សង្គម​ស៊ីវិល​ថា​លោក ឱម យ៉ិនទៀង គួរ​បង្ហាញ​របាយការណ៍​អំពើ​ពុក​រលួយ​ល្អ​ជាង​សុំ​ទោស

ដោយ ថា កិត្យា
2015-12-31
អ៊ីម៉ែល
មតិ
Share
បោះពុម្ព
ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង ថ្លែង​ក្នុង​សន្និសីទ​កាសែត​ស្ដីពី​ការ​វាយ​តម្លៃ និង​ត្រួត​ពិនិត្យ​លើ​កិច្ច​ខិតខំ​ប្រឹងប្រែង​ប្រយុទ្ធ​ប្រឆាំង​អំពើ​ពុករលួយ នៅ​ថ្ងៃ​ទី​៩ តុលា ឆ្នាំ​២០១៣។
ប្រធាន​អង្គភាព​ប្រឆាំង​អំពើ​ពុករលួយ លោក ឱម យ៉ិនទៀង ថ្លែង​ក្នុង​សន្និសីទ​កាសែត​ស្ដីពី​ការ​វាយ​តម្លៃ និង​ត្រួត​ពិនិត្យ​លើ​កិច្ច​ខិតខំ​ប្រឹងប្រែង​ប្រយុទ្ធ​ប្រឆាំង​អំពើ​ពុករលួយ នៅ​ថ្ងៃ​ទី​៩ តុលា ឆ្នាំ​២០១៣។
RFA

អង្គការ​សង្គម​ស៊ីវិល​លើក​ឡើង​ថា ប្រធាន​អង្គភាព​ប្រឆាំង​អំពើ​ពុក​រលួយ គួរ​តែ​បង្ហាញ​នូវ​ការ​រក​ឃើញ​អំពើ​ពុក​រលួយ​ក្នុង​របាយការណ៍​របស់​ខ្លួន ល្អ​ជាង​ការ​សុំ​ទោស​នៅ​ពេល​មាន​ប្រតិកម្ម​តប​ពី​ស្ថាប័ន​រដ្ឋ។ ការ​លើក​ឡើង​នេះ នៅ​បន្ទាប់​ពី​ប្រធាន​អង្គភាព​ប្រឆាំង​អំពើ​ពុក​រលួយ (ACU) លោក ឱម យ៉ិនទៀង សុំ​ទោស​រដ្ឋមន្ត្រី​ក្រសួង​មហាផ្ទៃ នៅ​ព្រឹក​ថ្ងៃ​ទី​៣១ ខែ​ធ្នូ ក្រោយ​ពី​លោក​លើក​ឡើង​កាល​ពី​ពេល​ថ្មីៗ​នេះ​ថា នឹង​ប្រើ​វិធានការ​ដុស​ក្អែល​នគរបាល​ដែល​ប្រព្រឹត្ត​អំពើ​ពុក​រលួយ។

ថ្វីត្បិត​ការ​ថ្លែង​សុំ​ទោស គឺ​ជា​ការ​បង្ហាញ​ឥរិយាបថ​ទន់​ភ្លន់​នៅ​ក្នុង​ទំនាក់ទំនង​គ្នា​ក្តី ប៉ុន្តែ​អង្គការ​សង្គម​ស៊ីវិល​មួយ​ចំនួន លើក​ឡើង​ថា ការ​ថ្លែង​សុំ​ទោស​នេះ វា​អាច​ធ្វើ​ឲ្យ​ប៉ះពាល់​ដល់​ឯករាជ​ភាព និង​បង្ហាញ​ពី​កង្វះ​ការ​យក​ចិត្ត​ទុក​ដាក់​លើ​ការងារ​ក្នុង​ស្ថាប័ន​របស់​ខ្លួន។

នាយក​ប្រតិបត្តិ​នៃ​សម្ព័ន្ធ​គណនេយ្យ​ភាព​សង្គម​កម្ពុជា លោក សន ជ័យ មាន​ប្រសាសន៍​ថា អង្គភាព​ប្រឆាំង​អំពើ​ពុក​រលួយ ត្រូវ​បង្កើន​សមត្ថភាព​របស់​ខ្លួន​ឲ្យ​បាន​ខ្លាំងក្លា​ជាង​មុន ជាពិសេស​ជំនាញ​តាម​ដាន​ស៊ើប​អង្កេត​អំពើ​ពុក​រលួយ​នៅ​ក្នុង​សេវា​សាធារណៈ។ លោក​បន្ថែម​ថា ការ​ពង្រឹង​សមត្ថភាព​របស់​ខ្លួន​នេះ គឺ​ដើម្បី​ឲ្យ​របាយការណ៍​របស់​ខ្លួន​មាន​លក្ខណៈ​ហ្មត់ចត់ ច្បាស់លាស់ ជៀសវាង​ការ​ឆ្លើយ​សុំ​ទោស នៅ​ពេល​មាន​ប្រតិកម្ម​តប៖ «ប្រសិន​បើ​ជា​ថ្ងៃ​ក្រោយ​ទៅ ថ្លែង​ចោទ​ប្រកាន់​ថា អំពើ​ពុក​រលួយ​ធ្ងន់ធ្ងរ ហើយ​ប្រតិកម្ម​ត្រឡប់​ពី​ស្ថាប័ន​នោះ​វិញ អង្គភាព​ប្រឆាំង​អំពើ​ពុក​រលួយ គួរ​ធ្វើ​លិខិត​បំភ្លឺ​បង្ហាញ​អំពី​ការ​រក​ឃើញ​នៅ​ក្នុង​របាយការណ៍​របស់​ខ្លួន ដើម្បី​ការពារ​ទង្វើ​របស់​ខ្លួន ជាង​ការ​សុំ​ទោស»

ការ​លើក​ឡើង​នេះ នៅ​បន្ទាប់​ពី​ប្រធាន​អង្គភាព​ប្រឆាំង​អំពើ​ពុក​រលួយ លោក ឱម យ៉ិនទៀង បាន​ថ្លែង​សុំ​ទោស​ចំពោះ​មុខ​រដ្ឋមន្ត្រី​ក្រសួង​មហាផ្ទៃ លោក ស ខេង អគ្គស្នងការ​នគរបាល​ជាតិ និង​ស្នងការ​រាជធានី-ខេត្ត​ទាំងអស់ ចំពោះ​ពាក្យ​សម្ដី​របស់​លោក​កាល​ពី​ថ្ងៃ​ទី​៩ ខែ​ធ្នូ ដែល​ថា នឹង​ប្រើ​ច្រាស​ដែក​ដុស​ក្អែល​នគរបាល​អត្តសញ្ញាណប័ណ្ណ និង​នគរបាល​ចរាចរណ៍ ដែល​ប្រព្រឹត្ត​អំពើ​ពុក​រលួយ។

កាល​ណោះ លោក ឱម យ៉ិនទៀង ក៏​បញ្ជាក់​ដែរ​ថា ក្រសួង​មហាផ្ទៃ ត្រូវ​បាន​ពលរដ្ឋ​ប្ដឹង​ច្រើន​ជាង​គេ​ពី​ករណី​ពុក​រលួយ ហើយ​ចំណាត់​ថ្នាក់​លេខ​ពីរ​ធ្លាក់​លើ​ក្រសួង​អប់រំ ចំណែក​ស្ថាប័ន​តុលាការ ស្ថិត​ក្នុង​ចំណាត់​ថ្នាក់​លេខ​៣។

ការ​ថ្លែង​សុំ​ទោស និង​ទទួល​ស្គាល់​ពាក្យ​សម្ដី​របស់​ខ្លួន​ថា​មិន​ត្រឹមត្រូវ​នេះ ធ្វើ​ឡើង​ក្នុង​ពិធី​បើក​កិច្ច​ប្រជុំ​ផ្សព្វផ្សាយ​វិធានការ​ពង្រឹង​ការ​អនុវត្ត​ច្បាប់​ចរាចរណ៍​ផ្លូវ​គោក នា​ទីស្ដីការ​ក្រសួង​មហាផ្ទៃ នៅ​ព្រឹក​ថ្ងៃ​ទី​៣១ ខែ​ធ្នូ៖ «ខ្ញុំ​បាទ​សុំ​ធ្វើ​ការ​សុំ​ទោស​សម្ដេច​ក្រឡាហោម ស ខេង ចំពោះ​ការ​ប្រើ​ពាក្យ​សម្ដី​មិន​សមរម្យ​របស់​ខ្ញុំ​បាទ ដែល​ជា​ពាក្យ​សម្ដី​នាំ​ឲ្យ​មាន​ការ​ប៉ះពាល់​ដល់​ផ្លូវ​ចិត្ត។ ខ្ញុំ​បាទ​សង្ឃឹម​ជឿជាក់​លើ​ទឹក​ចិត្ត​របស់​សម្ដេច ដែល​មាន​ការ​សន្តោស និង​មាន​ការ​មេត្តា​ដល់​កំហុស​ខុស​ឆ្គង​នេះ​របស់​ខ្ញុំ​បាទ»

ទាក់ទិន​នឹង​ការ​លើក​ឡើង​របស់ លោក ឱម យ៉ិនទៀង កាល​នោះ ត្រូវ​បាន​ក្រសួង​មហាផ្ទៃ ចេញ​លិខិត​ប្រតិកម្ម​តប​វិញ​កាល​ពី​ថ្ងៃ​ទី​១០ ខែ​ធ្នូ ដោយ​ចាត់​ទុក​ថា អង្គភាព​ប្រឆាំង​អំពើ​ពុក​រលួយ មើល​រំលង​ការ​បំពេញ​ការងារ​របស់​ក្រសួង​នៅ​ពេល​កន្លង​មក។

លិខិត​ដដែល​បញ្ជាក់​ថា កន្លង​មក ក្រសួង​ក៏​បាន​ចាត់​វិធានការ​រដ្ឋបាល និង​ផ្លូវ​ច្បាប់​ចំពោះ​នគរបាល​ដែល​ប្រព្រឹត្ត​ទង្វើ​មិន​គប្បី ប្រាសចាក​ក្រម​សីលធម៌​មន្ត្រី​រដ្ឋបាល​សាធារណៈ និង​វិន័យ​កង​កម្លាំង​នគរបាល​ដែរ។

យ៉ាង​ណា​ក៏ដោយ​ចុះ នាយក​ប្រតិបត្តិ​អង្គការ​តម្លាភាព​កម្ពុជា លោក ព្រាប កុល មើល​ឃើញ​ថា បញ្ហា​អំពើ​ពុក​រលួយ​កើត​មាន​នៅ​គ្រប់​ស្ថាប័ន​រដ្ឋ ប៉ុន្តែ​ស្ថាប័ន​ផ្តល់​សេវា​សាធារណៈ គឺ​មាន​ទំហំ​នៃ​អំពើ​ពុក​រលួយ​ធំ​ជាង​គេ។

ទន្ទឹម​គ្នា នាយក​ប្រតិបត្តិ​នៃ​សម្ព័ន្ធ​គណនេយ្យ​ភាព​សង្គម​កម្ពុជា លោក សន ជ័យ ក៏​សង្ស័យ​ថា រាល់​គម្រោង​ហេដ្ឋារចនាសម្ព័ន្ធ​មួយ​ចំនួន​មាន​ជាប់​ពាក់ព័ន្ធ​បញ្ហា​ពុក​រលួយ ដោយសារ​គុណភាព​ផ្លូវ​ថ្នល់​អន់​ឆាប់​ខូច។ ចំណែក​ការ​គ្រប់គ្រង​ធនធាន​ធម្មជាតិ និង​អភិបាលកិច្ច​ល្អ ក៏​នៅ​តែ​មាន​បទល្មើស​កើត​ឡើង​ដដែល ដោយសារ​អំពើ​ពុក​រលួយ។

អង្គការ​សង្គម​ស៊ីវិល ក៏​ស្នើ​ឲ្យ​អង្គភាព​ប្រឆាំង​អំពើ​ពុក​រលួយ ចាប់​មន្ត្រី​ដែល​ប្រព្រឹត្ត​អំពើ​ពុក​រលួយ​មក​កាត់​ទោស​ឲ្យ​មាន​ប្រសិទ្ធភាព ព្រោះ​ថា អំពើ​ពុក​រលួយ គឺ​ជា​ឧបសគ្គ និង​ធ្វើ​ឲ្យ​បាត់បង់​ថវិកា​ជាតិ​រាប់​លាន​ដុល្លារ​ក្នុង​មួយ​ឆ្នាំៗ ដែល​ជះ​ឥទ្ធិពល​យ៉ាង​ធ្ងន់ធ្ងរ​ដល់​ការ​អភិវឌ្ឍ​សង្គម​សេដ្ឋកិច្ច ស្ថិរភាព​នយោបាយ និង​ការ​បែង​ចែក​ភោគផល​សេដ្ឋកិច្ច​ប្រកប​ដោយ​សមធម៌ និង​ស្មើ​ភាព ព្រម​ទាំង​ការ​វិវឌ្ឍ​នៃ​លទ្ធិប្រជាធិបតេយ្យ​នៅ​កម្ពុជា៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
Share

ហានិភ័យ

ពី តាកែវ

ថាហើយថា ចាប់បានតែកូនកំពិស កំភ្លាញ ចង្វា ដល់ប៉ះត្រីរ៉ស់ត្រីឆ្តោ បែបចង់គ្រុនញាក់។

Dec 31, 2015 02:16 PM

Bona

ពី MZWNGJE

Cannot do it, will not do it because they are intertwined meaning we will open a can of worms too if you dare prosecuting us. Simply put, the same as usual.

Dec 31, 2015 08:43 AM

គេហទំព័រ​ទាំងមូល