សមាគមគ្រូបង្រៀនសង្ឃឹមថា អាជ្ញាធរនឹងមិនរឹតត្បិតពួកគេក្នុងការប្រារព្ធទិវាគ្រូបង្រៀនដូចរាល់ឆ្នាំ
2018.09.22
សមាគមគ្រូបង្រៀនកម្ពុជាឯករាជ្យ សង្ឃឹមថា អាជ្ញាធររាជធានីភ្នំពេញ នឹងមិនរឹតត្បិតពួកគេ ក្នុងការប្រារព្ធទិវាគ្រូបង្រៀន ដូចរាល់ៗឆ្នាំទេ។ ប្រធានសមាគមនេះ អះអាងថា ទិវានេះជាការរំលឹកគុណគ្រូ និងស្នើសុំឲ្យមានការដំឡើងប្រាក់ខែគ្រូបង្រៀន មិនមែនជាសកម្មភាពបាតុកម្មទេ។ អ្នកឃ្លាំមើលសិទ្ធិមនុស្ស ថា សមាគមគ្រូបង្រៀន មានសិទ្ធិដោយគ្មានការរារាំង ក្នុងជួបប្រជុំគ្នា ដើម្បីសម្ដែងពីសុខទុក្ខរបស់គ្រូបង្រៀន និងប្រារព្ធទិវាគ្រូបង្រៀនពិភពលោក។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយាវី អះអាងថា បានដាក់លិខិតជូនដំណឹង ស្ដីពីការស្នើសុំប្រារព្ធទិវាគ្រូបង្រៀនពិភពលោក ៥តុលា ទៅសាលារាជធានីភ្នំពេញរួចរាល់ហើយ នៅព្រឹកថ្ងៃទី២១ កញ្ញា។ អ្នកស្រី ថា មន្ត្រីសាលាក្រុងបានទទួលយកលិខិតរបស់សមាគមហើយ ប៉ុន្តែមិនទាន់ឆ្លើយតបបែបណាទេ៖ «ទម្លាប់គេទាល់តែជិតដល់ថ្ងៃ សាលាក្រុងមិនដែល អនុញ្ញាតលិខិតរបស់សមាគមទេ ចាស ក៏ប៉ុន្តែគោលជំហរសមាគម ទោះបីមិនអនុញ្ញាតក៏នៅតែធ្វើ ដែរព្រោះអីយើងមិនមែនបានទៅបាតុកម្មទៅអីណា យើងគ្រាន់តែទៅទាមទារលក្ខខណ្ឌការងារ និង ប្រាក់បៀវត្សរ៍សម្រាប់តែលោកគ្រូ អ្នកគ្រូតែប៉ុណ្ណោះ»។
សមាគមគ្រូបង្រៀនកម្ពុជាឯករាជ្យ នឹងរៀបចំប្រារព្ធទិវាគ្រូបង្រៀនពិភពលោក នៅថ្ងៃទី៥ តុលា នៅទីតាំងសួនច្បារវត្តភ្នំ ចាប់ពីម៉ោង៨ព្រឹកតទៅ។
ប្រធានបទ នៅឆ្នាំនេះ គឺក្រុមគ្រូបង្រៀន លើកយកពី សិទ្ធិទទួលបានការអប់រំ និងសិទ្ធិទទួលបានគ្រូបង្រៀនមានគុណភាព ហើយមានការចូលរួមពីសមាជិក សមាជិកានៃសមាគម លោកគ្រូ អ្នកគ្រូ យុវជន សិស្ស និស្សិត សហជីព អង្គការសង្គមស៊ីវិលជាតិ អន្តរជាតិ និងប្រជាពលរដ្ឋ អាណាព្យាបាលសិស្ស សរុបយ៉ាងតិច ១៥០នាក់។ ក្នុងសេចក្ដីជូនដំណឹង សមាគមគ្រូបង្រៀន បញ្ជាក់ថា ក្នុងពិធីអបអរសាទរទិវាគ្រូបង្រៀនពិភពលោកឆ្នាំនេះ នឹងដង្ហែក្បួនចេញពីសួនច្បារវត្តភ្នំ ដើម្បីដាក់ញត្តិទៅក្រសួងអប់រំ យុវជន និងកីឡា និងខុទ្ទកាល័យ លោក ហ៊ុន សែន បន្ទាប់មកពិធីនេះ នឹងប្រកាសបិទកម្មវិធី។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយាវី ពន្យល់ថា គ្រូបង្រៀនត្រូវការប្រាក់ខែខ្ពស់ជាងនេះ ហើយសមាគមត្រូវការប្រារព្ធទិវានេះ នៅទីតាំងសាធារណៈដែលមានមនុស្សអ៊ូអរ ដើម្បីផ្សព្វផ្សាយឲ្យសាធារណជនបានដឹង៖ «គេកំណត់ស្អីអីណា គីឡូលេខប្រាំមួយអ៊ីចឹងណា ហើយបើទៅគីឡូលេខប្រាំមួយស្រែកដដែល អ៊ីចឹងសុខចិត្តទៅវាលស្រែ កន្លែងណាមួយ ស្រែក ដោយមិនចាំបាច់សុំច្បាប់ស្រួលជាង យើងចង់ស្រែកដើម្បីឲ្យពលរដ្ឋ និងសាធារណជនគាត់ បាន ដឹងបានលឺ បើស្រែកកន្លែងស្ងាត់ដដែលអញ្ចឹងយើងស្រែកធ្វើអី»។
សមាគមគ្រូបង្រៀនកម្ពុជាឯករាជ្យ តែងតែប្រារព្ធទិវាគ្រូបង្រៀនពិភពលោក ជារៀងរាល់ឆ្នាំ។ កាលពីថ្ងៃទី០៥ តុលា ឆ្នាំ២០១៧ បានប្រារព្ធទិវាគ្រូបង្រៀន នៅសួនច្បារវត្តភ្នំ តែបានបរាជ័យក្នុងការដង្ហែក្បួនទាមទាររបស់ខ្លួន ដោយសារកងកម្លាំង និងសន្តិសុខសាលារាជធានីភ្នំពេញ រារាំង មិនឲ្យមានការដង្ហែក្បួនដាក់ញត្តិទៅរដ្ឋសភា។
អាស៊ីសេរី មិនអាចសុំការបញ្ជាក់ជុំវិញរឿងនេះ ពីអ្នកនាំពាក្យសាលារាជធានីភ្នំពេញ លោក ម៉េត មាសភក្ដី បានទេ នៅថ្ងៃទី២១ កញ្ញា ដោយសារលោកមិនលើកទូរស័ព្ទ។
អ្នកស្រី អ៊ុក ឆាយាវី បញ្ជាក់ថា នៅឆ្នាំនេះ សមាគមគ្រូបង្រៀននៅតែទាមទារឲ្យក្រសួងអប់រំ ដំឡើងប្រាក់បៀវត្សរ៍គោលគ្រូឲ្យបានសមរម្យ គឺចំនួន ២លានរៀល ឬស្មើនឹង៥០០ដុល្លារ ក្នុងមួយខែ ទើបធ្វើឲ្យមានជីវភាពថ្លៃថ្នូរ លែងឆ្លៀតទៅរកមុខរបរទី២ ឬ លែងជំរិតទារលុយពីកូនសិស្ស។ អ្នកស្រី អ៊ុក ឆាយាវី បន្ដថា ក្រៅពីប្រាក់ខែគោល២លានរៀល សមាគម ក៏ស្នើឲ្យក្រសួងអប់រំ រក្សាប្រាក់អត្ថប្រយោជន៍ផ្សេងៗ ដូចជា ប្រាក់សម្រាប់ប្រពន្ធ កូន ជូនលោកគ្រូ អ្នកគ្រូ ដដែល។ អ្នកស្រី អ៊ុក ឆាយាវី មានជំនឿថា រដ្ឋមន្ត្រីក្រសួងអប់រំ មានលទ្ធភាពដំឡើងប្រាក់ខែគោល ២លានរៀល ឲ្យគ្រូបង្រៀន ព្រោះកន្លងមក ក្រសួងអប់រំ ធ្លាប់សល់ប្រាក់ជាច្រើន បង្វិលឲ្យរដ្ឋវិញ។
អ្នកនាំពាក្យសមាគមសិទ្ធិមនុស្សអាដហុក (Adhoc) លោក ស៊ឹង សែនករុណា ពន្យល់ថា យោងតាមច្បាប់បាតុកម្ម មុនធ្វើបាតុកម្ម ត្រូវដាក់ពាក្យស្នើសុំ ប៉ុន្តែដោយសារ ការប្រារព្ធទិវាគ្រូបង្រៀន មិនមែនជាគម្រោងធ្វើបាតុកម្ម ដូច្នេះ អាជ្ញាធរមិនគូររឹតត្បិតដល់សកម្មភាព ដែលគ្រូបង្រៀនទូទាំងពិភពលោក នាំគ្នាប្រារព្ធឡើង ដើម្បីគ្រាន់តែចង់បង្ហាញពីសុខទុក្ខ នៃវិស័យសិក្សា និងជីវភាពរបស់គ្រូបង្រៀន៖ «ពិនិត្យមើលទៅកាន់ប្រទេសដែលមានការប្រកាន់របបសង្គមនិយមលទ្ធិប្រជាធិបតេយ្យវិធីទាំងអស់នេះវាគួរតែជាវិធីនៃការលើកទឹកចិត្តណាស់ ហើយវាក៏ជាវិធីមួយដែលរាជរដ្ឋាភិបាលនិងចូលរួមរៀបចំផងអោយបានសកម្ម ដើម្បីលើកទឹកចិត្ត ដល់គ្រូបង្រៀនគួរណាតែអនុញ្ញាតឲ្យពួកគាត់ជាគ្រូបង្រៀន បានបញ្ចេញមតិក្នុងឱកាសណុងទៅ ដើម្បីយើង បានដឹងថា តើគ្រូបង្រៀនដែលស្ថិតក្នុងរបបដឹកនាំរបស់រាជរដ្ឋាភិបាលសព្វថ្ងៃជួបនឹងបញ្ហាអ្វីខ្លះ រឹតត្បិតសេរីភាពនឹងបាទ»។
ទោះជាយ៉ាងណា អ្នកស្រី អ៊ុក ឆាយាវី បញ្ជាក់ថា បើទោះជារងការរឹតត្បិតសេរីភាពដូចឆ្នាំមុនៗ ក៏សមាគមគ្រូបង្រៀន ប្ដេជ្ញាប្រារព្ធទិវានេះ ឲ្យបានតាមគោលដៅ របស់ខ្លួន ព្រោះជាការបម្រើឲ្យផលប្រយោជន៍គ្រូបង្រៀន និងសិស្សានុសិស្ស៕