វត្ត២នៅភ្នំពេញព្រមផ្ដល់ទីកន្លែងសម្រាប់បុណ្យ១០០ថ្ងៃបណ្ឌិត កែម ឡី
2016.09.29
ពិធីដង្ហែសពបណ្ឌិត កែម ឡី ទៅបញ្ចុះនៅស្រុកកំណើតរបស់លោកនាភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ កាលពីថ្ងៃទី២៤ ខែកក្កដា ឆ្នាំ២០១៦។ RFA/Chuop Sereyroth
RFA/Chuop Sereyroth
គណៈកម្មការរៀបចំបុណ្យ១០០ថ្ងៃរបស់លោកបណ្ឌិត កែម ឡី បានទទួលការឆ្លើយតបពីព្រះចៅអធិការវត្តចំនួន២ នៅក្នុងរាជធានីភ្នំពេញ ថានឹងផ្ដល់កន្លែងសម្រាប់រៀបចំពិធីបុណ្យ ប៉ុន្តែត្រូវរង់ចាំការសម្រេចរបស់សាលារាជធានីភ្នំពេញ ជាមុនសិន។ សាលារាជធានីភ្នំពេញ វិញ ឲ្យដឹងថា ក្រោយបុណ្យភ្ជុំបិណ្ឌចប់សព្វគ្រប់ អាជ្ញាធររាជធានីភ្នំពេញ នឹងធ្វើលិខិតជូនដំណឹងជាផ្លូវការទៅគណៈកម្មការរៀបចំបុណ្យវិញ។
លោក សៅ កុសល អ្នកនាំពាក្យ និងជាសមាជិកគណៈកម្មការរៀបចំបុណ្យខួបគម្រប់ ១០០ថ្ងៃឲ្យដឹងនៅថ្ងៃទី២៩ ខែកញ្ញា ថា វត្ត២ ដែលបានឆ្លើយតបឲ្យប្រារព្ធពិធីបុណ្យ ១០០ថ្ងៃ គឺមានវត្តពោធិយារាម ហៅវត្តចាស់ និងវត្តនន្ទមុនី ហៅវត្តថាន់។ លោកបញ្ជាក់ថា វត្តដែលគណៈកម្មការបុណ្យជ្រើសរើសនោះ គឺសម្រេចយកវត្តចាស់ ក្នុងការរៀបចំពិធី ដោយសារវត្តនេះប្រជាពលរដ្ឋធ្លាប់ស្គាល់រួចមកហើយ៖ «គណៈកម្មការគិតថា ដោយសារវត្តចាស់ ជាកន្លែងធ្វើបុណ្យសពលោកបណ្ឌិត អ៊ីចឹងយើងសម្រេចថា សុំយកវត្តចាស់វិញ ជាកន្លែងមួយដែលមហាជនយើងបានដឹងបានស្គាល់រួចហើយ។ អ៊ីចឹងយើងសម្រេចយកទីនោះ ហើយឥឡូវនេះកំពុងតែពិចារណាដាក់លិខិតទៅសាលារាជធានីភ្នំពេញ»។
កាលពីថ្ងៃទី២៣ ខែកញ្ញា គណៈកម្មការរៀបចំបុណ្យខួបគម្រប់ ១០០ថ្ងៃ លោកបណ្ឌិត កែម ឡី បានអំពាវនាវរកទីតាំងធ្វើកម្មវិធីម្ដងរួចហើយ បន្ទាប់ពីអាជ្ញាធរក្រុងភ្នំពេញ ដាក់បម្រាមគ្រប់វត្តមិនអនុញ្ញាតឲ្យគណៈកម្មការបានរៀបចំពិធី។
ឆ្លើយតបរឿងនេះ អ្នកនាំពាក្យសាលារាជធានីភ្នំពេញ លោក មាស ចាន់យ៉ាដា បញ្ជាក់ថា ខាងអាជ្ញាធរនឹងផ្ដល់ដំណឹងជាផ្លូវការទៅគណៈកម្មការវិញ នៅក្រោយពិធីបុណ្យភ្ជុំបិណ្ឌចប់។ ប៉ុន្តែលោកនៅពុំទាន់ប្រាកដនៅឡើយទេថា អាជ្ញាធររាជធានីភ្នំពេញ ព្រមបើកភ្លើងខៀវ ឬយ៉ាងណានោះទេ៖ «យើងនឹងធ្វើលិខិតឆ្លើយតបជាផ្លូវការទៅអ្នកដែលស្នើសុំមកហ្នឹង។ ប្រហែលជាភ្ជុំរួចយើងនឹងធ្វើលិខិតជាផ្លូវការ ឆ្លើយតបទៅវិញ»។
គណៈកម្មការរៀបចំបុណ្យខួបគម្រប់ ១០០ថ្ងៃលោកបណ្ឌិត កែម ឡី ឲ្យដឹងថា កម្មវិធីបុណ្យនេះចាប់ផ្ដើមរយៈពេល ២ថ្ងៃ នៅភ្នំពេញ គឺពីថ្ងៃទី១៤ ដល់ថ្ងៃទី១៥ ខែតុលា។ នៅថ្ងៃទី១៦ ចាប់ផ្ដើមដង្ហែរូបសំណាកលោកបណ្ឌិត កែម ឡី ពីរាជធានីភ្នំពេញ ទៅកាន់ទីតាំងបញ្ចុះសពនៅខេត្តតាកែវ ហើយនៅថ្ងៃទី១៧ គឺជាកិច្ចបង្ហើយកម្មវិធីបុណ្យ។ សេចក្ដីជូនដំណឹងរបស់គណៈកម្មការឲ្យដឹងថា ពិធីបុណ្យរយៈពេល ២ថ្ងៃនៅភ្នំពេញនេះ គឺមានតាំងពីពិព័រណ៍រូបថត និងចាក់ផ្សាយឡើងវិញនូវបទវិភាគបញ្ហាសង្គមរបស់លោកបណ្ឌិត កែម ឡី។
លោកបណ្ឌិត កែម ឡី ត្រូវឃាតកបាញ់សម្លាប់កាលពីថ្ងៃទី១០ ខែកក្កដា នៅក្នុងហាងស្តារម៉ាត កាល់តិច (Caltex) ស្ដុបបូកគោ។ គិតពីថ្ងៃបាញ់ប្រហារមកដល់ពេលនេះ ខាងសមត្ថកិច្ចបញ្ជាក់ថា ពុំមានតម្រុយណាថ្មីជាប់ទាក់ទងអំពើឃាតកម្មនេះនៅឡើយទេ។ ម្យ៉ាងវិញទៀត ខាងនគរបាលឲ្យដឹងថា សំណុំរឿងបទឧក្រិដ្ឋនេះ បានបញ្ជូនដល់ដៃតុលាការរួចហើយដែរ។
ជុំវិញអំពើឃាតកម្មនេះ លោក ហ៊ុន សែន បានឆ្លើយតបភ្លាមៗដោយអះអាងថា ការស្លាប់លោកបណ្ឌិត កែម ឡី អ្នកត្រូវខាតបង់គឺរដ្ឋាភិបាល។ ចំណែកអង្គការមិនមែនរដ្ឋាភិបាល និងអង្គការឃ្លាំមើលពិភពលោក (Global Witness) ដាក់ការសង្ស័យក្នុងសំណុំរឿងនេះថា ពុំមែនជាមនុស្សសាមញ្ញឡើយ ដែលស្ថិតនៅពីក្រោយករណីនេះ។
លោកបណ្ឌិត កែម ឡី មុនឃាតកបាញ់សម្លាប់តែប៉ុន្មានថ្ងៃ បានរិះគន់ខ្លាំងៗ តាមរយៈរបាយការណ៍ស្រាវជ្រាវរបស់អង្គការ គ្លបល វីនេស ជុំវិញជំនួញរបស់ក្រុមគ្រួសារត្រកូល «ហ៊ុន»៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
សង្គម
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
- ពលរដ្ឋ និងអ្នកឃ្លាំមើលថា ឧកញ៉ា លី យ៉ុងផាត់ ស័ក្តិសមទទួលទណ្ឌកម្មពីសហរដ្ឋអាមេរិក
- ក្រុមហ៊ុនស្រាបៀហនុមានប្រើគ្រប់មធ្យោបាយ ផ្សព្វផ្សាយផលិតផលគ្រឿងស្រវឹង
- អ្នកឃ្លាំមើលថា គួរស៊ើបអង្កេតលោក លី យ៉ុងផាត់ ជាជាងឱ្យសមាគមឧកញ៉ាចេញមុខការពារ