ពលរដ្ឋមួយចំនួនមិនពេញចិត្តនឹងការធ្វើបុណ្យនៅក្រៅវត្តក្នុងស្រុកព្រៃកប្បាសខេត្តតាកែវ
2017.04.16
ផែនទីខេត្តតាកែវ
ប្រជាពលរដ្ឋខ្លះនៅឃុំព្រៃផ្ដៅ ស្រុកព្រៃកប្បាស ខេត្តតាកែវ មិនពេញចិត្តនៅពេលពុទ្ធបរិស័ទមួយចំនួនមិនទៅធ្វើបុណ្យទាននៅក្នុងវត្តអារាម តែបែរជាទៅធ្វើបុណ្យនៅសាលាសំណាក់ទៅវិញ។ ពលរដ្ឋដែលមិនពេញចិត្តទាំងនេះលើកឡើងថា ការធ្វើបែបនេះអាប់ឱនដល់សាសនា ក៏ប៉ុន្តែព្រះសង្ឃពន្យល់ថា ពុទ្ធបរិស័ទអាចទៅធ្វើបុណ្យនៅទីណាក៏បាន មិនបាច់តែនៅទីអារាមទេ ហើយអាជ្ញាធរបញ្ជាក់ថា វាជាសេរីភាពរបស់ពលរដ្ឋក្នុងការជ្រើសរើសទីតាំងសម្រាប់ធ្វើបុណ្យ។
អ្នកភូមិគោកទ្រា គឺលោក សៀក រ៉ាន់ ថ្លែងនៅថ្ងៃទី១៦ មេសា ថា អស់រយៈពេលជាច្រើនឆ្នាំមកហើយដែលប្រជាពលរដ្ឋយកទីសាលាសំណាក់នៅខាងមុខវត្តព្រៃផ្ដៅ ធ្វើជាទីតាំងរៀបចំបុណ្យទាន និងសុំសីល។
ទីសាលាសំណាក់នេះ ស្ថិតនៅលើដំបូកខាងមុខខ្លោងទ្វារវត្ត។
លោក សៀក រ៉ាន់ អះអាងថា ការណ៍ដែលពុទ្ធបរិស័ទមិនទៅរៀបចំបុណ្យទាននៅក្នុងទីអារាម ធ្វើឲ្យអាប់ឱនសាសនា៖ «ខ្ញុំព្រួយបារម្ភថា វាអាប់ឱនដល់ព្រះពុទ្ធសាសនា ការកសាងមិនរីកចម្រើន។ ធ្វើឲ្យមនុស្សលែងចេះគោរព លែងដឹងខុសត្រូវ គុណស្រ័យ ស្រេចតែគំនិតខ្លួន ចង់ធ្វើអីស្រេចតែខ្លួនឯង។ ខ្ញុំយល់ថា វាខុសឆ្គង។ ខុសឆ្គងនឹងគន្លងព្រះពុទ្ធសាសនា។ ធ្វើបុណ្យមានតែនៅវត្តអារាមទេ ដែលស្របតាមរដ្ឋធម្មនុញ្ញ ស្របនឹងច្បាប់របស់ក្រសួងធម្មការ។ មានវត្ត មានព្រះសង្ឃ មានគណៈកម្មការ មានវិហារ។ ដល់ពេលនាំគ្នាទៅធ្វើនៅក្រៅវត្តតាមចិត្តឯងចឹង មិនត្រូវ»។
អ្នកភូមិមួយរូបទៀត លោក ជា ប៉េង យល់ថា ការនិមន្តព្រះសង្ឃពីវត្តផ្សេងមករៀបចំបុណ្យនៅសាលាសំណាក់ ជាការមិនសូវសមរម្យនោះទេ៖ «មិនសូវសម ដោយសារវត្តនៅជិតបង្កើយ។ អ្នកភូមិភាគច្រើនទៅធ្វើបុណ្យក្នុងវត្ត ហើយមួយក្តាប់តូចទៅធ្វើនៅសាលាសំណាក់ នៅកៀកវត្តប្រហែល ២០០ម៉ែត្រពីខ្លោងទ្វារវត្ត។ វាអត់សូវសមចឹង»។
ព្រះតេជព្រះគុណ សោម សុខ ដែលគង់នៅវត្តព្រៃផ្ដៅ មានថេរដីកាថា រឿងរ៉ាវបែងចែកកន្លែងធ្វើបុណ្យនៅក្នុងភូមិនេះ មានរយៈពេលជាង ១០ឆ្នាំមកហើយ៖ «ទំនាស់ពីមុនមករវាងព្រះចៅអធិការ និងគណៈកម្មការវត្ត។ មានរឿងបាត់លុយ ហើយលោក (ព្រះចៅអធិការ) បានសួរដេញដោលក៏មានបញ្ហា រហូតប្ដឹងផ្តល់ដល់តុលាការខេត្ត។ គណៈកម្មការក៏បែកគំនិតបង្កើតសាលាសំណាក់ធ្វើដោយសម្រាប់រៀបចំបុណ្យដោយខ្លួនឯងទៅ»។
ព្រះតេជព្រះគុណពន្យល់ថា ការរៀបចំបុណ្យមិនប្រកាន់ទីកន្លែងនោះទេ មិនចាំបាច់តែក្នុងទីវត្តអារាមទេ តែសំខាន់លើទឹកចិត្តជ្រះថ្លារបស់សាមីខ្លួន។ ក៏ប៉ុន្តែព្រះអង្គក៏ចង់ឃើញការសាមគ្គីគ្នារវាងអ្នកភូមិ ដោយព្រះអង្គមានថេរដីកាថា ប្រសិនបើក្នុងភូមិមានវត្តអារាមហើយ គួរស្រុះស្រួលគ្នាធ្វើពិធីបុណ្យទាននៅកន្លែងជាមួយគ្នា។
លោក សៀក រ៉ាន់ ដែលជាអ្នកភូមិ លើកឡើងថា ការរៀបចំបុណ្យនៅកន្លែងផ្សេងគ្នាក្នុងភូមិ ដោយអ្នកខ្លះទៅធ្វើនៅវត្ត ហើយខ្លះទៀតទៅធ្វើនៅលើដំបូកសាលាសំណាក់ វាបង្កឲ្យមានការសង្ស័យមិនទុកចិត្តគ្នា បាត់បង់សាមគ្គីភាពក្នុងសហគមន៍។
មេឃុំព្រៃផ្ដៅ លោក មុត សូ ឲ្យដឹងថា នៅក្នុងឃុំលោកមានវត្តចំនួន៣ រួមទាំងវត្តព្រៃផ្ដៅផង ដែលលោកថាចំនួននេះគ្រប់គ្រាន់សម្រាប់ឲ្យពុទ្ធសាសនិកប្រតិបត្តិសាសនា។ លោកមេឃុំប្រាប់ថា ពលរដ្ឋកំពុងទៅសុំសីល ស្រោចទឹក ឬរៀបចំបុណ្យនានានៅសាលាសំណាក់ ដោយសារទីនោះមានដំបូកដែលអ្នកភូមិជឿថាមានបារមីស័ក្តិសិទ្ធិ៖ «ជាទួលមួយសម្រាប់អ្នកស្រុកអ្នកភូមិគោរពបូជា។ មានអ្នកតា ជាសាលាសំណាក់ប្រចាំភូមិ នៅក្នុងឃុំខ្ញុំហ្នឹង។ ចាស់ៗតែងតែធ្វើពិធីបុណ្យឡើងលាននៅរដូវច្រូតកាត់ហើយ។ រឿងនេះមិនមានបញ្ហាអីទេ។ វាជាសាលាសំណាក់ មិនមែនជាវត្តអារាមអីទេ»។
ទោះបីជាយ៉ាងណា លោកមិនបារម្ភពីការបែកបាក់សាមគ្គីភាពរវាងអ្នកភូមិនោះទេ ហើយលោកចាត់ទុកការប្រតិបត្តិនេះ ជាសេរីភាពខាងជំនឿរបស់ពលរដ្ឋ។
បើតាមព្រះសង្ឃ និងលោកមេឃុំ រហូតមកដល់ពេលនេះ បញ្ហាប្រតិបត្តិសាសនានៅទីតាំងផ្សេងគ្នានេះមិនមានបង្កជម្លោះណាមួយរវាងអ្នកភូមិនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
