សំណង់អគារខុនដូរ​នៅ​កែប បាក់​បណ្ដាល​ឱ្យ​កម្មករ​ស្លាប់​​កើន​​ដល់ ៧​នាក់

ដោយ អាស៊ីសេរី
2020-01-03
អ៊ីម៉ែល
មតិ
Share
បោះពុម្ព
សំណង់អាគារឃុនដូរ បាក់បណ្ដាលឲ្យកម្មករស្លាប់៤នាក់ និងរបួស២០នាក់​នៅ​ខេត្ដកែបថ្ងៃទី០៣ ខែមករា ឆ្នាំ២០២០។​
សំណង់អាគារឃុនដូរ បាក់បណ្ដាលឲ្យកម្មករស្លាប់៤នាក់ និងរបួស២០នាក់​នៅ​ខេត្ដកែបថ្ងៃទី០៣ ខែមករា ឆ្នាំ២០២០។​
រូបភាព​ផ្ដល់ឲ្យ

សមត្ថកិច្ច​ខេត្ត​កែប​រក​ឃើញ​សាកសព​កម្មករ​សំណង់​ ៧នាក់​ ក្នុងចំណោម​ជនរងគ្រោះ​ ២៥នាក់​ ពី​សំណង់​សណ្ឋាគារ​ កម្ពស់​ ៧ជាន់​ ដែល​បាក់​រលំ​ នៅ​ល្ងាច​ថ្ងៃទី៣ ខែមករា​នេះ​។ នេះ​បើ​តាម​របាយការណ៍ គិត​ត្រឹម​ម៉ោង ៥ព្រឹក​ ថ្ងៃ​ទី៤ ខែ​មករា។

អភិបាលខេត្ត​កែប​ លោក ​កែន​ សុ​ត្ថា​ បាន​ប្រាប់​អាស៊ី​សេរី​ពី​យប់ថ្ងៃ​ទី៣ មករា​ថា​ សមត្ថកិច្ច​ កំពុង​ជួយសង្គ្រោះ​ជនរងគ្រោះ​ ចេញពី​គំនរ​បាក់បែក​។ ប៉ុន្តែ​បដិសេធ​មិន​ធ្វើ​អត្ថា​ធិបា​យលម្អិត​ពី​ការ​បាក់​អគារ៧ជាន់​នេះ​ទេ​ ព្រោះ​លោក​ប្រាប់​ថា​ជាប់រវល់​ ចាត់ចែង​ក្នុង​ការ​សង្រ្គោះ​ជនរងគ្រោះ​បន្ត​ទៀត​។

អ្នកសម្របសម្រួល​សមា​គម​អាដ​ហុក​ (Adhoc) ប្រចាំ​នៅ​ខេត្ត​កែប​ លោក​ យន់​ ផល្លី​ ដែល​មាន​វត្តមាន​នៅកន្លែង​កើតហេតុ​ បាន​និយាយ​ថា​ អគារ​នេះ​ទើបតែ​បន្ត​សង់​ជាន់ទី៧​ ផ្ទុយ​នឹង​ច្បាប់​អនុញ្ញាត​ និង​មានកម្ម​ករ​ធ្វើការ​ប្រហែល ៤០នាក់​។ លោក​បន្ត​ថា​ ម្ចាស់​សណ្ឋ​គារ​ ជា​អនិកជន​ ប៉ុន្តែ​មិនទាន់​ដឹង​​ពី​សញ្ជាតិ​ពិតប្រាកដ​នៅឡើយ​។

នេះ​ជា​ករណី​បាក់​អគារ​លើក​ទីបី​ហើយ ដែល​បាន​សម្លាប់​មនុស្ស​។ កាលពីដើម​ខែធ្នូ​ កម្មករ​បី​នាក់​ស្លាប់​ក្នុងករណី​បា​ក់​កុ​ដិ​ និង​បណ្ដាល​​ឱ្យ​កម្មករ​ច្រើន​នាក់​រង​របួស​ នៅ​ខេត្ត​ សៀមរាប​។ កាល​ពី​ដើម​​ឆ្នាំ២០១៩​ អគារ​វិនិយោគ​របស់​ជនជាតិ​ចិន​កម្ពស់​ ៧ជាន់​ ដែល​កំពុង​សាងសង់​ គ្មាន​ច្បាប់​អនុញ្ញាត​នៅ​ខេត្ត​ព្រះសីហនុ​ បាន​បាក់​រលំ​បណ្ដាល​ឱ្យ​ កម្មករ​សំណង់​ស្លាប់​ ២៨នាក់​ និង​របួស​ ២៦នាក់​។ ក្រោយ​ហេតុការណ៍​បាក់​រលំ​អគារ​នេះ​ តុលាការខេត្ត​ព្រះសីហនុ​ បានសម្រេច​ឃុំខ្លួន​ជនជាតិ​ចិន​ ៤នាក់​ ដែល​ជា​ម្ចាស់​អគារ​នោះ​ ព្រមទាំង​ម្ចាស់​ក្រុមហ៊ុន​ម៉ៅការ​សាងសង់​ អ្នកមើល​ការខុសត្រូវ​ការដ្ឋាន​សាងសង់​ និង​មេជាង​សំណង់​ផង​ដែរ​។

អាស៊ី​សេរី​នឹង​មាន​សេច​ក្ដី​រាយការណ៍​ពិស្ដារន្ថែ​មទៀ​ត ជុំវិញ​ការ​ដួល​រំលំ​បាក់​អគារ​នេះ​៕