ពលរដ្ឋថានៅតែនឹកបណ្ឌិត កែម ឡី ទោះបីជាពន្លឺយុត្តិធម៌ហាក់នៅឆ្ងាយ
2016.11.10
ម្ដាយរបស់បណ្ឌិត កែម ឡី លោកស្រី ភោគ សេ ជជែកជាមួយលោក ឃួន សេរីវុធ ដែលមកគោរពវិញ្ញាណក្ខន្ធកូនប្រុសរបស់គាត់នៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ កាលពីថ្ងៃទី២៧ កញ្ញា ឆ្នាំ២០១៦។
RFA
គិតមកទល់នឹងថ្ងៃទី១០ វិច្ឆិកា គឺមានរយៈពេល ៤ខែគត់ដែលបណ្ឌិត កែម ឡី អ្នកវិភាគដ៏ល្បីល្បាញត្រូវបានឃាតកបាញ់ប្រហារយ៉ាងឃោរឃៅនៅចំកណ្ដាលរាជធានីភ្នំពេញ។ ក្នុងរយៈពេល ៤ខែនេះ ពលរដ្ឋនៅតែនឹកដល់លោក បើទោះជាពន្លឺនៃយុត្តិធម៌សម្រាប់បណ្ឌិត កែម ឡី ហាក់នៅឆ្ងាយក្តី។
នៅថ្ងៃទី១០ វិច្ឆិកា ចំថ្ងៃដែលបណ្ឌិត កែម ឡី ដែលកាលពី ៤ខែមុនត្រូវបានឃាតកបាញ់សម្លាប់ ពលរដ្ឋដែលគោរពស្រឡាញ់លោក នៅតែបន្តបង្ហោះរូបភាពលោកនៅលើទំព័រហ្វេសប៊ុក (Facebook) របស់ពួកគេ ខ្លះសរសេរបញ្ចេញមតិ ហើយខ្លះតែងកំណាព្យដង្ហោយរកយុត្តិធម៌ជូនបណ្ឌិត កែម ឡី និងក្រុមគ្រួសាររបស់លោក។
ចំណែកពលរដ្ឋមួយចំនួនដែលប្រកបរបររកស៊ីនៅក្បែរហាងស្ដារម៉ាតកាល់តិច (Caltex) ក្បែរស្តុបបូកគោ ទីដែលបណ្ឌិត កែម ឡី ត្រូវបានឃាតកបាញ់សម្លាប់នោះ និយាយថា ពួកគេនៅតែចងចាំបណ្ឌិត កែម ឡី។ ទោះជាយ៉ាងណា ពលរដ្ឋទាំងនោះមិនហ៊ានឲ្យអាស៊ីសេរី សម្ភាស ថតសំឡេង ឬបញ្ចេញឈ្មោះឡើយ ដោយបារម្ភពីសុវត្ថិភាពផ្ទាល់ខ្លួន និងការលាបពណ៌ពីអ្នកដទៃ។
បុរសរត់ម៉ូតូកង់បីម្នាក់ប្រាប់អាស៊ីសេរី នៅថ្ងៃទី១០ វិច្ឆិកា ថា កាលពីពេលបណ្ឌិត កែម ឡី នៅមានជីវិត លោកតែងឃើញបណ្ឌិត កែម ឡី ដើរកាត់កន្លែងលោកពីផ្ទះរបស់គាត់នៅផ្សារបឹងកេងកង មកកាន់ហាងលក់ទំនិញស្ដារម៉ាតកាល់តិច នៅស្តុបបូកគោ។ លោកថា ពេលខ្លះលោកថែមទាំងបាននិយាយលេងជាមួយបណ្ឌិត កែម ឡី ទៀតផង។ លោកថា លោកមិនភ្លេចបណ្ឌិត កែម ឡី ឡើយ។
នៅពេលសួរពីយុត្តិធម៌សម្រាប់បណ្ឌិត កែម ឡី វិញ បុរសរូបនេះនិយាយថា លោកហាក់មិនសង្ឃឹមឡើយ។ ទោះជាយ៉ាងណា លោកថាសម្រាប់បុគ្គលដែលប្រព្រឹត្តទង្វើអាក្រក់លើមនុស្សល្អដូចបណ្ឌិត កែម ឡី លោកមានជំនឿថា នៅទីបញ្ចប់ ព្រហ្មលិខិតនឹងដាក់ទោសទណ្ឌពួកគេជាមិនខានឡើយ។
លោកបន្តថា តាមចិត្តលោក លោកចង់ឲ្យគេធ្វើកន្លែងបូជាមួយសម្រាប់បណ្ឌិត កែម ឡី នៅក្បែរកន្លែងដែលគាត់ត្រូវបានបាញ់ប្រហារនោះ ដើម្បីឲ្យពលរដ្ឋចូលអុជធូបគោរពវិញ្ញាណក្ខន្ធបណ្ឌិត កែម ឡី និងដើម្បីឲ្យពលរដ្ឋចងចាំថា គឺនៅទីនោះហើយដែលបណ្ឌិត កែម ឡី ត្រូវបានគេផ្តាច់ផ្តិលជីវិត។
ដោយឡែកអ្នកប្រើប្រាស់បណ្ដាញសង្គមហ្វេសប៊ុកឈ្មោះ Chorvy Khat បានសរសេរនៅលើទំព័រហ្វេសប៊ុកអមដោយរូបភាពបណ្ឌិត កែម ឡី ដែលកំពុងអង្គុយញញឹមថា ខ្ញុំនឹកលោកបណ្ឌិត ទោះដឹងថាយុត្តិធម៌ឆ្ងាយដូចជើងមេឃក៏នៅតែចាំ។ ចំណែកម្ចាស់ហ្វេសប៊ុកមួយរូបទៀតឈ្មោះ អ្នកឃ្លាំមើលអាណាចក្រ កមេ បានបង្ហោះរូបភាពបណ្ឌិត កែម ឡី ដែលកំពុងអង្គុយជាមួយភរិយាលោក គឺលោកស្រី ប៊ូ រចនា ហើយសរសេរថា ដើម្បីរកយុត្តិធម៌ឲ្យបណ្ឌិត កែម ឡី ២០ឆ្នាំទៀត ក៏មិនហួសដែរ។
ជុំវិញរឿងស្វែងរកយុត្តិធម៌ជូនបណ្ឌិត កែម ឡី នេះ គ្រួសារបណ្ឌិត កែម ឡី និងអ្នកគោរពស្រឡាញ់លោក គ្រោងហែញត្តិទៅកាន់ស្ថាប័នពាក់ព័ន្ធមួយចំនួននៅពេលខាងមុខ ដើម្បីជំរុញឲ្យស្ថាប័នទាំងនោះ ជួយស្វែងរកយុត្តិធម៌ជូនបណ្ឌិត កែម ឡី។ ស្ថាប័នទាំងនោះមានដូចជា សាលាដំបូងរាជធានីភ្នំពេញ ក្រសួងយុត្តិធម៌ និងស្ថានទូតបរទេសនានា។
គ្រួសារបណ្ឌិត កែម ឡី ឲ្យអាស៊ីសេរី ដឹងថា ពួកគាត់ពុំអាចអត់ទ្រាំរង់ចាំយុត្តិធម៌ ដែលកប់បាត់អស់ពេលជាច្រើនខែមកហើយនេះបានតទៅទៀតឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- អ្នកតាមដាននយោបាយថា អាមេរិកដាក់ទណ្ឌកម្ម លោក លី យ៉ុងផាត់ ជាការកាត់ផ្ដាច់សរសៃឈាមសេដ្ឋកិច្ចរបស់បក្សកាន់អំណាច
- កញ្ញា ឈឹម ស៊ីថរ រក្សាជំហរតស៊ូ ដើម្បីសេរីភាពសហជីព និងការពារផលប្រយោជន៍កម្មករក្រោយមានសេរីភាព
- ហេតុអ្វីបានជាអាមេរិកដាក់ទណ្ឌកម្ម «ស្តេចកោះកុង»?
- សមត្ថកិច្ចចាប់ខ្លួន លោក ហោ សុខុន អតីតព្រះចៅអធិការវត្តច្បារអំពៅ និងមនុស្ស ៣ទៀត
- ក្រសួងការបទេស និងគណបក្សប្រជាជនកម្ពុជាចាត់ទុកថា ជារឿងអយុត្តិធម៌ ដែលក្រសួងរតនាគារសហរដ្ឋអាមេរិកដាក់ទណ្ឌកម្មលើលោក លី យ៉ុងផាត់
អត្ថបទពេញនិយម
សង្គម
- ពលរដ្ឋរិះគន់អាជ្ញាធរអប្សរាបណ្តោយឱ្យអ្នកមានលុយមានអំណាចសង់ផ្នូរខ្មោចចិនមួយធំក្នុងតំបន់អង្គរ
- ពលរដ្ឋ និងអ្នកឃ្លាំមើលថា ឧកញ៉ា លី យ៉ុងផាត់ ស័ក្តិសមទទួលទណ្ឌកម្មពីសហរដ្ឋអាមេរិក
- ក្រុមហ៊ុនស្រាបៀហនុមានប្រើគ្រប់មធ្យោបាយ ផ្សព្វផ្សាយផលិតផលគ្រឿងស្រវឹង
- អ្នកឃ្លាំមើលថា គួរស៊ើបអង្កេតលោក លី យ៉ុងផាត់ ជាជាងឱ្យសមាគមឧកញ៉ាចេញមុខការពារ