានតូបលក់ដូរលើចិញ្ចើមផ្លូវបំបែកនោះជាច្រើនសាមកហើយថា ដីនៅត្រង់ចំណុចផ្លូវបំបែកនោះ ប៉ះចំណីផ្លូវជាតិលេខ៥៩ ដែលក្រុមហ៊ុនចិន កំពុងធ្វើការសាងសង់។
លោកអភិបាលខេត្តបានមានប្រសាសន៍បន្តថា ខាងអាជ្ញាធរខេត្តកំពុងបានគិតគូរពីគោលនយោបាយដោះស្រាយជូនអ្នករងផលប៉ះពាល់ជាក់ស្ដែងនៅទីនោះ ដោយខាងខេត្តបានធ្វើសំណើដាក់ទៅក្រសួងរួចរាល់ហើយ ប៉ុន្តែនៅមិនទាន់ទទួលចម្លើយភ្លាមៗទេ។
ក្រុមអ្នកភូមិបានឲ្យដឹងថា ផ្សារឯកជនថ្មីនោះមានចម្ងាយប្រហែល ៤០០ម៉ែត្រពីទីតាំងផ្សារផ្លូវបំបែកសាលាក្រៅចាស់ ហើយភាគីម្ចាស់ផ្សារមានការប្រកាសជួលថ្លៃពេក ដែលក្រុមអាជីវករមិនអាចមានលទ្ធភាពលៃលកប្រាក់កាសយកទៅជួលបាន។
មន្ត្រីសិទ្ធិមនុស្សនៃសមាគមអាដហុក លោក យិន ម៉េងលី បានមានប្រសាសន៍ថា អាជ្ញាធរខេត្តគួរធ្វើការពិនិត្យច្បាប់អស្សាមិករណ៍ដែលរដ្ឋសភាទើបបានធ្វើការអនុម័តចេញមកហើយនោះ។ បញ្ហាមួយទៀត ខាងអាជ្ញាធរខេត្តត្រូវគិតគូរការដោះស្រាយសំណងឲ្យបានសមរម្យជូនប្រជាពលរដ្ឋដែលរងផលប៉ះពាល់ក្នុងបញ្ហាខាងលើនេះ។
ប្រភពពីក្រុមអ្នកភូមិឲ្យដឹងថា តូបលក់ដូររបស់អាជីវករនៅផ្សារផ្លូវបំបែកខាងលើនេះ ត្រូវបានខាងភាគីអាជ្ញាធរឈូសឆាយរុះរើកម្ទេចចោលទាំងអស់។ ចំណែកក្រុមអាជីវករដែលរងការប៉ះពាល់បានត្រឹមឈរមើល និងមានការសោកស្ដាយពីការបាត់បង់មុខរបរប្រចាំថ្ងៃរបស់ពួកគាត់ ហើយពុំហ៊ានធ្វើការតវ៉ាប្រឆាំងទំនាស់ទៅនឹងក្រុមអាជ្ញាធរឡើយ៕
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
អត្ថបទពេញនិយម
ព័ត៌មានថ្មីៗ
- លោក ហ៊ុន សែន បដិសេធការចោទរបស់វៀតណាម ដែលថា ព្រែកជីកហ្វូណនសម្រាប់សម្រួលវត្តមានយោធាចិន
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
- ក្រុមគ្រួសារលោក ហ៊ុន សែន បង្កើតកម្មវិធីរាំច្រៀងសប្បាយនៅលើគំនរទុក្ខពលរដ្ឋ
- ក្រុមអតិថិជនបុរីពិភពថ្មីដាក់ពាក្យប្ដឹង ទៅស្នងការករណីតៃកុងឡានបុរីបើកបុកពួកគាត់
- លោក ហ៊ុន ម៉ាណែត ថ្លែងការពារគម្រោងព្រែកជីកហ្វូណនតេជោ ក្រោយពេលវៀតណាមរិះគន់