ពលរដ្ឋរិះគន់សមត្ថកិច្ចថាយឺតយ៉ាវក្នុងការពន្លត់អគ្គីភ័យឆេះផ្សារចាស់
2014.11.24
អគ្គីភ័យបានឆាបឆេះផ្សារចាស់នៅព្រឹកថ្ងៃទី២៤ វិច្ឆិកា បណ្ដាលឲ្យខូចខាតតូបប្រមាណជិត៥០ភាគរយ ក្នុងចំណោមតូបសរុបជាង៩រយតូប។ ពលរដ្ឋជាអាជីវករផ្សារម្នាក់ៗតក់ស្លុត ចំពោះហេតុការណ៍នេះ ដោយខាតបង់ទ្រព្យសម្បត្តិជាច្រើន និងបានរិះគន់សមត្ថកិច្ចចំពោះការយឺតយ៉ាវក្នុងការបញ្ជូនរថយន្តមកពន្លត់អគ្គីភ័យមិនទាន់ពេលវេលា។
ចំណែកសមត្ថកិច្ចដាក់បន្ទុកបញ្ហានេះទៅបញ្ហាស្ទះចរាចរណ៍តាមដងផ្លូវ និងកត្តាភូមិសាស្ត្រនៅកន្លែងកើតហេតុផ្ទាល់។
អាជីវករផ្សារចាស់នៅមិនទាន់កំណត់សំណើ ឬដាក់ពាក្យបណ្ដឹងតាមផ្លូវច្បាប់នៅឡើយដើម្បី រកអ្នកទទួលខុសត្រូវចំពោះការខាតបង់ ដែលម្ចាស់តូបខ្លះមានការខូចខាតទំនិញរហូតដល់រាប់ម៉ឺនដុល្លារ។
ម្ចាស់តូបខ្លះស្នើរថា បើរកអ្នកទទួលខុសត្រូវមិនឃើញទេ សូមកុំឲ្យអាជ្ញាធរបណ្ដេញមិនឲ្យពួកគាត់លក់នៅទីនេះថែមទៀត ដើម្បីកុំឲ្យពួកគាត់ជួបទុក្ខជាន់លើទុក្ខម្ដងទៀត។ សំឡេង
ទន្ទឹមគ្នានេះក្រុមអាជីវករផ្សារចាស់ ដែលមើលឃើញហេតុការណ៍ផ្ទាល់ភ្នែកបានឲ្យដឹងថា ដំបូងភ្លើងឆេះចេញពីតូបមួយនៅជ្រុងខាងកើតផ្សារលក់ថង់ប្លាស្ទិក និងម៉ុង ភួយ ដោយឆ្លងចរន្តអគ្គិសនី ឬទុស្សេខ្សែភ្លើងនៅម៉ោងប្រមាណ៧ព្រឹក។ ក្រុមអាជីវករបានទូរស័ព្ទទៅខាងឡានទឹកភ្លាមៗ តែប្រហែលជាមួយម៉ោងក្រោយទើបមានឡានទឹកមួយមកជួយពន្លត់។ សំឡេង
ឆ្លើយបញ្ហានេះនៅនឹងកន្លែងកើតហេតុផ្ទាល់ អភិបាលរងសាលារាជធានីភ្នំពេញ លោក ឃួង ស្រេង មានប្រសាសន៍ថា ឡានទឹកអត់ដេកនៅផ្សារចាស់នេះទេ គឺឡានទឹកនៅឆ្ងាយ តាមផ្លូវស្ទះចរាចរណ៍ និងស្ថានភាពលំបាកនៅតំបន់កើតហេតុនោះផ្ទាល់ ដែលធ្វើឲ្យមានការយឺតយូរបន្តិច និងខូចខាតច្រើន។ សំឡេង
នាយការិយាល័យបង្ការ និងពន្លត់អគ្គីភ័យនៃស្នងការដ្ឋាននគរបាលរាជធានីភ្នំពេញ លោក ព្រំ យ៉ន មានប្រសាសន៍ថា កម្លាំងលោកប្រើពេលជាង៣ម៉ោង ទើបអាចពន្លត់ភ្លើងបានជាស្ថាពរ។
លោកបានបញ្ជាក់ហេតុផល និងប៉ាន់ស្មានបឋមអំពីការខូចខាត គឺចាប់ពី៤០ទៅ ៥០ភាគរយនៃចំនួនតូបទាំងអស់ដែលមានជាង៩រយតូប។ សំឡេង
នៅរសៀលថ្ងៃដដែលនេះ អាជ្ញាធររាជធានីភ្នំពេញ បានប្រកាសថា តូបដែលត្រូវខូចខាតមានជាង៣រយរូបក្នុងចំណោម៩១៤តូប។ ចំណែកទំហំនៃការខាតបង់ទឹកប្រាក់ ឬសម្ភារៈ ទំនិញផ្សេងនោះ អាជ្ញាធរពុំទាន់បានបូកសរុបនៅឡើយ។ ទោះយ៉ាងណាអាជ្ញាធររាជធានីភ្នំពេញ បានបង្កើតក្រុមការងារមួយដើម្បីដោះស្រាយផលប៉ះពាល់ ក្នុងនោះ សិក្សាស្រាវជ្រាវផលប៉ះពាល់ នៃការខូចខាតបណ្ដាលមកពីអគ្គីភ័យ ស្រង់ស្ថិតិតូប និងអាជីវករដែលបានខូចខាត វាយតម្លៃការខូចខាតទ្រព្យសម្បត្តិអាជីវករ និងទ្រព្យសម្បត្តិសាធារណៈ បន្ទាប់មកដាក់ជូនគណៈអភិបាលរាជធានីភ្នំពេញពិនិត្យ និងដោះស្រាយ។
ក្រុមអាជីវកររងគ្រោះដោយអគ្គីភ័យបានឲ្យដឹងថា ពេលពួកគាត់ជញ្ជូនរបស់របររត់គេចចេញពីភ្លើងឆេះបានខ្លះ យកមកទុកខាងក្រៅផ្សារ ក៏ត្រូវក្រុមចោរនៅខាងក្រៅចាំលួចបន្តទៀត ដែលមិនមានសមត្ថកិច្ចណាអាចជួយដោះស្រាយបញ្ហានេះ បាននៅឡើយពេលមានភ្លើងឆេះផ្ទះម្តងៗ៕