ព្រះសង្ឃ ប៊ុត ប៊ុនតិញ គ្រោងបង្កើតយុទ្ធនាការ១ដុល្លារដើម្បីជួយគ្រួសារបណ្ឌិត កែម ឡី
2018.02.21
អតីតប្រធានបណ្ដាញព្រះសង្ឃឯករាជ្យដើម្បីយុត្តិធម៌សង្គម ព្រះតេជព្រះគុណ ប៊ុត ប៊ុនតិញ នៅក្នុងកម្មវិធីវេទិកាអ្នកស្ដាប់វិទ្យុអាស៊ីសេរី កាលពីយប់ថ្ងៃទី១២ កក្កដា ឆ្នាំ២០១៦។
RFA
អតីតប្រធានបណ្ដាញព្រះសង្ឃឯករាជ្យព្រះតេជព្រះគុណ ប៊ុត ប៊ុនតិញ និងប្រជាពលរដ្ឋដែលគោរពស្រលាញ់លោកបណ្ឌិត កែម ឡី រស់នៅប្រទេសអូស្ត្រាលី គ្រោងបង្កើតយុទ្ធនាការ ១ដុល្លារដើម្បីជួយដល់គ្រួសារលោកបណ្ឌិត កែម ឡី ដែលទើបតែបានទៅតាំងទីលំនៅថ្មីឯប្រទេសអូស្ត្រាលី។
ព្រះតេជព្រះគុណ ប៊ុត ប៊ុនតិញ មានថេរដីកានៅក្នុងកិច្ចសម្ភាសន៍ជាមួយវិទ្យុអាស៊ីសេរី កាលពីថ្ងៃទី២១ ខែកុម្ភៈ ថា ព្រះអង្គបានពិភាក្សាជាមួយឥស្សរជនសំខាន់ៗមួយចំនួននៅប្រទេសអូស្ត្រាលី គឺបានកំណត់យកការប្រារព្ធខួបពីរឆ្នាំនៃការបាញ់សម្លាប់លោកបណ្ឌិត កែម ឡី ដើម្បីប្រកាសយុទ្ធនាការ ១ដុល្លារ ដើម្បីរក្សាកេរមរតក កែម ឡី។ ព្រះអង្គមានថេរដីកាបន្ថែមថា ដើម្បីធានាអោយបាននូវគណនីយភាព និងតម្លាភាព គណៈកម្មការមួយនឹងត្រូវបង្កើតឡើងដើម្បីប្រមូលប្រាក់ និងទុកដាក់ប្រាក់សម្រាប់ជួយដល់ក្រុមគ្រួសារលោកបណ្ឌិត កែម ឡី និងជួយបន្តកិច្ចការមួយចំនួនទៀត ដូចជាកសាងចេតិយ ដី និងបណ្ណាល័យ កែម ឡី ជាដើម៖ «អាត្មាថាពេលវេលាដែលសមរម្យ គឺពេលវេលាដែលយើងធ្វើបុណ្យ ២ឆ្នាំ ហើយយើងចាប់ផ្ដើមប្រកាសបង្កើតគណៈកម្មការនៅថ្ងៃបុណ្យ២ឆ្នាំ ហើយគណៈកម្មការហ្នឹង មានអនុគណៈកម្មការ។ ដោយសារយើងមានបទពិសោធន៍ពីអតីតកាលយើងមិនកាន់ប្រាក់ ដល់គេសួររកប្រាក់ យើងអត់មាន ដល់អត់មានគេចោទថាយើងលួច។ ដើម្បីចៀសវាងការលួចប្រាក់ ១ដុល្លារ យើងត្រូវធានាថា ការគ្រប់គ្រងគឺយើងមានអ្នកទទួលខុសត្រូវច្បាស់លាស់...»។
ខួបពីរឆ្នាំនៃការបាញ់សម្លាប់លោកបណ្ឌិត កែម ឡី ត្រូវនឹងថ្ងៃទី១០ ខែកក្កដា ឆ្នាំ២០១៨ នេះ ក៏ប៉ុន្តែកាលបរិច្ឆេទនៃការប្រារព្ធពិធីបុណ្យខួប និងការប្រកាសបង្កើតយុទ្ធនាការ ១ដុល្លារនោះ នៅមិនទាន់កំណត់ថ្ងៃច្បាស់លាស់នៅឡើយទេ។
ព្រះតេជព្រះគុណ ប៊ុត ប៊ុនតិញ ក៏មានថេរដីកាដែរថា ព្រះអង្គនឹងមិនភ្លេចទេក្នុងការទាមទាររកយុត្តិធម៌ជូនសពលោកបណ្ឌិត កែម ឡី។ ព្រះអង្គមានថេរដីកាបន្ថែមទៀតថា តុលាការរបស់លោក ហ៊ុន សែន ជាតុលាការអត់មាត្រា ធ្វើអ្វីតាមតែអំពើចិត្ត។ ព្រះអង្គបានអំពាវនាវទៅដល់ប្រជាពលរដ្ឋទាំងក្នុង និងក្រៅប្រទេសទាំងអស់ ត្រូវបង្វិលសេចក្ដីស្រលាញ់ និងការគោរពដ៏ធំធេងរបស់លោកបណ្ឌិត កែម ឡី ឲ្យទៅជាចលនា ដើម្បីឲ្យមានការផ្លាស់ប្ដូររបបដឹកនាំមួយត្រឹមត្រូវពិតប្រាកដ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- មេធាវីគ្រោងដាក់សេចក្តីសន្និដ្ឋានទៅសាលាឧទ្ធរណ៍ភ្នំពេញបញ្ជាក់ពីភាពស្អាតស្អំលោក កឹម សុខា
- កម្មករវៀតណាមកំពុងសម្ងំធ្វើការក្នុងក្រុមហ៊ុនចម្ការចេកខេត្តរតនគិរី
- លោក ហ៊ុន សែន អួតនៅក្នុងវេទិកាប្រទេសកូរ៉េថា កម្ពុជាមានសន្តិភាព ខណៈអ្នកតវ៉ាទាមទារប្រជាធិបតេយ្យ
- សមាគមឧកញ៉ារំឭកឧកញ៉ាឱ្យបង់វិភាគទានប្រចាំឆ្នាំ
- បទសម្ភាសន៍៖ អតីតមនុស្សជំនិតសម្ដេចក្រុមព្រះថា លោក ហ៊ុន សែន ជ្រៀតជ្រែកព្រះមហាក្សត្រលើការតែងតាំងរដ្ឋមន្ត្រីក្រសួងព្រះបរមរាជវាំងថ្មី
